Ikete ryandikiwe Abaheburayo

1 Imana, iyavuganye kera mu bihe vyinshi+ no mu buryo bwinshi na ba sogokuruza bacu biciye ku bahanuzi+, 2 kw’iherezo ry’iyi misi+ yavuganye natwe biciye ku Mwana wayo+, uwo yagenye kuba samuragwa w’ibintu vyose+, kandi biciye kuri we ikaba ari ho yashizeho+ ibihe*. 3 Ni we gukayangana kw’ubuninahazwa+ bwayo n’ishusho nyayo y’akamere nyene kayo+, kandi ashigikiza ibintu vyose ijambo ry’ububasha bwiwe+; kandi amaze kudutyorora ibicumuro vyacu+, yicara iburyo+ bwa Nyenubukuru mu bibanza vyo hejuru+. 4 Yabaye rero uwuruta abamarayika+, kuko yatoranye izina+ ry’agahebuza kuruta iryabo.

5 Nk’akarorero, ni nde mu bamarayika yigeze kubwira iti: “Uri umwana wanje; jewe uno musi ncitse so+”? Kandi iti: “Jewe ubwanje nzomubera se, na we azombera umwana+”? 6 Mugabo niyongera kuzana Imfura+ yayo mw’isi, ivuga iti: “Kandi abamarayika b’Imana+ bose nibikubite imbere yiwe+.”

7 Vyongeye, ku bijanye n’abamarayika ivuga ngo: “Kandi abamarayika bayo ibagira impwemu, abakozi bayo bakorera abantu ikabagira urubeya rw’umuriro+.” 8 Mugabo ku bijanye n’Umwana wayo, ngo: “Imana ni yo ntebe yawe y’ubwami ibihe bitazoshira+, kandi agakoni k’ubutware k’ubwami+ bwawe ni agakoni k’ukugororoka+. 9 Wakunze ubugororotsi, wanka ubugarariji. Ni co gituma Imana, Imana yawe, yakurobanuje amavuta*+ y’umwigino kuruta bagenzawe+.” 10 Kandi ngo: “Mu ntango, ewe Mukama, washinze imishinge y’isi, kandi amajuru ni ibikorwa vy’amaboko yawe+. 11 Vyo bizoyogera, mugabo wewe wamaho ibihe vyose; vyose bizosaza nka kurya kw’impuzu yo hejuru+, 12 kandi uzobizinga nk’igikwemu+, nk’impuzu yo hejuru; kandi bizohindurwa, ariko wewe wama uri wa wundi, kandi imyaka yawe ntizokwigera ihera+.”

13 Mugabo ni nde mu bamarayika yigeze kuvugako ngo: “Icara iburyo bwanje, gushika ngize abansi bawe nk’intebe y’ibirenge vyawe+”? 14 Mbega bose si impwemu+ ku bw’igikorwa gikorerwa abantu+, zatumwe gukorera abagiye kuzotorana+ ubukiriro?

2 Ni co gituma ari nkenerwa ko twitwararika ivyo twumvise+ kuruta uko bisanzwe, kugira ntitwigere tugenda akayombekere+. 2 Kuko, nimba ijambo ryavuzwe biciye ku bamarayika+ ryabonetse ko ritanyiganyiga, kandi ukugabitanya kwose be n’ukugambarara kwose bikaba vyararonse agahembo gahuye n’ubutungane+, 3 tuzorusimba dute+ nimba twafashe minenegwe+ ubukiriro buhambaye gutyo+ mu buryo bw’uko bwatanguye kuvugwa biciye ku Mukama+ wacu kandi bukemezwa+ ku bwacu n’abamwumvise, 4 mu gihe Imana yagiyemwo igashinga intahe biciye ku bimenyetso n’ibitangaza be n’ibikorwa vy’ububasha+ bitari bimwe, no ku kugabanganywa+ kw’impwemu nyeranda nk’uko ukugomba kwayo kuri+?

5 Kuko abamarayika atari bo yahaye isi izoza ngo bayiganze+, ari yo turiko turavuga. 6 Mugabo hari icabona catanze ikimenyamenya ahantu hamwe, giti: “Umuntu ni iki ku buryo umwibuka+, canke umwana w’umuntu ku buryo umwitaho+? 7 Wamugize uwuri munsi gatoyi y’abamarayika; wamwambitse urugori rw’ubuninahazwa n’iteka+, wongera umushinga kugaba ibikorwa vy’amaboko yawe+. 8 Vyose wabishize munsi y’ibirenge vyiwe ngo abiganze+.” Kuko, kubera ko yamuhaye kuganza ibintu vyose+, Imana nta na kimwe yasize ngo ntakiganze+. Ariko ubu ibintu vyose ntiturabona biganzwa na we+; 9 mugabo tubona Yezu, uwagizwe uwuri munsi gatoyi y’abamarayika+, yambitswe urugori rw’ubuninahazwa+ n’iteka ku bwo kuba yarashikiwe n’urupfu+, kugira ngo biciye ku buntu ata wari abukwiriye bw’Imana, ahonjereze urupfu umuntu wese+.

10 Kuko vyari bibereye kuri wa wundi ibintu vyose biriho ku bwiwe+ kandi ibintu vyose bikaba biriho biciye kuri we, mu kuzana abana benshi ku buninahazwa+, yuko atunganya ya Mboneza+ y’ubukiriro bwabo biciye ku mibabaro+. 11 Kuko uwuriko areza n’abariko barezwa+ bose bava kuri umwe+, kandi ico ni co gituma adaterwa isoni no kubita “bene wabo+,” 12 igihe avuga ngo: “Nzomenyesha izina ryawe bene wacu; hagati mw’ishengero nzogushemeza n’ururirimbo+.” 13 Kandi ngo: “Nzomwizigira+.” Kandi ngo: “Raba! Jewe n’abana batoyi, abo Yehova yampaye+.”

14 Rero, kubera ko nya “bana batoyi” ari abasangiye amaraso n’umubiri, na we nyene yaronse kuri ivyo bintu nyene+, kugira ngo biciye ku rupfu rwiwe+ ahindure ubusa+ umwe afise uburyo bwo guteza urupfu+, ari we Shetani*+; 15 no kugira ngo aronse umwidegemvyo+ abo bose bari mu buja ubuzima bwabo bwose+ kubera ugutinya urupfu+. 16 Kuko vy’ukuri atariko afasha abamarayika na gato, ahubwo ariko afasha uruvyaro* rwa Aburahamu+. 17 Ku bw’ico rero yabwirijwe gucika nka “bene wabo” mu mice yose+, ngo acike umuherezi mukuru w’umunyembabazi n’umwizigirwa mu vyerekeye Imana+, kugira ngo atange ikimazi c’impongano+ ku bw’ibicumuro vy’abantu+. 18 Kuko, kubera ko we ubwiwe yababajwe igihe yariko aragezwa+, arashoboye gutabara abariko baragezwa+.

3 Nuko rero, bene wacu beranda basangiye uguhamagarirwa ijuru+, muzirikane ya ntumwa+ akaba n’umuherezi mukuru twemera icese+, ari we Yezu. 2 Yabaye umwizigirwa+ kuri Umwe yamugira gutyo, nk’uko na Musa+ yari umwizigirwa mu nzu yose y’Uwo+. 3 Kuko uwo wa kabiri abonwa ko abereye ubuninahazwa+ kuruta Musa, kubera yuko uwubaka+ inzu afise iteka kuruta nya nzu+. 4 Nkako, inzu yose yubakwa n’umuntu, mugabo uwubatse ibintu vyose ni Imana+. 5 Kandi Musa bwa musuku+, yari umwizigirwa mu nzu yose y’Uwo nk’intahe y’ibintu vyabwirizwa kuvugwa mu nyuma+, 6 mugabo Kristu bwa Mwana+, yabaye umwizigirwa ku nzu y’Uwo. Twebwe turi inzu y’Uwo+, nimba tugumya rwose umwidegemvyo wacu wo kuvuga be n’ukwirata kwacu ku bw’icizigiro cacu gushika kw’iherezo+.

