Niwame witeguye!

“Mwame mwiteguye kuko Umwana w’umuntu azoza kw’isaha mutiyumvira.”​—MAT. 24:44.

1, 2. (a) Ni ibintu ibihe vyavuzwe mu buhanuzi bwo muri Bibiliya bishobora kugereranywa n’uguhindukirirwa n’ingwe? (b) Igitero cimirije kigira ico gikoze gute kuri wewe?

UMUKINYI w’utugenegene umwe yaramaze imyaka n’imyaka anezereza ababa bariko baramurorera mu gukina n’ingwe ziwe zamenyerejwe gukina n’abantu zo mu karere k’Ubuhindi kitwa Bengale. Yavuze ati: “Igihe igikoko kikweretse ko kidashobora kukugirira nabi bigatuma ucizigira, uca ubona ari nk’aho wahawe ingabirano nziza kuruta izindi zose mw’isi.” Mugabo kw’igenekerezo rya 3 Gitugutu 2003, ukwo kwizigira ibikoko kwaraheze. Biturutse ku mvo itazwi, kimwe muri ivyo bikoko vyiwe, ikaba yari ingwe yera yapima ibilo 172, caramuhindukiriye kirondera kumurya. Uwo muntu amenyereza ibikoko ntiyari yiteze na gato yuko ico gikoko comuhindukiriye, akaba rero atari yiteguye.

² Birashimishije cane kubona Bibiliya ivuga imbere y’igihe ibijanye n’“igikoko” kizotera giturumbuka, tukaba rero dukeneye kwama twiteguye. (Soma Ivyahishuwe 17:15-18.) None ni nde ico gikoko gitera? Ibintu birahinduka mu buryo butangaje, isi ya Shetani ikicamwo ibice maze ikirwanya. Ico gikoko c’ibara ry’agahama kigereranya Ishirahamwe mpuzamakungu, “arya mahembe cumi” na yo akagereranya intwaro zose z’ivya politike. Izo ntwaro zizohindukirira Babiloni Akomeye ameze nk’umumaraya, ni ukuvuga inganji y’isi yose y’idini ry’ikinyoma, maze zimutikize bimwe bikomeye. None ivyo bizoshika ryari? Ntituzi umusi n’isaha. (Mat. 24:36) Ico tuzi coco ni uko bizoba kw’isaha tutiteze be n’uko igihe gisigaye kugira ngo ico gitero kibe ari kigufi. (Mat. 24:44; 1 Kor. 7:29) Birahambaye cane rero yuko tuguma twiteguye mu buryo bw’impwemu kugira ngo ico gitero nicaba, Kristu na we akaza gushitsa urubanza, azoturokore! (Luka 21:28) Kugira ngo dushobore kwama twiteguye gutyo, turashobora kugira ico twigiye ku basavyi b’Imana b’abizigirwa bagumye biteguye maze bakibonera ukuntu ivyo Imana yasezeranye biranguka. Twoba tuzofata nkama ivyo bintu vyabaye koko?

Niwame witeguye nka Nowa

3. Ni ibintu ibihe vyatuma Nowa atoroherwa no gukorera Imana adahemuka?

³ Naho mu gihe ca Nowa kw’isi hari hiraye ibintu biteye ikinya, yama yiteguye kugira ngo abone ukuntu ivyo Imana yari yarasezeranye biranguka. Niwihe ishusho y’ibintu bitoroshe Nowa yabwirizwa kwihanganira igihe abamarayika b’abagarariji biyambika imibiri y’abantu maze bakaza kubana n’abagore bezabeza! Ukwo kubana kutari kujanye n’uburyo baremwe kwatumye havuka abana badasanzwe, b’“abanyenkomezi” bakoresha ububasha bwabo burengeye ubw’abantu mu kugirira nabi abandi. (Ita. 6:4) Nuzirikane ku bukazi bwagirwa igihe ivyo bigatanya vyaza birateza akajagari ahantu hose vyaba bigiye. Ivyo vyatumye ububisha buba ndanse, ivyiyumviro vy’abantu be n’inyifato yabo na vyo birononekara cane. Umukama Segaba Yehova yaciye ashinga igihe yokuriyeho iyo si itibanga Imana.​—Soma Itanguriro 6:3, 5, 11, 12.a

4, 5. Ni mu buryo nyabaki muri iki gihe ibintu bimeze nk’uko vyari biri mu gihe ca Nowa?

