Urubanza Rushitswa mu Kiyaya Kirundurirwamwo Imanza

“Amahanga . . . adūge, aje mu kiyaya ca Yehoshafati: kukw ari ho nzovyagira, ngacira amatēka amahanga yose yo hirya no hino.”—YOWELI 3:12.

1. Ni kuki Yoweli abona amasinzi akoraniye mu ‘kiyaya co kurunduriramwo imanza’?

“EWE masinzi n’amasinzi ari mu kiyaya kizorundurirwamw’imanza!” Ayo majambo akabura tuyasoma muri Yoweli 3:14. Ni kuki ayo masinzi akoranira hamwe? Yoweli arishura ati: “Umusi w[a Yehova] uri hafi.” Ni umusi uhambaye Yehova azokwikurirako iceyi—umusi wo gushitsa urubanza ku masinzi yateye akagere Ubwami bwashinzwe bw’Imana burongowe na Kirisitu Yezu. Amaherezo, ba “bamarayika bane” bo mu Vyahishuriwe ikigabane c’7 bazorekura ya “miyaga ine yo kw isi,” bitume haba “amarushwa ahambaye atigeze kubaho kuva kw itanguriro ry’isi ugashitsa n’ubu, kandi [a]tazokwongera kubaho.”—Ivyahishuriwe 7:1; Matayo 24:21.

2. (a) Ni kuki bikwiriye ko aho Yehova ashikiriza urubanza hitwa “ikiyaya ca Yehoshafati”? (b) Igihe Yehoshafati yaterwa, yavyifashemwo mu buryo bubereye gute?

² Muri Yoweli 3:12, aho urwo rubanza ruzoshikirizwa hitwa “mu kiyaya ca Yehoshafati.” Mu buryo bubereye, mu kiringo ca kahise k’Ubuyuda kari kuzuye umudurumbanyo, Yehova yarahashikirije urubanza ku neza ya wa Mwami mwiza Yehoshafati, uwo izina ryiwe risigura ngo “Yehova Ni Umucamanza.” Umwihwezo w’ivyashitse muri ico gihe uraja kudufasha gutahura neza kuruta ivyimirije gushika muri iki gihe turimwo. Iyo nkuru tuyisanga muri 2 Ngoma ikigabane ca 20. Ku murongo wa 1 w’ico kigabane, tuhasoma yuko “Abanyamowabu n’Abamoni hamwe n’ab’i Mayoni bamwe bate[ye] Yehoshafati ngo bamurwanye.” Yehoshafati yavyifashemwo ate? Yagize ivyo abasavyi ba Yehova b’abizerwa bagira igihe cose bari mu magume. Yahindukiriye Yehova kugira amuyobore, asabana umwete ati: “Ewe Mana yacu, mbega none ntiwobacirakw itēka? Kukw ata nkomezi dufise zo kurwanya ico gitero kingana girtyo kije kudutera, kandi turabuze ico twokora; ariko ni wewe duhanze amaso.”—2 Ngoma 20:12.

Yehova Yishura Isengesho

3. Ni amabwirizwa ayahe Yehova yahaye Yuda igihe iryo hanga ryahangana n’igitero c’amahanga yari arikikije?

³ Igihe “Abayuda bose [bari bahagaze] ngaho imbere y[a Yehova], bari kumwe n’utwana twabo dutoduto, n’abagore babo, n’abana babo bakuze,” Yehova yarishuye. (2 Ngoma 20:13) Nka kumwe nyene uwo Mutegagutwi w’isengesho mukuru akoresha ‘wa mushumba w’umwizerwa kandi w’incabwenge’ wiwe muri iki gihe, ni ko yahaye umuhanuzi w’Umulewi Yahaziyeli ingoga kugira ngo ashikirize abari bakoranye inyishu Yehova atanze. (Matayo 24:45) Dusoma uku: “Uku ni k[o Yehova] agize: ati Nta co mutinya, canke ngo muranduke imitima kubg’ayo masinzi y’ingabo; kukw intambara atar’iyanyu, ariko n’iy’Imana. . . . Mur’iyo ntambara ntimuzorinda kurwana, ariko muze mutonde urugamba, mwihagararire gusa, murābe agakiza [Yehova] azobakirisha, . . . Ntimuze mutinye, canke ngo muranduke imitima: ejo muze muje kubatega, kuk[o Yehova] azoba ari kumwe namwe.”—2 Ngoma 20:15-17.

