Urutonde rw’Amakoraniro y’Umurimo

Indwi Itangura ku wa 11 Ntwarante

Ururirimbo rwa 12 (113)

Imin. 13: Amatangazo y’iwanyu. Amatangazo arobanuwe mu yo mu Gikorwa Dukorera Ubwami. Nimugire imyerekano ibiri itandukanye y’ukuntu twoshikiriza Umunara w’Inderetsi wo ku wa 1 Ntwarante na Réveillez-vous! yo ku wa 22 Ruhuhuma mukoresheje inama ziri ku rupapuro rw’8. Muri umwe wose, nimwerekane uburyo butandukanye bw’ukuntu twovyifatamwo umuntu asubijeyo amajambo yohava ahagarika ikiyago ngo: “Ntavyo nshaka.”—Raba agatabu Uburyo bwo Gutanguza no Kubandanya Ibiyago Bishingiye Kuri Bibiliya, urupapuro rw’8.

Imin. 12: Nuryohore Uburyo bwo Kwigisha mu Ndimiro. Nusubiremwo inama ziri mu nyongera y’Igikorwa Dukorera Ubwami co muri Mukakaro 1996 ku kuntu umuntu yorongora inyigisho za Bibiliya. Nushimike ku vy’ukwitegurira neza inyigisho imbere y’igihe, umuntu afise mu bwenge ivyo umwigishwa akeneye. Nimugire umwerekano mugufi w’ukuntu umwamamaji ashobora gutora ivyiyumviro bikurubikuru n’ivyanditswe vy’ishimikiro bikeyi akoresha ku mwigishwa kanaka mukoresheje igihimba co mu gitabu Ubumenyi.

Imin. 20: “[Nitu]be Abatunzi [m]u Bikorwa Vyiza.”a Gishikirizwe n’umucungezi w’umurimo. Nuhimirize bose kugira uruhara mu busuku mu kwitegurira ihimbazwa ry’Icibutso ryo ku wa 28 Ntwarante. Nimuganire ukuntu udukaratasi tw’ubutumire dushobora kurushiriza gukoreshwa neza. Nusabe abamamaji bavuge ingene bashoboye gushikira incuti zabo, ababanyi, abatohoji ba Bibiliya, n’abashimishijwe kugira ngo babatumire bitabe Icibutso mu mwaka uheze be n’umunezero ivyo vyabazaniye. Nuremeshe ababishoboye bose gukora ubutsimvyi bw’ugufasha mu kwezi kwa Ndamukiza no gusaba ifomu yo kwuzuza inyuma y’ikoraniro.

Ururirimbo rwa 10 (82) n’isengesho ryo gusozera.

Indwi Itangura ku wa 18 Ntwarante

Ururirimbo rwa 29 (222)

Imin. 10: Amatangazo y’iwanyu. Raporo y’ivy’amakonte. Nimuganire “Ivyibukijwe ku Vyerekeye Icibutso.” Nuremeshe bose gukurikira urutonde rw’ugusoma Bibiliya kw’Icibutso rwo ku wa 23-28 Ntwarante, nk’uko vyerekanwa mu gatabu Twihweze Ivyanditswe ku Musi ku Musi—2002.

Imin. 15: “Nitwunge Ubumwe na Yehova be n’Umwana Wiwe Tunezerewe.” Insiguro ivyura ingiro ishingiye ku Vyanditswe ishikirizwa n’umukurambere. Nuremeshe umwe wese kugira akigoro kadasanzwe hagati y’ubu no ku wa 28 Ntwarante mu gutumira abantu benshi bashoboka kugira ngo bitabe Icibutso bari kumwe na twe.

Imin. 20: “Ikete Rivuye ku Nama Nyobozi.” Ishikirizwe n’umucungezi muhagarikizi. Nusome wongere ukoreshe ivyanditswe vyatanzwe nimba umwanya ubigukundiye.

Ururirimbo rwa 24 (185) n’isengesho ryo gusozera.

Indwi Itangura ku wa 25 Ntwarante

Ururirimbo rwa 22 (130)

Imin. 14: Amatangazo y’iwanyu. Nusigure yuko hatararengerana kwuzuza ifomu y’ubutsimvyi bw’ugufasha muri Ndamukiza. Mukoresheje inama ziri ku rupapuro rw’8, nimugire umwerekano ugirwa n’umuntu akuze w’ukuntu umuntu yoshikiriza Umunara w’Inderetsi (mu Gifaransa) wo ku wa 1 Ntwarante hanyuma uw’uwukiri muto yerekane ukuntu umuntu yoshikiriza Réveillez-vous! yo ku wa 8 Ntwarante. Uko umwerekano wose uheze, nushimike ku bintu bimwebimwe vyiza vyagizwe muri ukwo gushikiriza ibinyamakuru. Udukuru twa Gitewokarasi.

Imin. 15: Ibikenewe iwanyu.

Imin. 16: Nidukoreshe Agatabu Iyo Uwo Wakunda Apfuye . . . mu Gutanga Indemesho ku Babuze Ababo. Turakeneye “[k]uremesh[a]” abari mu mubabaro bo mw’ishengero be n’abo twohura mu busuku. (1 Tes. 5:14) Ukoresheje ibiri ku rupapuro rwa 20-24 muri ako gatabu, agace gafise umutwe uvuga ngo “Abandi Bashobora Gufasha Gute?” Nusabe abumviriza bavuge indemesho zishingiye ku Vyanditswe bashobora guha mwene abo bantu. Niwerekane “Ico wogira . . . ” mu guhushanya n’ “Ivyo utogira . . . ” Nugire inama umwe wese agerageze kuremesha umuntu igihe cose bikenewe.—Gal. 6:10.

Ururirimbo rwa 16 (143) n’isengesho ryo gusozera.

Indwi Itangura ku wa 1 Ndamukiza

Ururirimbo rwa 11 (85)

Imin. 7: Amatangazo y’iwanyu. Niwibutse abamamaji gutanga raporo y’umurimo wo mu ndimiro y’ukwezi kwa Ntwarante.

Imin. 18: “ ‘Abantu b’Ingabirano’ Baragira Ubusho bw’Imana Babishashaye.” Insiguro ishikirizwa n’umukurambere. Nimuganire ku vyanditswe vyatanzwe. Niwerekane ukuntu kugendera cungere abahororokewe no gufasha abafise ubumuga gukora ivyo bashoboye bishobora kuvamwo ivyiza kandi biravamwo koko. Abungere b’abanyarukundo baragaragaza ko bashima utwigoro twose bagira tuvuye ku mutima kugira ngo bagume ari abanyamwete mu busuku bwa Yehova.

Imin. 20: “Niwongereze Umunezero Wawe mu Kwamamaza.”b Igihe muganira ku ngingo ya 5, nutange inama ngirakimazi ku kuntu tworushiriza gukora neza mu cibare cacu. Nimwerekane akarorero kamwe canke bubiri bw’ukuntu dushobora kwibwiriza kwegera umuntu kugira ngo dushinge intahe mu majambo magufi. Nuremeshe umwe wese kurondera uturyo two gushinga intahe muri uyu mushamvu.

Ururirimbo rwa 2 (15) n’isengesho ryo gusozera.

[Utujambo tw’epfo]