Twisunze Bibiliya

Vyoba bibereye ko ushira ahabona ivyo utunze?

“Kwambara ipantalo igezweho canke ibindi bintu bigezweho birashobora gutuma umuntu yahora yikengera asigara abona ko ari agahambaye ku buryo atangura kwifata uko atari mu kuvuga ngo: ‘Ndi agakomeye, nimba utavyemera raba iyi mpuzu nambaye aho yakorewe!’ ”—Umuhinga mu vy’inyifato z’abantu Chaytor D. Mason.

ABANTU bamwebamwe barashira ahabona impuzu zabo zigezweho canke ibindi bintu bigezweho batunze kugira ngo babatamarire. Nk’akarorero mu gihugu kimwe co muri Aziya, nk’uko bivugwa mu kiganiro kiri mu kinyamakuru kimwe (The Washington Post), “abantu baheruka kuba abatunzi usanga bakunda ibintu bizimvye, aho hakaba harimwo udusakoshi tw’abagore tuva mu Bufaransa, imiduga y’inkino yo mu Butaliyano, mbere n’ikiruta vyose ugasanga bakunda guhaya [ubutunzi bwabo].”

Ariko ntiwumve, nta kibi kiri mu kunezerererwa ivyo wabiriye akuya. Bibiliya ivuga iti: ‘Umuntu wese narye, emwe, anywe, abone iciza ku bw’igikorwa ciwe cose c’ubutame. Ni yo ngabirano y’Imana.’ (Umusiguzi 3:13) Mugabo none vyoba biranga ubukerebutsi gushira ahabona canke guhaya ivyo dutunze? Bibiliya ibivugako iki?

“Umutunzi agira abakunzi benshi”

Igihe umutunzi canke abantu bigira abatunzi bashize ahabona ivyo batunze, ni abagenzi bameze gute boshobora gukwegēra? Bibiliya iratanga inyishu muri aya majambo aranga ubukerebutsi yerekana ukuntu abantu bameze iti: “Umworo arankwa gushitsa no ku mubanyi wiwe, arik’umutunzi agira abakunzi benshi.”—Imigani 14:20, Bibiliya Yera.

Ico bivamwo ni iki: Abo “bakunzi benshi” b’umutunzi ntibakunda cane abantu ubwabo ahubwo bakunda ubutunzi bwabo. Icitwa ngo ni ubugenzi bwabo usanga gishingiye ku bwikunzi, nk’uko amajambo yabo yo kuryosharyosha ari. Bibiliya ivuga ko amajambo nk’ayo ari ‘ukwiyerekana uko utari kugira ngo unyegeze umwina.’—1 Abatesalonika 2:5.

Niwibaze rero uti: ‘Nipfuza abagenzi bameze gute? Abagenzi bankundira ivyo mfise canke abagenzi nyakuri bankundira ico ndi?’ Bibiliya irerekana ko inyifato yacu ishobora kwerekana abagenzi dukwegēra abo ari bo.

“Ubukerebutsi buri kumwe n’abifata ruto”

Iyindi ngorane ijanye no guhaya ubutunzi irabonekera neza mu nkuru yo muri Bibiliya yerekeye Umwami Hezekiya, uwaba i Yeruzalemu ha kera. Igihe kimwe Hezekiya yareretse abanyacubahiro bari bavuye i Babiloni “ibintu vyose vyari mu matunga yiwe.” Biboneka ko ubwo butunzi bwiwe buhambaye bwatangaje abo bantu bari baje kumugendera. Ariko rero, bushobora kandi kuba bwaratumye bagira umwina. Bamaze kugenda, umuhanuzi w’Imana Yesaya yabwiye Hezekiya abigiranye umutima rugabo yuko umusi uri izina amatunga yiwe yose “[yotwawe] koko i Babiloni. Nta na kimwe [cosigaye].” Erega uko yabivuze ni ko vyagenze! Haciye imyaka, Abanyababiloni baragarutse banyaga ubutunzi bwose bw’umuryango wa Hezekiya.—2 Abami 20:12-17; 24:12, 13.

