Ikete rya Yakobo

1 Jewe Yakobo+, umushumba+ w’Imana n’uw’Umukama Yezu Kristu, ndandikiye mwebwe miryango cumi n’ibiri+ yasabagiye+:

Ndabaramukije!

2 Mubibone nk’akanyamuneza gusa, bene wacu, igihe muhuye n’ibigeragezo bitari bimwe+, 3 muzi yuko ako gaciro kagejejwe k’ukwizera kwanyu kazana ukwihangana+. 4 Mugabo ukwihangana nikunonosore igikorwa cakwo, kugira mube abanonosoye+ kandi mutagira agahonzi muri vyose, mudahajije mu kintu na kimwe+.

5 Nimba rero hari uwo muri mwebwe ahajije mu bukerebutsi+, nagume abusaba Imana+, kuko itanga cane kuri bose ata gutera imirarwe+; kandi azobuhabwa+. 6 Mugabo nagume asaba+ yizeye, adakekeranya na gatoyi+, kuko uwukekeranya ameze nk’umupfunda w’ikiyaga ukubebwa n’umuyaga+ kandi ukazungazungishwa irya n’ino. 7 Nkako, uyo muntu ntiyibwire ko hari ico azohabwa na Yehova+; 8 ni umuntu adafata ingingo+, adashikamye+ mu nzira ziwe zose.

9 Mugabo umuvukanyi yiyorosha niyiratire ugushirwa hejuru kwiwe+, 10 n’umutunzi+ yiratire uguteterezwa kwiwe, kubera azohita nk’ishurwe ryo mu vyatsi+. 11 Kuko izuba riseruka n’ubushuhe bwaryo buturira hanyuma rikumisha nya vyatsi, maze ishurwe ryavyo rigahunguruka, ubwiza bwavyo bw’inyuma na bwo bugahera. N’umutunzi nyene azokabirana mu nzira ziwe z’ubuzima+.

12 Hahiriwe umuntu aguma yihanganiye ikigeragezo+, kuko niyashimwa azoronka rwa rugori rw’ubuzima+ Yehova yasezeranira ababandanya kumukunda+. 13 Iyo umuntu ari mu kigeragezo+, ntavuge ngo: “Ndiko ngeragezwa n’Imana.” Kuko Imana idashobora kugeragezwa n’ibintu bibi, eka na yo ubwayo nta we ibigerageresha. 14 Mugabo umwe wese arageragezwa iyo akwezwe kandi akaryosharyoshwa n’icipfuzo ciwe bwite+. 15 Maze nya cipfuzo iyo gitwaye inda, kivyara igicumuro+; igicumuro na co iyo kiranguwe, kivyara urupfu+.

16 Ntimuzimizwe+, bene wacu bakundwa. 17 Ingabirano nziza yose+ be n’impano yose itagira akanenge iva hejuru+, kuko imanuka iva kuri Se w’imico yo mw’ijuru+, kandi kuri we ntihaba uguhinduka kw’izunguruka ry’igitutu+. 18 Kubera ko yabigomvye+, yaratuvyarishije ijambo ry’ukuri+, kugira ngo tube umushuzo+ kanaka w’ibiremwa vyiwe.

19 Mumenye ibi, bene wacu bakundwa. Umuntu wese atebuke kwumva, atebe kuvuga+, atebe kuraka+; 20 kuko uburake bw’umuntu budashitsa ubugororotsi bw’Imana+. 21 Ku bw’ivyo, mwiyambure umucafu wose be na ca kintu kidakenewe, ari co bubi+, hanyuma mwemerane ubwitonzi uguterwa kwa rya jambo+ rishobora gukiza ubuzima bwanyu+.

22 Ariko mube abashira mu ngiro rya jambo+, atari abumva gusa, mwibesha n’ivyiyumviro bitari vyo+. 23 Kuko nimba umuntu ari uwumva rya jambo, ntabe uwushira mu ngiro+, uwo ameze nk’umuntu araba mu cirore mu maso hiwe yavukanye. 24 Kuko yiraba agaca yigira, buno nyene agaca yibagira uwo ari. 25 Mugabo uwihweza muri rya tegeko ritagira akanenge+ ry’umwidegemvyo kandi agakovya muri ryo, uwo muntu, kubera atabaye uwumva akibagira, mugabo akaba uwukora igikorwa+, azoba ahiriwe+ mu kubikora.

