Ezekiyeli
32 Nuko mu mwaka ugira 12, mu kwezi kugira 12, ku musi wa mbere w’ukwo kwezi, Yehova yongera kumbwira ati: 2 «Mwana w’umuntu, ririmba akaririmbo k’intimba ku bijanye na Farawo umwami wa Misiri, umubwire uti:
“Wari umeze nk’intambwe y’umukangara ikomeye* mu mahanga,
mugabo wanumijwe.
Wari nk’urukoko rwo mu mazi+, ukubitagura amazi yo mu nzuzi zawe,
utobanga amazi n’ibirenge vyawe wongera wonona inzuzi*.”
3 Umukama Segaba Yehova avuze ati:
“Nzogutererako urusenga rwanje nkoresheje isinzi ry’amahanga menshi,
kandi bazogukwegera mu rusenga rwanje rw’umukwabu.
4 Nzoguhebera i musozi
ndagushiburire mu gahinga.
Nzotuma inyoni zose zo mu kirere zikugwako,
ntume ibikoko vyo kw’isi yose bikurya bihage+.
7 “Kandi niwamara kuzima, nzopfuka ijuru ntume inyenyeri zo kw’ijuru zihinduka umwiza.
Izuba nzoripfukisha ibicu
kandi ukwezi ntikuzotanga umuco+.
8 Nzotuma ibintu vyose bitanga umuco vyo kw’ijuru bihinduka umwiza kubera wewe,
kandi igihugu cawe nzogipfukisha umwiza”, ni ko Umukama Segaba Yehova avuze.
9 “Nzotuma imitima y’amahanga menshi igira amaganya, abantu bawe bagizwe imbohe ninabajana mu yandi mahanga,
mu bihugu utamenye+.
10 Nzotuma amahanga menshi atekerwa n’ubwoba,
abami babo na bo bahinde agashitsi bajorewe kubera wewe, ninabangura inkota yanje barorera.
Ku musi w’ugutemba kwawe,
bazoguma bajugumira umwe wese atinyira ubuzima bwiwe.”
11 Kuko Umukama Segaba Yehova avuze ati:
“Inkota y’umwami wa Babiloni izokuzako+.
12 Nzotuma amasinzi yawe yicishwa inkota n’abarwanyi b’abahizi,
bose hamwe bakaba bakaze kuruta abo mu yandi mahanga+.
Bazoshira hasi ubwishime bwa Misiri, kandi amasinzi yiwe yose azozimanganywa+.
13 Nzotikiza ibitungwa vyiwe vyose biri iruhande y’amazi yiwe menshi+,
kandi nta kirenge c’umuntu canke ikinono c’igitungwa kizosubira kuyatobanga+.”
14 “Ico gihe nzotuma amazi yabo aba meza,
ntume inzuzi zabo zitemba nk’amavuta”, ni ko Umukama Segaba Yehova avuze.
15 “Misiri ninayigira umusaka, nkayigira igihugu catswe ivyari bicuzuyemwo vyose+,
ninasasika ababayo bose,
bazomenya vy’ukuri yuko ndi Yehova+.
16 Ako ni akaririmbo k’intimba, kandi abantu bazokaririmba ata kabuza.
Abakobwa bo mu mahanga bazokaririmba.
Bazokaririmbira Misiri n’amasinzi yayo yose”, ni ko Umukama Segaba Yehova avuze.»
17 Maze mu mwaka ugira 12, ku musi ugira 15 w’ukwezi, Yehova ambwira ati: 18 «Mwana w’umuntu, borogera amasinzi ya Misiri, umanukane Misiri mu gihugu c’epfo, we hamwe n’abakobwa bo mu mahanga akomeye, cokimwe n’abamanuka baja muri ca cobo*.
19 “Mbega hari uwo urusha ubwiza? Manuka riho, uryame hamwe n’abatagenyerewe!”
20 “Bazogwa* mu bicishijwe inkota+. Yatanzwe* ngo yicishwe inkota. Nimumuburutire hariya we n’amasinzi yiwe.
21 Abarwanyi b’intwari kuruta abandi bazovugana na we hamwe n’abamufasha, bavuganire epfo mu kuzimu. Bazomanuka ata kabuza, baryame cokimwe n’abatagenyerewe, bishwe n’inkota. 22 Ashuri n’ishengero ryiwe ryose ni yo bari. Imva zabo ziramukikuje. Bose bicishijwe inkota+. 23 Imva ziwe ziri epfo muri ca cobo*, kandi ishengero ryiwe rikikuje imva ziwe. Bose bicishijwe inkota, kuko bahoze batera ubwoba abantu mu gihugu c’abazima.
24 Elamu+ n’amasinzi yiwe yose akikuje imva yiwe ni yo bari, bose bakaba bicishijwe inkota. Bagiye mu gihugu c’epfo batagenyerewe, bamwe bahoze batera ubwoba abantu mu gihugu c’abazima. Ubu rero bazomaramara cokimwe n’abamanuka muri ca cobo*. 25 Bamuteguriye igitanda mu bishwe cokimwe n’amasinzi yiwe yose akikuje imva ziwe. Bose ntibagenyerewe kandi bicishijwe inkota, kubera ko bahoze batera ubwoba abantu mu gihugu c’abazima. Bazomaramara cokimwe n’abamanuka muri ca cobo*. Yashizwe hamwe n’abishwe.
26 Aho ni ho hari Mesheki na Tubali+ n’amasinzi yabo* yose. Imva zabo* ziramukikuje. Bose ntibagenyerewe kandi basogoswe inkota, kubera ko bahoze batera ubwoba abantu mu gihugu c’abazima. 27 None ntibazoryama hamwe n’abarwanyi b’intwari batagenyerewe kandi bishwe, bamwe bamanukanye mu kuzimu n’ibirwanisho vyabo vy’intambara? Inkota zabo zizoshirwa munsi y’imitwe yabo*, n’ibicumuro vyabo bishirwe ku magufa yabo, kubera ko abo barwanyi b’intwari bahoze batera ubwoba abantu mu gihugu c’abazima. 28 Nayo wewe, uzomenagurirwa mu batagenyerewe, kandi uzoryama hamwe n’abicishijwe inkota.
29 Edomu+ n’abami bayo n’abakuru bayo bose ni yo bari. Naho bari abanyenkomezi, baryamitswe hamwe n’abicishijwe inkota. Na bo nyene bazoryama hamwe n’abatagenyerewe+ hamwe n’abamanuka muri ca cobo*.
30 Abatware* bose bo mu buraruko ni yo bari, hamwe n’Abanyasidoni bose+, bamwe bamanukanye ibimaramare mu kuzimu bari kumwe n’abishwe, naho bahoze batera ubwoba abantu kubera ububasha bwabo. Bazoryama batagenyerewe, baryame hamwe n’abicishijwe inkota, kandi bazomaramara cokimwe n’abamanuka muri ca cobo*.
31 Abo bose Farawo azobabona, yumve ahojejwe kubera ivyashikiye amasinzi yiwe yose+. Farawo n’ingabo ziwe zose bazokwicishwa inkota”, ni ko Umukama Segaba Yehova avuze.
32 “Farawo n’amasinzi yiwe yose bazoryamikwa hamwe n’abatagenyerewe, hamwe n’abicishijwe inkota, kubera ko Farawo yahoze atera ubwoba abantu mu gihugu c’abazima”, ni ko Umukama Segaba Yehova avuze.»