Woba ufise “agatima ko kurindira”?

‘Mukwiye kumera mute mu ngeso zera no mu bikorwa biranga ukwubaha Imana, no mu kurindira, no mu kugumiza hafi mu muzirikanyi ukuza kw’umusi wa Yehova’!​—2 PETERO 3:11, 12, NW.

1, 2. Kugira “agatima ko kurindira” umusi wa Yehova, twobitangira akarorero gute?

NIWIHE ishusho y’umuryango witeze abashitsi baza ku mazimano. Isaha bashikirako irushiriza kwegereza. Inarugo ariko aca hirya no hino aheraheza gutegura imfungurwa. Umugabo wiwe n’abana bariko baramufasha mu kuraba yuko ikintu cose kiri ku rutonde. Umwe wese aranezerewe cane. Egome, umuryango wose uriteganye umushasharo ukuza kw’abo bashitsi kandi witeze gufungura imfungurwa zinovera be n’ukugiriranira ibiganiro vyiza.

² Twebwe abakirisu, turarindiriye ikintu mbere gihambaye kuruta. None turindiriye iki? Twese turindiriye ‘umusi wa Yehova’! Imbere y’uko ushika, turakeneye kuba nka wa mumenyeshakazoza Mika, we yavuze ati: “Nzohanga amaso Uhoraho; [“nzogaragaza agatima ko kurindira”, NW] Imana y’agakiza kanje” (Mika 7:7). Ivyo vyoba bisobanura kurera amaboko? Namba. Hariho ibikorwa vyinshi bitegerezwa gukorwa.

3. Twisunze 2 Petero 3:11, 12, ni agatima akahe abakirisu bategerezwa kugira?

³ Intumwa Petero aradufasha kugira inyifato ibereye mu gihe turindiriye. Avuga ati: ‘Mukwiye kumera mute mu ngeso zera no mu bikorwa biranga ukwubaha Imana, no mu kurindira, no mu kugumiza hafi mu muzirikanyi ukuza kw’umusi wa Yehova’! (2 Petero 3:11, 12, NW). Uramenya yuko mu kuvuga ayo majambo Petero atariko agira amakenga ku vyerekeye uko tubwirizwa kumera. Mu makete abiri yanditse ahumekewe n’Imana, yaradondoye ukuntu abakirisu babwirizwa kumera. Yarabakebuye kandi kubandanya kugira ‘ingeso zera no gukora ibikorwa biranga ukwubaha Imana’. Naho hari haciye imyaka nka 30 Yezu Kirisitu atanze ikimenyetso c’“umuhero w’isi”, abakirisu bategerezwa kuguma bari maso (Matayo 24:3). Bategerezwa ‘kurindira no kugumiza hafi mu muzirikanyi’ ukuza kw’umusi wa Yehova.

4. ‘Kugumiza hafi mu muzirikanyi ukuza kw’umusi wa Yehova’ bisobanura iki?

⁴ Ijambo ry’ikigiriki ryahinduwe hano ngo “kugumiza hafi mu muzirikanyi” urudome ku rundi risobanura “kwihutisha”. Ariko ntiwumve, ntidushobora ‘kwihutisha’ nya kwihutisha umusi wa Yehova. Kanatsinda, ‘ntituzi umusi canke isaha’ Yezu Kirisitu azozirako gushitsa urubanza ku bansi ba Se (Matayo 24:36; 25:13). Igitabu kimwe gisigura yuko irivuga ryo mu ntango ry’iyo mvugo “kwihutisha” hano risobanura “‘gutuma ikintu gitebuka’, gutyo ikaba ifitaniye isano cane no ‘kugira ubwira, umwete be no kwitwararika ikintu’”. Petero rero yariko arahimiriza abo basangiye ukwemera ‘guhahamira’ ukuza kw’umusi wa Yehova. Ivyo bari kubigira mu kubandanya kuwamiza mu muzirikanyi (2 Petero 3:12). Kubera “umusi mukuru uteye ubgoba w’Uhoraho” ubu weregereje cane, dukwiye kugira inyifato yo mu mutima nk’iyo nyene.​—Yoweli 2:31.

