Amosi
3 “Nimwumve iri jambo Yehova avuze ku biberekeye+, yemwe bene Isirayeli, ku vyerekeye umuryango wose naduganye ndawukuye mu gihugu ca Misiri+, ati: 2 ‘Ni mwebwe gusa namenye+ mu miryango yose yo ku butaka+. Ni co gituma nzogira ico ndababaza ku makosa yanyu yose+.
3 “‘Mbega babiri bojana batahuye kw’isango bahanye+? 4 Mbega intambwe yorohera mu kibira ata co yacakiye+? Mbega intambwe y’umukangara y’umugāra yokwumvikanishiriza ijwi ryayo mu bwikingo bwayo ata co yafashe namba? 5 Mbega inyoni yogwa mu mutego hasi ata mushibuka yatezwe+? Mbega umutego urashibuka uvuye mw’ivu ata co wafashe namba? 6 Iyo havugijwe inzamba mu gisagara, mbega abantu ntibaca bajugumira+? Iyo hashitse ivyago mu gisagara, mbega Yehova si we none aba akoze ikintu? 7 Kuko Umukama Segaba Yehova ata co azokora adahishuriye akabanga kiwe abasavyi biwe b’abahanuzi+. 8 Intambwe iraroshe+! Ni nde atotinya? Umukama Segaba Yehova ubwiwe aravuze! Ni nde atovuga ubuhanuzi+?’
9 “‘Nimuvyamamaze ku minara yo kubamwo i Ashidodi no ku minara yo kubamwo mu gihugu ca Misiri+, muti: “Nimukoranire imisozi ya Sama riya+, mubone imivurungano myinshi ihari be n’ubugunge buhibereye+. 10 Ntibazi gukora ibigororotse+,” ni ko Yehova avuze, “abarunda ubukazi+ n’ubunyazi mu minara yabo yo kubamwo.”’
11 “Ibi rero ni vyo Umukama Segaba Yehova avuze: ‘Hariho umurwanizi hirya no hino y’igihugu+; emwe, azomanura inkomezi zawe zikuveko, kandi iminara yawe yo kubamwo izosahurwa vy’ukuri+.’
12 “Ibi ni vyo Yehova avuze: ‘Nka kurya umwungere ashikura mu kanwa k’intambwe amaguru* abiri canke igipande c’ugutwi+, ni ko bene Isirayeli bazoshikurwa, abo biyicariye i Samariya ku buriri bwakaka+ no ku busaswa bw’i Damasiko+.’
13 “‘Nimwumve, mushinge intahe+ mu nzu ya Yakobo,’ ni ko Umukama Segaba Yehova avuze, ya Mana nyen’ingabo. 14 ‘Kuko, ku musi nzogira ico mbaza+ Isirayeli ku migararizo yiwe, nzogira n’ico mbaza ibicaniro vy’i Beteli+; kandi amahembe y’igicaniro ntazobura gucibwa, akagwa hasi+. 15 Nzosenyurira hasi inzu yo kubamwo mu rushana+ n’inzu yo kubamwo mu ci+.’
“‘Kandi amazu y’amasenge y’inzovu azokamangana+, eka n’amazu menshi azoyogera+,’ ni ko Yehova avuze.”