4. Ni mu buryo ki Yehova yasavye ko igisata ciwe kigira ico gikoze, ntibarere gusa amaboko igihe bahanganye n’umwansi?

⁴ Yehova ntiyasavye Umwami Yehoshafati n’igisata ciwe kwiyicarira gusa, barindiriye kurokorwa ku gitangaro. Bategerezwa kwibwiriza ku vyerekeye ukwirwanako bagahangana n’umwansi. Umwami n’ ‘abo mu Buyuda bose, hamwe nyene n’utwana twabo dutoduto, abagore babo hamwe n’abana bakuze babo,’ baragaragaje ukwizera gukomeye igihe bagamburuka bakazinduka bagenda guhura n’ayo masinzi yari abateye. Mu nzira, uwo mwami yaguma abashikiriza amabwirizwa ya gitewokarasi yongera abaremesha, mu kubahimiriza ati: “Mwizere [Yehova] Imana yanyu, mubone gushikama; mwizere n’abavugishwa na we, mubone gutsinda.” (2 Ngoma 20:20) Kwizera Yehova! Kwizera abahanuzi biwe! Aho ni ho intsinzi yari ihagaze. No muri iki gihe nyene, uko tubandanya mu gikorwa ca Yehova dushirutse ubute, ntitukigere dukeka ivy’uko azotuma ukwizera kwacu gutsinda!

5. Muri iki gihe Ivyabona vya Yehova bagira umwete gute mu gushemeza Yehova?

⁵ Nk’uko Abayuda bo mu gihe ca Yehoshafati babigenjeje, dukwiye ‘gushemeza Yehova, kukw’imbabazi ziwe ar’iz’ibihe bidashira.’ Tumushemeza nk’ukwo dute? Tumushemeza mu kwamamaza Ubwami n’umwete! Nk’uko abo bayuda “ba[tanguye] kuririmba no gutazīra,” ni ko natwe ukwizera kwacu tukwuhiriza ibikorwa. (2 Ngoma 20:21, 22) Egome, nitubandanye kugaragaza ukwizera gukomeye mwen’ukwo mu gihe Yehova yitegurira gutera abansi biwe! Naho impinga yosa n’uko ari ndende, nitwiyemeze kurindirako, dushikamye mu kwizera, nk’uko nyene abo mu gisata ciwe cenintsinzi babigenza mu mihingo yo kw isi yuzuye imidurumbanyo muri iki gihe. Mu bihugu bimwebimwe bisinzikajwe n’uruhamo, ubukozi bw’ikibi, amapfa, n’ubutunzi bukaba bwifashe nabi, abasavyi b’Imana b’abizerwa bararonka ingaruka nziza bitangaje, nk’uko igitabu Annuaire des Témoins de Jéhovah 1998 kibivuga.

Yehova Akiza Igisata Ciwe

6. Ukwizera gukomeye kudufasha gute kuguma turi intadohoka muri iki gihe?

⁶ Amahanga atayobokera Imana yari akikije Ubuyuda yaragerageje kunigira mu menshi igisata c’Imana, mugabo abasavyi ba Yehova basubijeyo mu kuririmba amashemezo yiwe bafise ukwizera kw’akarorero. Turashobora guserura ukwizera nk’ukwo nyene muri iki gihe. Mu kwuzuza ubuzima bwacu ibikorwa vy’ugushemeza Yehova, turakomeza ibirwanisho vyacu vy’impwemu, kugira ngo ntiduhe urwenge rwa Shetani akaryo na kamwe ko kuduca mu ryahumye. (Abanyefeso 6:11) Ukwizera gukomeye kuzotuma tutoshwa ngo dusamazwe n’ibinezereza biteye isoni, uguhahamira amaronko n’ukuba sindabibazwa biranga iyi si idukikije iri ku mpfiro. Ukwo kwizera kw’intatsindwa kuzotuma tuguma dukora tudahemuka dufatanije na wa ‘mushumba w’umwizerwa kandi w’incabwenge,’ uko dufungurirwa ubudahengeshanya ingaburo zigizwe n’ibifungurwa vy’impwemu bitangwa “igihe kigeze.”—Matayo 24:45.

