Icigwa ca 12

Kwubaha Ubuzima n’Amaraso

Dukwiye kubona gute ubuzima? (1) ugukorora inda? (1)

Abakirisu berekana gute ko bitwararika ukwirinda impanuka? (2)

Kwica ibikoko vyoba ari bibi? (3)

Ni imigenzo imwimwe iyihe itubahiriza ubuzima? (4)

Itegeko ry’Imana rivuga iki ku vy’amaraso? (5)

Aho hoba harimwo n’ivy’uguterwa amaraso? (6)

1. Yehova ni we soko ry’ubuzima. Ibintu bifise ubuzima vyabuhawe n’Imana. (Zaburi 36:9) Ubuzima ni ubw’agaciro ku Mana. N’ubuzima bw’umwana ataravuka ari mu nda ya nyina ni ubw’agaciro kuri Yehova. Kwica n’ibigirankana uruyoya nk’urwo rukiriko rurakura ni bibi mu nyonga z’Imana.​—⁠Kuvayo 21:22, 23; Zaburi 127:3.

2. Abakirisu b’ukuri baritwararika ukwirinda impanuka. Bararaba neza ko imiduga yabo hamwe n’inzu yabo bitokwega impanuka. (Gusubira mu Vyagezwe 22:8) Abasavyi b’Imana ntibashira mu kaga ubuzima bwabo bidakenewe barondera gusa kwinezereza. Ni co gituma bataja mu nkino zikomeretsa z’ukubabaza abandi bantu n’ibigirankana. Baririnda ibinezereza biremesha ubukazi.​—⁠Zaburi 11:5; Yohana 13:35.

3. Ubuzima bw’ibikoko na bwo nyene ni ubw’agaciro ku Muremyi. Umukirisu yoshobora kwica ibikoko kugira ngo yironse ibifungurwa n’ivyambarwa, canke kugira ngo yikingire indwara n’ivyago. (Itanguriro 3:21; 9:3; Kuvayo 21:28) Ariko ni bibi kugirira nabi ibikoko canke kuvyica umuntu yikinira gusa canke kugira yinezereze.​—⁠Imigani 12:10.

4. Ukunywa itabi, ukunywa ubugoro hamwe n’ukunywa ibiyayura umutwe kugira ngo gusa umuntu yinezereze ntibibereye Abakirisu. Iyo migenzo ni mibi kubera ko (1) itugira abaja bayo, (2) ikagirira nabi imibiri yacu, kandi (3) ikaba ihumanye. (Abaroma 6:19; 12:1; 2 Ab’i Korinto 7:1) Guheba izo ngeso birashobora kuba ibigoye. Ariko dutegerezwa kuyiheba kugira ngo duhimbare Yehova.

5. Amaraso na yo nyene ni ay’agaciro mu nyonga z’Imana. Imana ivuga ko ubugingo, ari bwo buzima, buri mu maraso. Kurya amaraso rero ni bibi. Ni bibi kandi kurya inyama y’igitungwa kitakuwemwo amaraso neza. Nimba igikoko canizwe canke kigapfira mu mutego, ntigikwiye kuribwa. Nimba gicumiswe canke kikaraswa, gitegerezwa gukurwamwo amaraso ningoga nimba dushaka kukirya.​—⁠Itanguriro 9:3, 4; Abalewi 17:13, 14; Ivyakozwe 15:28, 29.

6. Vyoba ari bibi kwemera guterwa amaraso? Nitwibuke yuko Yehova adusaba kwirinda amaraso. Ivyo bisobanura ko dutegerezwa kutinjiza mu mibiri yacu mu buryo na bumwe amaraso y’abandi bantu canke mbere amaraso yacu yoba yabitswe ahantu. (Ivyakozwe 21:25) Abakirisu b’ukuri rero ntibemera guterwa amaraso. Bemera kuvurwa mu bundi buryo, nko guterwa imiti itarimwo amaraso. Barashaka kubaho, ariko ntibagerageza gukiza ubuzima bwabo mu kurenga amategeko y’Imana.​—⁠Matayo 16:25.

[Amafoto ku rup. 25]

Kugira ngo duhimbare Imana, dutegerezwa kwirinda guterwa amaraso, ingeso zihumanye, no kwita mu kaga bidakenewe