Ikiyago co gusozera abakurambere bagirana n’abipfuza kubatizwa

Ibatisimu ikunze kugirwa igihe habaye amateraniro n’amahwaniro y’Ivyabona vya Yehova. Mu mpera y’insiguro y’ibatisimu, umushikirizansiguro arasaba abagiye kubatizwa ngo bahaguruke maze bishure ibibazo bibiri bikurikira n’ijwi ryumvikana:

1. Woba warigaye ivyaha vyawe, uriyegurira Yehova wongera uremera uburyo yatunganije bwo kuturokora biciye kuri Yezu Kristu?

2. Woba utahura yuko ukubatizwa kwawe gutuma uba Icabona ca Yehova yifadikanije n’ishirahamwe ryiwe?

Igihe abipfuza kubatizwa bishuye ngo “ego” kuri ivyo bibazo, baba ‘batuye icese’ yuko bizera incungu be n’uko beguriye Yehova ubuzima bwabo bwose. (Rom. 10:9, 10) Abipfuza kubatizwa barakwiye kuzirikana imbere y’igihe kuri ivyo bibazo babijanishije n’isengesho, ku buryo batanga inyishu zivuye ku mutima.

Woba wariyeguriye Yehova mw’isengesho, uramusezeranira ko ari we wenyene uzosenga be n’uko gukora ivyo agomba ari vyo uzokwama ushira imbere mu buzima bwawe?

Woba ata mazinda na makeyi ufise yuko akaryo kabonetse woca ubatizwa?

Ni impuzu izihe zibereye mu gihe c’ibatisimu? (1 Tim. 2:9, 10; Yoh. 15:19; Flp. 1:10)

Dukwiye kwambara “mu rupfasoni no mu kurorana kw’umuzirikanyi” kugira twerekane ko “[du]tinya Imana.” Ku bw’ivyo, abagiye kubatizwa ntibakwiye kwambara mwene twa duhuzu abantu bogamwo canke impuzu ziriko ivyandiko canke ivyivugo. Bakwiye kwambara impuzu zimeze neza, zisukuye, zidatera ubuyega abandi kandi ziberanye n’ico kiringo.

Umuntu akwiye kugira inyifato iyihe igihe ariko arabatizwa? (Luka 3:21, 22)

Ibatisimu ya Yezu ni ko karorero abakirisu bisunga muri iki gihe. Yaratahura ko ibatisimu ari intambwe ihambaye, kandi ivyo vyaragaragariye mu nyifato yiwe n’ibikorwa vyiwe. Ku bw’ivyo, aho kubatiriza ntihakwiye kuba ahantu ho kuvugira ibijajuro, gukinira, kwogera canke gukorera ibindi bintu vyohava bituma urwo rubanza rutakaza agaciro karwo. Eka mbere uwuhejeje kubatizwa ntiyokwigenza nk’aho yoba atahukanye intsinzi ikomeye. Naho ibatisimu ari igihe c’umunezero, uwo munezero ukwiye guserurwa mu rupfasoni.

Kuguma witaba amakoraniro no kwifatanya n’abagize ishengero bizogufasha gute kubaho uhuza n’ukwiyegura kwawe?

Kubera iki bihambaye ko ugumana urutonde rwiza rwo kwiyigisha kandi ukagira uruhara mu ndimiro udahorereza n’inyuma y’ibatisimu?

UBUYOBOZI BUGENEWE ABAKURAMBERE B’ISHENGERO

Igihe umwamamaji amenyesheje ko yipfuza kubatizwa, akwiye kuremeshwa gusuzuma yitonze “Ibibazo vy’abipfuza kubatizwa” biri ku rupapuro rwa 185-206. Abakurambere bakwiye kumusaba kwihweza “Akajambo kagenewe umwamamaji atarabatizwa.” Ako kajambo gahera ku rupapuro rwa 182, kakaba kamwereka ingene yokwitegurira ibiyago azogirana n’abakurambere. Nk’uko vyerekanwa muri ako kajambo, uwo mwamamaji yoshobora gukoresha utuntu yiyandikiye kandi mukayaga azinguruye iki gitabu. Ariko ntibikenewe ko hagira uwundi basuzumira hamwe ivyo bibazo imbere yo kubonana n’abakurambere.

