Inyigisho yo muri Bibiliya irakomeza ukwizera

“ESE ukuntu kari agateka ntangere kumara amezi atanu turimbura ivyiyumviro vy’Umuremyi twongera twiga kubona ibintu nk’uko abibona!”. Ayo ni amajambo yavuzwe n’uwaserukiye abanyeshure bari bagize umugwi ugira 122 w’abasohotse Ishure ry’ivya Bibiliya ry’i Gileyadi rya Watchtower ku musi baronka impapuro z’umutsindo. Igenekerezo rya 10 Ntwarante 2007, ntirizibagirwa n’abanyeshure 56 bari bagize uwo mugwi, abari bagiye gutangura igikorwa cabo c’ubumisiyonari mu bihugu 26 barungitswe gukoreramwo.

Theodore Jaracz, akaba ari umwe mu bagize Inama Nyobozi, amaze guha ikaze n’igishika abantu 6.205 bari bitavye ivyo birori, yavuze ati: “Turizigiye tudakeka ko kuba mwitavye iyi porogarama ijanye no guha abanyeshure impapuro z’umutsindo biza kubakomeza mu vy’impwemu vyongere bikomeze n’ukwizera kwanyu”. Yaciye aha ikaze umwumwe mu bashikirizansiguro bane bohaye abo banyeshure indemesho n’impanuro bishingiye kuri Bibiliya bije ku gihe, kugira ngo bibafashe kuroranirwa mu gikorwa cabo c’ubumisiyonari.

Amajambo abaremesha gukomeza ukwizera kw’abandi

Uwitwa Leon Weaver, akaba ari umwe mu bagize Komite y’ishami ryo muri Leta Zunze Ubumwe za Amerika, yaraciye irya n’ino insiguro ifise umutwe-shimikiro ugira uti: “Nimugume mukora ivyiza”. Yaribukije abo banyeshure ko umwumwe wese muri bo amaze incahagati y’imyaka 13 mu busuku bw’igihe cose ateza imbere inyigisho yo muri Bibiliya ikomeza ukwizera. Yavuze ati: “Ni igikorwa ciza kubera yuko kirokora ubuzima bw’abantu, n’igihambaye kuruta, ni igikorwa ciza kubera ko kininahaza Umuvyeyi wacu wo mw’ijuru Yehova”. Umuvukanyi Weaver yaciye aremesha abo banyeshure kubandanya ‘babiba mu mpwemu’ no ‘kwama bakora ivyiza’.​—Ab’i Galatiya 6:8, 9.

David Splane, akaba ari umwe mu bagize Inama Nyobozi, igihe yariko aca irya n’ino insiguro ivuga ngo “Muriyemeza neza ko mukora uko mushoboye kwose”, yaribukije abo banyeshure ibintu ngirakamaro. Umuvukanyi Splane yararemesheje abo bamisiyonari bashasha kugira intango nziza mu gikorwa c’abo c’ubumisiyonari mu gukora ibi bikurikira: “Mugume mubona ibintu mu buryo bwiza. Ntimwihutire gushika ku vyiyumviro. Muramwenyura. Ntimunebagure abandi. Muricisha bugufi kandi mwubahe abavukanyi bo mu turere mugiye gukoreramwo”. Maze yongeyeko ati: “Nimwururuka indege, murakora uko mushoboye kwose. Ese Yehova yohezagira ibirenge vyanyu vyiza uko mushira abantu ‘inkuru nziza z’ivyiza!’”.​—Yesaya 52:7.

Umwigisha w’i Gileyadi yitwa Lawrence Bowen yaraciye irya n’ino insiguro ifise umutwe-shimikiro uvuga uti: “Intoranwa itarimwo amakenga”. Umuvukanyi Bowen yaribukije abo banyeshure yuko itanguzwa ry’Ishure ry’i Gileyadi mu gihe c’Intambara ya kabiri y’isi yose ryari rishingiye ku kwizera bimwe biherejeko iranguka ry’Ijambo ry’ubuhanuzi rya Yehova (Abaheburayo 11:1; Ivyahishuriwe 17:8). Kuva ico gihe, Ishure ry’i Gileyadi ryararonkeje abanyeshure baryitaba akaryo ko gukomeza ukwizera kwabo. Ukwizera gukomeye kuravyurira abo baronka impapuro z’umutsindo umutima wo gutera baja imbere, bamamaza ukuri babigiranye umwete.

Uwundi mwigisha w’i Gileyadi yitwa Mark Noumair, yaratanze insiguro ishimishije ifise umutwe-shimikiro uvuga uti: “Munyibutsa umuntu umwe”. Yaravuze ibijanye n’akarorero k’umuhanuzi Elisa, uwagaragaje ukwizera be n’umutima rugabo mu gikorwa yarangura. Mu gushingira ivyo yavuga ku canditswe co mu 1 Abami 19:21, umuvukanyi Noumair yavuze ati: “Elisa yari afise umutima ukunze wo kugira ivyo ahinduye mu buzima bwiwe, agashira inyungu ziwe mu kibanza ca kabiri, gutyo akamenyesha abandi ibijanye n’umugambi wa Yehova”. Yarakeje abo bari bagiye kuronka impapuro z’umutsindo kuba baragaragaje agatima nk’aka Elisa, yongera abaremesha kubandanya babigenza gutyo mu vyibare bishasha bari bagiye gukoreramwo.