26 Nimba umuntu yibwira ko ari uwusenga mu buryo nyabwo+ yamara ntajiginyike* ururimi rwiwe+, mugabo akabandanya guhenda umutima wiwe bwite+, ugusenga kw’uwo muntu nta co kuba kumaze+. 27 Insengo ityoroye+ kandi idahumanye+ ku Mana yacu ikaba na Data ni iyi: kwitaho impfuvyi+ n’abapfakazi+ mu makuba yabo+, no kuguma wirinze ntutosekazwe+ n’isi+.

2 Bene wacu, mbega mugira ngo muriko muragumya ukwizera kw’Umukama wacu Yezu Kristu, we buninahazwa bwacu+, mu kugira nkunzi+? 2 Kuko, iyo umuntu w’impeta z’inzahabu ku ntoke kandi yambaye ivyambarwa vyakaka yinjiye mw’ikoraniro+ ryanyu, mugabo umworo yambaye ivyambarwa bicafuye na we akinjira+, 3 yamara mukaraba ryiza+ umwe yambaye ivyambarwa vyakaka, mukavuga muti: “Wewe icara ng’aha mu kibanza ciza,” hanyuma mukabwira nya mworo ngo: “Wewe guma uhagaze,” canke ngo: “Icara harya munsi y’intebe y’ibirenge vyanje,” 4 murasumbanya abantu muri mwebwe+, kandi mwacitse abacamanza+ bapfundika ingingo mbi+, si ko none?

5 Nimwumvirize, bene wacu bakundwa. Mbega Imana ntiyatoye aboro+ mu vy’isi ngo babe abatunzi+ mu kwizera na ba samuragwa b’ubwami, ubwo yasezeraniye abayikunda+? 6 Mugabo mwebwe mwaratetereje umworo. Mbega abatunzi si bo babahahaza+, vyongeye bakababuruta babajana imbere y’amasentare+? 7 Mbega si bo barogota+ kuri rya zina ryiza mwitirirwa+? 8 Nimba rero mushitsa neza rya tegeko ry’i bwami+ nk’uko icanditswe kivuga, ngo: “Utegerezwa gukunda mugenzawe nk’uko wikunda+,” muriko mugira neza cane. 9 Mugabo nimba mubandanya kugira nkunzi+, muriko mukora igicumuro, kuko mukangirwa n’itegeko+ nk’abarenga itegeko.

10 Kuko uwo wese yubahiriza Itegeko ryose mugabo agatirimuka mu kintu kimwe, aba ayacumuyeko yose+. 11 Kuko uwavuze ati: “Ntukarenge ibigo+,” yavuze kandi ati: “Ntukice+.” Nimba rero utarenga ibigo mugabo ukica, uba ucitse uwurenga itegeko. 12 Mugume muvuga kandi mukora nk’abazocirwa urubanza n’itegeko ry’igisata c’abantu bidegemvya+. 13 Kuko uwutagira imbabazi azocirwa urubanza ata mbabazi+. Imbabazi zirihaya ku rubanza zigina intsinzi.

14 Bimaze iki ga bene wacu, nimba hari uwuvuga ko afise ukwizera+ mugabo adafise ibikorwa+? Mbega ukwo kwizera kurashobora kumukiza+? 15 Nimba mwene wacu canke mushiki wacu ari gusa kandi akenye ibifungurwa bikwiranye n’umusi+, 16 yamara uwo muri mwebwe akamubwira ati: “Genda amahoro, ugume ususurutse kandi urya neza,” mugabo ntimumuhe ivyo umubiri wiwe ukeneye, bimaze iki+? 17 N’ukwizera nyene, iyo kudafise ibikorwa+, ubwakwo kuba gupfuye.

