Bakurambere, mwoba muruhurira “umutima urushe”?

Angela,a akaba ari mushiki wacu atubatse ageze mu myaka 30, asa n’uwuhagaritse umutima. Arindiriye abakurambere. Ni igiki baza kumubwira? Ni ivy’ukuri ko yasivye amakoraniro nk’angahe, mugabo ararushe cane kubera ko amaze umusi wose afasha abageze mu zabukuru. Uretse imyitwarariko yiwe ya buri musi, arahagaritswe umutima cane n’amagara ya nyina.

Hamwe woba ubwirizwa kugendera Angela, woremesha gute uwo “mutima urushe”? (Yer. 31:25) Ubwa mbere hoho, wokwitegurira gute kugendera umuntu cungere mu buryo bumuruhurira?

ZIRIKANA KU KUNTU IVY’ABAVUKANYI BAWE VYIFASHE

Birashika twese tukaruha kubera akazi dukora canke amabanga ya gitewokarasi tujejwe. Nk’akarorero, umuhanuzi Daniyeli yarumvise ‘intege zimuheranye’ igihe yerekwa ibintu atashobora gutahura. (Dan. 8:27) Ikindi gihe, yarafashijwe igihe umumarayika Gaburiyeli yamubonekera. Iyo ntumwa y’Imana yarafashije Daniyeli gutahura ivyo bintu, iramukura amazinda yuko Yehova yari yumvise amasengesho yiwe, yongera imubwira yuko yari akiri “umuntu ahimbaye cane.” (Dan. 9:21-23) Ikindi gihe, amajambo acaguwe neza yavuzwe n’uwundi mumarayika yarakomeje uwo muhanuzi yari arushe.—Dan. 10:19.

Muri ubwo buryo nyene, imbere y’uko ugendera uwo musangiye ukwemera yoshobora kuba arushe canke yacitse intege, nufate akanya uzirikane ku kuntu ivyiwe vyifashe. Ni ingorane izihe afise? Izo ngorane zoshobora gute kuba ziriko ziramutwara utuguvu? Ni kamere nziza izihe agaragaza? Richard, akaba amaze imyaka irenga 20 ari umukurambere, avuga ati: “Nibanda ku vyo abavukanyi banje bashoboye.” Yongerako ati: “Igihe nzirikanye nitonze ukuntu ivyabo vyifashe imbere y’uko ndabagendera, bica birushiriza kunyorohera kubona ukuntu nobaremesha mu buryo buhuye n’ivyo bakeneye.” Nimba uzojana n’uwundi mukurambere, ubona gute murabiye hamwe ukuntu ivy’uwo muvukanyi wanyu vyifashe?

NUTUME ABAVUKANYI BAWE BUMVA BISANZE

Ushobora kuba wemera yuko kuvuga ukuntu wiyumva bishobora kugutera isoni. Tubitangire akarorero: Umuvukanyi wawe vyoshobora kutamworohera kuyagira abakurambere bamugendeye. Ushobora gute none gutanguza ikiyago? Kumumwenyurira ubikuye ku mutima no kumubwira amajambo makeyi amusubiriza umutima mu nda vyoshobora kuvamwo ivyiza. Michael, akaba amaze imyaka irenga 40 ari umukurambere, akunda gutanguza aya majambo: “Mbega urazi, kamwe mu duteka duhimbaye kuruta utundi twose umukurambere afise, ni ukugendera abavukanyi ku mihana yabo maze akarushiriza kubamenya. Ni co gituma nari maze igihe niteganye igishika kubagendera uyu musi.”

Woshobora guhitamwo gutura isengesho rivuye ku mutima amaja mu ntango z’ikiyago mugiranira. Mu masengesho intumwa Paulo yatura yarashimika mu buryo bubereye ku kwizera kw’abavukanyi biwe, ku rukundo rwabo no ku kwihangana kwabo. (1 Tes. 1:2, 3) Useruye ukuntu wiyumva ku bijanye na kamere nziza z’umuvukanyi wawe, mu vy’ukuri uba uteguye umutima wawe n’uwiwe ku bw’ikiyago cubaka. Amajambo yawe arashobora kandi gutuma uwo muvukanyi aturura. Uwitwa Ray, akaba ari umukurambere aciye uruma, avuga ati: “Birashika twese tukibagira ivyiza dukora. Igihe rero hari uwubitwibukije, biraturuhurira.”

