Malaki

1 Ijambo ryamenyeshejwe:

Ng’iri ijambo Yehova+ yavuze ku vyerekeye Isirayeli biciye kuri Malaki:

2 “Narabakunze+,” ni ko Yehova avuze.

Namwe mwavuze muti: “Wadukunze gute+?”

“Mbega Esawu ntiyari mwene wabo na Yakobo+?”, ni ko Yehova avuze. “Ariko nakunze Yakobo+, 3 Esawu+ na we naramwanse; kandi amaherezo imisozi yiwe nayihinduye igiharabuga+, intoranwa yiwe ndayiha imbwebwe zo mu gahinga+.”

4 “Ko Edomu aguma avuga ngo: ‘Twarajanjaguwe, ariko tuzogaruka twubake ibibanza vyatikijwe,’ ibi ni vyo Yehova nyen’ingabo* avuze: ‘Bobo bazokwubaka, nanje nsambure+. Kandi ntibazobura kubita “akarere k’ububisha,” babite kandi “abantu Yehova yasutseko imisibo+ gushika igihe kitagira urugero*.” 5 Amaso yanyu azovyibonera, namwe ubwanyu muvuge muti: “Yehova ashimagizwe ku karere ka Isirayeli+.”’”

6 “‘Umwana aratera iteka se+, n’umusuku agatera iteka shebuja wiwe ahambaye+. None nimba ndi so+, iteka ryanje riri hehe+? Kandi nimba ndi Shobuja Ahambaye, ukuntinya+ kuri hehe?’ ni ko Yehova nyen’ingabo ababwiye, yemwe baherezi musuzugura izina ryanje+.

“‘Namwe mwavuze muti: “Izina ryawe twarisuzuguye gute?”’

7 “‘Mu gushikiriza ku gicaniro* canje umukate wanduye+.’

“‘Namwe muti: “Twakwanduje gute?”’

“‘Mu kuba muvuga ngo: “Imeza+ ya Yehova ni ikintu co gusuzugurwa+.” 8 Iyo mushikirije igitungwa gihumye ngo gitangweko ikimazi, muvuga ngo: “Nta kibi kirimwo.” Kandi iyo mushikirije igitungwa gicumbagira canke kirwaye, muvuga ngo: “Nta kibi kirimwo+.”’”

“Enda nuvyegereze buramatari wawe. Mbega yoguhimbarirwa, canke akakwakirana ubuntu?”, ni ko Yehova nyen’ingabo avuze.

9 “Enda rero nimutakambire+ Imana*, itugirire ubutoni+. Ivyo vyavuye mu kuboko kwanyu. Mbega hari n’umwe muri mwebwe izokwakirana ubuntu?”, ni ko Yehova nyen’ingabo avuze.

10 “Mbega hoho ni nde muri mwebwe yokwugara imiryango+? Kandi mwebwe ntimwocana umuriro ku gicaniro canje​—⁠ivyo ngo mubigire ata co muhawe+. Ntimumpimbara na gatoyi,” ni ko Yehova nyen’ingabo avuze, “n’ishikanwa ryo mu kuboko kwanyu ntirinezera na gatoyi+.”

11 “Kuko kuva iyo izuba rirasira gushika iyo rirengera*, izina ryanje rizoba irihambaye mu mahanga+, kandi ahantu hose bazohafumbishiriza umwotsi w’ibimazi+, bashikirize ishikanwa ku bw’izina ryanje, emwe, ituro ridahumanye+; kuko izina ryanje rizoba irihambaye mu mahanga+,” ni ko Yehova nyen’ingabo avuze.