18 Yamara rero, hari uwovuga ati: “Wewe ufise ukwizera, nanje mfise ibikorwa. Nyereka ukwizera kwawe kutagira ibikorwa, nanje nkwereke ukwizera kwanje biciye ku bikorwa vyanje+.” 19 Uremera ko hari Imana imwe+, si ko? Ugira neza cane. Yamara amadayimoni* na yo aravyemera kandi agahinda agashitsi+. 20 Mugabo urashaka kumenya ga yewe muntu ata co urimwo, yuko ukwizera kutagira ibikorwa ata co gukora? 21 Mbega Aburahamu data+ ntiyiswe umugororotsi biciye ku bikorwa, aho amariye gushikana Izahaki umuhungu wiwe ku gicaniro*+? 22 Urabona ko ukwizera kwiwe kwakoranye n’ibikorwa vyiwe kandi biciye ku bikorwa vyiwe ukwizera kwiwe kukagirwa ukutagira akanenge+, 23 kandi icanditswe cararangutse, kimwe kivuga ngo: “Aburahamu yizeye Yehova, abiharurwako nk’ubugororotsi+,” araheza yitwa “umugenzi wa Yehova+.”

24 Murabona ko umuntu yitwa umugororotsi+ bivuye ku bikorwa+, bitavuye ku kwizera kwonyene+. 25 Muri ubwo buryo nyene, mbega Rahabu+ wa mumaraya we ntiyiswe umugororotsi bivuye ku bikorwa, aho amariye kwakira neza za ntumwa hanyuma akazirungika azicishije mu yindi nzira+? 26 Egome, nk’uko umubiri utagira impwemu uba upfuye+, ni ko n’ukwizera kutagira ibikorwa kuba gupfuye+.

3 Ntimukwiye kuba abigisha muri benshi+, bene wacu, kuko muzi yuko tuzocirwa urubanza ruremereye kuruta+. 2 Kuko twese dutsitara kenshi+. Nimba hari uwudatsitara mw’ijambo+, uyo ni umuntu atagira akanenge+, ashoboye no kujiginyika umubiri wiwe wose. 3 Iyo dushize imijiginya+ mu kanwa k’amafarasi kugira ngo atugamburukire+, turayobora n’umubiri wayo wose. 4 Raba! Mbere n’amato, naho ari manini cane kandi akajanwa n’imiyaga ikomeye, ayoborwa n’ingafe+ ntoyi cane akaja aho uwufashe ikinyongesho agomba.

5 N’ururimi nyene ni agahimba gatoyi yamara kakiyemera bikomeye+. Raba ingene bisaba akariro gakeyi kugira ngo umuntu adomeke ishamba rinini cane! 6 Erega, ururimi ni umuriro+. Ururimi rugize ukutagororoka kungana isi mu bihimba vyacu, kuko rutosekaza umubiri+ wose rukadomeka ikurudumu y’ubuzima bwo kw’isi, na rwo rukadomekwa na Gehena. 7 Kuko ubwoko bwose bw’ibikoko hamwe n’inyoni n’ibikwega inda hasi n’ibiremwa vyo mu mazi bugundwa, kandi bwaragunzwe n’abantu+. 8 Mugabo ururimi, nta n’umwe mu bantu ashobora kurugunda. Ni ikintu kibi c’akagaramaruganda, cuzuye ubumara bwica+. 9 Turaruhezagirisha Yehova+, umwe Data+, yamara kandi tukaruvumisha+ abantu babayeho “mw’ishusho y’Imana+.” 10 Mu kanwa kamwe havamwo umuhezagiro n’umuvumo.

Ntibibereye, bene wacu, ko ivyo bintu bibandanya kuba gutyo+. 11 Mbega isôko+ ryotuma mu mbizi imwe hadudubiza ibisosa n’ibirura? 12 Bene wacu, mbega igiti c’umusukoni coshobora kwama imyelayo canke umuzabibu ukama insukoni+? Eka n’amazi y’umunyu ntashobora kuvamwo amazi asosa.