7 Ku bw’ico, nk’uko impwemu nyeranda+ ivuga ngo: “Uno musi nimwumviriza ijwi ryayo+, 8 ntimukomantaze imitima yanyu nka ca gihe c’ugutera ishavu ry’umururazi+, nko kuri wa musi w’ukugerageza+ mu gahinga+, 9 aho ba sogokuruza banyu bangezesha ikigeragezo, kandi bari barabonye ibikorwa+ vyanje mu kiringo c’imyaka mirongo ine+. 10 Ni co catumye nsesemwa n’iri yaruka, nkavuga nti: ‘Bama bazimira mu mitima yabo+, kandi ntibamenye inzira zanje+.’ 11 Nararahiye rero mw’ishavu ryanje nti: ‘Ntibazokwinjira+ mu karuhuko kanje+.’”

12 Mwiyubare, bene wacu, kugira ngo ntihigere hatsimbatara mu muntu n’umwe muri mwebwe umutima mubi utizera mu kuva kuri ya Mana nzima+; 13 mugabo mugume muhimirizanya+ ku musi ku musi, hacitwa “Uno musi+,” kugira ngo ntihagire uwo muri mwebwe akomantazwa n’ububasha buhendana+ bw’igicumuro. 14 Kuko ducika vy’ukuri abasangiye Kristu+ nimba gusa tugumya rwose kwa kujijuka twari dufise mu ntango gushika kw’iherezo+, 15 mu gihe bikivugwa ngo: “Uno musi nimwumviriza ijwi ryayo+, ntimukomantaze imitima yanyu nka ca gihe c’ugutera ishavu ry’umururazi+.”

16 Kuko, ni bande bumvise yamara bagatera ishavu ry’umururazi+? Mbega nkako si abavuye mu Misiri bose barongōwe na Musa+? 17 Vyongeye, ni bande Imana yasesemwe na bo mu myaka mirongo ine+? Mbega si bamwe bacumura, imivyimba yabo ikagwa mu gahinga+? 18 Mugabo ni bande yarahiye+ yuko batokwinjiye mu karuhuko kayo atari bamwe bagambarara+? 19 Turabona rero ko batashoboye kwinjira kubera ukutizera+.

4 Ko rero hagisigaye umuhango wo kwinjira mu karuhuko kayo+, dutinye yuko igihe kanaka hogira uwo muri mwebwe asa n’uwananiwe kugashikira+. 2 Kuko na twebwe twamenyeshejwe inkuru nziza+, nk’uko na bo bayimenyeshejwe+; mugabo ijambo ryumviswe nta co ryabunguye+, kubera ko batari bunze ubumwe n’abumvise+ koko, biciye ku kwizera+. 3 Kuko twebwe abizeye twinjira koko muri nya karuhuko, nk’uko yavuze iti: “Nararahiye+ rero mw’ishavu ryanje nti: ‘Ntibazokwinjira+ mu karuhuko kanje+,’” naho ibikorwa vyayo vyarangijwe+ kuva kw’ishingwa ry’isi+. 4 Kuko ahantu hamwe yavuze ivy’umusi ugira indwi iti: “Hanyuma ku musi ugira indwi Imana iruhuka ibikorwa vyayo vyose+,” 5 no ng’aha ngo: “Ntibazokwinjira mu karuhuko kanje+.”

6 Ko rero hari abakirorereye kukinjiramwo, kandi abo inkuru nziza+ yamenyeshejwe ubwa mbere bakaba batakinjiyemwo kubera ukugambarara+, 7 yongera gushinga umusi kanaka mu kuvuga inyuma y’igihe kirekire gutyo muri zaburi ya Dawidi ngo: “Uno musi”; nk’uko vyavuzwe aho haruguru ngo: “Uno musi nimwumviriza ijwi ryayo+, ntimukomantaze imitima yanyu+.” 8 Kuko iyo Yosuwa+ abinjiza ahantu h’akaruhuko+, Imana ntiba yaravuze mu nyuma+ ivy’uwundi musi. 9 Haracasigaye rero akaruhuko k’isabato ku bantu b’Imana+. 10 Kuko umuntu yinjiye mu karuhuko+ k’Imana na we ubwiwe aba aruhutse ibikorwa vyiwe+ nk’uko Imana yaruhutse ivyayo.

11 Dukore uko dushoboye kwose rero ngo twinjire muri ako karuhuko, kugira ngo ntihagire uwugwa muri ico citegererezo nyene c’ukugambarara+. 12 Kuko ijambo+ ry’Imana ari rizima+ kandi rigira ububasha+ rikaba kandi rikarishe kuruta inkota iyo ari yo yose y’ubugi bubiri+ kandi rikinjira gushika no ku gutandukanya ubuzima+ n’impwemu+, ingingo n’umusokoro wazo, kandi rigashobora gutahura ivyiyumviro n’imigabo vy’umutima+. 13 Kandi nta kiremwa na kimwe kitibonekeza imbere yayo+, ahubwo vyose biri gusa kandi vyashizwe ku mugaragaro mu maso y’uwuri n’ico atubaza+.

14 Ko rero dufise umuherezi mukuru akomeye yarenganye mu majuru+, Yezu Umwana w’Imana+, tugume tumwatura icese+. 15 Kuko umuherezi mukuru dufise atari uwudashobora gusangira+ natwe umubabaro mu bugoyagoye bwacu, ahubwo ni uwagejejwe mu mice yose cokimwe natwe, mugabo ntiyagira igicumuro+. 16 Twegere+ rero intebe y’ubuntu ata wari abukwiriye dufise umwidegemvyo wo kuvuga+, kugira duhabwe imbabazi twongere turonke ubuntu ata wari abukwiriye kugira dutabarwe ku gihe nyaco+.

5 Kuko umuherezi mukuru wese akuwe mu bantu agenwa ku bw’abantu ku bintu vyerekeye Imana+, kugira ashikane amashikanwa n’ibimazi ku bw’ibicumuro+. 2 Arashoboye kugirira ibiri ku rugero abantu ata co bazi be n’abahuba kuko na we nyene akikujwe n’ubugoyagoye bwiwe bwite+, 3 kandi kubera bwo, abwirizwa gushikana amashikanwa ku bw’ibicumuro, ku bwiwe no ku bw’abantu+.

4 Vyongeye, umuntu ntaronka iryo teka ari we aryihaye+, ahubwo gusa arironka arihamagariwe n’Imana+, nk’uko vyabaye no kuri Aroni+. 5 Na Kristu rero ntiyininahaje+ mu gucika umuherezi mukuru+, ahubwo yaninahajwe+ n’umwe yavuga ku bijanye na we ngo: “Uri umwana wanje; jewe uno musi ncitse so+.” 6 Nk’uko avuga kandi ahandi hantu ngo: “Uri umuherezi ibihe vyose mu buryo bwa Melekisedeki+.”

7 Mu misi y’umubiri wiwe Kristu yashikaniye ugutakamba n’ugusaba+ Umwe yari ashoboye kumukiza urupfu, hariko n’amaborogo akomeye+ be n’amosozi, kandi yarumviwe ku bw’ugutinya Imana kwiwe+. 8 Naho yari Umwana wiwe, yarize kugamburuka biciye ku mibabaro yamushikiye+; 9 kandi aho amariye kugirwa uwutagira akanenge+, yacitse uwujejwe ubukiriro budahera+ ku bamugamburukira bose+, 10 kuko yiswe n’Imana bimwe bitomoye umuherezi mukuru mu buryo bwa Melekisedeki+.

