Inyobozo Zihabwa Abacungezi b’Ishure

MW’ISHENGERO rimwerimwe ryose, hariho umukurambere aba yaragenywe ngo abe umucungezi w’Ishure ry’Ubusuku bwa Gitewokarasi. Nimba washinzwe iryo banga, ubushwashwanutsi ugirira ishure hamwe n’ukuntu witwararika iterambere ry’umunyeshure wese birashobora kugira ico biterereye kinini mu vyo ishure rishitsa aho iwanyu.

Igihimba gihambaye c’ibanga washinzwe ni uguhagarikira Ishure ry’Ubusuku bwa Gitewokarasi mw’ishengero ryanyu. Uramiza mu muzirikanyi yuko turetse abanyeshure bafise ibigabu igihe ico ari co cose ishure rigizwe, abandi baba bariko barakurikira. Nurongore ishure mu buryo ishengero ryose rigira ivyo ryibukijwe bikabura, vy’ingirakamaro kandi bijanye n’imiburiburi n’imwe mu ntumbero z’ishure zivugwa muri iki gitabu ku rupapuro rwa 5 gushika ku rw’8.

Niwitwararike abanyeshure bose, baba abashizwe ku rutonde kugira ngo bashikirize ibigabu bijanye n’ugusoma, ibiganiro bitangwa mu buryo bw’imyerekano, canke kugira bashikirize insiguro. Bafashe ivyo bariko barakora ntibabibone nk’ikigabu bashinzwe gusa, mugabo babibone nk’akaryo ko kugira iterambere mu murimo barangurira Yehova. Akigoro ubwabo bagira birumvikana ko ari ikintu nyamukuru kizotuma batera imbere. Mugabo birahambaye kandi yuko werekana ko ubitwararikanye ubugwaneza, ko ubafasha gutahura agaciro k’amanuta y’impanuro no gutahura ukuntu bakurikiza mwene izo mpanuro. Kugira ivyo ubishikeko, niwumvirize witonze insiguro imwimwe yose kugira ngo ubagire inama z’ingirakamaro.

Uritwararika gutangura ishure ku gihe no kuriheza ku gihe. Igihe utanga insasanuro, nutange akarorero keza mu kutarenza umwanya wagenewe. Igihe insiguro umunyeshure atanze irengeje umwanya, wewe canke umufasha wawe mukwiye gutanga ikimenyetso. Umunyeshure akwiye guca asozera iryungane ryiwe hanyuma akava ku mukiruruko. Nimba hari ikindi gihimba ca porogarama kirengeje umwanya, nugabanye insasanuro zawe hanyuma uheze ubiganire na nya muvukanyi inyuma y’ikoraniro.

Igihe ari ho uri, ukwiye kurongora iryo shure. Nimba hagize igihe uba atari ho uri, uwundi mukurambere aba yagenywe n’inama y’abakurambere arakwiye kuriraba. Nimba ukeneye gufashwa mu vyo gutegura urutonde, kwandika udukaratasi tw’ibigabu no kutugabanganya, canke kuringaniza ivy’abasubirira abandi ku rutonde, umukozi w’ishengero yagenywe n’inama y’abakurambere ashobora gusahiriza muri ivyo bintu.

Kwandika Abanyeshure. Remesha abamamaji bose biyandikishe mw’ishure. Abandi bifatanya n’ishengero bashirutse ubute barashobora kwandikwa nimba bemeranya n’inyigisho zo muri Bibiliya kandi ubuzima bwabo bukaba buhuye n’ingingo ngenderwako za gikirisu. Igihe hari umuntu aseruye icipfuzo co kwandikwa, numukeze n’igishika cinshi. Nimba nya muntu ataraba umwamamaji, wewe bwa mucungezi w’ishure ukwiye kuganira na we ku bisabwa ku muntu agomba kwandikwa mw’ishure, bikaba vyoba vyiza ubigize uri kumwe n’umuntu amurongorera inyigisho ya Bibiliya (canke uri kumwe n’umuvyeyi wiwe yizeye). Ivyo bisabwa ni nka vya bindi birabwa kugira ngo umuntu abe umwamamaji atarabatizwa. Tubisanga ku rupapuro rwa 99 gushika ku rw’101 mu gitabu Twagizwe Ishirahamwe ngo Dushitse Ubusuku Bwacu. Nuzigame urutonde rushasha rw’abantu bose biyandikishije muri iryo shure.