7. Ivyabona vya Yehova bishuye gute ibitero bitandukanye baterwa?

⁷ Ukwizera kwacu gushingiye kuri Bibiliya kuzodukomeza kugira duhagarare dushikamye duhangana n’amasekeza y’urwanko agirwa n’abagaragaza agatima nk’aka wa ‘mushumba mubi’ wo muri Matayo 24:48-51. Mu gushitsa ubwo buhanuzi mu buryo butangaje, mu bihugu vyinshi abahakanyi barakwiragiza ibinyoma n’amaporopagande, bakaniyunga ku bantu bamwebamwe bafise ubukuru mu vy’intwaro mu mahanga. Aho vyari bibereye, Ivyabona vya Yehova barishuye, nk’uko bidondorwa mu B’i Fifilipi 1:7, mu ‘kuburanira ubutumwa bwiza no mu kubutsimbataza [ngo bwemerwe n’amategeko].’ Nk’akarorero, kw igenekerezo rya 26 Nyakanga 1996, mu rubanza rwaje ruva mu Bugiriki, abacamanza icenda ba ya Sentare y’i Buraya Iharanira Agateka ka Zina Muntu ishashe i Strasbourg barasubiriye kwemerera hamwe yuko “Ivyabona vya Yehova boharurwa nk’ ‘idini izwi,’ ” ko bafise uburenganzira bwo kugira umwidegemvyo w’ijwi ryo mu mutima, wo mu vy’idini no mu vyo bemera, hamwe n’uburenganzira bwo kumenyekanisha ukwizera kwabo. Ku vyerekeye abahakanyi bo, urubanza rw’Imana ruvuga ruti: “Ivyabashitseko n’ivy’uyu mugani w’ukuri ngw Imbga isubiye ku vy’idashwe; kandi, ngw Ingurube yuhagiwe isubiye kwivurunga mu vyondo.”—2 Petero 2:22.

8. Mu gihe ca Yehoshafati, ni gute Yehova yashikije urubanza ku bansi b’igisata ciwe?

⁸ Mu gihe ca Yehoshafati, Yehova yarashikije urubanza ku bashaka kugirira nabi igisata ciwe. Dusoma duti: “[Yehova] ashirah’abo guca igico abāri baje gutera i Buyuda, ari bo Bamoni n’Abanyamowabu n’abāvuye ku musozi Seyiri, baca basubiranamwo. Kukw Abamoni n’Abanyamowabu baciye bahindukirana abāvuye ku musozi Seyiri, kugira ngo babice, babageseze; nuko bamaze guherengeteza abo Banyaseyiri, bīsubiraniramw’ubgabo, umuntu wese na mugenzi we bashirako baricana.” (2 Ngoma 20:22, 23) Abayuda bise aho hantu Ikiyaya ca Beraka, Beraka bikaba bisigura “Umuhezagiro.” No muri iki gihe ca none, ugushitswa kw’urubanza kwa Yehova ku bansi biwe kuzovyara imihezagiro ku gisata ciwe bwite.

9, 10. Ni bande berekanye ko bakwiriye gucirwa rubi na Yehova?

⁹ Dushobora kubaza, duti Ni bande mu gihe ca none baraririye gucirwa rubi na Yehova? Kugira ngo turonke inyishu y’ico kibazo, dukwiye gusubira ku buhanuzi bwa Yoweli. Yoweli 3:3 havuga ivy’abansi b’igisata ciwe, ngo “umuhungu [ba]mutanga kw impēra ya maraya, n’umukobga bakamugura vino ngo bīnywere.” Egome, babona abasavyi b’Imana nk’abari hasi yabo cane, abana babo nk’abafise agaciro katarenze igihembo cohabwa maraya canke ikiguzi c’agakarabo k’umuvinyu. Ivyo babwirizwa kuzobibazwa.

