Yobu

28 “Ni ukuri, ifeza hariho ikibanza bazisangamwo

Hakabaho n’ikibanza c’inzahabu batyorora+;

 2 Icuma bagikura mu mukungugu+

Umujumpu na wo ugashongeshwa mw’ibuye.

 3 Yashize iherezo ku mwiza;

Ashika ku mpera zose aserangura arondera+

Ibuye mu muzimagiza no mu gitutu kizitanye.

 4 Yimvye urunogo kure y’aho abantu baba ari ba kavamahanga+,

Ahantu hibagiwe, kure y’ikirenge;

Bamwe mu bantu buntu, bamanutse bayumbayumba, baracundeba.

 5 Isi na yo, ni yo ibifungurwa bisokorokamwo+;

Ariko munsi yayo, isebagizwa nk’aho isebagijwe n’umuriro.

 6 Amabuye yayo ni yo kibanza ca safiro+,

Kandi itekeye umukungugu w’inzahabu.

 7 Uwo munyuro, nta nyoni ihiga+ yawumenye,

Eka n’ijisho ry’ikinyamwanira cirabura+ ntiryawubonye.

 8 Ibikoko bikakaye ntivyawuhonyanze;

Intambwe y’umukangara ntiyawuciyemwo.

 9 Yaramvuriye ukuboko kwiwe kw’ibuye ry’isare;

Yatembagaje imisozi ahereye mu mizi yayo;

10 Yimvye mu bitandara imiserege itwara amazi+,

Kandi ibintu vyose vy’agaciro ijisho ryiwe ryarabibonye.

11 Ahantu inzuzi zatemba ziva yarahagomeye+,

Ikintu gihishijwe akakizana ku muco.

12 Ariko ubukerebutsi ga yemwe, umuntu yobusanga hehe+?

Ahantu ugutegera kuba ni hehe?

13 Umuntu buntu ntiyamenye agaciro kabwo+,

Kandi ntibuboneka mu gihugu c’abazima.

14 Inyenga y’amazi yavuze iti:

‘Ntiburi muri jewe!’

Ikiyaga na co nyene giti: ‘Ntiburi iwanje+!’

15 Ntibwokabwa inzahabu itavanze+,

N’ifeza ntizopimwa ngo zibe ikiguzi cabwo.

16 Ntibworihwa inzahabu y’i Ofiri+,

Canke ibuye rya onigisi ry’imbonekarimwe na safiro.

17 Inzahabu n’ikiyo ntivyogereranywa na bwo,

Nta n’icombo c’inzahabu ityoroye bwokabwa.

18 Ibuye ry’agaciro ryitwa korali+ n’irya kirisitalo yoyo ntiyovugwa,

Ariko isaho yuzuye ubukerebutsi irusha agaciro iyuzuye imaragarita+.

19 Ibuye rya topazi+ ry’i Kushi ntiryogereranywa na bwo;

Mbere ntibworihwa inzahabu mu butyoroke bwayo.

20 Ariko ubukerebutsi ga yemwe, buturuka hehe+?

None ahantu ugutegera kuba ni hehe?

21 Bwanyegejwe amaso y’umuntu wese muzima+,

N’ibiremwa biguruka vyo mu kirere vyarabuhishijwe.

22 Agatikizo n’urupfu vyavuze biti:

‘Inkuru yabwo twayumvise ku matwi gusa.’

23 Imana ni yo yatahuye inzira yabwo+,

Kandi ubwayo ni yo yamenye ikibanza cabwo.

24 Kuko ubwayo iraba gushika ku mpera z’isi+;

Munsi y’amajuru uko yakabaye irahabona,

25 Kugira ishingire umuyaga+ uburemere,

Mu gihe amazi yayahaye urupimo ku rugero+;

26 Igihe yashingira imvura ingingo nyobozi+,

Igashingira inzira igicu c’ikirura gituragara,

27 Ni ho yabona ubukerebutsi, igatangura kuyaga ivyabwo;

Yarabuteguye yongera irabuserangura.

28 Ni ko kubwira umuntu iti:

‘Raba! Ugutinya Yehova, ubwo ni bwo bukerebutsi+,

Kandi guca kure ikibi ni kwo gutegera+.’”