No muri iki gihe nyene, abantu bashira ahabona ubutunzi bwabo boshobora kubutakaza bwose canke n’imiburiburi bumwe muri bwo. Raporo imwe yagize ico ivuze ku bijanye n’ubugizi bwa nabi be n’ivyo kwirinda impanuka muri Megizike yagize iti: “Gushira ahabona ubutunzi butangaje ni vyo bikwegēra ibisuma mu gisagara ca Megizike. Kwambara udusharizo n’amasaha bizimvye no kwerekana amafaranga menshi biratuma abantu bavyitwararika cane bidakenewe.” Ese ukuntu birushiriza kuba vyiza gushira mu ngiro impanuro yo muri Bibiliya isaba umuntu ‘kutiyemera’ kubera ubutunzi afise. (Yeremiya 9:23) Mu Migani 11:2 hagira hati: “Ubukerebutsi buri kumwe n’abifata ruto.”

Nubone kamere nziza mu bandi

Umuntu yifata ruto kandi yicisha bugufi arahimbarwa na kamere nziza abona mu bandi be n’ububangukirwe bwabo aho kugira agatima ko kwishira imbere ngo bamubone. Mu Bafilipi 2:3 havuga hati: “Ntimugire ico mukora kubgo gukēbana cank’ukwifata uko mutari, ariko mwicishije bugufi, umwe wese yiyumvire yuko mugenzi we amuruta.” (Bibiliya Yera) Mu Bagalatiya 5:26 dusoma duti: “Ntiturondere kwishira imbere, tuvyura uguhiganwa, tugiriranira agashari.”

Muri ubwo buryo nyene, abantu bafise ubukerebutsi buva ku Mana barazi yuko ubugenzi nyakuri bushingiye ku kutagira ubwikunzi n’ukwubahana be n’uko ubwo bugenzi budahera igihe ubutunzi buheze. Ahubwo nyabuna, buguma bukomera uko haca igihe. Mu Migani 17:17 hagira hati: “Umugenzi nyakuri akundana igihe cose.” N’ikiruta vyose, umuntu w’inkerebutsi arihatira guhimbara Imana. Arazi yuko Imana idakangwa n’ukuntu umuntu aboneka inyuma ahubwo ko iraba “wa muntu yihishije wo mu mutima,” ni ukuvuga ico turi imbere muri twebwe. (1 Petero 3:4) Ku bw’ivyo, arakora uko ashoboye kwose kugira ngo atsimbataze kamere nziza ziranga ico Bibiliya yita “umuntu mushasha.” (Abanyefeso 4:24) Zimwezimwe muri izo kamere ziravugwa muri Mika 6:8, ahagira hati: “None hari ikindi Yehova agusaba atari ugukurikiza ubutungane no gukunda ubuntu no kugendana n’Imana yawe wifashe ruto?”

Egome, mw’isi ya kino gihe abantu ntibaremeshwa kwifata ruto, ivyo bikaba bidatangaza abatohoji ba Bibiliya. Uti gute? Mu kuvuga ibijanye n’ “imisi ya nyuma,” Bibiliya yari yaravuze yuko abantu muri rusangi bobaye “abanyamwina, abihayagiza, . . . abihimbaza . . . , n’abuzuye ubwishime.” (2 Timoteyo 3:1-5, GNT ) Mu kibano aho ibintu vyifashe gutyo, abantu bashira ahabona ivyo batunze bumva bisanze. Ariko rero, Imana ituremesha ‘guca kure abantu nk’abo’; ahandi ho twomera nka bo.

WOBA UMAZE KUVYIBAZA?

● Ni kamere izihe zihimbara Imana?—Mika 6:8.

● Dukwiye kubona gute kamere nziza n’ububangukirwe abandi bafise?—Abafilipi 2:3.

● Kubera iki tudakwiye gutangazwa no kuba agatima ko gushira ahabona ivyo umuntu atunze kiraye?—2 Timoteyo 3:1-5.

[Ifoto ku rup. 25]

[Iciyumviro nyamukuru ku rup. 25]

Woba wipfuza abagenzi bagukundira ivyo ufise canke wipfuza abagenzi bagukundira ico uri?