Ibibazo vy’Abasomyi

Kugura inyubakwa y’uwundi mugwi w’ivy’idini hanyuma igahindurwa Ingoro y’Ubwami bwoba ari uburyo bwo gusukiranya ukwizera?

Mu bisanzwe, Ivyabona vya Yehova baririnda kugiranira imigenderanire nk’iyo n’ayandi madini. Naho biri ukwo, ukugura nk’ukwo gushobora kutaba ari ugusukiranya ukwizera. Gushobora gusa kubonwa ko ari igikorwa kijanye n’ivy’ubucuruzi gikozwe ico gihe. Ishengero ry’Ivyabona vya Yehova ryo muri ako karere ntiriba ririko rirafashanya n’uwundi mugwi w’ivy’idini kwubaka ikibanza c’ugusengeramwo bazokoresha bompi.

Ni igiki Yehova afata ko ari ugusukiranya ukwizera? Rimbura ubuyobozi intumwa Paulo atanga, na bwo bukaba bugira buti: “Ntimwifatanye n’abatizera, kand’ata co musangiye: ukugororoka n’ukugabitanya bifatana bite? Cank’umuco n’umwiza bifatanya bite? Kandi Kristo ahūriye hehe na Beliyari? Cank’uwizera n’ūtizera basangiye iki? Kand’urusengero rw’Imana ruhūza rute n’ibigirwamana? . . . Nuko muve hagati ya ba bandi, mubītandukanyeko, ni k’Uhoraho agize, kandi ntimugakore ku kintu gihumanya na kimwe; nanje nzobākira.” (2 Ab’i Korinto 6:14-17) Ni igiki Paulo yashatse kuvuga mu majambo “musangiye” na “bifatanya”?

Ugusangira Paulo avuga biratomoye ko kurimwo ibikorwa bijanye n’ugusenga be n’ivy’impwemu ukorana n’abasenga ibigirwamana be n’abatizera. Yaragabishije Abanyakorinto kwirinda “gusangira . . . ivyo ku meza y’abadayimoni.” (1 Ab’i Korinto 10:20, 21) Gutyo, gusukiranya ukwizera ni ukwifatanya mu gusenga canke kugira ivyo musangiye mu vy’impwemu n’ayandi mashirahamwe y’ivy’idini. (Kuvayo 20:5; 23:13; 34:12) Igihe inyubakwa yahora ikoreshwa n’ishirahamwe rinaka ry’ivy’idini iguzwe, ivyo biba bikozwe kugira gusa haboneke inzu ikenewe yogirwa Ingoro y’Ubwami. Imbere yuko ikoreshwa bwa Ngoro y’Ubwami, irakurwamwo ibisigarira ivyo ari vyo vyose vy’ugusenga kw’ikinyoma. Ico gihe imaze guhindurwa, iregurirwa Yehova kugira ikoreshwe gusa mu kumusenga. Nta gufatanya canke gusangira kuba kugizwe hagati y’ugusenga kw’ukuri n’ugusenga kw’ikinyoma.

Mu kuvugana ibintu vyose bijanye n’ukwo kugura, ivyo kuganira n’uwo wundi mugwi bikwiye kugirwa gake gashoboka kandi bikaba bikwiye kuba bijanye gusa n’ukwo kugura. Abagize ishengero rya gikirisu vyoba vyiza bagumije mu muzirikanyi ingabisho Paulo yatanze yo ‘kutifatanya n’abatizera.’ Naho nyene tutumva ko turuta abantu bafise ivyo bizera bindi, turirinda kwifatanya na bo canke kwisuka mu gusenga kwabo.a

Bite ho igihe ishengero rikotesheje inyubakwa y’ishirahamwe rinaka ry’ivy’idini? Gukotesha bituma hama hariho ivyo kuvugana n’iryo shirahamwe ry’ivy’idini, na vyo umuntu akaba ategerezwa kuvyirinda. Mbere no mu gukotesha inyubakwa nk’iyo ku bw’ibirori vy’umusi umwe, inama y’abakurambere ikwiye kurimbura ibi bikurikira: Hoba hazoba hariho ibigirwamana canke ibimenyetso vy’idini ivyo ari vyo vyose imbere canke inyuma ya nya nyubakwa? Abantu bo muri ico kibano bazobibona gute dukoresheje iyo nyubakwa? Hoba hari umuntu n’umwe wo mw’ishengero azotsitazwa n’uko dukoresheje iyo nyubakwa? (Matayo 18:6; 1 Ab’i Korinto 8:7-13) Abakurambere bararimbura ivyo bintu hanyuma rero bagafata ingingo bavyisunze. Ijwi ryabo bwite ryo mu mutima be n’iry’abo mw’ishengero muri rusangi ntirikwiye kwirengagizwa mu kuraba niba bogura inyubakwa nk’iyo hanyuma bakayihinduramwo Ingoro y’Ubwami.

[Akajambo k’epfo]

[Ifoto ku rup. 27]

Iyi nyubakwa, iyahora ari isinagogi, yaraguzwe hanyuma irasanurwa igirwa Ingoro y’Ubwami