Gusubiramwo Kugira ngo Ushimike

MU KWIGISHA neza harajamwo n’ugusubiramwo. Mu gihe iciyumviro gihambaye kivuzwe incuro zirenze imwe, biratuma abumviriza borushiriza kucibuka. Mu gihe iciyumviro gisubiwemwo mu bundi buryo butandukanye gatoya n’uko cavuzwe ubwa mbere, boshobora mbere kugitahura neza kuruta.

Nimba abakwumviriza batibuka ivyo uvuga, amajambo yawe ntazogira ico akoze ku vyo bemera canke ku kuntu babayeho. Bisa n’uko bazobandanya kwiyumvira ivyo ushimitseko cane.

Yehova, we Mwigisha wacu Ahambaye, yaradushiriyeho akarorero mu buryo akoresha ugusubiramwo. Yarahaye ya Mabwirizwa Icumi ihanga rya Isirayeli. Abicishije ku muvugizi w’umumarayika, yaratumye iryo hanga ryumva ayo mabwirizwa ku Musozi Sinayi. Mu nyuma yarayahaye Musa mu nyandiko. (Kuv. 20:1-17; 31:18; Gus. 5:22) Musa abitegetswe na Yehova, yarasubiriyemwo iryo hanga ayo mabwirizwa imbere y’uko binjira mu Gihugu c’Isezerano, maze biciye ku mpwemu yera Musa arayimura, nk’uko tubisanga mu Gusubira mu Vyagezwe 5:6-21. Mu mabwirizwa yahawe Abisirayeli harimwo itegeko ryabasaba gukunda Yehova no kumusukurira n’umutima wabo wose, n’ubugingo bwabo bwose, be n’inkomezi zabo zose. Iryo na ryo rikaba ryarasubiwemwo kenshi. (Gus. 6:5; 10:12; 11:13; 30:6) Kubera iki? Nk’uko Yezu yabivuze, ni kubera yuko ryari ryo bwirizwa “rihambaye rya mbere.” (Mat. 22:34-38) Yehova abicishije ku mumenyeshakazoza Yeremiya, yaribukije abantu b’i Buyuda incuro zirenga 20 uburemere bwo kumugamburukira mu bintu vyose yabageze. (Yer. 7:23; 11:4; 12:17; 19:15) Kandi biciye kuri Ezekiyeli, Imana yaratangaje incuro zirenga 60 ko amahanga ‘azomenya yuko ari Yehova.’—Ezk. 6:10; 38:23.

Mu nkuru y’ubusuku bwa Yezu, turahabona kandi ikoreshwa kirumara ry’ugusubiramwo. Nk’akarorero, hariho Injili zine, imwe yose ikaba irimwo ibintu bihambaye vyabaye bivugwa mu yindi Njili imwe canke zirenga, mugabo ivyo bintu vyabaye zikabivuga mu buryo butandukanye gatoya. Mu kwigisha kwiwe, Yezu yashikiriza iciyumviro kimwe c’ishimikiro mu bihe bitari bike, mugabo mu buryo butandukanye. (Mrk. 9:34-37; 10:35-45; Yoh. 13:2-17) N’igihe yari ku Musozi wa Elayono hasigaye imisi mikeyi ngo apfe, Yezu yarakoresheje ugusubiramwo kugira ngo ashimike kuri iyi mpanuro ihambaye: “Mwame mugavye, kuko mutazi umusi umwami wanyu azozako.”—Mat. 24:42; 25:13.

Mu Busuku bwo mu Ndimiro. Igihe ushinga intahe ku bantu, uba wipfuza yuko bazokwibuka ivyo uvuga. Ugukoresha neza ugusubiramwo birashobora kugufasha gushikira iyo ntumbero.

Kenshi na kenshi, ugusubiramwo mu gihe nyene ikintu kiriko kiraganirwa bizofasha kucandika mu bwenge bw’umuntu. Gutyo, uhejeje gusoma icanditswe, woshobora kugishimikako mu kwerekeza ku gahimba nyamukuru kaco maze ukabaza uti: “Woba wabonye ukuntu uyu murongo uvuga?”

