Ingene wokwironsa ivyo ukeneye mu vy’impwemu

“MU MYAKA cumi iheze, ibitabu birenga 300 bivuga ukuntu kamere y’ivy’impwemu igira ico ikoze ku kazi, guhera ku gitabu Jesus CEO gushika ku gitabu The Tao of Leadership, vyaruzuranye mu mangazini agurishirizwamwo ibitabu”. Ivyo bivugwa n’ikinyamakuru kimwe (U.S.News & World Report). Ico ni ikintu gusa cerekana yuko mu bihugu vyinshi biteye imbere mu vy’ubutunzi, abantu bariko bararushiriza kwipfuza cane ubuyobozi bwo mu vy’impwemu mu buzima. Ikinyamakuru kimwe c’ivy’ubucuruzi (Training & Development) caragize ico kivuga kuri ivyo, mu kugira giti: “Mu gihe ubuhinga bugenga iyindi mice yose y’ubuzima bwacu, turondera insobanuro y’ubuzima yimbitse kuruta, intumbero bufise be n’ukuntu tworushiriza gushira akanyota”.

Ni hehe none ushobora kuronkera ubuyobozi bwo mu vy’impwemu bumara akanyota? Muri kahise, abantu bahanga amaso idini yashinze imizi kugira ngo ibafashe kuronka “insobanuro [y’ubuzima] yimbitse kuruta” be n’“intumbero” bufise. Muri iki gihe, benshi barateye ibitugu idini yashinze imizi. Itohoza rimwe ryagizwe n’abayobozi be n’abakuru mu vy’akazi bo mu rwego rwo hejuru bashika 90, ryerekanye yuko “abantu bashiraho itandukaniro rinini hagati y’idini be na kamere y’ivy’impwemu”, nk’uko ca kinyamakuru (Training & Development) kibivuga. Abagizweko iryo tohoza babona ko idini “ikumirana kandi icanamwo ibice” mu gihe kamere y’ivy’impwemu yo babona ko “ari iy’abantu bose kandi ko ata we ikumira”.

Abakiri bato benshi bo mu bibano bititaho ivy’idini, nko muri Ositaraliya, muri Nouvelle-Zélande no muri Royaume-Uni no mu Buraya, na bo nyene babona ko hari itandukaniro hagati y’idini na kamere y’ivy’impwemu. Mu gitabu (Youth Studies Australia) Porofeseri Ruth Webber yanditse, yemeza ibi: “Benshi mu rwaruka baremera Imana canke ubwoko bunaka bw’inguvu nsigabwenge, mugabo ntibabona yuko idini ihambaye canke ifasha mu vyo kugaragaza kamere yabo y’ivy’impwemu”.

Idini y’ukuri iraremesha ivy’impwemu

Ukwo gukekeranya ku vy’idini kurumvikana. Amashirahamwe menshi y’ivy’idini arisuka mu migambi y’ivya politike igirirwa mu kinyegero akongera akagira uburyarya mu bijanye n’inyifato runtu kandi akivobeka mu vy’ugusesa amaraso y’abantu ata co bazira mu ntambara z’amadini zidaharurika. Ariko rero, naho bamwebamwe batera akagere amashirahamwe y’ivy’idini yandujwe n’uburyarya be n’uruhendo, baragize ikosa ryo gutera akagere na Bibiliya, iyo bibaza ko irenza uruho rw’amazi ku migenzo nk’iyo.

Mu vy’ukuri, Bibiliya iriyamiriza uburyarya be n’ubugarariji. Yezu yabwiye indongozi z’idini zo mu gihe ciwe ati: “Muzobona ibara, mwebge abanyabgenge b’ivyanditswe n’Abafarisayo, mwa ndyadya mwe, kuko musa n’imva zihomeshejwe ingwa, ziboneka inyuma zīkuyengeje, arikw imbere zuzuye amagufa y’abapfuye n’ibihumanya vyose. Namwe ni ko muri: inyuma mubonekera abantu mur’abagororotsi, arikw imbere mwuzuye uburyarya n’ubugarariji”.—Matayo 23:27, 28.

Vyongeye, Bibiliya iremesha abakirisu kutagira aho bahengamiye mu bintu vyose vya politike. Aho guhimiriza abizera kwicana, itegeka yuko umwe wese akwiye kugira umutima ukunze wo gupfira mugenziwe (Yohana 15:12, 13; 18:36; 1 Yohana 3:10-12). Idini y’ukuri, ishingiye kuri Bibiliya, aho kuba ‘iyikumirana kandi icanamwo ibice, yo nta we ikumira’. Intumwa Petero yavuze ati: “Imana [nti]robanura abantu ku butoni, ariko mu mahanga yose, ūyubaha, agakora ivy’ukugororoka, iramwemera”.—Ivyakozwe 10:34, 35.

