Imigani

16 Intondeko z’umutima ni iz’umuntu yakuwe mw’ivu+, mugabo inyishu y’ururimi iva kuri Yehova+.

2 Inzira z’umuntu zose ziratyoroye mu maso yiwe+, mugabo Yehova aragera imitima+.

3 Nuragize ibikorwa vyawe Yehova ubwiwe+, imigambi yawe izoheza ibe iyishimangiwe+.

4 Vyose Yehova yabikoze ku bw’intumbero yiwe+, egome, mbere n’umubisha ku bw’umusi mubi+.

5 Uwishima mu mutima wese ni ikintu giteye ishishi kuri Yehova+. Ukuboko kwokwiyunga ku kundi, yamara umuntu ntazobura guhanwa+.

6 Biciye ku buntu bwuzuye urukundo no ku kuri ikosa rirahongerwa+, kandi mu gutinya Yehova umuntu arakevya ngo ntagwe mu bibi+.

7 Iyo Yehova ahimbawe n’inzira z’umuntu+, atuma mbere n’abansi biwe bibera amahoro na we+.

8 Duke turimwo ubugororotsi+ turuta umurengera w’ibintu utarimwo ubutungane+.

9 Umutima w’umuntu yakuwe mw’ivu woshobora kwiyumvira inzira yiwe+, mugabo Yehova ni we ayobora intambuko ziwe+.

10 Ingingo ihumetswe ikwiye kuba ku minwa y’umwami+; mu rubanza akanwa kiwe ntigakwiye kuba akatizigirwa+.

11 Ikigeresho be n’umunzane bitabesha ni ivya Yehova+; amabuye y’ugupimisha yose yo mw’isaho ni igikorwa ciwe+.

12 Gukora ububisha ni ikintu giteye ishishi ku bami+, kuko biciye ku bugororotsi ari ho intebe y’ubwami ishimangirwa+.

13 Iminwa y’ubugororotsi irahimbara umwami ahambaye+; kandi akunda uwuvuga ibigororotse+.

14 Ubushangashirwe bw’umwami busobanura intumwa z’urupfu+, mugabo umuntu w’inkerebutsi arabuhindukiza+.

15 Mu muco wo mu maso h’umwami hari ubuzima+, kandi ubutoni bwiwe ni nk’igicu c’imvura y’impeshi+.

16 Kuronka ubukerebutsi, ewe kuntu biruta inzahabu+! Kandi kuronka ugutegera ni ivyo guhitamwo kuruta ifeza+.

17 Inzira y’ikirari y’abagororotse ni ugukevya ngo ntibagwe mu bibi+. Uwuzigama inzira yiwe aba agumije ubuzima bwiwe+.

18 Ubwishime buza imbere yo gusenyuka+, umutima wibona na wo imbere yo gutsitara+.

19 Kwiyorosha mu mutima kumwe n’abatekereza+, biruta kugabura isahu kumwe n’abinantaza+.

20 Uwerekana ko ari n’ugutahura kwimbitse mu kintu, azoronka ivyiza+, kandi hahiriwe uwizigira Yehova+.

21 Umuntu w’inkerebutsi mu mutima azokwitwa uwutegera+, kandi uw’iminwa isosa arongereza ubushobozi bwo gutuma umuntu anyurwa+.

22 Ugutahura kwimbitse ni iriba ry’ubuzima+ kuri benekwo; kandi indero y’ibipfu ni ubupfu+.

23 Umutima w’umuntu w’inkerebutsi utera akanwa kiwe kwerekana ugutahura kwimbitse+, kandi wongera ku minwa yiwe ubushobozi bwo gutuma umuntu anyurwa+.

24 Amajambo ahimbaye ni ikimamara c’ubuki+, asosera umutima kandi agakiza amagufa+.

25 Hari inzira iba igororotse imbere y’umuntu+, mugabo iherezo ryayo mu nyuma ari inzira z’urupfu+.

26 Icipfuzo c’umukozi akora agatama caramukoreye kiratama+, kubera ko akanwa kiwe kamuhase cane+.

27 Umuntu w’imburakimazi arimba ibibi+, kandi ku minwa yiwe ni nk’aho hari umuriro uturira+.

28 Umuntu w’imigambi y’uruyeri aguma yandurutsa amahane+, kandi umubesheranyi atandukanya abasanganywe+.

29 Umuntu w’ubukazi aryosharyosha mugenziwe+, kandi ntabura kumutera kuja mu nzira itari nziza+. 30 Akomaguza amaso ngo ategure imigambi y’uruyeri+. Afyondaniriza hamwe iminwa yiwe, akarangura koko umugambi wiwe w’uruyeri.

31 Imvi ku mutwe ni urugori rw’ubwiza+ iyo ruboneka mu nzira y’ubugororotsi+.

32 Uwuteba gushavura aruta umunyenkomezi+, kandi uwucungera umutima wiwe aruta uwufata igisagara+.

33 Ubupfindo butererwa mu gikondorero+, mugabo ingingo yose izanana kuri bwo iva kuri Yehova+.