Gukoresha Ifomu y’Impanuro. Ifomu y’impanuro y’umunyeshure wese iri mu gitabu ciwe, ku rupapuro rwa 79 gushika ku rwa 81. Nk’uko vyerekanwa n’irya mirongo y’amabara, inuta iryo ari ryo ryose ry’impanuro kuva ku rya 1 gushika ku rya 17 rishobora gukoreshwa igihe umunyeshure ahawe ikigabu c’ugusoma. Ku biganiro bishikirizwa mu buryo bw’imyerekano, inuta iryo ari ryo ryose ry’impanuro rishobora gukoreshwa kiretse iry’7, irya 52 n’irya 53. Mu mpanuro zitangwa ku bw’insiguro harimwo amanuta yose kiretse iry’7, 18 n’irya 30.

Igihe inuta ry’impanuro ritanzwe, umucungezi w’ishure akwiye kwitwararika kwandikisha ikaramu y’igiti musi y’ahavuga ngo “Itariki Yashinzwe,” mu mwanya wasigajwe ahakurikira inuta kw’ifomu y’impanuro iri mu gitabu c’umunyeshure. Umunyeshure amaze gushikiriza ikigabu ciwe, mubaze mu mwiherero ko yoba yarakoze umwimenyerezo canke imyimenyerezo yerekanywe ku mpera z’ikiganiro gisigura ivy’iryo nuta ry’impanuro. Nimba yarayikoze, urakwiye gushira akamenyetso mu kumba ko kuri iyo fomu. Nimba umusaba ko yobandanya gukorera kuri iryo nuta nyene, nta kindi kintu gikeneye kwandikwa kuri iyo fomu y’impanuro; ntihagire ico wandika ahavuga ngo “Itariki Rinonosoreweko.” Aho hakwiye kwandikwa igihe gusa ageze kuja ku rindi nuta. Vyongeye, ku rupapuro rwa 82 rw’igitabu c’umunyeshure, ku ruhande rw’ibubamfu rw’ikiringo cafatiweko, harakwiye kwandikwa itariki inyuma y’ikiganiro cose umunyeshure ashikirije. Hariho umwanya wasigajwe kw’ifomu y’impanuro be no ku rutonde rw’ibiringo bifatirwako kugira ngo kimwekimwe cose gishobore gukoreshwa kabiri. Abanyeshure bakwiye kuba bafise ibitabu vyabo mu gihe c’ishure.

Nuhe umuntu gukorera kw’inuta rimwerimwe gusa ry’impanuro. Mu bisanzwe, birarushiriza kuba vyiza gukorera ku manuta y’impanuro muri rurya rutonde arimwo. Ariko rero mu gihe abanyeshure bamwebamwe berekanye ubuhanga bwibonekeje, ushobora kubaremesha kwiga ivyigwa bimwebimwe no kubikurikiza ubwabo batarinze kubigirira mw’ishure. Maze urashobora rero kubafashiriza ku manuta ubona ko azobungura kugira ngo batere imbere mu vyo kuba abashikirizansiguro n’abigisha bashika ku nyota.

No mu gihe nyene umunyeshure yoba amaze imyaka myinshi ari mw’ishure, arashobora kwungukira cane ku kwiga no gukurikiza icigwa kimwekimwe cose. Mu gufasha abanyeshure mu bintu bidasanzwe bakenera, ushobora gutoranya kamere zimwezimwe z’ivy’ukuvuga bakeneye kugira bazikorereko, aho gupfa gusubiramwo impanuro zose uko zitonze kw’ifomu.

Gutanga Impanuro. Igihe utanga impanuro, koresha neza uturorero n’ingingo ngenderwako vyo muri Bibiliya. Abanyeshure bakwiye gutegera yuko impanuro itanzwe be n’ingene itanzwe bigengwa n’ingingo ngenderwako ziri hejuru zo mw’Ijambo ry’Imana.

Uramiza ku muzirikanyi yuko uri ‘umukozi akorana’ n’abavukanyi be n’abavukanyikazi bawe. (2 Kor. 1:24) Cokimwe na bo, urakeneye kuguma ubwawe wijukira kuryohora ubuhanga bwo kuvuga no kwigisha. Ubwawe, niwige iki gitabu Niwungukire ku Nyigisho yo mw’Ishure ry’Ubusuku bwa Gitewokarasi, ushire mu ngiro impanuro gitanga, wongere uhe abandi akarorero keza kugira ngo na bo bagire kuno.

Uko ubigira, niwishingire intumbero yo gusahiriza abanyeshure kugira ngo bacike abasomyi beza, abashikirizansiguro babushitse, n’abigisha babishoboye. Kugira ngo ivyo ubishikeko, niwihatire gutanga imfashanyo yose ikenewe kugira ngo abanyeshure batahure kamere zinyuranye z’ivy’ukuvuga izo ari zo, igituma zihambaye, be n’ukuntu bozitsimbataza. Iki gitabu cahawe imero izogufasha kubishikako. Ariko rero, kenshi usanga hariho ibintu vyinshi bikenewe ku ruhande rwawe atari gusa ugusoma amajambo ari muri iki gitabu. Niwihweze iciyumviro nya majambo aserura be n’ukuntu wogikurikiza.