Umuntu wese yipfuza kubatizwa akwiye kubimenyesha umuhuzabikorwa w’inama y’abakurambere. Uwo muntu amaze gufata umwanya wo kwihweza “Ibibazo vy’abipfuza kubatizwa,” umuhuzabikorwa w’inama y’abakurambere azomubaza ko yamaze kwiyegurira Imana mw’isengesho kugira akore ivyo igomba. Nimba yaramaze kwiyegura, umuhuzabikorwa w’inama y’abakurambere azotunganya ko abakurambere babiri baganira na we “Ibibazo vy’abipfuza kubatizwa.” Umwumwe azoganira na we ku gice kimwe. Si ngombwa ngo murindire itangazo ry’uko mwimirije iteraniro canke ihwaniro ngo abe ari ho muganira na we.

Mu bisanzwe, birya bihimba bibiri murashobora kubirimbura mu biringo bibiri bimara isaha imwimwe, ariko nta cobuza ko mwokoresha umwanya urenze uwo igihe bikenewe. Buri kiringo gikwiye gutanguzwa n’isengesho kandi kigasozerwa n’irindi. Yaba uwipfuza kubatizwa canke abakurambere, nta n’umwe akwiye kwihutagiza mu gihe co kurimbura ivyo bibazo. Abakurambere bashinzwe ico gikorwa bakwiye kugishira imbere mu vyo barangura.

Mu bisanzwe, ni vyiza kwihweza ivyo bibazo n’umwumwe wese mu bipfuza kubatizwa aho kuvyihwereza mu mugwi. Igihe uwipfuza kubatizwa atanze inyishu ku bibazo vyose, birafasha abakurambere kubona aho ugutahura kwiwe kugera, maze bakamenya neza ko akwiye kubatizwa canke atabikwiye. Vyongeye, hari aho uwipfuza kubatizwa yokworoherwa no guserura iryo agona igihe ata bandi bantu bahari. Abubakanye boshobora kubazwa ivyo bibazo bari kumwe.

Mu gihe uwipfuza kubatizwa ari umudada, ivyo biyago bikwiye kubera ahantu abandi bashobora kubabona ariko ntibumve ivyo bavuga. Nimba bikenewe ko uwusuzuma uwo mwamamaji ajana n’uwundi muntu, akwiye kuba ari umukurambere canke umukozi w’ishengero, bivanye n’igihimba kiriko kirihwezwa, nk’uko vyerekanwa mu ngingo ikurikira.

Mu mashengero afise abakurambere bake, abakozi b’ishengero babishoboye kandi bamaze kwerekana ko babona ibintu mu buryo bwiza be n’uko bafise ugutahura, boshobora kwihwereza hamwe n’abipfuza kubatizwa ibibazo vyo mu gice ca 1 kivuga ngo “Ivyo twemera.” Abakurambere gusa ni bo bakwiye kwihwereza hamwe n’abipfuza kubatizwa igice ca 2 kivuga ngo “Kubaho rukirisu.” Nimba ishengero ridafise abavukanyi bahagije bakwije ibisabwa, mwoshobora kwitura umucungezi w’umuzunguruko akaraba ko hari ishengero ribanyi ryobafasha.

Nimba uwo yipfuza kubatizwa ari umwana ataragera mu bigero, abavyeyi biwe bakwiye kuba ari ho bari mu gihe co kumusuzuma nimba ari Ivyabona. Nimba abavyeyi biwe badashobora kuboneka, akwiye guca asuzumwa n’abakurambere babiri (canke umukurambere n’umukozi w’ishengero bivanye n’igice barimbura).

