Ku muyobozi. Ni izaburi ya bene Kora+. Masikili.
44 Ewe Mana, twarumvise n’amatwi yacu,
Ba sogokuruza bacu baratudondeye+
Igikorwa wakoze mu misi yabo+,
Mu misi ya kera+.
2 Wewe ubwawe warirukanye amahanga n’ukuboko kwawe+,
Uraheza ubateragira mu kibanza cayo+.
Wavunaguye imiryango y’amahanga, urayihinda+.
3 Kuko batigaruriye igihugu n’inkota yabo+,
Kandi ukuboko kwabo si kwo kwabazaniye ubukiriro+.
Kuko vyakozwe n’ikiganza cawe c’iburyo n’ukuboko kwawe+ be n’umuco wo mu maso hawe,
Kubera ko wahimbawe na bo+.
4 Ni wewe Mwami wanje, ewe Mana yanje+.
Tegeka habe ubukiriro buhambaye kuri Yakobo+.
5 Tubikesheje wewe, tuzosunika abarwanizi bacu+;
Mw’izina ryawe tuzohonyangira hasi abadukurira hasi+.
6 Kuko umuheto wanje atari wo nagumye nizigiye+,
Kandi inkota yanje si yo yankiza+.
7 Kuko wadukijije abarwanizi bacu+,
Abatwanka urunuka na bo ukabamaramaza+.
8 Tuzoshikanira Imana amashemezo burinde bwira+,
Kandi izina ryawe tuzorihaya gushika igihe kitagira urugero+. Sela.
9 Ariko ubu waradushibuye kandi uguma udutetereza+,
Kandi ntujana n’ingabo zacu+.
10 Uguma utuma dusubira inyuma imbere y’umurwanizi+,
Kandi abatwanka urunuka barisahuriye ibintu+.
11 Udutanga nk’intama, nk’ikintu co kurya+,
Kandi wadusanzaje mu mahanga+.
12 Ugurisha abantu bawe ku bitagira agaciro namba+,
Kandi nta butunzi wakuye ku kiguzi cabo.
13 Wadushiriyeho kuba iceyi ku babanyi bacu+,
Agatwengo be n’akamenyo ku badukikije+.
14 Watugize iciro ry’umugani mu mahanga+,
Abo kuzungiriza umutwe mu miryango y’amahanga+.
15 Uguteterwa kwanje kwama imbere yanje bukarinda bwira,
Kandi ibimaramare vyo mu maso hanje vyampfutse+,
16 Bivuye kw’ijwi ry’uwusigana iceyi kandi agatukana,
Kubera umwansi be n’uwihora+.
17 Ivyo vyose ni vyo vyatujeko, natwe ntitwakwibagiye+,
Kandi ntitwakoranye ikinyoma mw’isezerano ryawe+.
18 Umutima wacu ntiwahemutse ngo usubire inyuma+,
Eka n’amakanda yacu ntakevya ngo ate umunyuro wawe+.
19 Kuko watujanjaguriye ahantu h’imbwebwe+,
Ukadupfuka igitutu kizitanye+.
20 Nimba twaribagiye izina ry’Imana yacu,
Canke tugasanzira ibiganza vyacu imana y’ahandi+,
21 Mbega Imana ubwayo ivyo ntizobiserangura+?
Kuko izi amabanga y’umutima+.
22 Mugabo twiriwe turicwa duhorwa wewe;
Twabonywe nk’intama zo gukererwa+.
23 Vyuka! Kubera iki uguma usinziriye ga Yehova+?
Ikangure! Ntugume udushibura ibihe bidahera+.
24 Kubera iki uguma uhishije mu maso hawe?
Kubera iki wibagira amarushwa yacu n’agahahazo turimwo+?
25 Kuko umutima wacu wajondamye gushika ku mukungugu+;
Inda yacu yamatanye n’isi.
26 Haguruka udufashe+,
Uducungure ku bw’ubuntu bwuzuye urukundo bwawe+.