⁴ Yezu yaravuze mu buryo bw’ubuhanuzi yuko muri iki gihe cacu ibintu vyobaye bimeze nk’uko vyari biri mu misi ya Nowa. (Mat. 24:37) Nk’akarorero, n’ubu turibonera ukuntu ibiremwa vy’impwemu vy’ibibisha bigira ico bikoze mu vyo abantu bakora. (Ivyah. 12:7-9, 12) Abo bamarayika b’amadayimoni bariyambitse imibiri y’abantu mu misi ya Nowa. Naho ubu badashobora kwiyambika imibiri y’abantu, baragerageza kwigarurira abato n’abakuze. Abo bamarayika b’ibihumbu barahimbarwa n’ibintu bibi kandi vyononekaye bikorwa n’abantu bo kw’isi bashobora kwononwa n’abo bamarayika, ivyo bikaba ata muntu n’umwe abiciye n’ikanda.​—Ef. 6:11, 12.

⁵ Ijambo ry’Imana rivuga yuko Shetani ari “umwicanyi,” rikavuga kandi yuko afise “uburyo bwo guteza urupfu.” (Yoh. 8:44; Heb. 2:14) Ariko rero, Imana ntimureka ngo yice umuntu uwo ari we wese ashatse. Naho ari ukwo, arashobora gutuma abantu bakora ibintu bibagirira nabi maze bigatuma bapfa. Vyongeye, arosha imizirikanyi y’abantu kugira ngo banke abandi bongere batsimbataze agatima k’ubwicanyi. Nk’akarorero, umwana 1 mu bana 142 bavuka muri Leta Zunze Ubumwe, aruhira kwicwa. Uravye ukuntu ubukazi bwiraye ukuri aho bukaba kandi bugirwa ata mvo yumvikana ibutumye, wibaza none ko muri iki gihe Yehova atabubona nk’uko yabubonye mu gihe ca Nowa? Yoba azoreka kugira ico akoze?

6, 7. Nowa n’umuryango wiwe bagaragaje gute ko bafise ukwizera be n’uko batinya Imana?

⁶ Igihe kigeze, Nowa yaramenyeshejwe ingingo Imana yari yafashe yo kuzana umwuzure w’amazi kw’isi, ugahonya ikiri n’umubiri cose. (Ita. 6:13, 17) Yehova yarategetse Nowa kwubaka ubwato bumeze nk’igisandugu amahero. Nowa n’umuryango wiwe baciye batangura ico gikorwa. Ni igiki none cabafashije kugamburuka no kuguma biteguye gushika urubanza rw’Imana rushitse?

⁷ Ukwizera gukomeye be n’ugutinya Imana ni vyo vyatumye Nowa n’umuryango wiwe bakora nk’uko Imana yari yabategetse. (Ita. 6:22; Heb. 11:7) Kubera ko Nowa yari serugo, yagumye ari maso mu buryo bw’impwemu maze aririnda kwisuka mu ngeso mbi z’abantu bari bamukikuje. (Ita. 6:9) Yari azi ko umuryango wiwe wari ukeneye kwirinda kwigana inyifato iranga ubukazi be n’agatima ko kugarariza vyaranga abantu bari bawukikuje. Vyari bihambaye ko birinda gutwarwa n’ibikorwa vyo mu buzima bwa misi yose. Imana yari yarabahaye igikorwa bokoze, kandi vyari bihambaye ko uwo muryango wose ushingira ubuzima bwawo kuri ico gikorwa.​—Soma Itanguriro 6:14, 18.

Nowa n’umuryango wiwe bagumye biteguye

8. Ni igiki cerekana yuko abari bagize umuryango wa Nowa bakora ibikorwa biranga ukwihebera Imana?

⁸ Iyo nkuru yo muri Bibiliya irashimika kuri serugo Nowa, mugabo umukenyezi wiwe, abana biwe be n’abakazana biwe na bo nyene bari abasavyi ba Yehova. Umuhanuzi Ezekiyeli ivyo yaravyemeje. Yavuze yuko iyaba Nowa yariho mu gihe ca Ezekiyeli, abana biwe batorokotse kubera ubugororotsi bwa se wabo. Bari bakuze bihagije ku buryo bari gushobora kugamburuka canke kugambarara. Ku bw’ivyo, ubwabo barerekanye yuko bakunda Imana n’inzira zayo. (Ezk. 14:19, 20) Umuryango wa Nowa waremera ubuyobozi yawuha, ukagira ukwizera nk’ukwiwe, kandi ntiwaretse ngo abandi batume uheba igikorwa Imana yari yawuhaye.