11 Ku bimwerekeye turafise vyinshi vyo kuvuga kandi bigoye isigura, kuko mwacitse abakomantaye mu kuntu mwumva+. 12 Kukaba nkako, naho mwabwirizwa kuba muri abigisha+ turavye igihe kihaciye, mwongeye gukenera uwubigisha guhera ku ntango ibintu vy’intango+ vy’amajambo meranda y’Imana+; kandi mwacitse abakeneye amata, si ibifungurwa bigumye+. 13 Kuko umuntu wese afungura amata aba atazi ijambo ry’ubugororotsi, kuko aba ari uruyoya+. 14 Mugabo ibifungurwa bigumye ni ivy’abantu bahumuye, abo ububasha bwabo bwo gutegera+ bumenyerezwa gutandukanya iciza n’ikibi+, biciye ku gukoreshwa.

6 Ku bw’ico, ubu ko twarenganye inyigisho y’intango+ yerekeye Kristu+, dutere tuja imbere tugana ku buhumure+, tutongera gushinga umushinge+, ni ukuvuga ukwigaya ibikorwa bipfuye+, be n’ukwizera Imana+, 2 inyigisho y’ivy’amabatisimu+ be n’ivy’ukurambikwako ibiganza+, izuka ry’abapfuye+ be n’urubanza rw’ibihe bidahera+. 3 Kandi ivyo tuzobikora, nimba koko Imana ibishatse+.

4 Kuko ibi bidashoboka: ku bijanye n’abamurikiwe rimwe rizima+, bagahonja ya ngabirano ya gusa yo mw’ijuru+, bakaba abasangiye impwemu nyeranda+, 5 bagahonja rya jambo+ ryiza ry’Imana n’ububasha bw’igihe* kiriko kiraza+, 6 mugabo bakagwa+, ntibishoboka ko bongera kuvyurwa ngo bigaye+, kuko baba bongeye kwimanikira Umwana w’Imana no kumutetereza ku mugaragaro+. 7 Nk’akarorero, ubutaka bunyoye imvura ibugwako kenshi bugaheza bukazana ibimera bigirira akamaro barya nyene baburimirwa+, na bwo buraheza bukaronka umuhezagiro uva ku Mana. 8 Mugabo iyo bumeze amahwa n’ibitovu, burahebwa, kandi buba buri hafi kuvumwa+; kandi buruhira guturirwa+.

9 Ariko ku biberekeye ga bakundwa, naho tuvuze gutyo, turazi neza ko ivyanyu ari vyiza kuruta be n’uko mufise ibintu bijana ku bukiriro. 10 Kuko Imana atari iyitagororotse ngo yibagire igikorwa canyu n’urukundo mwerekanye ko mufitiye izina ryayo+, kuko mwakoreye aberanda+ kandi mukaba mubandanya kubakorera. 11 Mugabo dushaka ko umwe wese muri mwebwe yerekana ubwira nk’ubwo nyene kugira ngo mushire amazinda rwose+ ku vyerekeye ca cizigiro+ gushika kw’iherezo+, 12 kugira ntimube ibinebwe+, ahubwo mwigane+ abatorana ya mihango biciye ku kwizera n’ukwihangana+.

13 Kuko igihe Imana yaha umuhango wayo Aburahamu+, kubera ko itashobora kurahira uwundi muntu n’umwe ayiruta, yarirahiye+ yo ubwayo, 14 iti: “Emwe, ari ukuguhezagira nzoguhezagira, no kukugwiza nzokugwiza+.” 15 Kandi gutyo inyuma y’aho Aburahamu yerekaniye ukwihangana, yarakomorewe uwo muhango+. 16 Kuko abantu barahira uwubaruta+, kandi indahiro yabo ni yo irangiza impari zose, kuko ari icemeza cemewe kuri bo+. 17 Muri ubwo buryo, igihe Imana yishingira intumbero yo kurushirizaho kwereka ba samuragwa+ b’umuhango ingene inama yayo idahinduka+, yaserukanye indahiro, 18 kugira ngo biciye ku bintu bibiri bidahinduka muri vyo bikaba bidashoboka ko Imana ibesha+, twebwe abahungiye muri bwa buhungiro turonke indemesho ikomeye kugira ducakire ca cizigiro+ twashizwe imbere. 19 Ico cizigiro+ tugifise nk’inanga y’ubwato y’ubuzima, kikaba ari ntakekeranywa n’ikitanyiganyiga, kandi kirinjira imbere muri rya rido+, 20 aho integuza yinjiye ku bwacu+, ari we Yezu, uwabaye umuherezi mukuru mu buryo bwa Melekisedeki ibihe vyose+.

7 Kuko uyo Melekisedeki, umwami wa Salemu, umuherezi w’Imana Musumbavyose+, umwe yasanganira Aburahamu agarutse avuye gusasika abami akamuhezagira+, 2 ari na we Aburahamu yagabanirije ikigira cumi ku bintu vyose+, imbere ya vyose ni “Umwami w’Ubugororotsi” nk’uko bisobanurwa, akaba rero n’umwami wa Salemu+, ni ukuvuga, “Umwami w’Amahoro.” 3 Mu kuba atagira se, atagira nyina canke amamuko canke intango y’imisi+ canke iherezo ry’ubuzima, mugabo akaba yagizwe nk’Umwana w’Imana+, aguma ari umuherezi ibihe vyose+.

4 Nimurabe rero ingene uwo muntu yari ahambaye, uwo Aburahamu wa mukuru w’umuryango yahaye ikigira cumi mu binyagano nyavyonyavyo+. 5 Ego ni ko, ba bantu bo muri bene Lewi+ baronka ibanga ryabo ry’ubuherezi barafise ibwirizwa ryo kwegeranya ivy’icumi+ mu bantu+ nk’uko Itegeko riri, ni ukuvuga muri bene wabo, naho nyene bano bakomotse mu mafyinga ya Aburahamu+; 6 mugabo wa muntu amamuko+ yiwe adaturuka muri bo yarakiriye ivy’icumi ahawe na Aburahamu+ yongera ahezagira umwe yari yarahawe imihango+. 7 Ata mpari na nkeyi rero, umuto ahezagirwa n’umukuru+. 8 Kandi mu vya mbere abantu bapfa ni bo baronka ivy’icumi+, mugabo mu vya kabiri ni umuntu ashingirwa intahe yuko ariho+. 9 Kandi, nimba nokoresha iyi mvugo, biciye kuri Aburahamu, mbere na Lewi umwe aronka ivy’icumi, yaratanze ivy’icumi, 10 kuko yari akiri mu mafyinga+ ya sekuruza igihe Melekisedeki yamusanganira+.

11 Iyo rero ukutagira akanenge+ kuba vy’ukuri kuboneka biciye ku buherezi bw’Abalewi+ (kuko biciye kuri iyo ndinganizo ari ho abantu bahawe Itegeko+), vyokenerewe iki+ kandi ko hahaguruka uwundi muherezi mu buryo bwa Melekisedeki+, ntibivugwe ko ari mu buryo bwa Aroni? 12 Ko rero ubuherezi buriko burahindurwa+, bica biba ngombwa ko n’itegeko rihindurwa+. 13 Kuko umuntu avugwako ivyo bintu yabaye uwo mu wundi muryango+ ata n’umwe awukomokamwo yakoreye ku gicaniro*+. 14 Kuko vyibonekeza neza yuko Umukama wacu yamutse kuri Yuda+, umuryango Musa ata na kimwe yawuvuzeko ku vyerekeye abaherezi.