¹⁰ Abazocirwa urubanza nk’urwo ni abakora ubumaraya bwo mu vy’impwemu. (Ivyahishuriwe 17:3-6) Na canecane abandi bari n’ico babazwa ni abasunikira abakuru ba politike mu vy’uguhama Ivyabona vya Yehova no gutangira igikenurwa cabo, nk’uko indongozi z’idini zigumura abantu zabigize mu Buraya bwo mu Buseruko mu bihe biheruka. Yehova araserura umwiyemezo wiwe wo guhana abo bantu bakora akabi.—Yoweli 3:4-8.

‘Nimugabishe!’

11. Yehova ahigisha ate abansi biwe ngo batere indwano?

¹¹ Ubukurikira, Yehova atera akamo igisata ciwe ngo batangaze aka gahigo mu mahanga ngo: “Ni mugabishe, mugomore abahizi, ingabo zose ni zīgire hafi, zidūge.” (Yoweli 3:9) Ukwo ni uguhamagaza intambara idasanzwe—intambara igororotse. Ivyabona b’intadohoka ba Yehova bizigira ibirwanisho vy’impwemu igihe bishura poropagande y’ikinyoma, ububeshi bakabutsindisha ukuri. (2 Ab’i Korinto 10:4; Abanyefeso 6:17) Vuba, Imana igiye kugabisha “[i]ntambara yo ku musi uhambaye w’Imana Ishobora vyose.” Izokiza isi abantu bose barwanya ukuba Segaba kw’Imana. Abo mu gisata ciwe bazoba bari kw isi ntibazoyijamwo ngo barwane. Mu buryo nyabwo no mu buryo bw’ikigereranyo, ‘inkota zabo bazivunjemwo amasuka, amacumu yabo na yo bayavunjamwo inkero.’ (Yesaya 2:4) Ibinyuranye n’ivyo, Yehova arahigisha amahanga amurwanya ngo agire igihushane cavyo ngo: “Amasuka yanyu muyavunjavunje, muyacuremw’inkota, n’inkero zanyu muzivunjavunje, muzicuremw’amacumu.” (Yoweli 3:10) Abatera akamo kugomorora ibikoresho vy’indwano vyose bafise hamwe n’ibirwanisho vyabo bigezweho ngo babizane mu rugamba. Mugabo ntaco bashobora gushikako, kubera yuko urugamba n’intsinzi ari ivya Yehova!

12, 13. (a) Naho kwa gushamirana kw’ibihugu vya rutura kwaheze, ni gute amahanga menshi yerekana ko agikunda indwano? (b) Ni igiki amahanga atiteguriye?

¹² Mu ntango y’imyaka y’1990, amahanga yatangaje ko wa mushamirano w’ibihugu vya rutura warangiye. Turavye ivyo, twovuga none ko umugambi nyamukuru w’amahoro Ishirahamwe Mpuzamakungu ryishinze woba warashitsweko? Habe namba! Ibiba mu Burundi, muri Iraki, muri Liberiya, muri Repubulika Demokaratike ya Kongo, mu Rwanda, muri Somaliya hamwe n’ahahoze ari Yugosilaviya vyoba bitubwira iki? Mu majambo ari muri Yeremiya 6:14, bavuga bati: “N’amahoro, n’amahoro; kand’ata mahoro ariho.”

¹³ Naho indwano yeruye yahagaze mu mihingo imwimwe, ibihugu bigize Ishirahamwe Mpuzamakungu biracabandanya guhiganirwa ivy’uguhingura ibirwanisho vy’intambara bikozwe ku buhinga buhanitse. Bimwebimwe birabandanya kugumana ibirundo n’ibirundo vy’ibirwanisho ruhonyanganda. Ibindi birateza imbere ibirwanisho vy’ubumara canke bikoresha imikorobo vyo kuyogeza inganda. Uko ayo mahanga atororokanira mu karere k’ikigereranyo kitwa Harumagedoni, arayahigisha ati: “Umunyantege nke ni yivuge kw ar’umuhizi. Ni munyaruke muze, yemwe mahanga mwese yo hirya no hino, mukoranire hamwe.” Maze Yoweli aranyuzamwo aka kamo kiwe bwite: “Nawe [Yehova], n’ugomore abahizi bawe bamanuke!”—Yoweli 3:10, 11, ni twe duhiritse izo ndome.