Turindire dufise “ingeso zera”

5. Twokwerekana gute ko ‘duhahamiye’ kubona ‘umusi wa Yehova’?

⁵ Nimba ‘duhahamiye’ kurokoka umusi wa Yehova, ivyo tuzovyerekanira mu ‘ngeso zacu zera no mu kwubaha Imana’. Imvugo ngo “ingeso zera” ishobora kutwibutsa neza inkeburo Petero yatanze igira iti: “Mumere nk’abana bagamburuka, ntimwishushanye n’ukwifuza kwanyu kwa kera kwo mu gihe c’ukutamenya kwanyu. Ariko nk’ukw Iyabahamagaye ar’iyera, namwe abe ari ko muba abera mu ngeso zanyu zose. Kuko vyanditswe, ngo Mube abera, kuko nanje nd’uwera”.​—1 Petero 1:14-16.

6. Kugira ngo tube abera, dutegerezwa gukora iki?

⁶ Kugira ngo tube abera, dutegerezwa kuguma tudahumanye ku mubiri, mu bwenge, mu vy’ukwigenza runtu no mu vy’impwemu. Twoba turiko turitegurira ‘umusi wa Yehova’ mu kuguma turi abera bwa bantu bitirirwa izina rya Yehova? Ntivyoroshe muri iki gihe kuguma dutyoroye gutyo, kubera yuko ingingo mfatirwako z’ivyo kwigenza runtu z’isi ziguma zitituka (1 Ab’i Korinto 7:31; 2 Timoteyo 3:13). Twoba twibonera ko itandukaniro riri hagati y’ingingo mfatirwako zitugenga z’ivyo kwigenza runtu be n’iz’isi ritera riba rinini? Nimba atari ukwo biri, turakwiye kuhagabira. Kwoba ari ukubera ko ingingo mfatirwako ubwacu tugenderako, naho ziri hejuru kuruta iz’isi, zitera zitituka? Nimba ari ukwo biri, turakwiye kugira ico dukoze tugakosora ibintu kugira duhimbare Imana.

7, 8. (a) Twoshobora gute gusanga twibagiye ko kugira “ingeso zera” bihambaye? (b) Ni izihe ngingo twofata kugira ngo dukosore ibintu?

⁷ Kubera yuko amashusho yerekana ubushegabo asigaye aboneka kuri Interineti kandi umuntu akaba ashobora kuyaraba ari wenyene, abantu bamwebamwe batahora baronka uburyo bwo gushikira ivyo bintu vy’ubushegabo ubu bariko bararonka “uturyo twinshi tujanye n’ivyo kwihweza ubushegabo”. Ivyo ni vyo umuganga umwe avuga. Turamutse turondeye mwene ivyo bibanza vyo kuri Interineti bihumanye, nta mazinda yuko twoba turiko turirengagiza itegeko rya Bibiliya ryo ‘kudakora ku kintu gihumanye na kimwe’ (Yesaya 52:11). Twoba vy’ukuri turiko ‘turagumiza hafi mu muzirikanyi ukuza kw’umusi wa Yehova’? Canke mu muzirikanyi wacu, twoba turiko turigiza inyuma uwo musi, twiyumvira yuko naho nyene turiko turacafurisha ubwenge bwacu ibintu bihumanye, tugifise umwanya wo kwityorora? Nimba twaragize ingorane muri ivyo, ese ukuntu vyoba vyihutirwa gutakambira Yehova kugira ngo ‘akebukishe amaso yacu yoye kuraba ibitagira ikimazi, atugirire bazima mu nzira ziwe’!​—Zaburi 119:37.

⁸ Benshi mu Vyabona vya Yehova, abato n’abakuze, bariko barumira ku ngingo mfatirwako ziri hejuru z’Imana, gutyo bakirinda inyosha mbi z’ivy’ubushegabo z’iyi si. Kubera bazi yuko ibihe turimwo vyihutirwa, bakaba kandi bazi imburizi Petero yatanze yuko ‘umusi wa Yehova uzoza nk’igisuma’, babandanya kugira “ingeso zera” (2 Petero 3:10). Ivyo bakora birerekana yuko ‘barindiriye kandi bagumiza hafi mu muzirikanyi ukuza kw’umusi wa Yehova’a.