15 Kandi birarushiriza kwibonekeza cane yuko, mu buryo busa na Melekisedeki+, hahaguruka uwundi muherezi+ 16 yamubaye hatisunzwe itegeko ry’ibwirizwa rijanye n’umubiri+, ahubwo hisunzwe ububasha bw’ubuzima budashobora gusamburwa+, 17 kuko mu gushinga intahe bivugwa ngo: “Uri umuherezi ibihe vyose mu buryo bwa Melekisedeki+.”

18 Mu vy’ukuri rero, ibwirizwa rya mbere rirakurwaho kubera ubugoyagoye+ bwaryo no kubera ko ata co rishikako+. 19 Kuko Itegeko ata co ryatumye kiba ikitagira akanenge+, mugabo ukuzanwa kw’icizigiro kirushirije kuba ciza kwarabigize+, biciye kuri co tukaba turiko turegera Imana+. 20 Vyongeye, ku rugero rw’uko ivyo bitabaye ata ndahiro irahiwe, 21 (kuko vy’ukuri hariho abantu babaye abaherezi ata ndahiro irahiwe, mugabo hari umwe yamubaye habaye indahiro irahiwe n’Umwe yavuga ku bimwerekeye ati: “Yehova yararahiye+ (kandi ntazokwicuza), ati: ‘Uri umuherezi ibihe vyose+’”), 22 kuri urwo rugero nyene Yezu yacitse uwatanzweko ingwati y’isezerano ryiza kuruta+. 23 Ikigeretseko, benshi babwirijwe gucika abaherezi basubiriranira+ kubera babuzwa n’urupfu+ kubandanya iryo banga, 24 mugabo we kubera ko abandanya kubaho ibihe vyose+, arafise ubuherezi bwiwe butagira abasubirizi. 25 Kubera ico, arashoboye no gukiza rwose abariko baregera Imana biciye kuri we, kuko yama ari muzima kugira atakambe ku bwabo+.

26 Kuko umuherezi mukuru nk’uwo ari we yari atubereye+, uwuri intahemuka+, inziraburyarya+, uwudahumanye+, uwutandukanijwe n’abacumuzi+, kandi yacitse uwuri hejuru kuruta amajuru+. 27 Ntakeneye ku musi ku musi+, nka ba baherezi bakuru, gushikana ibimazi, ubwa mbere ku bw’ibicumuro vyiwe bwite+ hanyuma ku bw’ibicumuro vy’abantu+ (kuko ivyo yabigize rimwe rizima+ igihe yishikana+ ubwiwe); 28 kuko Itegeko rigena kuba abaherezi bakuru+ abantu bafise ubugoyagoye+, mugabo ijambo rya ya ndahiro irahiwe+ ryaje inyuma y’Itegeko rikagena Umwana, uwagizwe uwutagira akanenge+ ibihe vyose.

8 Ku vyo turiko turaganira rero, iciyumviro nyamukuru ng’iki: Dufise umuherezi mukuru+ mwene uyo, kandi yicaye iburyo bw’intebe y’ubwami ya Nyenubukuru mw’ijuru+, 2 umukozi akorera abantu w’ahantu heranda+ akaba n’uw’ihema nyakuri ryashinzwe na Yehova+, ritashinzwe n’umuntu+. 3 Kuko umuherezi mukuru wese agenwa ngo ashikane amashikanwa n’ibimazi+; ni co gituma vyari bikenewe ko uyo na we aronka ico ashikana+. 4 Iyo rero aba ari kw’isi, ntiyobaye umuherezi+, kuko hari abantu bashikana amashikanwa hisunzwe Itegeko, 5 mugabo nya bantu bakaba bakora igikorwa ceranda bwa kigereranyo+ n’igitutu+ c’ibintu vyo mw’ijuru; nk’uko Musa igihe yagira yubake ihema+ gushika rirangiye, yahawe itegeko ry’Imana+: Kuko ivuga iti: “Urabe neza ukore vyose wisunze icitegererezo cavyo weretswe ku musozi+.” 6 Mugabo ubu Yezu yaronse igikorwa gikorerwa abantu kirushirije kuba agahebuza, ku buryo ari we kandi muhuza+ w’isezerano rirushirije kuba ryiza ugereranije+, iryashinzwe mu buryo bwemewe ku mihango myiza kuruta+.

7 Kuko iyo rya sezerano rya mbere riza kuba ritagira amahinyu, ntihari kuronderwa ikibanza c’irigira kabiri+; 8 kuko itora amahinyu abantu igihe ivuga iti: “‘Ehe imisi iriko iraza,’ ni ko Yehova avuga, ‘kandi nzogirana isezerano rishasha+ n’inzu ya Isirayeli be n’inzu ya Yuda; 9 atari nka rya sezerano+ nagiranira na ba sekuruza babo ku musi nabafata ukuboko kugira ngo ndabasohore mu gihugu ca Misiri+, kubera ko batabandanije mw’isezerano ryanje+, ku buryo naretse kubababara,’ ni ko Yehova avuga+.”

10 “‘Kuko iri ari ryo sezerano nzosezerana n’inzu ya Isirayeli inyuma y’iyo misi,’ ni ko Yehova avuga. ‘Nzoshira amategeko yanje mu muzirikanyi wabo+, kandi nzoyandika mu mitima yabo. Kandi nzoba Imana yabo+, na bo bazoba abantu banje+.

11 “‘Kandi umwe wese muri bo ntazogenda yigishije umunyagihugu mugenziwe canke ngo umwe wese yigishe mwene wabo, ngo: “Menya Yehova+!” Kuko bose bazomenya+, guhera ku muto kugeza ku wuhambaye kuruta abandi bose muri bo. 12 Kuko nzoba umunyembabazi ku bikorwa vyabo bitagororotse, kandi sinzogenda nongeye kwibuka+ ibicumuro vyabo+.’”

13 Igihe ivuga ngo: “isezerano rishasha,” irya mbere iba irigize iryataye igihe+. Ikigizwe rero icataye igihe kandi kigasaza kiba kiri hafi kuvaho+.

9 Isezerano rya mbere rero ryoryo ryari rifise amategeko y’igikorwa ceranda+ be n’ahantu heranda haryo ho kw’isi+. 2 Kuko hari harubatswe igihimba ca mbere c’ihema+ carimwo igitereko c’amatara+ hamwe n’imeza+ be n’imikate yerekanwa+; kandi citwa “Aheranda+.” 3 Mugabo inyuma y’irido rigira kabiri+ hari igihimba c’ihema citwa “Aheranda Rwose*+.” 4 Ico cari gifise icotezo+ c’inzahabu be n’isandugu y’isezerano+ ikuyengejeko inzahabu hose+, ikabamwo ikarabo ry’inzahabu ririmwo manu*+ na ya nkoni ya Aroni yanaga+ be na vya bisate+ vy’isezerano; 5 mugabo hejuru yayo hari ba bakerubi*+ b’ubuninahazwa batwikiriza igitutu umurumyo w’impongano+. Mugabo ubu si co gihe co kuvuga ido n’ido ivy’ivyo bintu.