NUTANGE INGABIRANO Y’IVY’IMPWEMU

Nk’uko Paulo yabigira, urashobora gutanga “ingabirano y’ivy’impwemu” mu gushikiriza iciyumviro co mu Vyanditswe, naho coba kivuye mu murongo umwe gusa. (Rom. 1:11) Nk’akarorero, umuvukanyi adendebukiwe yoshobora kwiyumvamwo ko ata co amaze, nka wa mwanditsi w’amazaburi yigereranije n’“umukuza w’urushato [wakabiranye uri] mu mwotsi.” (Zab. 119:83, 176) Umaze gusigura muri make iyo mvugo, woshobora guserura ko wizigiye yuko uwo muvukanyi wawe ‘atibagiye’ amabwirizwa y’Imana.

Muri ubwo buryo nyene, ca kigereranyo cerekeye igiceri c’idarakima catakaye coba cokora ku mutima mushiki wacu yagiye akayombekere akava mw’ishengero canke yatakaje umwete? (Luka 15:8-10) Ico giceri catakaye coshobora kuba cari ku mugufu w’agaciro wari ugizwe n’ibiceri vy’ifeza vyinshi. Uciye irya n’ino ico kigereranyo, woshobora gufasha uwo mushiki wacu kubona ko ari umwe mu bagize ishengero rya gikirisu afise agaciro. Mumaze kuganira kuri ico kintu, woshobora kumwereka yuko Yehova amwitwararika cane mu kumubona ko ari umwe mu ntama ziwe ntonto.

Abo dusangiye ukwemera barakunda kugira ico bavuze kuri Bibiliya. Ku bw’ivyo, ntiwiharize ikiyago. Mumaze gusoma umurongo uhuye n’uko ivyabo vyifashe, woshobora gushira ahabona ijambo canke amajambo nyamukuru maze ukabasaba ngo bagire ico bayavuzeko. Nk’akarorero, hamaze gusomwa 2 Abakorinto 4:16, umukurambere yoshobora kubaza ati: “Woba umaze kwibonera uburyo butandukanye Yehova akugira mushasha?” Kubigenza gutyo vyoshobora gutuma haba “uguhanahana indemesho” kw’ukuri.—Rom. 1:12.

Woshobora kandi kuruhurira uwo musangiye ukwemera mu kuganira ku muntu avugwa muri Bibiliya yashikiwe n’ivyashikiye uwo muntu musangiye ukwemera. Umuntu yihebuye, ivyiwe vyoshobora kuba vyifashe nk’ivya Hana canke Epafurodito, abigeze kwihebura mugabo bakaguma bari n’agaciro imbere y’Imana. (1 Sam. 1:9-11, 20; Flp. 2:25-30) Ubona gute muganiriye ku burorero bumwebumwe bwo muri Bibiliya bwiza nimba buhuye n’uko ivyiwe vyifashe?

NIWIYEMEZE KUMUKURIKIRANA

Urashobora kwerekana ko witwararika vy’ukuri abo musangiye ukwemera mu kubandanya kubitwararika umaze kubagendera. (Ivyak. 15:36) Igihe uriko urasozera urwo rugendo, woshobora gusanga vyoba ngirakamaro muhanye isango ryo gukorana mu busuku bwo mu ndimiro. Bernard, uno akaba ari umukurambere aciye uruma, igihe asubiye kubonana n’umuvukanyi canke mushiki wacu aheruka kugendera, abigiranye ukwiyubara arashobora gukikiriza ku mpanuro iyo ari yo yose yatanze mu kumubaza ati: “Mbwira, yoba yaragufashije?” Niwamwitwararika gutyo, uzoshobora kumenya nimba akeneye iyindi mfashanyo.

Ubu kuruta ikindi gihe cose, abavukanyi bacu na bashiki bacu barakeneye kwiyumvamwo ko bitwararitswe, ko batahurwa be n’uko bakundwa. (1 Tes. 5:11) Ku bw’ivyo, imbere y’uko ugendera cungere uwo musangiye ukwemera, nufate akanya uzirikane ku kuntu ivyiwe vyifashe. Nubishire mw’isengesho. Nuhitemwo ivyanditswe bibereye. Niwabigenza gutyo, uzotora amajambo abereye yo kuruhurira “umutima urushe”!