Bibiliya ni inyobozo yo kwizigirwa ituma umuntu agira amagara mu vy’impwemu

Bibiliya itubwira yuko abantu baremwe mw’ishusho y’Imana (Itanguriro 1:26, 27). Naho ivyo bidasobanura yuko abantu basa n’Imana mu buryo bw’umubiri, bisobanura yuko abantu bafise ubushobozi bwo kugaragaza kamere ziranga Imana, ushizemwo ububangukirwe bwo kwironsa ivy’impwemu, canke kamere y’ivy’impwemu.

Ko bimeze gutyo, ni ivyumvikana kwemera yuko Imana yoduha kandi uburyo bwo kwironsa ivyo dukeneye mu vy’impwemu, be n’ubuyobozi bubereye budufasha gutandukanya ikintu cotugirira akamaro be n’ikintu cotugirira nabi mu buryo bw’impwemu. Nk’uko Imana yaremanye imibiri yacu abasoda b’umubiri batangaje, abarwanya indwara bakongera bakadufasha kuguma dufise amagara meza, ni na ko kandi yaduhaye ijwi ryo mu mutima rishobora kudufasha gufata ingingo zibereye no kwirinda imigenzo yotugirira nabi mu buryo bw’umubiri no mu buryo bw’impwemu (Abaroma 2:14, 15). Nk’uko tubizi, kugira ngo abasoda b’umubiri wacu bakore, bategerezwa kugaburirwa neza. Mu buryo nk’ubwo nyene, kugira ngo ijwi ryacu ryo mu mutima rikore, turakeneye kurigaburira imfungurwa nziza zo mu vy’impwemu.

Mu kwerekana ubwoko bw’imfungurwa zituma tuguma dufise amagara meza mu vy’impwemu, Yezu yavuze ati: “Umuntu ntatungwa n’umutsima gusa, arikw atungwa n’ijambo ryose riva mu kanwa k’Imana” (Matayo 4:4). Ivyo Yehova yavumereye biranditswe mw’Ijambo ryiwe Bibiliya, kandi “bigira ikimazi co kwigisha umuntu, no kumuhana, no kumutunganya” (2 Timoteyo 3:16). Ni twebwe rero dukwiye kugira akigoro kugira ngo twihereze izo mfungurwa zo mu vy’impwemu. Uko dushika ku kumenya Bibiliya kandi tukihatira gukurikiza mu buzima bwacu ingingo ngenderwako ziri muri yo, ni ko tuzohungukira mu buryo bw’impwemu no mu buryo bw’umubiri.—Yesaya 48:17, 18.

Hoba hari ico bivamwo?

Ikizwi coco ni uko bifata umwanya kugira ngo turyohore amagara yacu yo mu vy’impwemu biciye ku kwiga Bibiliya; kandi biboneka ko umwanya urushiriza kuba ikintu c’imbonekarimwe. Ariko rero, ivyiza bivamwo birashimishije! Umviriza ukuntu abantu bamwebamwe bafise imirimo myinshi barangura basigura igituma gufata umwanya wo kwitwararika amagara yabo yo mu vy’impwemu ari ikintu gihambaye kuri bo.

Marina, umuganga, avuga ati: “Sinari bwigere niyumvira ivyerekeye kamere yanje y’ivy’impwemu gushika igihe natangura gukora mu bitaro hanyuma ngatangura kwumva mbabajwe cane n’ukuntu abandi bacumukura. Naciye mbona yuko nari nkwiye kwemera icese ko nkeneye ivy’impwemu no kuvyironsa nimba nshaka gushira akanyota no gutekanirwa, kubera ko ingendo y’ubuzima be n’ibanga ry’ukwitwararika ibiraje ishinga abantu bishobora kuba ibintu bishusha umutwe ku muntu akora akazi nk’ako nkora.

“Ubu ndigana Bibiliya n’Ivyabona vya Yehova. Iyo nyigisho iramfasha gusuzuma mu buryo ngirakamaro ivyo nkora be n’imvo nkorana, ikongera ikamenyereza ivyiyumviro vyanje kugira ndushirize kubona ibintu mu buryo bwiza, ku buryo nguma mfise ubuzima buri ku burimbane. Ndumva koko nshize akanyota cane mu kazi kanje. Mugabo, ukwiga Bibiliya ni kwo kwaryohoye amagara yanje yo mu vy’akanyengetera, kuramfasha gutsinda inyiyumvo zitabereye, kuramfasha kugabanya uguta umutwe, kandi ndarushiriza kwihanganira abantu no kubumvira imbabazi. Gushira mu ngiro ingingo ngenderwako za Bibiliya vyaragiriye akamaro kandi umubano wacu. Igihambaye kuruta, narashitse ku kumenya Yehova no ku kwironkera ku rugero rutoyi impwemu yiwe, iyatumye ubuzima bwanje burushiriza kugira ico buvuze”.