9. Ni uburorero ubuhe bwo muri iki gihe bw’abantu bafise ukwizera nk’ukwa Nowa dushobora gutanga?

⁹ Ese ukuntu biremesha muri iki gihe kubona mu muryango wacu w’abavukanyi ukwiye kw’isi yose harimwo ba serugo bariko barihatira kwigana Nowa! Baratahura yuko bidahagije kuronsa imiryango yabo ibifungurwa, ivyambarwa, uburaro, no kubashira mw’ishure. Bategerezwa kandi kubaronsa ivyo bakeneye mu vy’impwemu. Mu kubigenza gutyo, baba bagaragaje ko biteguriye ivyo Yehova agiye gukora vuba.

10, 11. (a) Igihe Nowa n’umuryango wiwe bari mu bwato, bashobora kuba vy’ukuri bumvise bamerewe gute? (b) Ni ikibazo ikihe vyoba vyiza twibajije?

¹⁰ Nowa, umukenyezi wiwe, abahungu biwe n’abakazana biwe boshobora kuba baramaze imyaka nka 50 bariko barubaka ubwo bwato. Igihe bariko barubaka ubwo bwato, bategerezwa kuba baza barabwinjiramwo incuro amajana n’amajana. Barabuhomye, barabwuzuzamwo ibifungurwa, bongera barinjizamwo ibikoko. Numere nk’uwubona ibi bintu mu bwenge. Umusi bari barindiranye igishika ugiye washika. Ni ku musi ugira 17 w’ukwezi kugira kabiri mu mwaka wa 2370 B.G.C., maze ng’abo barinjiye mu bwato. Yehova arugaye umuryango, hanyuma imvura itanguye kugwa. Iryo si isegenya risanzwe. Igisenge c’amazi, ni ukuvuga amazi yo mu kirere ameze nk’ikiyaga, kirugurutse, maze imvura y’isegenya itibagurikira kuri nya bwato. (Ita. 7:11, 16) Abantu batari muri ubwo bwato bariko barapfa mu gihe abari muri bwo bobo barokoka. None umuryango wa Nowa ushobora kuba wumvise umerewe gute? Emwe, warakengurukiye Imana bimwe bishika kure. Mugabo nta gukeka ko bibwiye bati: ‘Ese ukuntu duhimbawe no kuba twaragendanye n’Imana y’ukuri tukongera tukaguma twiteguye!’ (Ita. 6:9) Woba ushobora kumera nk’uwubona mu bwenge umaze kurokoka Harumagedoni, umutima wawe wuzuye ugukenguruka nk’ukwo?

¹¹ Nta kintu na kimwe gishobora kubuza Mushoboravyose gushitsa ivyo yasezeranye bijanye no gukuraho iyi si ya Shetani. Niwibaze uti: ‘Noba nizigira ntakeka na gato yuko ata kintu na kimwe mu vyo Imana yasezeranye kitazoshika, naho koba akantu ide, be n’uko vyose bizoranguka ku gihe yashinze?’ Nimba ari ukwo biri, niwame witeguye mu kugumiza hafi ku muzirikanyi uwo “musi wa Yehova” uriko uregereza wihuta.​—2 Pet. 3:12.

Musa yagumye ari maso

12. Ni igiki cari gushobora gusamaza Musa ntabone ibintu mu buryo bw’impwemu?

¹² Nimuze turimbure akandi karorero. Dufatiye ku kuntu umuntu abona ibintu, Musa yasa n’uwari afise akaryo ko kuronka ibintu vyinshi cane mu Misiri. Kubera ko yari umwana w’umurerano w’umukobwa wa Farawo, ashobora kuba yarubahwa cane akaba kandi yarafungura ibifungurwa vyiza kuruta ibindi vyose, akambara impuzu nziza kuruta izindi, akaba kandi yaba ahantu hari ibintu bizimvye kuruta ibindi vyose. Yarize amashure menshi. (Soma Ivyakozwe 7:20-22.) Ashobora kuba yari kuronka intoranwa ihambaye cane.