Turindire dukora ‘ibikorwa biranga ukwubaha Imana’

9. Ukwubaha Imana gukwiye kudusunikira ku gukora iki?

⁹ ‘Ibikorwa biranga ukwubaha Imana’ na vyo nyene ni ntahara nimba twipfuza kugumiza mu muzirikanyi umusi wa Yehova. ‘Ukwubaha Imana’ bisobanura ukuyitinya kudusunikira ku gukora ivyiza mu nyonga zayo. Ukwifatanya na Yehova tudahemuka ni inguvu ituvyurira umutima wo kugira ico dukoze yihishije muri mwene ivyo bikorwa biranga ukwubaha Imana. Imana igomba yuko “abantu bose bakizwa bagashika ku kumenya ivy’ukuri” (1 Timoteyo 2:4). Imana “ntigomba ko hagira abahona, arikw igomba ko bose bi[gay]a” (2 Petero 3:9). None, ukwubaha Imana kwacu ntigukwiye kudukaburira kwongereza utwigoro tugira mu gufasha abantu kwiga ivyerekeye Yehova no kumwigana?​—Abanyefeso 5:1.

10. Ni kubera iki dukwiye kugaba ku bijanye n’“uruhendo rw’ubutunzi”?

¹⁰ Ubuzima bwacu buzokwuzura ibikorwa biranga ukwubaha Imana nitwabanza kurondera Ubwami bw’Imana (Matayo 6:33). Ivyo bisobanura yuko dukwiye kubona ibintu vy’umubiri mu buryo buri ku burimbane. Yezu yagabishije ati: “Murumva, mwirinde ukwifuza kwose, kuk’ubu[zima] bg’umuntu butava mu bihinda vy’ibintu atunze” (Luka 12:15). Naho bishobora kuba bigoye kwiha ishusho ubwacu turiko turahumwa amaso n’ugukunda amahera, dukwiye kumenya yuko “umwitwaririko w’ivy’isi n’uruhendo rw’ubutunzi” bishobora ‘kunyoha ijambo’ ry’Imana (Matayo 13:22, ni twe tubihiritse.). Uburyo bwo kubaho bushobora kuba bugoye. Mu mihingo imwimwe y’isi, benshi biyumvira yuko kugira ngo bagire ubuzima bwiza, bategerezwa kwimukira mu gihugu gitunze, kumbure bakamara imyaka n’imyaka batari kumwe n’imiryango yabo. Mbere na bamwebamwe mu basavyi b’Imana bariyumviriye gutyo. Bagiye mu kindi gihugu, boshobora kuronsa imiryango yabo ibintu vyizavyiza bigezweho. Ariko none, vyogendera gute mu vy’impwemu ababo basigaye i muhira? None ko urugo ruba rusigaye rudafise uwuruhagarikiye mu buryo bubereye, rwoba ruzoronka ivyo rukeneye mu vy’impwemu kugira ngo ruzorokoke umusi wa Yehova?

11. Umuntu umwe yari yagiye guca amahera mu kindi gihugu yerekanye gute yuko ibikorwa biranga ukwubaha Imana bihambaye kuruta ubutunzi?

¹¹ Hari umuntu yimutse aja guca amahera mu Buyapani avuye muri Filipine, yiganye ukuri kwa Bibiliya n’Ivyabona vya Yehova. Amaze kumenya ico Ivyanditswe bivuga ku mabanga y’ububemutwe, yaratahuye yuko akwiye gufasha abo mu rugo rwiwe gucika abasavyi ba Yehova (1 Ab’i Korinto 11:3). Umugore wiwe yari i muhira yararwanije yivuye inyuma ukwizera kwiwe gushasha, agashaka yuko yoguma amurungikira amahera aho gusubira i muhira ngo yigishe abo mu rugo rwiwe ivyo yemera bishingiye kuri Bibiliya. Ariko rero, asunitswe no kubona ko ibihe vyihuta hamwe n’ukuntu yitwararika abiwe, yarasubiye i muhira. Ukwihangana yagaragaje mu kuntu yafata abagize urugo mu buryo buranga urukundo kwaravuyemwo ivyiza. Amaherezo, urugo rwiwe rwarunze ubumwe mu gusenga kw’ukuri, umugore wiwe na we arinjira mu busuku bw’igihe cose.