Mu gihe umunyeshure yakoze neza kw’inuta kanaka, mukeze. Vuga muri make icatumye biba ibishika ku nyota canke igituma ivyo yakoze bihambaye. Nimba vyomubera vyiza ko yongera kwitwararika ikintu kinaka, raba neza yuko atahura igituma. Nuvuge ukuntu yobigenza. Mutomorere, ariko kandi ubigirane ubugwaneza.

Menya yuko kuri benshi, guhaguruka ngo baje gushikiriza ikiganiro imbere y’abantu benshi ari ikintu kigoye cane. Nimba hari umuntu yiyumvamwo ko atabigize neza, hari aho yoba yibaza nimba akwiye kuguma agerageza. Niwigane Yezu, uwutahohosha “irenga rivunitse” canke ngo azimye “urumuri ruyenga.” (Mat. 12:20) Ntiwirengagize ukuntu nya munyeshure ashobora kuba amerewe mu mutima. Igihe utanga impanuro, banza urabe nimba uwo munyeshure ari nka mushasha canke ko yoba ari umwamamaji amenyereye. Gukeza abantu n’igishika kandi bivuye ku mutima birashobora kubakomeza bigatuma baguma bakora uko bashoboye kwose.

Umunyeshure wese mufatane urupfasoni. Mu Baroma 12:10 hatubwira hati: “Ku vy’icubahiro, umuntu wese ashire imbere mugenzi we.” Ese ukuntu ari impanuro ibereye ku muhanuzi wo mw’Ishure ry’Ubusuku bwa Gitewokarasi! Nimba uwo munyeshure akuze kukuruta, nukurikize witonze ubuyobozi butangwa muri 1 Timoteyo 5:1, 2. Ariko rero, ata kuraba imyaka umuntu afise, igihe hatanzwe impanuro isaba umuntu guhindura uburyo akora ibintu igatangwa mu bugwaneza, kenshi yakirwa ningoga.—Imig. 25:11.

Igihe uhanura, nugumize imbere y’uwo munyeshure intumbero y’ukumenyerezwa. Iyo ntumbero si ugukora neza bihagije kugira gusa akezwe yongere abwirwe ko yobandaniriza kw’inuta ry’impanuro rikurikira. Ihangiro si ukugira ngo abe umushikirizansiguro n’umwigisha abandi bazokwikugura. (Imig. 25:27) Icipfuzo cacu ni ugukoresha ingabirano dufise y’ukuvuga kugira ngo dushemeze Yehova twongere dufashe abandi kumumenya no kumukunda. Tumenyerezwa kugira ngo turonswe ibikwiye ngo tubone kwitwararika neza igikorwa cerekanywe muri Matayo 24:14 no muri Matayo 28:19, 20. Abavukanyi babatijwe bakwiza ibisabwa boteba bagasabwa kugira uruhara mu vyo kwitwararika “ubusho bg’Imana” mu gushikiriza insiguro no mu kwigisha ku mugaragaro.—1 Pet. 5:2, 3.

Gira inama abanyeshure yuko bosoma ikiganiro co kw’inuta ry’impanuro rikurikira riri mu gitabu, babigire mu misi mikeyi ikurikira bamaze kurishingwa. Baremeshe ivyo biga babikurikize mu gutegura ibihimba bashikiriza mw’ishure, mu biyago vya misi yose, mu gutanga insasanuro ku makoraniro, no mu murimo wo mu ndimiro.

Gushinga Abanyeshure Ibigabu. Mu bisanzwe ivyo bikwiye kugirwa n’imiburiburi amayinga atatu imbere y’igihe. Mwene ivyo bigabu vyose bikwiye gutangwa ku gakaratasi nimba bishoboka.

Ibihimba bisaba kwigisha ishengero bikwiye gushingwa abakurambere, bikaba vyiza babaye abazobishikiriza mu buryo bushika ku nyota, bigashingwa kandi abakozi b’ishengero bigisha neza.

Mu kugira umenye insiguro zoshingwa abavukanyi be n’izoshingwa abavukanyikazi, kurikira amabwirizwa atanganwa ku rutonde rw’ishure. Nimba hari abavukanyi bake bashikiriza insiguro z’abanyeshure mugabo hakaba abavukanyikazi benshi, uraraba neza uhe abavukanyi akaryo gahagije ko gushikiriza insiguro zisaba ibirenze ugusoma gusa.

