Ikigabane ca 69

Ikibazo Cerekeye Uwuri Se

MU GIHE ca nya misi mikuru, ibihari birushiriza gukomera hagati ya Yezu n’indongozi z’Abayuda. Yezu aremera ati: “Ndazi ko mur’uruvyaro rwa Aburahamu, yamara murondera ingene mwonyica, kukw ijambo ryanje ritagira ikibanza muri mwebge. Jewe mvuga ivyo nabonye kuri Data; namwe mukora ivyo mwumvise kuri so.”

Naho Yezu atavuze uwo se wabo uwo ari we, aratomora yuko uwo se wabo atandukanye na se wiwe. Kubera ko nya ndongozi z’Abayuda zitazi uwo Yezu ashaka kuvuga, zishura ziti: “Aburahamu ni we data.” Biyumvira yuko bafise ukwizera nk’ukwa Aburahamu, uwari umukunzi w’Imana.

Yamara rero, Yezu arabamaramaza abahaye iyi nyishu ati: “Iyo muba mur’abana ba Aburahamu, muba mukora ibikorwa nk’ivya Aburahamu.” Si ivy’imbeshere, umwana nyawe yigana se. Yezu avuga ati: “Ariko none murondera ingene mwonyica, umuntu yababariye ivy’ukuri, ivyo numvise ku Mana; Aburahamu ntiyagize artyo.” Nuko Yezu arongera ati: “Mukora ibikorwa nk’ivya so.”

N’ubu ntibararuha bategera uwo Yezu ariko aravuga uwo ari we. Baguma biyumvira ko ari abana bemewe ba Aburahamu, bakavuga bati: “Twebge ntitur’ibivyarwa.” Nuko rero, mu kwirarira kwabo ngo ni abasavyi b’ukuri nka kumwe kwa Aburahamu, baremera n’ishavu n’akantu bati: “Dufise Data umwe, n’Imana.”

Ariko ubwo vy’ukuri Imana ni yo Se wabo? Yezu abishura ati: “Iy’Imana iba ari So, muba munkunda, kuko jewe naje mvuye ku Mana; sinaje nitumye, ariko ni yo yantumye. N’iki gituma mutamenya imvugo yanje?”

Yezu yagerageje kwereka izo ndongozi z’idini inkurikizi zohaba bamwiyamirije. Ariko ubu aravuga atarya umunwa ati: “Mwebge mur’aba so wa Murwanizi, kand’ivyo so yifuza ni vyo mushaka gukora.” Mbega Umurwanizi, ari we Mucokoranyi, ni se wabo ameze gute? Yezu yavuze ko ari umwicanyi hanyuma maze avuga ati: “[Ni] umunyabinyoma, kand[i n]i we se wavyo.” Nuko rero, Yezu asozera ati: “Uw’Imana yumva amajambo y’Imana; mwebge igituma mutumva, n’uko mutar’ab’Imana.”

Ba Bayuda bashavuzwa n’ukuntu Yezu abakubise intahe mu gahanga, bishura bati: “None se ntitwavuze ukuri k’ur’Umusamariya, kandi k’urimwo dayimoni?” Ijambo “Umusamariya” rikoreshwa nk’imvugo y’akagaye n’iceyi, Abasamariya bakaba bari abantu bankwa urunuka n’Abayuda.

Yezu yirengagiza iryo jambo ry’akagaye ry’uko ngo ari Umusamariya, asubizayo ati: “Jewe sindimwo dayimoni, ariko nubaha Data, namwe ntimunyubaha.” Mu kubandanya, Yezu atanga umuhango w’igitangaza ati: “Ni hagira uwitondera ijambo ryanje, ntazobona urupfu gushitsa ibihe bidashira.” Mugabo ntiwumve, Yezu ntashaka kuvuga yuko abamukurikira bose batazokwigera babona urupfu mu buryo bw’umubiri. Ahubwo nyabuna ashaka kuvuga yuko batazobona ihonywa ry’ibihe bidahera, ari ryo “rupfu rwa kabiri,” rumwe rutagira izuka.

Ariko rero, abo Bayuda amajambo ya Yezu bayafata nk’uko yakabaye. Ni co gituma bavuga bati: “Noneho turamenye k’urimwo dayimoni. Aburahamu yarapfuye, n’abāvugishwa n’Imana n’uko, ariko wewe uvuze, uti Ni hagira uwitondera ijambo ryanje, nta ho azokwumviriza ku rupfu. Mbeg’uruta sogokuruza wacu Aburahamu? We ko yapfuye, n’abāvugishwa n’Imana na bo bakaba bārapfuye: wiyita nde?”

Muri ukwo guharira kwose, birigaragaza ko Yezu ariko arakurira inkoni ku gishitsi abo bagabo ku vy’uko ari we Mesiya yari yarasezeranywe. Ariko aho gushoka yishura ikibazo cabo cabaza uwo ari we, Yezu avuga ati: “Ni naba niha icubahiro, icubahiro canje kizoba ar’ic’ubusa: ūmpa icubahiro ni Data, uwo muvuga ngo n’Imana yanyu, yamara ntimumuzi, ariko jewe ndamuzi. Kandi ni navuga ngo sindamuzi, nzoba mbaye umunyabinyoma nkamwe.”

Mu gushishikara, Yezu yongera kuvuga ivya wa mwizerwa Aburahamu, avuga ati: “Aburahamu sogokuruza wanyu yari yarahahamiye kubona umusi wanje, kandi yarawubonye, aranezerwa.” Ni vyo, Aburahamu akoresheje amaso y’ukwizera yararavye imbere ku gushika kwa Mesiya yari yarasezeranywe. Mu buryo bw’ukutemera, Abayuda basubizayo bati: “Ube utaramara imyaka mirongwitanu, ngo warabonye Aburahamu?”

Yezu arabishura ati: “N’ukuri, n’ukuri ndababgire: Aburahamu ataravuka, jewe namye ndiho.” Birumvikana ko Yezu ariko avuga ukubaho kwiwe imbere y’uko aba umuntu nkatwe, igihe yari umuntu wo mu buryo bw’impwemu w’ubushobozi mw’ijuru.

Ba Bayuda barakazwa n’uko Yezu avuze ko yabaheyo imbere ya Aburahamu, bandagura amabuye ngo bayamubirike. Ariko aranyegera, hanyuma arasohoka ava mu rusengero ataco abaye. Yohana 8:37-59; Ivyahishuriwe 3:14; 21:8.

▪ Yezu yerekanye ate ko we hamwe n’abansi biwe bari bafise ba se batandukanye?

▪ Kuba Abayuda bise Yezu Umusamariya bishaka kuvuga iki?

▪ Ni mu buryo ki Yezu avuga ko abigishwa biwe batazigera babona urupfu?