13 Ni nde ari inkerebutsi kandi ategera muri mwebwe? Niyerekanire mu ngeso ziwe nziza ibikorwa vyiwe+ ari n’ubwitonzi buva ku bukerebutsi. 14 Ariko nimba mufise ishari ry’umururazi+ n’agatima k’amahane+ mu mitima yanyu, ntimube mwiyemera+ mwongera mubeshera ukuri+. 15 Ubwo si ubukerebutsi bumanuka buvuye hejuru+, ahubwo ni ubwo kw’isi+, bw’ibikoko, bw’amadayimoni+. 16 Kuko aho ishari+ n’agatima k’amahane biri, ari ho haba umuvurungano n’ikintu c’agahomerabunwa cose+.

17 Mugabo ubukerebutsi+ buva hejuru imbere ya vyose ni ubutanduye+, maze bukaba ubw’amahoro+, bugira ibitegereka+, bugabirije kugamburuka, bwuzuye imbabazi n’ivyamwa vyiza+, ntibusobanura abantu mu kugira nkunzi+, ntibwiyorobeka+. 18 Vyongeye, urubuto rw’icamwa+ c’ubugororotsi+ rubibwa mu mahoro+ ku bariko baremesha amahoro+.

4 Intambara ziva ku rihe sôko kandi indwano ziva ku rihe sôko muri mwebwe? Mbega ntiziva kuri iri sôko+: ku vyipfuzo vyanyu bikaze vyo kunezereza umubiri biguma birwana mu bihimba vyanyu+? 2 Muripfuza, yamara ntimuronka. Mubandanya kwica+ no kugira umwina+, yamara ntimushobora kuronka. Mubandanya kurwana+ no kugira intambara. Ntimuronka kuko mudasaba. 3 Murasaba koko, yamara ntimuronka, kuko musaba mu ntumbero mbi+, kugira mubimarire ku vyipfuzo vyanyu bikaze vyo kunezereza umubiri+.

4 Yemwe bagore murenga ibigo+, ntimuzi yuko kugiranira ubugenzi n’isi ari ukwankana n’Imana+? Uwo wese rero ashaka kuba umugenzi+ w’isi aba ariko yigira umwansi w’Imana+. 5 Canke mwibaza yuko icanditswe kivugira ubusa ngo: “Impwemu+ icumbitse muri twebwe iguma icambirwa ibintu ibigiranye agatima k’ishari”? 6 Ariko ubuntu ata wari abukwiriye Imana itanga burahambaye kuruta+. Ni co gituma icanditswe kivuga giti: “Imana irwanya abibona+, mugabo iha ubuntu ata wari abukwiriye abicisha bugufi+.”

7 Muyobokere+ Imana rero; mugabo murwanye Shetani*+, na we azobahunga+. 8 Mwiyegereze Imana, na yo izobiyegereza+. Mukarabe iminwe yanyu, mwebwe abacumuzi+, kandi mutyorore imitima yanyu+, mwebwe abadafata ingingo+. 9 Nimwemere mugire amagorwa, mugandare, murire+. Agatwengo kanyu nigahinduke ikigandaro, n’akanyamuneza kanyu gahinduke ukujonjogora+. 10 Mwicishe bugufi mu maso ya Yehova+, na we azobashira hejuru+.

11 Mureke kuvuga nabi bagenzi banyu, bene wacu+. Uwuvuga nabi mwene wabo canke akamucira urubanza+ aba avuze nabi itegeko kandi akaba aciriye urubanza itegeko. Nimba rero ucira urubanza itegeko, ntuba uri uwukora ivy’itegeko, ahubwo uba uri umucamanza+. 12 Uwushinga amategeko akaba n’umucamanza+ ahari ni umwe, ari we ashoboye gukiza no guhonya+. Mugabo wewe, uri nde ngo ucire urubanza mugenzawe+?

13 Umve rero, mwebwe abavuga ngo: “Uno musi canke ejo tuzogira urugendo mu gisagara kanaka tumareyo umwaka, kandi tuzocuruza turonke inyungu+,” 14 kandi mutazi uko ubuzima bwanyu buzomera ejo+. Kuko muri igipfungu kiboneka akanya gato maze kikazimangana+. 15 Ahubwo mwari mukwiye kuvuga muti: “Nimba Yehova abigomba+, tuzobaho, dukore iki canke kiriya+.” 16 Mugabo ubu murirata mu vyo mwiyemeramwo+. Ukwishima mwene ukwo kwose ni kubi. 17 Nimba rero umuntu azi gukora ibigororotse yamara ntabikore+, bimubera igicumuro+.