12. Ni kubera iki dukwiye gushira ivy’impwemu mu kibanza ca mbere mu buzima?

¹² Uko ivyacu vyifashe gushobora kugereranywa n’ivy’abantu bari mu nzu iriko irasha. Ubwo vyoba biranga ubukerebutsi kwikubita hirya no hino muri nya nzu iriko irasha igira iherengetere urondera gukiza ibintu utunze? Ahubwo riho, ubwo ntivyoba bihambaye kure n’iyo kurokora ubuzima, ni ukuvuga ubwacu n’ubw’abo mu muryango wacu be n’ubw’abandi bayibamwo? Emwe, uru runkwekwe rw’ibintu rubi ruriko rugenda rwihuta rugana ku gusangangurwa, gutyo ubuzima bukaba buri ku manga. Kubera yuko ivyo tubitahura, nta nkeka ko dukwiye gushira ivy’impwemu mu kibanza ca mbere maze tukitunira n’umwete ku gikorwa ndokorabuzima co kwamamaza Ubwami.​—1 Timoteyo 4:16.

Dukwiye ‘kutagira ikirabagu’

13. Twipfuza ko umusi wa Yehova niwashika wosanga tumeze gute?

¹³ Mu gushimika ku kamaro ko kuguma umuntu afise agatima ko kurindira, Petero avuga ati: ‘Abo nkunda, kuko mureretse ivyo, mukwiye kugira umwete w’uko Imana yosanga muri mu mahoro, mutagira ikirabagu, mutarik’umugayo imbere yayo’ (2 Petero 3:14). Turetse inkeburo Petero yatanze yo kugira ingeso zera no gukora ibikorwa biranga ukwubaha Imana, arashimika ku kamaro k’uko Yehova yosanga turi abantu bahumanuwe n’amaraso y’agaciro ya Yezu (Ivyahishuriwe 7:9, 14). Ivyo bisaba yuko umuntu yizera inkuka ya Yezu hanyuma agacika umusavyi wa Yehova yiyeguye akabatizwa.

14. Kugira ngo umuntu agume ‘atagira ikirabagu’ bimusaba iki?

¹⁴ Petero aduhimiriza gukora uko dushoboye kwose kugira ngo ‘ntituzosangweko ikirabagu’. Impuzu zacu zerekeye inyifato be na kamere vya gikirisu vyoba biguma bitagira ikirabagu, bitandujwe n’isi? Iyo tubonye ikirabagu ku mpuzu zacu, duca ubwo nyene tugerageza kugikurako. Mu gihe caguye ku mpuzu dukunda cane, turayitondera rwose mu kuyimesura. Twoba tuvyifatamwo gutyo nyene mu gihe impuzu zacu za gikirisu zanduye, tubivuze mu buryo bw’ikigereranyo, bitumwe n’utunenge tumwetumwe two muri kamere yacu canke mu nyifato yacu?

15. (a) Ni kubera iki Abisirayeli bategerezwa gutera ubuyonga ku mpuzu zabo? (b) Ni kubera iki abasavyi ba Yehova bo mu gihe ca none batandukanye n’isi?