6 Ivyo bimaze kwubakwa gutyo, abaherezi barinjira mu gihimba ca mbere c’ihema+ ibihe vyose kugira ngo bakore ibikorwa vyeranda+; 7 mugabo mu gihimba kigira kabiri umuherezi mukuru ni we wenyene yinjirayo rimwe mu mwaka+, atibagiye amaraso+, ayo ashikana ku bwiwe+ no ku bw’ibicumuro abantu bakoze ku kutamenya+. 8 Gutyo impwemu nyeranda iratomora neza yuko inzira+ ija ahantu heranda itari bwerekanwe igihe rya hema rya mbere ryari rihagaze+. 9 Iryo hema nyene ni ikigereranyo+ ku bw’igihe cashinzwe ubu cashitse+, kandi hisunzwe ico kigereranyo amashikanwa n’ibimazi birashikanwa+. Ariko ivyo ntibishobora gutuma uwukora igikorwa ceranda aba uwutagira akanenge+ ku vyerekeye ijwi ryiwe ryo mu mutima+, 10 mugabo bijanye gusa n’ibifungurwa+ n’ibinyobwa+ be n’amabatisimu atari amwe+. Vyari ibisabwa n’amategeko bijanye n’umubiri+, kandi vyagizwe itegeko gushika ku gihe cashinzwe co kugorora ibintu+.

11 Ariko igihe Kristu yaza bwa muherezi mukuru+ w’ibintu vyiza bimaze kuba, biciye kw’ihema rinini kuruta kandi ritunganye kuruta ritakozwe n’amaboko, ni ukuvuga, ritari iryo muri ibi biremwa+, 12 yarinjiye, mugabo atinjiranye amaraso+ y’impene n’ay’ibimasa, ahubwo yinjiranye amaraso yiwe bwite+, rimwe rizima, ahantu heranda, hanyuma aronka ukurokorwa kwacu kw’ibihe bidahera+. 13 Kuko nimba amaraso y’impene+ n’ay’amashūri+ be n’iminyota+ y’ishashi imijagiwe abahumanijwe+ yeza gushika ku guhumanuka kw’umubiri+, 14 none amaraso+ ya Kristu, uwishikanye ku Mana atagira ikirabagu+ biciye ku mpwemu idahera+, ntazorushiriza guhumanura amajwi yacu yo mu mutima agakira ibikorwa bipfuye+ kugira dukorere ya Mana nzima igikorwa ceranda+?

15 Ni co gituma rero ari umuhuza+ w’isezerano rishasha, kugira ngo abahamagawe baronke wa muhango w’intoranwa idahera+, kubera ko habayeho urupfu kugira ngo biciye ku ncungu*+ babohorwe mu bigabitanyo bakoze mu gihe c’isezerano rya kera+. 16 Kuko ahari isezerano+, habwirizwa gutangwa urupfu rw’uwugize isezerano. 17 Kuko isezerano rigira ububasha habaye ugupfa, kuko ritigera rikora iyo uwugize isezerano ariho. 18 Ku bw’ico, n’isezerano rya kera+ ntiryatangujwe ata maraso+. 19 Kuko igihe Musa yari amaze kubwira abantu bose ibwirizwa rimwerimwe ryose nk’uko Itegeko riri+, yafashe amaraso y’ibimasa n’ay’impene n’amazi n’ubwoya bw’agahama na ezobu+ akamijagira igitabu ubwaco n’abantu bose, 20 avuga ati: “Aya ni amaraso y’isezerano Imana ibashizeko bwa tegeko+.” 21 Hanyuma ihema+ be n’ivyombo vyose vy’igikorwa gikorerwa abantu na vyo nyene abimijagira amaraso+. 22 Egome, hafi ibintu vyose birahumanuzwa amaraso+ nk’uko Itegeko riri, kandi hadasheshwe amaraso+ nta kubabarirwa kuhaba+.

23 Vyari nkenerwa rero yuko ibigereranyo+ vy’ibintu vyo mw’ijuru bihumanurwa hakoreshejwe ubwo buryo+, mugabo ibintu vyo mw’ijuru ubwavyo bigahumanuzwa ibimazi vyiza kuruta mwene ivyo bimazi. 24 Kuko Kristu atinjiye ahantu heranda hakozwe n’amaboko+, aho hakaba ari ikigereranyo c’ahantu nyaho+, ahubwo yinjiye mw’ijuru ubwaho+, kugira ngo ubu aduserukire imbere y’Imana+. 25 Eka mbere si kugira ngo aze arishikana kenshi, nk’uko vy’ukuri umuherezi mukuru yinjira ahantu heranda+ uko umwaka utashe+ afise amaraso atari ayiwe. 26 Ahandiho, yobwirijwe kubabara kenshi kuva kw’ishingwa+ ry’isi. Mugabo ubu yariyerekanye+ rimwe+ rizima ku nsozero y’ibihe+ kugira ngo akureho igicumuro biciye ku kimazi ciwe ubwiwe+. 27 Kandi nk’uko abantu babikiwe+ gupfa rimwe rizima, mugabo mu nyuma hakaba urubanza+, 28 ni ko na Kristu yashikanywe rimwe+ rizima kugira ngo yiremeke ibicumuro vya benshi+; kandi aho azobonekera+ irigira kabiri+ hazoba atari ku bw’igicumuro+, abonekere abamurindiranye igishika ku bw’ubukiriro bwabo+.

10 Kubera ko Itegeko rifise igitutu+ c’ibintu vyiza bizoza, mugabo atari umutumba nyene wa nya bintu, abantu ntibashobora kwigera batuma abegera Imana baba abatagira akanenge+ hakoreshejwe vya bimazi nyene bama bashikana ku mwaka ku mwaka. 2 Ahandiho, mbega ibimazi ntibiba vyararetse gushikanwa, kuko abakora igikorwa ceranda bari bahumanuwe rimwe rizima batosubiye kwiyumvamwo ibicumuro+? 3 Ahubwo riho, ivyo bimazi bituma haba ukwibukiriza ibicumuro uko umwaka utashe+, 4 kuko bidashoboka ko amaraso y’amashūri n’ay’impene akuraho ibicumuro+.

5 Ni co gituma igihe aza mw’isi avuga ati: “‘Ibimazi n’amashikanwa nta vyo washatse+, mugabo wanteguriye umubiri+. 6 Ntiwashimye amashikanwa aturiwe uko yakabaye be n’amashikanwa y’igicumuro+.’ 7 Maze ndavuga nti: ‘Ehe ndaje (mu muzingo w’igitabu biranditswe kuri jewe+) nje gukora ukugomba kwawe, ewe Mana+.’” 8 Amaze kubanza kuvuga ati: “Ntiwashatse canke ngo ushime ibimazi n’amashikanwa be n’amashikanwa aturiwe uko yakabaye be n’amashikanwa y’igicumuro+”—bikaba ari ibimazi bishikanwa hisunzwe Itegeko+— 9 maze avuga koko ati: “Ehe ndaje gukora ukugomba kwawe+.” Akuraho ivya mbere kugira ngo ashinge ivya kabiri+. 10 Biciye kuri ukwo “kugomba+” kuvuzwe, twarejejwe+ tubikesheje ugushikanwa+ kw’umubiri wa Yezu Kristu rimwe+ rizima.

11 Vyongeye, umuherezi wese araja mu kibanza ciwe+ ku musi ku musi+ ngo akore igikorwa gikorerwa abantu no kugira ngo ashikane kenshi vya bimazi nyene, kuko ivyo bitigera bishobora gukuraho ibicumuro rwose+. 12 Mugabo uwo muntu yashikanye ikimazi kimwe ku bw’ibicumuro ibihe vyose+ hanyuma yicara iburyo bw’Imana+, 13 kuva ubwo ararorera gushika abansi biwe bagizwe nk’intebe y’ibirenge vyiwe+. 14 Kuko kw’ishikanwa rimwe ry’ikimazi+ ari ho abezwa yabagize abatagira akanenge+ ibihe vyose. 15 Vyongeye, impwemu nyeranda+ na yo nyene iradushingira intahe, kuko mu nyuma yo kuvuga iti: 16 “‘Iri ni ryo sezerano nzosezerana kuri bo inyuma y’iyo misi,’ ni ko Yehova avuga. ‘Nzoshira amategeko yanje mu mitima yabo, kandi mu mizirikanyi yabo ni ho nzoyandika+,’” 17 irongera ikavuga iti: “Kandi sinzogenda nongeye kwibuka ibicumuro vyabo n’ibikorwa vyabo vy’ubugarariji+.” 18 Rero, aho ivyo bibabariwe+, ntihaba hakiri ishikanwa ry’igicumuro+.