Yehova Arakingira Abiwe

14. Abahizi ba Yehova ni bande?

¹⁴ Abahizi ba Yehova ni bande? Incuro nk’280 muri Bibiliya, Imana y’ukuri yitwa ‘Yehova Nyen’ingabo.’ (2 Abami 3:14) Izo ngabo ni amasinzi y’abamarayika bo mw ijuru bama biteguriye kugira ivyo Yehova abategetse. Igihe Abanyasiriya barondera gufata Elisa, Yehova amaherezo yarahumuye amaso y’umukozi wa Elisa kugira ngo abone igituma vyabataye ku w’amazi: “Umusozi wuzuye kw amafarasi n’imikogote vy’umuriro bikikije Elisa.” (2 Abami 6:17) Yezu yavuze yuko yari gushobora kwinginga Se akamurungikira “abamarayika basāga legiyono cumi na zibiri.” (Matayo 26:53) Mu gusigura ingene Yezu azogendera kw ifarasi kugira ngo ashitse urubanza kuri Harumagedoni, mu Vyahishuriwe havuga hati: “Ingabo zo mw ijuru ziramukurikira, zicaye ku mafarasi y’ibitare, zambaye impuzu nziza zera derere, zitanduye. Mu kanwa kiwe havamw’inkota ikarishe, kugira ngw ayikubite amahanga: azoyaragiza inkoni y’icuma. Kand’aganishiriza ibirenge mu bgato vino y’uburake bg’inkazi bg’Imana ishobora vyose.” (Ivyahishuriwe 19:14, 15) Ubwo bwato bw’ikigereranyo budondorwa mu majambo akomeye nk’ “[u]bgato bunini bg’ukuraka kw’Imana.”—Ivyahishuriwe 14:17-20.

15. Yoweli adondora ate indwano Yehova azorwana n’amahanga?

¹⁵ Ni gute none Yehova yishura ugutakamba kwa Yoweli ngo agomore abahizi biwe bwite bamanuke? Ni muri aya majambo akomeye ngo: “Amahanga ni yikangure, adūge, aje mu kiyaya ca Yehoshafati: kukw ari ho nzovyagira, ngacira amatēka amahanga yose yo hirya no hino. Ni musohore imihoro, kukw iyimbura rigeze! Ni muze mugane, kuk’ubgato bguzuye, kand’amāto akaba abōgabōga; kukw ibibi vyabo ari vyinshi. Ewe masinzi n’amasinzi ari mu kiyaya kizorundurirwamw’imanza! Kuk’umusi w[a Yehova] uri hafi, ah’imanza zizorundurirwa mu kiyaya! Izuba rizocura umwiza, bo n’ukwezi, kandi n’inyenyeri zizoca zireka kwaka. Maz[e Yehova] azokwivugira i Siyoni, arangurure ijwi ar’i Yerusalemu; ijuru n’isi bizotigita.”—Yoweli 3:12-16.

16. Ni bande bazoba bari mu bo Yehova azocirako iteka?

¹⁶ Nk’uko izina Yehoshafati risigura nyene ngo “Yehova Ni Umucamanza,” ni ko nyene Imana yacu Yehova izogarukira bimwe vyuzuye ukuba Segaba kwayo, niyashitsa urubanza. Ubwo buhanuzi budondora abazocirwa rubi ko ari ‘amasinzi, amasinzi mu kiyaya kirundurirwamwo imanza.’ Abashigikiye idini y’ikinyoma bagisigaye bose bazoba barimwo muri ayo masinzi. Hazoba harimwo kandi na bamwe bavugwa muri Zaburi ya kabiri—ni ukuvuga amahanga, imigwi y’amahanga, abami bo kw isi n’abatware—bahisemwo ivy’iyi si vyononekaye ah’uguhitamwo ‘gukorera Yehova batinya.’ Abo baranka ‘kugumbira wa mwana.’ (Zaburi 2:1, 2, 11, 12) Ntibemera icese Yezu ko ari we Mwami afadikanije na Yehova. Ikindi, amasinzi yadomweko ikimenyetso c’uguhonywa azoba arimwo abantu bose uwo Mwami azocira urubanza rw’uko ari “impene.” (Matayo 25:33, 41) Igihe gikwiriye c’uko Yehova yivugira muri Yeruzalemu yo mw ijuru nicashika, wa Mwami w’abami wiwe yagennywe azogendera kw ifarasi kugira ashitse urwo rubanza. Nta gukeka ijuru n’isi bizotigita! Ariko rero, turemererwa ibi: “[Yehova] azobera abantu biwe ubuhungiro, Abisirayeli ababere igihome co kubakingira.”—Yoweli 3:16.