5 Ehe rero yemwe batunzi+, nimurire, muborogeshwe n’amagorwa agira abazeko+. 2 Ubutunzi bwanyu buraboze, n’impuzu zanyu zo hejuru ziriwe n’udukoko+. 3 Inzahabu n’ifeza vyanyu bimazwe n’ingese, kandi ingese yavyo izobabera nk’intahe ibagiriza kandi izorya inyama zanyu. Ikintu kimeze nk’umuriro+ ni co mwarundanije+ mu misi ya nyuma+. 4 Raba! Impembo y’abakozi bimbuye imirima yanyu mugabo mukayigumya+ iguma isemerera+, kandi ugutaka+ kw’abashwabuzi kwashitse mu matwi+ ya Yehova nyen’ingabo*. 5 Mwibereyeho kw’isi mu bihinda kandi mwihaye ibiryohera umubiri+. Mwadoheje imitima yanyu ku musi wo gukererwa+. 6 Mwaciriye rubi umugororotsi, muramwica. None ntabarwanya+?

7 Mwihangane rero, bene wacu, gushika ku kuhaba+ kw’Umukama. Raba! Umurimyi aguma arindiriye ivyamwa vy’agaciro vy’isi, akihangana ku bijanye na vyo gushika aronse imvura ya kare n’imvura yo hanyuma+. 8 Namwe nyene mwihangane+; mushikamishe imitima yanyu, kuko ukuhaba kw’Umukama kwegereje+.

9 Ntimunihagire mugirira ishavu bagenzi banyu, bene wacu, kugira ngo ntimucirwe urubanza+. Raba! Umucamanza ahagaze imbere y’imiryango+. 10 Bene wacu, ku bijanye n’ukwiyumanganya mu mibabaro+ n’ukwihangana+, mufatire akarorero+ ku bahanuzi+, abavuze mw’izina rya Yehova+. 11 Raba! Abihanganye tubita abahirwe+. Mwarumvise ivya kwa kwihangana kwa Yobu+ mwongera murabona icavuyemwo gitanzwe na Yehova+, murabona yuko Yehova ari umunyakibabarwe cane n’umunyembabazi+.

12 Mugabo hejuru ya vyose, bene wacu, mureke kurahira, emwe, kwaba ukurahira ijuru canke kurahira isi canke iyindi ndahiro+. Mugabo Ego yanyu ibe Ego, Oya yanyu na yo, Oya, ngo ntimugibweko n’urubanza+.

13 Hoba hari uwuriko arihanganira imibabaro muri mwebwe? Nashishikare gusenga+. Hoba hari uwunezerewe? Naririmbe amazaburi+. 14 Hoba hari uwurwaye muri mwebwe+? Nahamagare abagabo b’inararibonye+ b’ishengero baze kuri we, bamusengere, bamusige amavuta+ mw’izina rya Yehova. 15 Kandi isengesho ry’ukwizera rizotuma uyo amerewe nabi akira+, kandi Yehova azomuhagurutsa+. Vyongeye, nimba yarakoze ibicumuro azobabarirwa+.

16 Mwaturiranire+ ibicumuro rero ata guhishanya kandi musengeranire, kugira ngo mukire+. Ugutakamba kw’umugororotsi, igihe gukora, kugira inguvu nyinshi+. 17 Eliya yari umuntu yiyumva nk’uko twiyumva+, yamara mw’isengesho yarasavye Imana ngo imvura ntigwe+; kandi ntiyaguye kuri ico gihugu mu myaka itatu n’amezi atandatu. 18 Kandi yarongeye gusenga, maze ijuru ritanga imvura, igihugu na co gitanga ivyamwa vyaco+.

19 Bene wacu, hagize uwo muri mwebwe azimizwa agata ukuri hanyuma uwundi akamugarura+, 20 mumenye yuko uwugaruye umucumuzi akava mu buzimire+ bw’inzira yiwe azokiza ubuzima bwiwe urupfu+ kandi azopfuka ibicumuro indiri+.