19 Rero ga bene wacu, ko dufise ubutinyutsi bwo guca mu nzira yinjira+ ahantu heranda+ biciye ku maraso ya Yezu, 20 iyo yadutangurije ari inzira nshasha kandi nzima ica muri rya rido+, ari ryo mubiri wiwe+, 21 kandi ko dufise umuherezi akomeye ku nzu y’Imana+, 22 twegere dufise imitima nyakuri, dufise ugushira amazinda gukwiye kuvuye ku kwizera, imitima yacu imijagiwe igakurwamwo ijwi ribi+ n’imibiri yacu yuhagijwe amazi atyoroye+. 23 Tugumye kwa gushingira intahe icese icizigiro+ cacu tudahungabana+, kuko uwasezeranye ari umwizigirwa+. 24 Kandi twiyumvirane kugira tuvyuriranire+ ugukundana n’ibikorwa vyiza+, 25 tudaheba kwa gukoranira hamwe kwacu+, nk’uko bamwe babimenyereye, mugabo turemeshanya+, kandi birushirize kumera gutyo uko mubona wa musi wegereza+.

26 Kuko nimba tuza turacumura n’ibigirankana+ tumaze kuronka ubumenyi butagira amakosa bwerekeye ukuri+, nta kimazi c’ibicumuro kiba kigisigaye+, 27 ahubwo haba hasigaye ukwitegana ubwoba ata kabuza urubanza+ hakaba n’ishari ry’umuriro rigiye kuyigiza abarwanya Imana+. 28 Umuntu wese akengereye itegeko rya Musa arapfa ata mpuhwe, ku ntahe ya babiri canke batatu+. 29 None mwiyumvira ko kizoba gikaze ukungana iki igihano+ gikwiriye umuntu yahonyanze+ Umwana w’Imana kandi agafata ibisanzwe amaraso+ y’isezerano ubwiwe yezeshejwe, akongera agatuka ya mpwemu+ y’ubuntu ata wari abukwiriye n’akagaye n’akantu? 30 Kuko tuzi uwavuze ati: “Uguhōra ni ukwanje; ni jewe nzosubiriza umuntu mu ndumane+”; vyongeye ati: “Yehova azocira urubanza abantu biwe+.” 31 Birateye ubwoba gukorokera mu maboko ya ya Mana nzima+.

32 Ariko mugume mwibuka imisi ya kera, hamwe mwihanganira urugamba rukomeye mu mibabaro+ inyuma y’aho mumariye kumurikirwa+: 33 hari igihe mwashirwa ku kabarore nko mu kibanza c’ibirori+ mu bitutsi n’amakuba, hari n’igihe mwifatanya n’abariko barashikirwa na mwene ivyo bintu+. 34 Kuko mwerekanye ko mubabarana n’abari mw’ibohero kandi mukemera munezerewe gusahurwa+ ivyanyu, muzi yuko mwebwe ubwanyu mufise itunga ryiza kuruta kandi riramba+.

35 Ntimute rero umwidegemvyo wanyu wo kuvuga+, umwe ufise impembo nini+ uzohabwa. 36 Kuko mukeneye ukwihangana+, kugira ngo nimwamara gukora ukugomba kw’Imana+, muronke iranguka rya wa muhango+. 37 Kuko hasigaye “akanya gato cane+,” kandi “umwe ariko araza azoshika kandi ntazoteba+.” 38 “Mugabo umugororotsi wanje azobeshwaho n’ukwizera+,” kandi, “asubiye inyuma, umutima* wanje ntuhimbarwa na we+.” 39 Twebwe rero ntituri muri bamwe basubira inyuma ngo bahone+, ahubwo turi muri bamwe bafise ukwizera ngo bazigamirwe ubuzima+.

11 Ukwizera+ ni ukwitega ata mazinda ibintu vyizigiwe+, iyerekanwa riboneka ry’ibintu biriho koko naho bitabonwa+. 2 Kuko biciye kuri ukwo kwizera ari ho abantu bo mu bihe vya kera bashingiwe intahe+.

3 Kubera ukwizera turatahura yuko ibihe*+ vyashizwe mu rutonde n’ijambo ry’Imana+, ku buryo ibibonwa vyaje biva mu bitaboneka+.

4 Kubera ukwizera, Abeli yarashikaniye Imana ikimazi c’agaciro kanini kurusha Kayini+, biciye kuri ukwo kwizera ashingirwa intahe yuko yari umugororotsi, Imana ishingira intahe+ amashikanwa yiwe; kandi biciye kuri ukwo kwizera, naho yapfuye, aracavuga+.

5 Kubera ukwizera, Henoki+ yarimuwe kugira ngo ntabone urupfu, kandi nta hantu na hamwe yaboneka kubera ko Imana yari yamwimuye+; kuko imbere y’ukwimurwa kwiwe yashingiwe intahe yuko yari yahimbaye Imana rwose+. 6 Vyongeye, ata kwizera+ ntibishoboka kuyihimbara rwose+, kuko uwegera Imana ategerezwa kwemera yuko iriho+ be n’uko ihemba+ abayironderana ubwira+.

7 Kubera ukwizera, Nowa+ amaze kuburirwa n’Imana ku bintu bitari bwabonwe+, yarerekanye ugutinya Imana arubaka ubwato+ bwo gukiza urugo rwiwe; kandi biciye kuri ukwo kwizera yaratsindishije isi+, aba samuragwa w’ubugororotsi+ bujanye n’ukwizera.

8 Kubera ukwizera, Aburahamu+, igihe yahamagarwa, yaragamburutse aragenda, aja ahantu yabwirizwa kuronka bwa ntoranwa; kandi yaragiye, naho atari azi iyo yariko araja+. 9 Kubera ukwizera, yabayeho ari kavamahanga mu gihugu yahaweko umuhango nko mu gihugu co mu mahanga+, abana mu mahema+ na Izahaki+ na Yakobo+, abasangiye na we kuba ba samuragwa ba nya muhango nyene+. 10 Kuko yari arorereye ca gisagara+ gifise imishinge nyayo, umwubatsi n’umuhinguzi w’ico gisagara akaba ari Imana+.

11 Kubera ukwizera kandi, Sara+ ubwiwe yararonse ububasha bwo gusama inda y’uruvyaro, naho yari yararenganye imyaka yavyo+, kuko yabonye ko uwari yarasezeranye ari umwizigirwa+. 12 Ni co gituma kandi ku muntu umwe+, na we akaba yari nk’uwapfuye+, havutse abana mu bwinshi bangana nk’inyenyeri zo kw’ijuru, kandi nk’umusenyi wo ku nkengera y’ikiyaga, badaharurika+.

13 Abo bose bapfiriye mu kwizera+, naho bataronse iranguka rya nya mihango+, mugabo bayiboneye kure+ barayiha ikaze bongera baratura icese yuko bari ba kavantara n’ingenzi muri nya gihugu+. 14 Kuko abavuga mwene ivyo baba batanze ikimenyamenya c’uko bariko baronderana ubwira ahantu habo bwite+. 15 Yamara, iyo baba koko bagumye bibuka ahantu bari baravuye+, baba bararonse akaryo ko gusubirayo+. 16 Mugabo ubu bariko barondera gushikira ahantu heza kuruta, ni ukuvuga ahantu ho mw’ijuru+. Ni co gituma Imana idaterwa isoni na bo, ngo iterwe isoni no kwambazwa nk’Imana yabo+, kuko yabateguriye igisagara+.