17, 18. Ni bande badondorwa ko ari abazorokoka wa mubabaro ukomeye, kandi bazokwinovora ibintu bimenze gute?

¹⁷ Mu Vyahishuriwe 7:9-17 havuga ko abo barokotse umubabaro ukomeye ari “ishengero ryinshi” rigizwe n’abagaragaza ko bizeye ububasha bw’inkuka y’amaraso ya Yezu. Abo barakingirwa kuri wa musi wa Yehova, mu gihe ya masinzi arundaniye hamwe yo mu buhanuzi bwa Yoweli yihurira n’ugucirwa rubi. Yoweli abwira abazorokoka ati: “Aho ni ho muzomenyera yuko nd[i Yehova] Imana yanyu, mpangamye i Siyoni ku musozi wanje wera” mw ijuru aho Yehova aba.—Yoweli 3:17a.

¹⁸ Maze ubwo buhanuzi buratumenyesha yuko akarere k’Ubwami bw’Imana bwo mw ijuru “[ka]zoba ahēra, kandi nta bantu b’akavantara bazosubira kuhahita ukundi.” (Yoweli 3:17b) Mw ijuru no mu karere ko mw isi k’ubwo Bwami bw’ijuru, nta ba kavantara bazoba bariho, kubera ko bose bazoba bahurikiye hamwe mu gusenga gutyoroye.

19. Yoweli adondora gute ubuhirwe nk’ubwo mw iparadizo igisata c’Imana bafise muri iki gihe?

¹⁹ No muri iki gihe nyene, umusesekara w’amahoro urasasagaye mu igisata c’Imana aha kw isi. Baramamaza imanza ziwe bafatanye mu nda mu bihugu birenga 230 no mu ndimi zitandukanye zirenga 300. Ugusagamba kwabo kuravugwa na Yoweli mu buhanuzi mu buryo bw’akaroruhore ngo: “Kur’uwo musi, imisozi izojējēta vino ziryoshe, n’uturambi dutembe amata, kand’imigezi yose y’i Buyuda izosendanisha amazi.” (Yoweli 3:18) Egome, Yehova azobandanya kurindimurira ku bamushemeza bo kw isi umusesekara w’imihezagiro itera umunezero n’ubutunzi hamwe n’umugezi wiyongēra w’ukuri kw’agaciro. Ukuba Segaba kwa Yehova kuzoba kwagarukiwe bimwe vyuzuye mu kiyaya co kurundurirwamwo imanza, kandi umunezero uzoba ari wose igihe azoba acumbitse ibihe bidashira mu gisata ciwe cacunguwe.—Ivyahishuriwe 21:3, 4.

Woba Wibuka?

◻ Yehova yarokoye igisata ciwe gute mu misi ya Yehoshafati?

◻ Ni bande Yehova abona ko bakwiriye gusangangurirwa mu “kiyaya co kurundurirwamw imanza”?

◻ Abahizi ba Yehova ni bande, kandi ni uruhara uruhe bazogira muri ya matati ya nyuma?

◻ Ni amahirwe ayahe abasengana ukwizerwa bifitiye?

[Ifoto ku rup. 27]

Ubuyuda bwabwiwe buti: ‘Ntutinye kuko urugamba atari urwawe ariko ari urw’Imana’

[Ifoto ku rup. 29]

Yehova arahigisha abansi biwe ngo ‘inkota zabo bazivunjemwo amasuka’

[Ifoto ku rup. 30]

Bibiliya ivuga ko hariho ishengero rinini ry’abazorokoka wa mubabaro ukomeye