12 “Ariko mwebwe murampumanya+ mu kuvuga ngo: ‘Imeza ya Yehova ni ikintu canduye, kandi icamwa cayo, ari vyo bifungurwa bishirwa kuri yo, ni ikintu co gusuzugurwa+.’ 13 Kandi mwavuze ngo: ‘Ewe muruho uraho+!’, kandi mwatumye bibonwa nk’akanuka,” ni ko Yehova nyen’ingabo avuze. “Mwazanye icatwawe ku nguvu, n’igicumbagira, n’ikirwaye+; egome, mwabizanye ngo bibe ituro. Mbega mubimpaye vyompimbara+?”, ni ko Yehova avuze.

14 “Aravumwe uwukorana urwenge kandi mu busho bwiwe hariyo igitungwa c’ikigabo, akagira indagano hanyuma agashikanira Yehova icononekaye+. Kuko ndi Umwami ahambaye+,” ni ko Yehova nyen’ingabo avuze, “kandi izina ryanje rizoba iriteye ubwoba mu mahanga+.”

2 “Ubu rero iri bwirizwa ni mwebwe rihawe, mwa baherezi+. 2 Nimutumviriza+, kandi nimutashira ku mutima+ ivyo guha ubuninahazwa izina ryanje+,” ni ko Yehova nyen’ingabo avuze, “nanje sinzobura kubarungikako umuvumo+, mvume imihezagiro yanyu+. Egome, mbere umuhezagiro narawuvumye, kuko mutabishira ku mutima.”

3 “Raba! Kubera mwebwe, ngira mpambarire imbuto yabibwe+, kandi mu maso hanyu nzohasanzaza amayezi, amayezi y’imisi mikuru yanyu; kandi vy’ukuri hazogira uwuyabajanako. 4 Kandi muzobwirizwa kumenya yuko nabarungikiye iri bwirizwa+, kugira ngo isezerano+ nagiranye na Lewi ribandanye+,” ni ko Yehova nyen’ingabo avuze.

5 “Isezerano ryanje ryari kumwe na we, isezerano ry’ubuzima n’amahoro+, kandi nagumye ndabimuha, biri kumwe n’ugutinya. Kandi yagumye antinya+; egome, yaracika ivutu kubera izina ryanje+. 6 Itegeko ry’ukuri ryari mu kanwa kiwe+, kandi nta bitagororotse vyaboneka ku minwa yiwe. Yagendanye nanje mu mahoro no mu kugororoka+, kandi yaragaruye benshi barava mw’ikosa+. 7 Kuko iminwa y’umuherezi ari yo ikwiye kugumya ubumenyi, itegeko rikaba ari ryo abantu bakwiye kuronderera mu kanwa kiwe+; kuko ari we ntumwa ya Yehova nyen’ingabo+.

8 “Ariko mwebwe, mwarakebeje muta inzira+. Mwatumye benshi batsitara mu bijanye n’itegeko+. Mwarononye isezerano rya Lewi+,” ni ko Yehova nyen’ingabo avuze. 9 “Emwe, nanje rero nzotuma muba abo gusuzugurwa, mube abo hasi, ku bantu bose+, nk’uko namwe mutagumije inzira zanje, mugabo mukagira nkunzi mu bijanye n’itegeko+.”

10 “Mbega twese ntidufise data umwe+? Mbega Imana yaturemye si imwe+? None ni kubera iki duhemukiranira+, mu guhumanya isezerano rya ba sogokuruza+? 11 Yuda yarahemutse, kandi muri Isirayeli be n’i Yeruzalemu hakozwe ikintu giteye ishishi+; kuko Yuda yahumanije ubweranda bwa Yehova+, ubwo iyo Mana yakunda, kandi yatwaye umukobwa w’imana y’inyamahanga ngo amubere umugeni+. 12 Yehova azorandura mu mahema ya Yakobo uwo wese abikora+, uwuri maso be n’uwishura, be n’uwushikiriza Yehova nyen’ingabo ishikanwa+.”