Ntiwirengagize uko ivyabo vyifashe igihe ubashinga ibigabu. Mbega vyoba bikenewe gushinga umukurambere canke umukozi w’ishengero ikigabu co mw’ishure ku musi afise ikigabu mw’Ikoraniro ry’Umurimo, canke ku ndwi nyene afise insiguro mw’ishengero? Vyoba bikenewe gushinga umuvukanyikazi kanaka gushikiriza ikiganiro ku musi nyene umwana wiwe mutoyi nya muvukanyikazi yokenera gufasha agifitiyeko? Canecane ku bijanye n’umwana mutoyi canke umunyeshure atarabatizwa, ubwo umutwe w’ijambo yashinzwe woba ari uwo bakwiranye? Raba neza yuko ikigabu gikwiranye n’inuta ry’impanuro uwo munyeshure akorerako.

Ku bigabu bishingwa abavukanyikazi, umunyeshure mu bisanzwe ni we yitoraniriza ikiringo afatirako kijanye n’amabwirizwa ari ku rupapuro rwa 78 n’urwa 82. Akwiye guhabwa umufasha umwe, mugabo hari aho n’uwundi yokoreshwa. Nimba hari umunyeshure asavye umufasha azoba yujuje neza ibikenewe kugira ngo ahuze n’ikiringo kinaka, mwoshobora kuraba ko mutobimusaba.

Amasomero y’Inyongera. Nimba hari abanyeshure barenga 50 biyandikishije, mushobora kuraba ko mutokoresha ibibanza vy’inyongera ku bw’ibihimba bishikirizwa n’abanyeshure. Mwisunze ibikenewe iwanyu, iyo ndinganizo yoshobora gukoreshwa ku biganiro vyose bishikirizwa n’abanyeshure, canke kuri bibiri vya nyuma gusa.

Isomero ryose ry’inyongera rikwiye kuba rifise umuhanuzi akwiza ibisabwa, bikaba vyoba vyiza abaye umukurambere. Aho bikenewe, umukozi w’ishengero abishoboye yoshobora gufasha. Iyemezwa ry’abo bahanuzi rikwiye kugirwa n’inama y’abakurambere. Nimukorane na bo musenyera ku mugozi umwe, kugira ngo abanyeshure bakurikiranwe neza mu kibanza ico ari co cose bazoshikiririzamwo ikigabu.

Ivyigwa Bidasanzwe Vyerekeye Ugusoma. Igihe inama y’abakurambere ibonye ko hari abantu batari bake mw’ishengero bakeneye inyigisho y’ishimikiro mu vy’ugusoma mu rurimi ishengero rikoresha, mushobora kugira indinganizo zavyo, bikajana n’Ishure ry’Ubusuku bwa Gitewokarasi. Izo nyigisho zishobora kuba zerekeye ubushobozi bw’ishimikiro bwo gusoma no kwandika, canke intumbero yavyo ikaba ari ukuryohora ubushobozi bwo gusoma.

Mwene ivyo vyigwa si ngombwa ngo bigirwe igihe nyene ibiganiro vy’abanyeshure biriko birashikirizwa mw’Ishure ry’Ubusuku bwa Gitewokarasi. Kugira ngo hatangwe imfashanyo ikwiye, hari aho hokenerwa umwanya uruta uwoshobora kuboneka mu gihe c’ishure. Abakurambere b’iwanyu bashobora kuraba ibikenewe be n’igihe izo nyigisho zotangirwako. Mwisunze ibikenewe, mworinganiza ivy’uko izo nyigisho zigirirwa umugwi w’abantu canke umuntu umwumwe ukwiwe.

Umwigisha abishoboye arakenewe. Icoba ciza, ico gikorwa gikwiye gushingwa umuvukanyi asoma neza kandi azi neza urwo rurimi. Nimba ata muvukanyi ariho, abakurambere boshobora gusaba umuvukanyikazi abishoboye, w’intangakarorero, ngo afashe. Uwo muvukanyikazi akwiye kwipfunga igitambara mu mutwe igihe atanga ivyo vyigwa.—1 Kor. 11:3-10; 1 Tim. 2:11, 12.

Ka gatabu Niwijukire Gusoma no Kwandika karabonetse mu ndimi nyinshi. Kagenewe gutanga ubwenge bwo gusoma no kwandika bw’ishimikiro. Ayandi mayagwa ajanye n’izo nyigisho yoshobora gukoreshwa, bivanye n’urugero rw’ubushobozi bwo gusoma abiyandikishije bafise. Igihe abanyeshure bamaze gutera imbere bihagije, bakwiye kuremeshwa kugira uruhara muri porogarama y’Ishure ry’Ubusuku bwa Gitewokarasi.

Wewe bwa mucungezi w’Ishure ry’Ubusuku bwa Gitewokarasi, urashobora gukora vyinshi kugira ngo ugire ico wunguye ishengero. Uritegura neza, kandi mu buryo bujanye n’impanuro iri mu Baroma 12:6-8 witwararike igikorwa washinzwe bwa mbitso y’agaciro iva ku Mana.