13. Musa yagumije umutima gute ku vyo Imana yari yarasezeranye?

¹³ Biragaragara ko ukuba Musa yari yaramenyerejwe n’abavyeyi biwe kuva akiri muto vyatumye ashobora gutahura ubupfu bwari mu gusenga ibigirwamana kw’Abanyamisiri. (Kuv. 32:8) Ivy’amashure vyo mu Misiri be n’ibintu bikayangana vy’i Bwami ntivyatumye Musa aheba ugusenga kw’ukuri. Ategerezwa kuba yarazirikana bimwe bigera kure ivyo Imana yari yarasezeraniye ba sekuruza biwe akaba kandi yaripfuza cane kwama yiteguye kugira ngo akore ivyo Imana igomba. Kanatsinda, Musa yabwiye bene Isirayeli ati: “Yehova . . . Imana ya Aburahamu, Imana ya Izahaki n’Imana ya Yakobo, yabantumyeko.”​—Soma Kuvayo 3:15-17.

14. Ukwizera kwa Musa be n’umutima rugabo wiwe vyageragejwe gute?

¹⁴ Yehova we Mana y’ukuri ntiyari umugani kuri Musa, ukwo akaba atari ko vyari ku bigirwamana vyose vyagereranya imana zitagira ubuzima zo mu Misiri. Yabaho nk’aho abona “Umwe ataboneka.” Musa yarizera ko abasavyi b’Imana bobohowe, mugabo ntiyari azi igihe ivyo vyobereyeko. (Heb. 11:24, 25, 27) Icipfuzo gikomeye yari afise co kubona Abaheburayo babohowe cagaragaye igihe yarwanira umushumba w’Umwisirayeli yariko aragirirwa nabi. (Kuv. 2:11, 12) Ariko rero, ico nticari co gihe Yehova yari yarashinze co kubohora Abisirayeli, akaba ari co gituma Musa yabwirijwe kubaho ari impunzi mu gihugu ca kure. Nta gukeka ko bitamworoheye kuva mu bihinda vyo ku kirimba co mu Misiri akaja kuba mu gahinga. Naho vyari ukwo, Musa yagumye yiteguye mu kuguma akurikiza ubuyobozi bwose Yehova yamuha. Ni co gituma Imana yashoboye kumukoresha kugira ngo aruhurire bene wabo haciye imyaka 40 ari i Midiyani. Musa abitegetswe n’Imana, yarasubiye mu Misiri abigiranye agatima ko kugamburuka. Igihe c’uko Musa arangura igikorwa c’Imana kandi akagikora mu buryo Imana igomba cari gishitse. (Kuv. 3:2, 7, 8, 10) Musa, ‘uwatekereza kuruta abantu bose,’ amaze gusubira mu Misiri yari akeneye ukwizera n’umutima rugabo kugira ngo aseruke imbere ya Farawo. (Guh. 12:3) Ntiyaserutse imbere yiwe rimwe gusa, ahubwo yabigize incuro n’izindi uko vya vyago vyaguma bitera, akaba atari azi izindi ncuro yabwirizwa kuja imbere ya Farawo kuva ku cago kimwe gushika ku gikurikira.

15. Naho Musa yashikiwe n’intambamyi, ni igiki camuvyuriye umutima wo kuguma arondera uturyo two gutera iteka Se wiwe wo mw’ijuru?

¹⁵ Mu myaka 40 yakurikiye, kuva 1513 B.G.C. gushika mu 1473 B.G.C., Musa yarashikiwe n’ibintu bivuna umutima. Yamara, yararondeye uturyo two gutera iteka Yehova yongera araremesha n’umutima wiwe wose Abisirayeli bagenziwe kubigenza gutyo. (Gus. 31:1-8) Uti kubera iki? Kubera ko yakunda izina rya Yehova n’ubusegaba bwiwe kuruta uko yakunda izina ryiwe bwite. (Kuv. 32:10-13; Guh. 14:11-16) Naho dushikirwa n’ibintu bivuna umutima canke intambamyi, na twebwe nyene dutegerezwa kubandanya gushigikira ubutegetsi bw’Imana, twizigiye yuko uburyo ikora ibintu ari bwo buranga ubukerebutsi, ari bwo bugororotse, bukaba kandi ari bwo bwiza kuruta ubundi ubwo ari bwo bwose. (Yes. 55:8-11; Yer. 10:23) Ukwo kwoba ari ko ubibona?

