Yesaya
55 Yemwe abanyotewe mwese+! Nimuze ku mazi+. N’abatagira amahera! Nimuze, mugure murye+. Egome, nimuze, mugure umuvinyu+ n’amata+ mbere ata mahera canke ikiguzi+. 2 Kubera iki muguma mutanga amahera ku bitari ibifungurwa*, mugacumukurira ibidahaza+? Nimunyumvirize mwitonze, murye ibiryoshe+, muryoherwe cane n’ikinure+. 3 Nimutege ugutwi+, muze kuri jewe+. Nimwumvirize, mubandanye kubaho+, nanje, n’umutima ukunze, nzogirana namwe isezerano ryamaho igihe kitagira urugero+ ku bijanye n’ubuntu bwuzuye urukundo bwagiriwe Dawidi bwo kwizigirwa+. 4 Raba! Namutanze+ nk’icabona+ ku miryango y’amahanga+, nk’indongozi+ n’umutware+ ku miryango y’amahanga.
5 Raba! Uzohamagara ihanga utazi+, kandi abo mw’ihanga batakumenye bazokwirukira+, kubera Yehova Imana yawe+, no ku bwa wa Mweranda wa Isirayeli+, kuko azoba yagusharije+.
6 Nimurondere Yehova umwanya agishobora kuboneka+. Nimumuhamagare umwanya akiri hafi+. 7 Umubisha nahebe inzira yiwe+, n’umuntu agira nabi ahebe ivyiyumviro vyiwe+; nagaruke kuri Yehova, uwuzomugirira imbabazi+, ku Mana yacu, kuko izobabarira cane+.
8 “Kuko ivyiyumviro vyanyu atari vyo vyiyumviro vyanje+, canke ngo inzira zanje zibe ari zo nzira zanyu+,” ni ko Yehova avuze. 9 “Kuko, nk’uko amajuru ari hejuru cane y’isi+, ni ko n’inzira zanje ziri hejuru cane y’inzira zanyu+, n’ivyiyumviro vyanje bikaba hejuru cane y’ivyiyumviro vyanyu+. 10 Kuko nk’uko imvura y’isegenya imanuka ivuye mu majuru, be na shelegi*, maze ntisubireyo itajobetse isi vy’ukuri ngo itume yimbuka kandi ikamera+, n’imbuto zigahabwa vy’ukuri umubivyi, n’umukate ugahabwa uwurya+, 11 ni ko n’ijambo ryanje riva mu kanwa kanje rizomera+. Ntirizogaruka kuri jewe hatagize ikivamwo+, mugabo rizokora koko icampimbaye+, kandi ata kabuza rizororanirwa mu co naritumye+.
12 “Kuko muzosohokana umunezero+, mwinjizwe mu mahoro+. Imisozi n’imirambi bizogira akamwemwe imbere yanyu n’akamo k’umunezero+, kandi ibiti vy’ishamba vyose bizokoma amashi+. 13 Mu kibanza c’igisaka c’inzitane c’amahwa hazoduga igiti c’umuberoshi+. Mu kibanza c’igisuru kibaba hazoduga igiti c’umuhadasi+. Kuri Yehova bizoba ikintu ca rurangiranwa+, ikimenyetso co gushika igihe kitagira urugero+ kitazorandurwa.”