Ivyo uvuga ubwa nyuma mu kiyago birashobora na vyo nyene gukoreshwa bikagira ico bivuyemwo. Nk’akarorero, ushobora kuvuga uti: “Iciyumviro nyamukuru nizigiye yuko uzokwibuka mu vyo twayaze ni . . . ” Nuce ukivuga mu buryo busanzwe. Gishobora kuba ari nk’iki: “Imana ifise umugambi wo guhindura isi iparadizo. Uwo mugambi uzoranguka ata kabuza.” Canke woshobora kuvuga uti: “Bibiliya irerekana neza yuko tubayeho mu misi y’iherezo y’uru runkwekwe rw’ibintu. Nimba dushaka kurokoka umuhero warwo, birakenewe ko twiga ivyo Imana idusaba.” Canke gishobora kuba iki: “Nk’uko twabibonye, Bibiliya iratanga impanuro kirumara ku buryo bwo guhangana n’ingorane z’ubuzima bwo mu rugo.” Mu bihe bimwebimwe ushobora gusa gusubiramwo amajambo yavuye muri Bibiliya bwa ciyumviro co kwibukwa. Birumvikana, kugira ivyo ubigire neza bisaba kwitegura imbere y’igihe.

Usubiye kugendera umuntu, tutibagiye inyigisho za Bibiliya, gukoresha ugusubiramwo bishobora gusaba ko ukoresha ibibazo vyagenewe isubiramwo.

Igihe umuntu asanze bigoye gutahura canke gushira mu ngiro impanuro za Bibiliya, bishobora kuba ngombwa ko ugarukana ico kintu incuro nka zingahe. Niwihatire kubigira mu buryo bunyuranye. Ivyo biganiro ntibikeneye kuba birebire, mugabo bikwiye kuremesha nya mutohoji kuguma yiyumvira ico kintu. Ibuka yuko Yezu yakoresheje ubwo buryo bw’ugusubiramwo mu gufasha abigishwa biwe gutsinda icipfuzo co kuba mu kibanza ca mbere.—Mat. 18:1-6; 20:20-28; Luka 22:24-27.

Igihe Ushikiriza Insiguro. Igihe utanga insiguro uri ku mukiruruko, intumbero yawe si iyo gushikiriza gusa amakuru. Ushaka yuko abakwumviriza bayitahura, bakayibuka, kandi bakayishira mu ngiro. Kugira ivyo ubishikeko, nukoreshe neza ugusubiramwo.

Ariko rero, mu gihe usubiyemwo ivyiyumviro nyamukuru incuro nyinshi, abakwumviriza bashobora kureka kugukurikira. Nuhitemwo witonze ivyiyumviro bikwiriye gushimikwako mu buryo budasanzwe. Ahanini ivyo biba ari ivyiyumviro nyamukuru insiguro yawe yubakiyeko, mugabo biranashobora kujamwo n’ibindi vyiyumviro bizogirira akamaro kanini abakwumviriza.

Kugira ngo ukoreshe ugusubiramwo, ushobora kubanza kuvuga ivyiyumviro nyamukuru vyawe mu ntangamarara. Ivyo bigire ukoresheje amungane magufi atanga iciyumviro rusangi c’ivyo uja gushikiriza, ukoresheje ibibazo canke uturorero tugufitugufi twerekana ingorane zija gutorerwa umuti. Ushobora kuvuga uko ivyiyumviro nyamukuru bihari bingana kandi ukabitondeka ku nomero. Hanyuma nuce irya n’ino kimwe cose muri ivyo vyiyumviro mu mutumba w’insiguro yawe. Urashobora kwongereza ugushimika mu mutumba w’insiguro yawe mu gusubiramwo iciyumviro nyamukuru kimwekimwe cose imbere y’uko uja ku gikurikira. Canke birashobora kugirwa mu gukoresha akarorero gasaba yuko werekana ishirwa mu ngiro ry’iciyumviro nyamukuru. Urashobora kandi kwongereza ugushimika ku vyiyumviro nyamukuru ushikiriza mu gukoresha insozero ibisubiramwo, ibishira ahabona, ikoresheje amajambo ahushanya ibintu, yishura ibibazo vyari vyabajijwe, canke yerekana muri make umuti w’ingorane yari yavuzwe.

Turetse ivyo duhejeje kuvuga, umushikirizansiguro aciye uruma aritegereza yitonze abantu bagize abamwumviriza. Nimba bamwe muri bo basanga hariho iciyumviro kinaka kibagoye gutahura, umushikirizansiguro arabimenya. Nimba ico ciyumviro ari igihambaye, arasubira akagishikiriza. Ariko rero, gusubiramwo ya majambo nyene bishobora kutamushikana ku ntumbero yiwe. Kwigisha si ukwo gusa. Umushikirizansiguro ategerezwa kuba umuntu ahuza ivyo avuga n’uko ibintu vyifashe. Bishobora kuba bikenewe yuko agira utundi tuntu yongera mu nsiguro yiwe. Ukuntu wiga gushikira abumviriza ku vyo bakeneye ubigize muri ubwo buryo, bizokwerekana ku rugero runini ko uri umwigisha ashika ku nyota.