17 Kubera ukwizera, Aburahamu igihe yagezwa+, yabaye nk’aho ashikanye Izahaki, umuntu yari yakiranye umunezero ya mihango agerageza gushikana umwana wiwe w’ikinege+, 18 naho yari yabwiwe ngo: “Ikizokwitwa ‘uruvyaro* rwawe’ kizoboneka biciye kuri Izahaki+.” 19 Mugabo yabonye yuko Imana yari ishoboye no kumuzura mu bapfuye+; kandi yaranamuronse koko avuyeyo, mu buryo bw’ikigereranyo+.

20 Kubera ukwizera kandi, Izahaki yarahezagiye Yakobo+ na Esawu+ ku bintu bizoza.

21 Kubera ukwizera, Yakobo, igihe yagira apfe+, yarahezagiye umwe wese mu bahungu ba Yozefu+ yongera arasenga yishimikije umutwe w’inkoni yiwe+.

22 Kubera ukwizera, Yozefu, igihe yari yegereje iherezo ryiwe, yaravuze ivy’ukuvayo+ kwa bene Isirayeli; kandi yaratanze itegeko ku vyerekeye amagufa yiwe+.

23 Kubera ukwizera, Musa yaranyegejwe n’abavyeyi biwe amezi atatu inyuma y’ivuka ryiwe+, kuko babonye ko nya mwana mutoyi yari mwiza+, ntibatinya itegeko+ ry’umwami. 24 Kubera ukwizera, Musa amaze gukura+, yaranse kwitwa umuhungu w’umukobwa wa Farawo+, 25 ahitamwo gufatanwa nabi n’abantu b’Imana aho kunezererwa igicumuro akanya gato, 26 kuko yabonye ko iceyi+ ca Kristu ari ubutunzi buruta amatunga yo mu Misiri; kuko yashinze ijisho itangwa ry’impembo+. 27 Kubera ukwizera yaravuye mu Misiri+, mugabo atari kubera ugutinya ishavu ry’umwami+, kuko yagumye ashikamye nk’aho abona Umwe ataboneka+. 28 Kubera ukwizera yarahimbaje pasika*+ na kwa kumija amaraso+, kugira ngo umuranduzi ntakore ku mfura zabo+.

29 Kubera ukwizera, baraciye mu kiyaga Gitukura nko kw’isi yumutse+, mugabo Abanyamisiri bahirahiye ngo bahace baca baramirwa+.

30 Kubera ukwizera, impome za Yeriko zaratemvye zimaze kuzungurukwa imisi indwi+. 31 Kubera ukwizera, Rahabu+ wa mumaraya, ntiyatikiranye n’abagambaraye, kuko yakiriye ba batasi mu buryo burangwa amahoro+.

32 Mvuge iki kandi? Kuko ata mwanya noronka hamwe nobandanya kuvuga ivya Gideyoni+, Baraki+, Samusoni+, Yefuta+, Dawidi+ hamwe na Samweli+ be na ba bahanuzi bandi+, 33 kubera ukwizera bakaba baranesheje ubwami mu ntambara+, barashitsa ubugororotsi+, barakomorerwa imihango+, baraziba iminwa y’intambwe+, 34 barahagarika inguvu z’umuriro+, barakira ubugi bw’inkota+, baragirwa abanyabubasha kandi bari goyigoyi+, baraba intwari mu ntambara+, barakinagiza ingabo z’abanyamahanga+. 35 Abagore bararonse abapfuye babo biciye kw’izuka+; mugabo abandi bantu barasinzikarijwe ubuzima kuko batemera kubohorwa biciye ku ncungu kanaka, kugira ngo bashikire izuka ryiza kuruta. 36 Egome, abandi bararonse ikigeragezo cabo mu gutwengwa no mu gushishagurwa, mbere n’ibiruta ivyo, mu mvuto+ n’amabohero+. 37 Baratewe amabuye+, barageragejwe+, barakekagujwe imisumeno, barapfuye+ bakerejwe inkota, barayerereye bari mu nsato z’intama+, mu nsato z’impene, bari mu bukene+, mu makuba+, bagirirwa nabi+; 38 kandi isi ntiyari ibabereye. Barayerereye mu bugaragwa no mu misozi no mu masenga+ no mu myobo y’isi.

39 Yamara abo bose, naho bashingiwe intahe bivuye ku kwizera kwabo, ntibaronse iranguka rya wa muhango+, 40 kuko Imana yatuboneye imbere y’igihe ikintu ciza kuruta+, kugira ngo ntibagirwe+ abatagira akanenge+ tutari kumwe+.

12 Nuko rero, ko dufise igipfungu kinini gutyo c’ivyabona+ kidukikije, twiyambure kandi uburemere bwose+ n’igicumuro kitwizingirako bitagoranye+, kandi twiruke twihanganye+ muri rya siganwa+ twashirwa imbere+, 2 dushinze ijisho ya Mboneza+ akaba na We atuma ukwizera kwacu kuba ukutagira akanenge+, ari we Yezu. Ku bw’akanyamuneza yashizwe imbere yarihanganiye+ igiti co kubabarizwako, asuzugura ibimaramare, kandi yicaye iburyo bw’intebe y’ubwami y’Imana+. 3 Egome, murimbure mwitonze umwe yihanganira mwene ayo majambo y’ibihari+ abacumuzi bavuga bigirira nabi, kugira ntimuruhe ngo mudendebukirwe mu mitima yanyu+.

4 Mu rugamba rwanyu rwo kurwanya ico gicumuro, ntimurigera munana gushika ku maraso+, 5 mugabo mwaribagiye buhere kwa guhimiriza kubabwira nk’abana+ ngo: “Mwananje, ntugaye ugutozwa indero kuva kuri Yehova, canke ngo udendebukirwe igihe ukosowe na we+; 6 kuko uwo Yehova akunda amutoza indero; nkako, ahushagura uwo wese yakira nk’umwana wiwe+.”

7 Muriko mwihangana ku bw’ugutozwa indero+. Imana iriko ibagirira nk’uko igirira abana+. Kuko, ni nde mwana se adatoza indero+? 8 Mugabo nimba mutaronka kwa gutozwa indero bose basangira, mu vy’ukuri muri ibivyarwa+, ntimuri abana. 9 Ikigeretseko, twari dufise ba data dusangiye umubiri bo kudutoza indero+, kandi twarabubaha. None ntituzorushiriza kuyobokera Data w’ubuzima bwacu bw’impwemu tukabaho+? 10 Kuko bo badutoza indero imisi mikeyi bisunze ivyaboneka ko ari vyiza kuri bo+, mugabo we abigira ku nyungu yacu kugira ngo dusangire ku bweranda bwiwe+. 11 Ego ni ko, nta gutozwa indero kuboneka uwo mwanya ko guteye umunezero, ahubwo kuboneka nk’uguteye intuntu+; yamara mu nyuma, ku bamenyerejwe na kwo, kwama icamwa c’amahoro+, ari co bugororotsi+.