13 “Iki ni co kigira kabiri mukora, kandi ico bivamwo ng’iki: igicaniro ca Yehova kiradengerezwa amosozi, amarira be n’iminiho, ku buryo ata shikanwa ryongera kurabwa ryiza canke ngo hagire ikintu na kimwe kivuye mu kuboko kwanyu gishimwa+. 14 Namwe mwavuze muti: ‘Kubera iki+?’ Ni kubera iyi mvo: Yehova ubwiwe yarashinze intahe hagati yawe n’umugore wo mu buto bwawe+, uwo wahemukiye, naho ari we mugenzi wawe akaba n’umugore w’isezerano ryawe+. 15 Kandi hariho uwutabikoze, kuko yari afise impwemu yari isigaye. Kandi uwo yarondera iki? Uruvyaro rw’Imana+. Namwe mutegerezwa kwirinda ku bijanye n’agatima mufise*+, kandi ntihagire n’umwe ahemukira umugore wo mu buto bwiwe+. 16 Kuko yanse ukwahukana+,” ni ko Yehova ya Mana ya Isirayeli avuze, “akanka n’uwujuje impuzu yiwe ubukazi+,” ni ko Yehova nyen’ingabo avuze. “Mutegerezwa kwirinda ku bijanye n’agatima mufise, kandi mutegerezwa kudahemuka+.

17 “Mwaruhije Yehova n’amajambo yanyu+, hanyuma muvuga ngo: ‘Ni gute twamuruhije?’ Ni mu kuba muvuga ngo: ‘Umuntu wese akora ikibi ni mwiza mu maso ya Yehova, kandi mwene abo baramuhimbara+’; canke ngo: ‘Ya Mana y’ubutungane iri hehe+?’”

3 “Ehe ntumye intumwa yanje+, na yo izotunganya inzira imbere yanje+. Kandi bukwi na bukwi wa Mukama w’ukuri+ azoza ku rusengero rwiwe+, uwo mwebwe murondera, be na ya ntumwa+ y’isezerano+, iyo muhimbarirwa+. Ehe azoza koko,” ni ko Yehova nyen’ingabo avuze+.

2 “Ariko ni nde azoshobora kwihanganira umusi w’ukuza kwiwe+, kandi ni nde azoshobora guhagarara niyaseruka+? Kuko azoba ameze nk’umuriro w’umutyorozi+ be n’isabuni+ y’umumesuzi+. 3 Azokwicara ari nk’uwutyorora be n’uwusukura ifeza+, asukure bene Lewi+; kandi azobatosora nk’inzahabu+ n’ifeza, babere Yehova abashikiriza ishikanwa+ mu bugororotsi. 4 Kandi ishikanwa rya Yuda na Yeruzalemu rizoba irihimbara Yehova vy’ukuri+, nko mu misi yahise no mu myaka ya kera cane+.

5 “Kandi nzobegera ku bwo guca urubanza+, mbe icabona cihuta+ mu kwagiriza abapfumu+, n’abarenga ibigo+, n’abarahira ibinyoma+, n’abakorana ubugunge ku bijanye n’ingero y’umucangero+, ku bijanye n’umupfakazi+ no ku bijanye n’impfuvyi*+, be n’abigizayo kavamahanga+, kandi bakaba batantīnye+,” ni ko Yehova nyen’ingabo avuze.

6 “Kuko ndi Yehova; sinahindutse+. Namwe muri bene Yakobo; ntimwaherengeteye+. 7 Kuva mu misi ya ba sogokuruza banyu, mwarakebeje muva ku ngingo nyobozi zanje, ntimwazigumya+. Nimungarukeko, nanje nzobagarukako+,” ni ko Yehova nyen’ingabo avuze.

Namwe mwavuze muti: “Tugaruke gute?”

8 “Mbega umuntu yakuwe mw’ivu yokwambura Imana? Ariko mwebwe muranyambura.”

Namwe mwavuze muti: “Twakwambuye gute?”