Ukwizera gutuma umuntu ashira amanga

Abo bari bagiye kuba abamisiyonari, igihe bariko barakomeza ukwizera kwabo mu kiringo c’ivyigwa, baraboneyeho akaryo ko gukoresha impera z’imishamvu kugira ngo babwire abandi inkuru nziza. Ivyo vyatumye bibonera ibintu bishimishije bashikirije bongera babisubiramwo mu buryo bw’udukino mu gihe c’insiguro yatanzwe n’umwigisha w’i Gileyadi yitwa Wallace Liverance. Umutwe w’iyo nsiguro wagira uti: “Turizera, ni co gituma tuvuga”, ukaba waribukije amajambo intumwa Paulo yavuze mu 2 Ab’i Korinto 4:13.

Inyuma y’iyo nsiguro, Daniel Barnes hamwe na Charles Woody, bompi bakaba bari mu bagize umuryango wa Beteli, barashikirije insiguro zirimwo no kubaza ibibazo abariko barakora igikorwa c’ubumisiyonari be n’abigeze kugikora. Abo babajijwe barashize ahabona ukuntu Yehova yitwararika abamusukurira badahemuka akongera akabahezagira (Imigani 10:22; 1 Petero 5:7). Umumisiyonari umwe yavuze ati: “Jewe n’umukenyezi wanje, twariboneye koko ukuntu Yehova yatwitwararitse biciye ku nyigisho twaronkeye i Gileyadi. Iyo nyigisho vy’ukuri yarakomeje ukwizera kwacu. Ukwizera kurahambaye kubera yuko abasavyi b’Imana bose, ushizemwo n’abamisiyonari, bashikirwa n’ibigeragezo, ingorane be n’amaganya”.

Nimugume muteza imbere inyigisho yo muri Bibiliya ikomeza ukwizera

Iyo porogarama yari ijanye no gushikiriza impapuro z’umutsindo igeze ku gihe cayo c’agaheta, Samuel Herd, akaba ari umwe mu bagize Inama Nyobozi, yarashikirije abari ng’aho insiguro igira iti: “Nimugume mukomeza abavukanyi banyu”. None inyigisho abo banyeshure bari baronkejwe yari ifise intumbero iyihe? Umuvukanyi Herd yavuze ati: “Intumbero y’iyi nyigisho ni iyo kubigisha ukuntu mwokoresha ururimi rwanyu kugira mushemeze Yehova, mwigishe abandi ukuri kwiwe mu turere dushasha mugiye gukoreramwo, mwongere mukomezanye mu kwizera”. Ariko rero, yaribukije abo banyeshure yuko ururimi rushobora kandi gukoreshwa mu kuvuga ibitubaka (Imigani 18:21; Yakobo 3:8-10). Yarabaremesheje kwigana akarorero ka Yezu mu gukoresha ururimi rwabo. Igihe kimwe, abigishwa ba Yezu bamaze kumwumviriza bavuze bati: “Mbega imitima yacu ntiyariko irarurumba . . . igihe yariko aradusigurira Ivyanditswe?” (Luka 24:32, NW). Umuvukanyi Herd yavuze ati: “Amajambo muvuga ni yaba ayubaka, azokora ku mutima abavukanyi n’abavukanyikazi banyu bo mu turere mugiye gukoreramwo”.

Abo banyeshure baciye baronswa impapuro zabo z’umutsindo. Maze ikete ryo gukenguruka ryanditswe n’abo banyeshure ryaciye risomwa. Ryagira riti: “Turiyumvamwo rwose ibanga ryo gukoresha ivyo twize kugira ngo turangure tudahemuka ibikorwa dushinzwe bwa bamisiyonari. Kubera yuko dufise umutima ukunze wo kugenda gushika ku mpera z’isi, dusenga dusaba ko utwigoro twacu twovamwo akamo gakomeye ko gushemeza Umwigisha wacu Mukuru, Yehova Imana”. Abari ng’aho baciye babakomera amashi n’akamwemwe kenshi. Vy’ukuri, iyo porogarama ijanye no gushikiriza impapuro z’umutsindo yarakomeje ukwizera kw’abari ng’aho bose.

[Iciyumviro ku rup. 17]

“Amajambo muvuga ni yaba ayubaka, azokora ku mutima abavukanyi n’abavukanyikazi banyu bo mu turere mugiye gukoreramwo”

[Uruzitiro ku rup. 15]

IBIRANGA ABARI BITAVYE IRYO SHURE

Igitigiri c’ibihugu bavuyemwo: 9

Igitigiri c’ibihugu barungitswemwo: 26

Igitigiri c’abanyeshure: 56

Incahagati y’imyaka y’amavuka: 33,4

Incahagati y’imyaka bamaze mu kuri: 16,8

Incahagati y’imyaka bamaze mu busuku bw’igihe cose: 13

[Ifoto ku rup. 16]

Umugwi ugira 122 w’abasohoka Ishure ry’ivya Bibiliya ry’i Gileyadi rya Watchtower

Mu rutonde rukurikira, imirongo iharurwa uhereye imbere uja inyuma, amazina na yo akaba atondetse uhereye ibubamfu uja iburyo ku murongo umwumwe wose.

(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.