¹⁵ Abisirayelil bategerezwa ‘gutera ubuyonga ku mpuzu zabo’ no ‘gutera akanyuzi k’isufe ku buyonga bwo ku mitwe y’impuzu’. Kubera iki? Babigira kugira ngo bibuke amabwirizwa ya Yehova, bayagamburuke, bongere ‘berekane ko ari abera’ imbere y’Imana yabo (Guharūra 15:38-40). Twebwe abasavyi ba Yehova bo mu gihe ca none, turatandukanye n’isi kubera yuko twitondera amategeko n’ingingo ngenderwako vy’Imana. Nk’akarorero, tuguma tudahumanye mu vy’ukwigenza runtu, turubaha ubweranda bw’amaraso kandi turirinda gusenga ibigirwamana mu buryo bwose (Ivyakozwe 15:28, 29). Benshi baratwubaha kubera umwiyemezo wacu ntabanduka wo kuguma tudahumanye.​—Yakobo 1:27.

Dukwiye ‘kutabako umugayo’

16. Kuguma ‘tutariko umugayo’ birimwo iki?

¹⁶ Petero avuga kandi yuko dutegerezwa kuzosangwa ‘tutariko umugayo’. Ivyo bishoboka gute? Ikirabagu mu bisanzwe umuntu arashobora kugikurako ariko umugayo wo si ukwo. Umugayo werekana yuko imbere mu muntu hari agahaze, yagirwa n’ikosa. Intumwa Paulo yakebuye abakirisu bagenziwe b’i Filipi ati: “Mukore vyose ata kwidodomba, ata guhārīra, kugira ngo ntimugire umugayo cank’akarohe, mube abana b’Imana batagira agasembga, hagati y’ab’iki gihe bagoramye b’ibidambidambi, abo mubonekamwo nk’amatara mw’isi” (Ab’i Filipi 2:14, 15). Nitwakurikiza iyo nkeburo, tuzokwirinda imyidodombo be n’ibihari kandi tuzosukurira Imana tubitumwe n’imvo nziza. Tuzosunikwa n’urukundo dukunda Yehova na bagenzi bacu uko twamamaza “ubu butumwa bgiza bg’ubgami” (Matayo 22:35-40; 24:14). Vyongeye, tuzobandanya kwamamaza inkuru nziza naho abantu muri rusangi batotahura igituma dutanga umwanya wacu, mu kugerageza gufasha abandi kwiga ivyerekeye Imana n’Ijambo ryayo Bibiliya.

17. Imvo idusunika ikwiye kuba iyihe igihe turondera guterwa uduteka mw’ishengero rya gikirisu?

¹⁷ Kubera yuko twipfuza kuzosangwa ‘tutariko umugayo’, vyoba vyiza dusuzumye imvo zidusunika mu vyo dukora vyose. Twararetse uburyo isi ikora ibintu ibitumwe n’ubwikunzi, nko kwihatira kuronka ubutunzi canke ububasha. Nimba turiko turondera guterwa uduteka mw’ishengero rya gikirisu, nimuze imvo zidusunika zigume ari nziza kandi twame nantaryo tubitumwa n’urukundo dukunda Yehova be n’urwo dukunda abandi. Biraruhura kubona abagabo bakomeye mu vy’impwemu ‘bipfuza kuzezwa ishengero’ babigiranye umunezero be n’icipfuzo kirimwo ukwicisha bugufi, kugira ngo bakorere Yehova be n’abo basangiye ukwizera (1 Timoteyo 3:1; 2 Ab’i Korinto 1:24). Nkako, abakwije ibisabwa kugira basukure ari abakurambere ‘baragira ubusho bw’Imana . . . babikunze, . . . ntibaburagirishwa no kurondera inyungu mbi, ariko baburagira bashize igikonyo. Kandi ntibaragira nk’abatwaza amanyama amasho bagabanganirijwe, ariko baba ivyitegererezo vy’ubusho’.​—1 Petero 5:1-4.