Nugume uri maso!

16, 17. Ni kubera iki ibivugwa muri Mariko 13:35-37 biri n’ikintu gihambaye bivuze kuri wewe?

¹⁶ “Mugume mureretse, mugume murikanuye, kuko mutazi aho igihe cashinzwe kizogerera.” (Mrk. 13:33) Yezu yatanze iyo ngabisho igihe yariko aravuga ibijanye n’ikimenyetso coranze insozero y’ivy’iyi si mbi. Rimbura amajambo asozera ubwo buhanuzi buhambaye Yezu yavuze nk’uko yanditswe na Mariko, ayo na yo akaba agira ati: “Mugume muri maso, kuko mutazi igihe nyen’urugo azozirako, namba azoza buhwibiriye canke mu gicugu canke mu nkoko canke mu gatondo ka kare; kugira ngo niyashika giturumbuka, ntasange musinziriye. Mugabo ico ndababwiye, ndakibwiye bose: Mugume muri maso.”​—Mrk. 13:35-37.

¹⁷ Ayo majambo ya Yezu yo kuduhimiriza aratuma tuzirikana. Yaravuze ibijanye n’ibiringo bine bitandukanye aho abantu baterama mw’ijoro. Ikiringo ca nyuma caba ari igihe kitoroshe co kuguma umuntu ari maso, kuko cahera nko kw’isaha icenda z’ijoro kigashika izuba riserutse. Abahinga mu vy’intambara babona yuko ico ari co gihe ciza kuruta ibindi vyose co gutera abansi, kikaba gitanga akaryo keza kuruta ko kubacakira ‘basinziriye.’ Muri ubwo buryo nyene, muri iki gihe aho isi isinziriye umukondorazosi mu buryo bw’impwemu, twoshobora kurwana urugamba rukomeye kuruta izindi zose kugira ngo tugume turikanuye. Twoba dukekeranya yuko dukeneye ‘kuguma turikanuye’ no ‘kuguma tureretse’ kugira ngo tuze tubone iherezo be n’ukurokorwa kwacu vyari vyaravuzwe?

18. Twebwe Ivyabona vya Yehova, ni agateka ntangere akahe dufise?

¹⁸ Wa muntu amenyereza ibikoko twavuga mu ntango yararokotse igihe ya ngwe yo mu karere k’Ubuhindi kitwa Bengale yamuhindukirira irondera kumurya. Mugabo ubuhanuzi bwo muri Bibiliya burerekana ata kwihenda yuko ryaba idini ry’ikinyoma canke iyindi mice y’iyi si mbi bitazorokoka iherezo ririko riregereza. (Ivyah. 18:4-8) Ese twese abasavyi b’Imana, abato n’abakuze, bobona ko bihambaye gukora ivyo bashoboye vyose kugira ngo bame biteguriye umusi wa Yehova nk’uko Nowa n’umuryango wiwe babigenjeje. Tuba mw’isi idatera iteka Imana aho abigisha b’idini ry’ikinyoma, hamwe n’abakekeranya nimba Imana iriho be n’abahakanamana, bashinyaguriza Umuremyi mu vyo bavuga. Ntitwipfuza ko ivyo bigira ico bidukozeko. Nimuze dufate nkama uburorero twarimbuye maze tugume turondera uturyo two kuburanira no gutera iteka Yehova nka we “Mana iruta izindi mana,” egome, “Imana ihambaye, y’inkomezi kandi iteye ubwoba.”​—Gus. 10:17.

[Akajambo k’epfo]

Woba uvyibuka?

• Ni kubera iki Nowa yari akeneye gushira imbere ivyo umuryango wiwe wari ukeneye mu vy’impwemu?

• Ni gute ibihe turimwo bisa cane n’igihe ca Nowa?

• Naho Musa yashikiwe n’ibintu bivuna umutima, ni kubera iki yagumye ahanze amaso ivyo Yehova yari yarasezeranye?

• Ni ubuhanuzi bwo muri Bibiliya ubuhe butuma uguma urikanuye mu buryo bw’impwemu?

[Ifoto ku rup. 25]

Nowa n’umuryango wiwe bagumye bitwararika cane igikorwa ca Yehova

[Ifoto ku rup. 26]

Ibintu vyo kwizigirwa Imana yasezeranye vyarafashije Musa kuguma ari maso