Inyishu ku Bibazo Vyanyu

◼ Ni ibisohokayandikiro ibihe dukwiye kwigana n’abantu bashasha imbere yuko babatizwa?

Imbere yuko umuntu ashobora kwegurira ubuzima bwiwe Yehova akongera akabatizwa, ategerezwa kwironsa ubumenyi nyakuri. (Yoh. 17:3) Azomenya ivyo akeneye mu kwiga vya bisohokayandikiro vyompi, agatabu Ni Ibiki Imana Idusaba? n’igitabu Ubumenyi Bujana mu Buzima Budashira. Kenshi agatabu Ni Ibiki Imana Idusaba? ni ko kazotangura kwigwa. Ariko rero, mu gihe inyigisho yatanguriye mu gitabu Ubumenyi, agatabu Ni Ibiki Imana Idusaba? kazokwigwa ico gitabu kirangiye. Ni kuki ivyo bikenewe?

Agatabu Ni Ibiki Imana Idusaba? karatanga incamake y’inyigisho z’ishimikiro za Bibiliya. Mu gihe ari ko gatanguye kwigwa, kazotuma umwigishwa atahura ibintu vy’ishimikiro vyerekeye ibisabwa kugira ngo umuntu ahimbare Yehova. Kizwe ubwa nyuma, kazoba nk’isubiramwo ryiza ry’ibintu vyahetuwe mu gitabu Ubumenyi. Muri ivyo bihe vyose, nimuremeshe umwigishwa kurondera ivyanditswe bishigikira ivyiyumviro no kubizirikanako. Murarabe neza ko muserura ivyiyumviro ku mashusho kubera yuko ari ibintu kirumara cane bifasha kwigisha.—Raba Umunara w’Inderetsi wo ku wa 1 Ruhuhuma 1997, urupapuro 9-10.

Umwigishwa wa Bibiliya amaze kwiga ivyo bisohokayandikiro vyompi akabihetura, yoshobora kwishura ibibazo vyose abakurambere bazosubiramwo na we mu gihe co kwitegurira kubatizwa. Nimba ari ukwo, hari igihe bitoba bikenewe ko arongorerwa inyigisho isanzwe mu kindi gisohokayandikiro ico ari co cose, naho umurongozi akwiye kubandanya kwitwararika cane iterambere ryiwe.—Raba Umunara w’Inderetsi wo ku wa 1 Ruhuhuma 1996, urupapuro rw’8, 11.