12 Ku bw’ico, mugorore amaboko aregarega+ n’amavi agoyagoya+, 13 kandi mubandanye gutunganiriza ibirenge vyanyu inzira zigororotse+, kugira ngo igicumbagira ntigitane, ahubwo gikire+. 14 Mukurikirane ukugiranira amahoro n’abantu bose+, na kwa kwezwa+ ata wuzoshobora kubona Umukama atagufise+, 15 murabe neza ngo ntihagire n’umwe yimwa bwa buntu ata wari abukwiriye bw’Imana+; ngo ntihagire umuzi w’ubumara+ umera ugatera ingorane no kugira ngo benshi ntibahumanywe na wo+; 16 ngo ntihabe umusambanyi canke umuntu adaha agaciro ibintu vyeranda nka Esawu+, umwe yaheba uburenganzira bwiwe bw’imfura abukavye isahani imwe y’imfungurwa+. 17 Kuko muzi yuko no mu nyuma yankiwe+ igihe yashaka gutorana umuhezagiro+, kuko naho yaronderanye ubwira ko iciyumviro cohinduka ashizeko n’amosozi+, ata kibanza yabironkeye+.

18 Kuko ico mwegereye atari igishobora gukorakorwa+ kandi catongojwe umuriro+, be n’igicu cijimye n’umwiza w’umuzitanya n’igihuhusi+, 19 n’ugusamirana kw’urumbete+ n’ijwi ry’amajambo+; aho abantu bumviye iryo jwi bakaba baratakamvye ngo ntihagire irindi jambo bongerwa+. 20 Kuko iri tegeko batashobora kuryihanganira: “Kandi hagize igitungwa gikora ku musozi, gitegerezwa guterwa amabuye+.” 21 Vyongeye, ivyerekanywe vyari biteye ubwoba rwose ku buryo Musa yavuze ati: “Ndatekewe n’ubwoba kandi ndajugumira+.” 22 Mugabo mwegereye Umusozi Siyoni+ n’igisagara+ c’Imana nzima, Yeruzalemu yo mw’ijuru+, be n’ibihumbi mirongo vy’abamarayika+, 23 mw’ikoraniro rya bose+, be n’ishengero ry’imfura+ zanditswe+ mw’ijuru, n’Imana yo Mucamanza wa bose+, n’ubuzima bw’impwemu+ bw’abagororotsi bagizwe abatagira akanenge+, 24 na Yezu umuhuza+ w’isezerano rishasha+, n’amaraso y’ukumijagira+ avuga mu buryo bwiza kuruta aya Abeli+.

25 Murabe ntimwanke kwumviriza uwuriko aravuga+. Kuko nimba batarusimvye, bamwe banse kwumviriza umwe yavugira kw’isi imburi iva ku Mana+, hari akantu twebwe nitwaha umugongo umwe avugira mw’ijuru+. 26 Ico gihe ijwi ryiwe ryaranyiganyije isi+, mugabo ubu yarasezeranye, ati: “Rindi rimwe, sinzocekangura isi gusa, mugabo nzocekangura n’ijuru+.” 27 Iyo mvugo rero ngo: “Rindi rimwe,” yerekana ikurwaho ry’ibintu binyiganyizwa, ni ukuvuga ibintu vyakozwe+, kugira ngo ibitanyiganyizwa bigumeho+. 28 Ku bw’ivyo, ko tubwirizwa kuronka ubwami budashobora kunyiganyizwa+, tubandanye kugira ubuntu ata wari abukwiriye, ubudushoboza gukorera Imana igikorwa ceranda mu buryo bwemerwa, dufise ugutinya Imana n’akoba+. 29 Kuko Imana yacu ari kandi umuriro uyigiza+.

13 Urukundo rwanyu rwa kivukanyi nirubandanye+. 2 Ntimwibagire ubwakiranyi+, kuko bwatumye bamwe baha indaro abamarayika batabizi+. 3 Mugume mwibuka abari mu mvuto+ nk’aho mubohanywe na bo+, be n’abariko bagirirwa nabi+, kuko namwe ubwanyu mukiri mu mubiri. 4 Umubano w’ababiranye nube uwuteye iteka muri bose, kandi uburiri bw’ababiranye bwoye guhumana+, kuko Imana izocira urubanza abasambanyi n’abarenga ibigo+. 5 Uburyo bwanyu bwo kubaho ntibubemwo urukundo rw’amahera+, mu gihe mubumbwa+ n’ibintu vy’iki gihe+. Kuko yavuze iti: “Sinzogenda ngutaye, eka sinzogenda nguhevye+.” 6 Ku buryo dushobora kugira umutima rugabo+ tukavuga duti: “Yehova ni umutabazi wanje; sinzotinya. Umuntu yongira iki+?”

7 Mwibuke ababaja imbere+, abababwiye ijambo ry’Imana, kandi uko mwitegereza ico ingeso zabo zivamwo, mwigane+ ukwizera kwabo+.

8 Yezu Kristu ni wa wundi ejo, n’uno musi, be n’ibihe vyose+.

9 Ntimutwarwe n’inyigisho zitari zimwe kandi z’ivyaduka+; kuko ari vyiza ko umutima uhabwa ugushikama biciye ku buntu ata wari abukwiriye+, bidaciye ku biribwa+, bimwe ata co vyunguye abavyishinga.

10 Turi n’igicaniro abakora igikorwa ceranda kw’ihema badafise uburenganzira bwo kurya ibiri kuri co+. 11 Kuko imivyimba y’ivyo bitungwa amaraso yavyo yinjizwa ahantu heranda n’umuherezi mukuru ku bw’igicumuro, ituririrwa inyuma y’ikambi+. 12 Ni co gituma na Yezu, kugira ngo yezeshe+ abantu amaraso+ yiwe bwite, yababarijwe inyuma y’irembo+. 13 Tuje kuri we rero inyuma y’ikambi, twikoreye iceyi yikoreye+, 14 kuko tudafise ng’aha igisagara kibandanya+, mugabo turiko turonderana ubwira kimwe kizoza+. 15 Biciye kuri we, twame dushikanira Imana ikimazi c’ishemezo+, ni co camwa c’iminwa+ ishingira intahe icese izina ryayo+. 16 Vyongeye, ntimwibagire gukora iciza+ be no gusangira ibintu n’abandi, kuko mwene ivyo bimazi ari vyo bihimbara Imana rwose+.

17 Mugamburukire ababaja imbere+ kandi muyoboke+, kuko baguma barinze ubuzima bwanyu nk’abazobibazwa+; kugira ngo babikorane akanyamuneza, bataniha, kuko vyogirira nabi mwebwe+.

18 Mubandanye kudusengera+, kuko tuzi neza yuko turi n’ijwi ryo mu mutima rigororotse, kuko dushaka kwigenza mu buryo bugororotse muri vyose+. 19 Mugabo ndabahimiriza cane kubigira, kugira ngaruke iwanyu vuba hashoboka+.

20 Ya Mana y’amahoro+ rero, imwe yakura mu bapfuye+ wa mwungere+ mukuru w’intama+ ikoresheje amaraso y’isezerano ry’ibihe bidahera+, Umukama wacu Yezu, 21 ibaronse ikintu ciza cose kugira ngo mukore ukugomba kwayo, biciye muri Yezu Kristu ikorere muri twebwe ibihimbaye rwose imbere yayo+; ubuninahazwa bube ubwayo ibihe bitazoshira+. Amen.

22 Ndabahimiriza rero, bene wacu, kwihanganira iryo jambo ry’indemesho, kuko vy’ukuri ndabandikiye ikete mu majambo makeyi+. 23 Mumenye yuko mwene wacu Timoteyo+ yarekuwe, kandi niyaza vuba cane nzoza kubaraba ndi kumwe na we.

24 Mundamukirize ababaja imbere+ bose n’aberanda bose. Abo mu Butaliyano+ barabaramutsa.

25 Ubuntu ata wari abukwiriye+ bubane namwe mwese.