Abakurambere bazoraba ko uwipfuza kubatizwa atahura inyigisho z’ishimikiro zo muri Bibiliya ku rugero rutegereka. Vyongeye, bakwiye kuraba ko aha agaciro cane ukuri be n’uko yubaha ishirahamwe rya Yehova nk’uko bibereye. Nimba uwo muntu adatahura inyigisho z’ishimikiro zo muri Bibiliya, abakurambere bazoringaniza ivy’uko yofashwa kugira akwize ibisabwa maze azobatizwe ikindi gihe. Ku bandi na ho, hari aho wosanga bakeneye guhabwa uwundi mwanya kugira berekane ko baha agaciro indimiro canke ko bayoboka indinganizo z’ishirahamwe. Bizosaba ko abakurambere bakoresha neza wa mwanya w’isaha imwe canke irenga bamara ku gihimba kimwekimwe cose kugira bamenye neza ko uwo muntu yiteguriye kubatizwa. Naho ibibazo bimwebimwe boshobora kubimarako umwanya muremure kuruta uwo bamara ku bindi, nta kibazo na kimwe bakwiye gusimba.

Abakurambere bashinzwe kwihweza ivyo bibazo bazohurira hamwe inyuma y’igice ca kabiri maze barabe ko uwo muntu yoba akwiye kubatizwa. Abakurambere bazorimbura kahise k’umwe wese mu bipfuza kubatizwa, ubushobozi bwiwe n’ibindi bintu. Igihambaye ni uko uwo muntu aba akunda Yehova vy’ukuri kandi akaba atahura ukuri kw’ishimikiro kwo muri Bibiliya. Nimwafasha abipfuza kubatizwa mubigiranye urukundo, bazotera iyo ntambwe bafise ibikenewe vyose kugira barangure ibanga ryabo rihambaye ryo kwamamaza inkuru nziza.

Inyuma y’aho, umwe mu bakurambere bamusuzumye (canke bose uko ari babiri) akwiye kubonana na we maze akamumenyesha ko akwije ibisabwa canke atabikwije. Nimba akwije ibisabwa, abakurambere bakwiye kurabira hamwe na we “Ikiyago co gusozera abakurambere bagirana n’abipfuza kubatizwa” kiri ku rupapuro rwa 206-207. Nimba ataraheza igitabu Urashobora kwiberaho ibihe bidahera, abakurambere bakwiye kumuremesha kubandanya aciga inyuma y’ibatisimu. Nimumumenyeshe ko muzokwandika kw’ifishi yiwe itariki azobatirizwako. Nimumwibutse ko abakurambere bandika ayo makuru kugira ngo ishirahamwe rishobore kuguma rikurikirana igikorwa Ivyabona vya Yehova barangura kw’isi yose no kugira ngo ashobore kugira uruhara mu bikorwa vy’Ubwami yongere aronswe indemesho akeneye. Vyongeye, abakurambere barashobora kwibutsa abamamaji bashasha ko amakuru yose aberekeye akoreshwa hisunzwe Amategeko ajanye n’ingene Ivyabona vya Yehova bakingira amakuru kw’isi yose ari kuri jw.org. Ico kiyago ntigikwiye kurenza iminuta cumi.

Haciye umwaka umwamamaji abatijwe, abakurambere babiri bakwiye kubonana na we kugira bamuremeshe bongere bamugire inama ngirakamaro. Umwe muri abo bakurambere akwiye kuba ari umucungezi w’umugwi uwo mwamamaji arimwo. Nimba uwo mwamamaji ari umwana ataragera mu bigero, abavyeyi biwe bakwiye kuba ari ho bari nimba ari Ivyabona. Ico kiyago gikwiye kurangwa n’igishika kandi kikaba ikiremesha. Abakurambere bazoganira kw’iterambere ryiwe ryo mu vy’impwemu bongere bamugire inama y’ukuntu yoshishikara akamenyero keza ko kwiyigisha no gusoma Bibiliya buri musi, kugira ugusenga kwo mu muryango buri ndwi, kwitaba amakoraniro no kuyagiramwo uruhara adahorereza hamwe no gusohoka mu ndimiro buri ndwi. (Ef. 5:15, 16) Nimba atahejeje igitabu Urashobora kwiberaho ibihe bidahera, abakurambere bakwiye kumuronderera umuntu amufasha kukirangiza. Bakwiye kumukeza cane babigiranye urukundo. Akenshi, kumuhanura no kumugira inama ku ciyumviro kimwe canke bibiri biba bihagije.