Nicholas, umucafyi w’imigero, avuga ati: “Ntarigana Bibiliya n’Ivyabona vya Yehova, sinitaho ivy’impwemu. Intumbero yonyene nari mfise mu buzima yari iy’uko vyongendera neza mu kazi nahisemwo. Ukwiga Bibiliya kwaranyigishije yuko hariho n’ibindi mu buzima uretse akazi kandi yuko gukora ivyo Yehova agomba bizana agahimbare nyakuri kandi karamba.

“Akazi nkora ntigatuma numva nshize akanyota, mugabo Bibiliya ni yo yanyigishije akamaro ku kuguma noroheje ubuzima mu kwitwararika ivy’impwemu. Kubigenza gutyo vyatumye jewe n’umukenyezi wanje twirinda umukazo mwinshi uva ku kugira ubuzima burangwa n’ukwiruka inyuma y’amaronko. Twarironkeye kandi abagenzi nyakuri benshi biciye ku kwifatanya n’abantu babona ubuzima mu buryo bw’impwemu nkatwe”.

Vincent, umushingwamanza, avuga ati: “Akazi keza karashobora gutuma umuntu yumva ashize akanyota ku rugero runaka. Ariko rero, nasanze hakenewe vyinshi kugira umuntu aronke agahimbare yongere yumve ko ashize ipfa. Ntaramenya ico Bibiliya yigisha kuri ivyo, ndibuka ko vyashitse nkabona yuko ubuzima ata co bumaze na gato, kuko nabona ko umuntu avuka, agakura, akubaka urwiwe, agakora akazi kugira ngo aronke ivya nkenerwa mu buryo bw’umubiri bimufasha kurera abana biwe, akabamenyereza gukurikira iyo nzinguzingu nyene y’ubuzima, amaherezo agasaza hanyuma agapfa.

“Maze kwigana Bibiliya n’Ivyabona vya Yehova, ni ho honyene naronse inyishu zimara akanyota ku bibazo nari mfise bijanye n’intumbero y’ubuzima. Ukwiga Bibiliya kwatumye nshika ku kumenya Yehova uko ari maze ndamukunda urukundo rugera ibwina. Ivyo biranshiriraho ishimikiro ryo kuguma mbona ivy’impwemu mu buryo bwiza, uko nihatira kubaho mpuza ubuzima bwanje n’ivyo nzi ko ari umugambi wiwe. Ubu, twe n’umukenyezi wanje turamarwa akanyota n’ukumenya yuko turiko turakoresha ubuzima bwacu mu buryo bwose bushoboka buri n’ico buvuze”.

Na wewe urashobora kugira ubuzima buri n’intumbero kandi buri n’ico buvuze biciye ku kwiga Bibiliya. Ivyabona vya Yehova bazohimbarwa no kugufasha. Nka kumwe kwa Marina, Nicholas, na Vincent, urashobora gushira akanyota bivuye ku kwiga ivyerekeye Yehova be n’imigambi afitiye abantu muri rusangi be n’iyo agufitiye wewe ubwawe. Ntuzogira gusa umunezero wo kuronka ivyo ukeneye mu vy’impwemu ubu, ariko kandi uzogira icizigiro co kwinovora ubuzima butagira iherezo ufise amagara y’umubiri atagira agasembwa, ico kikaba ari icizigiro kironkwa gusa n’“aboro mu mitima yabo [“abazi ko bakeneye ivy’impwemu”, NW]”.—Matayo 5:3.

Uburyo bumwe bwodufasha gutsimbataza kamere yacu y’ivy’impwemu ni isengesho. Yezu yarafashe umwanya wo kwigisha abigishwa biwe ukuntu bosenga, abaha igikunze kwitwa Isengesho ry’Umukama. Iryo sengesho rifise insobanuro iyihe kuri wewe muri iki gihe? Ushobora gute kuryungukirako? Inyishu uzisanga mu biganiro bibiri bikurikira.

[Amafoto ku rup. 6]

Marina

[Amafoto ku rup. 7]

Nicholas

[Amafoto ku rup. 7]

Vincent