Dukwiye kuba “mu mahoro”

18. Ni kamere izihe zituma Ivyabona vya Yehova bamenyekana cane?

¹⁸ Ubwa nyuma, Petero adusaba kuzosangwa “mu mahoro”. Kugira ngo tubeho duhuza n’ico gisabwa, dukwiye kugiranira amahoro na Yehova be na bagenzi bacu. Petero arashimika ku kamaro ko ‘gukovya mu gukundana’ be no ku kamaro ko kuguma dufitaniye amahoro n’abakirisu bagenzi bacu (1 Petero 2:17; 3:10, 11; 4:8; 2 Petero 1:5-7). Kugira ngo tuzigame amahoro, dutegerezwa kugira urukundo hagati yacu (Yohana 13:34, 35; Abanyefeso 4:1, 2). Urukundo be n’amahoro vyacu bigaragara canecane igihe tugira amahwaniro mpuzamakungu. Kw’ihwaniro rimwe ryabereye muri Costa Rica mu 1999, umudandaza umwe yari ku kibuga c’indege yarashavujwe n’uko Ivyabona bo muri ako karere bariko baraha ikaze abavukanyi b’abashitsi bavuye mu bindi bihugu bakingiriye batabizi ibidandazwa vyiwe. Ariko rero ku musi ugira kabiri, yariboneye urukundo n’amahoro vyagaragajwe mu kwakirana igishika abo bashitsi, naho Ivyabona bo muri ako karere ubwabo batari babazi. Ku musi wa nyuma, wa mudandaza yaragiyemwo mu vyo kubaha ikaze maze aca asaba kugirirwa inyigisho ya Bibiliya.

19. Ni kubera iki bihambaye kugiriranira amahoro n’abo dusangiye ukwizera?

¹⁹ Ukuba tubandanya kugiriranira amahoro n’abavukanyi be n’abavukanyikazi bacu bo mu vy’impwemu tubikuye ku mutima, birashobora kugira ico bikoze ku kuntu turindirana umushasharo umusi wa Yehova be n’isi nshasha yadusezeraniye (Zaburi 37:11; 2 Petero 3:13). Dufate yuko bitatworoheye kuguma dufitaniye amahoro n’umwe mu bo dusangiye ukwizera. Twoba dushobora kwiha ishusho tubana na we mu mahoro mw’Iparadizo? Nimba hari ikintu dupfa n’umuvukanyi, dukwiye guca twihutira ‘kwikiranura na we’ (Matayo 5:23, 24). Kwikiranura na we birahambaye nimba dushaka kugiriranira amahoro na Yehova.​—Zaburi 35:27; 1 Yohana 4:20.

20. “Agatima ko kurindira” gakwiye kwigaragaza mu buhe buryo?

²⁰ Twoba ubwacu ‘turindiriye twongera tugumiza hafi mu muzirikanyi ukuza kw’umusi wa Yehova’? Icipfuzo cacu gikomeye co kubona ububisha bukurwaho cerekanwa n’ukuntu tuguma turi abera muri iyi si yononekaye. Vyongeye, ukuba duhahamira ukuza kw’umusi wa Yehova be no kubaho dutwarwa n’Ubwami bibonekera mu bikorwa vyacu biranga ukwubaha Imana. Bisubiye, ukuba twiteze kuba mw’isi nshasha y’amahoro bigaragazwa n’ukuntu tubandanya kugiriranira amahoro n’abo dufatanije gusenga muri iki gihe. Muri ubwo buryo, tuba twerekanye yuko dufise “agatima ko kurindira” kandi ko ‘tugumiza hafi mu muzirikanyi ukuza kw’umusi wa Yehova’.

[Akajambo k’epfo]

Woba uvyibuka?

• Kugumiza ‘hafi mu muzirikanyi ukuza kw’umusi wa Yehova’ bisobanura iki?

• “Agatima ko kurindira” kagaragarira gute mu kuntu twigenza?

• Ni kubera iki ‘ibikorwa biranga ukwubaha Imana’ bihambaye?

• Dutegerezwa gukora iki kugira ngo Yehova azosange ‘tutariko ikirabagu, tutariko umugayo kandi turi mu mahoro’?

[Ifoto ku rup. 11]

“Agatima ko kurindira” kagaragarira mu ngeso zera

[Amafoto ku rup. 12]

Igikorwa co kwamamaza Ubwami kirarokora ubuzima

[Ifoto ku rup. 14]

Uko turindira umusi wa Yehova, nimuze tubandanye kugiriranira amahoro n’abandi