Woba wari ubizi?

Ni kubera iki mu rusengero rw’i Yeruzalemu hariho abakaba amahera?

▪ Imbere gato y’uko Yezu apfa, yaratoreye umuti ikintu kiranga akarenganyo gakomeye cariko kibera mu rusengero. Bibiliya ivuga iti: “Yezu . . . ahindira hanze abari mu vyo kugurishiriza no kugurira mu rusengero bose, ahenagura imeza z’abakaba amahera be n’intebe z’abariko bagurisha inuma. Maze ababwira ati: ‘Vyanditswe ngo: “Inzu yanje izokwitwa inzu yo gusengeramwo,” mugabo mwebwe muriko muyigira isenga ry’abambuzi.’”​—Matayo 21:12, 13.

Abayuda bo mu kinjana ca mbere be n’abinjiye idini ry’Abayuda baragira ingendo bava mu bihugu vyinshi no mu bisagara vyinshi bagiye ku rusengero rw’i Yerusalemu, bitwaje ibiceri vyakoreshwa mu turere bavamwo. Ariko rero, basabwa gukoresha amahera yemewe kugira ngo barihe ikori ry’urusengero ryatangwa buri mwaka, bagure ibitungwa vyo gutangako ibimazi, no kugira ngo batange ayandi mashikanwa umuntu yatanga avyishakiye. Gutyo, abakaba amahera baravunja ibiceri vy’abantu baturutse mu mihingo itandukanye bakabaha amahera yemewe, mugabo bagasigaranako makeyi. Igihe imisi mikuru y’Abayuda yaba yegereje, abo bene gukaba amahera barashira amameza maninimanini mu Kigo c’Abanyamahanga c’urusengero.

Kuba Yezu yarahambariye abakaba amahera ababwira ko urusengero bariko bararugira “isenga ry’abambuzi,” nta gukeka ko vyerekana yuko bariko baraca abantu amaboko.

Ni kubera iki ibiti vy’imyelayo vyahabwa agaciro bimwe bidasanzwe mu bihe vya Bibiliya?

▪ Ibiti vy’imyelayo n’imirima y’imizabibu vyari mu mihezagiro Imana yasezeraniye abasavyi bayo mu gihe bogumye ari abizigirwa kuri yo. (Gusubira mu vyagezwe 6:10, 11) Gushika n’ubu, igiti c’umwelayo kirahabwa agaciro kanini mu turere kibamwo. Kirashobora kwama ivyamwa vyinshi mu kiringo c’imyaka amajana n’amajana batarinze kucitwararika cane. Igiti c’igiterano kirashobora gutotahara no mw’isi y’urubuyebuye kandi kirashobora kurinda uruzuba rukunda gutera. Mu gihe ico giti ciciwe, imizi yaco ica izana iminago itari mike ishobora kuvamwo ibindi biti.

Mu bihe vya Bibiliya, igishishwa n’amababi vy’ico giti vyarahabwa agaciro kubera vyashobora gukoreshwa nk’umuti ugabanya umucanwa. Ibintu bimeze nk’uburembo bisokoroka mu mashami ashaje bikaba kandi bifise akamoto keza, vyarakoreshwa mu guhingura ibintu vyo kwisiga bimota neza. Ariko rero, ahanini ico giti cahabwa agaciro kubera yuko catanga ivyo kurya, ni ukuvuga ivyamwa vyaco na canecane amavuta yaco. Icamwa c’umwelayo usanga kirimwo amavuta angana n’ica kabiri caco.

Igiti ciza kimwe carashobora gutanga amavuta agera ku malitiro 57 ku mwaka. Amavuta y’umwelayo yarakoreshwa kandi nk’igitoro c’itara, agakoreshwa mu bijanye n’ibirori no mu bijanye n’idini, abantu bakayisiga ku mubiri no mu mushatsi, akongera agakoreshwa nk’umuti wo kworosha ibikomere n’uwo kugabanya ububabare buterwa n’inguma.​—Kuvayo 27:20; Abalewi 2:1-7; 8:1-12; Rusi 3:3; Luka 10:33, 34.