“Ni mu bijanye n’ivy’icumi be n’intererano. 9 Uwo muvumo murawumvuma+, jewe mukanyambura, ivyo bigakorwa n’ihanga ryose uko ryakabaye. 10 Nimuzane ivy’icumi+ vyose mu kigega, kugira ngo mu nzu yanje habe ibifungurwa+; enda nimungeze muri ivyo+,” ni ko Yehova nyen’ingabo avuze, “murabe ko ntazobagomororera ingomero z’amajuru+, nkabacuncuburirako vy’ukuri umuhezagiro gushika aho hadasubira kubaho umukeno+.”

11 “Nzohambarira ikiryi ku bwanyu+, kandi ntikizobononera ivyamwa vy’ubutaka, eka n’umuzabibu wo mw’itongo ryanyu ntuzorumba+,” ni ko Yehova nyen’ingabo avuze.

12 “Amahanga yose azobwirizwa kubita abahirwe+, kuko muzocika igihugu c’agahimbare+,” ni ko Yehova nyen’ingabo avuze.

13 “Mwamvuzeko amajambo akomeye+,” ni ko Yehova avuze.

Namwe mwavuze muti: “Ni ibiki twakuvuzeko hagati yacu+?”

14 “Mwavuze ngo: ‘Gukorera Imana nta co bimaze+. Bitwungura iki kuba twaragumije ibwirizwa ryiwe, tukagenda tujonjogoye kubera Yehova nyen’ingabo+? 15 None ubu abita imbere ni bo twita abahirwe+. Vyongeye, abakora ivy’ububisha barubatswe+. Ikigeretseko, baragejeje Imana, ariko baguma bigīra amahoro+.’”

16 Maze abatinya Yehova+ baraganira, umwe wese na mugenziwe, Yehova na we aguma ateze ugutwi, yumviriza+. Nuko igitabu c’icibutso gitangura kwandikirwa imbere yiwe+ ku bw’abatinya Yehova no ku bw’abiyumvira izina ryiwe+.

17 “Kandi bazocika abanje koko+,” ni ko Yehova nyen’ingabo avuze, “umusi nzobagira inyegu idasanzwe+. Kandi nzobagirira impuhwe nk’uko umuntu agirira impuhwe umwana wiwe amukorera+. 18 Namwe ntimuzobura kwongera kubona ubudasa buri hagati y’umugororotsi n’umubisha+, hagati y’uwukorera Imana n’uwutayikoreye+.”

4 “Kuko ehe wa musi uriko uraza, umusi waka nk’itanure+, kandi abita imbere bose be n’abakora ivy’ububisha bose bazotegerezwa gucika nk’ibishakara+. Kandi uwo musi uriko uraza uzobarigata koko,” ni ko Yehova nyen’ingabo avuze, “ntihagire n’umuzi canke agashami ubasigariza+. 2 Kandi mwebwe abatinya izina ryanje izuba ry’ubugororotsi rizobarasira koko+, riri n’ugukiza mu mababa yaryo+; namwe muzosohoka vy’ukuri mwikina amatavu nk’inyana zadoheshejwe+.”

3 “Kandi muzohonyangira hasi ababisha, kuko bazocika nk’intumo munsi y’ubworo bw’ibirenge vyanyu ku musi nzogira ico nkoze+,” ni ko Yehova nyen’ingabo avuze.

4 “Nimwibuke rya tegeko rya Musa umusavyi wanje, iryo namutegekeye i Horebu ku vyerekeye Isirayeli yose, ni zo ngingo nyobozi n’ingingo z’ubutungane*+.

5 “Ehe ntumye kuri mwebwe Eliya umuhanuzi+ imbere y’ukuza kwa wa musi uhambaye kandi uteye ubwoba wa Yehova+. 6 Azogarukana umutima wa ba se ku bana, n’umutima w’abana kuri ba se; kugira ngo simpave nza ngakubita isi vy’ukuri nkayitikiza+.”

(Ivyanditswe vy’igiheburayo n’igiharameya uko vyahinduwe mu kirundi bigarukira aha, bigakurikirwa n’Ivyanditswe vy’ikigiriki vya gikirisu)