Imfungurwa zo mu vy’impwemu mu gihe kibereye
1. Muri Ezekiyeli 36:29 hariko haranguka gute muri iki gihe?
1 “[Nzo]bahurumbiriz[a] ingano ndazikikimvye, kandi sinzobatēza inzara”, ni ko Umukama Segaba Yehova agize (Ezk. 36:29). Ayo majambo y’ubuhanuzi arakora no ku basavyi b’Imana muri iki gihe. Tubivuze mu buryo bw’ikigereranyo, Yehova yaratumye ingano zibungabunga ubuzima zimera ari nyinshi ku bw’abasavyi biwe. Imfungurwa zo mu vy’impwemu zitangwa ku gihe biciye ku mahwaniro yacu y’intara ziratomora neza ico kintu.
2. Yehova yakoresheje gute amahwaniro y’intara kugira ngo akwiragize imfungurwa zo mu vy’impwemu ku gihe kibereye?
2 Kw’ihwaniro ryabereye i Columbus muri Ohio mu 1931, Yehova yarayoboye abasavyi biwe ku gufata izina rishasha, ari ryo Ivyabona vya Yehova (Yes. 43:10-12). Mu 1935, ishengero ryinshi rivugwa mu Vyahishuriwe 7:9-17 ryaramenyekanye mu buryo butagira agakosa. Mu 1942, umuvukanyi Knorr yarashikirije insiguro yari ifise umutwe uvuga ngo “Amahoro yoba azomara igihe?”. Iyo nsiguro yarongereje inguvu ku bijanye n’igikorwa co kwamamaza kirangurirwa ku mubumbe wose yongera iratuma hashingwa Ishure ry’ivya Bibiliya ry’i Gileyadi rya Watchtower. Naho amahwaniro amwamwe usanga ari intibagirwa bimwe bidasanzwe, rimwerimwe ryose ryaragaragaye ko ari imeza yuzuye imfungurwa zo mu vy’impwemu zirimwo ivyangombwa zitangwa ku gihe kibereye.—Zab. 23:5; Mat. 24:45.
3. Dutegerezwa gukora iki kugira ngo twungukire ku mazimano yo mu vy’impwemu kw’ihwaniro ryacu ry’intara?
3 Ufungura neza ku rugero rungana iki? Birashoboka ko tuba dukikijwe n’imfungurwa yamara tugafungura nabi mu gihe tutagize akigoro ko kuzifungura (Imig. 26:15). Ivyo ni ko bimeze no mu buryo bw’impwemu. Ku mahwaniro amwamwe, vyarabonetse yuko benshi usanga bariko baragendagenda ata kibajanye canke bariko baraganira n’abandi mu kiringo ca porogarama. Naho ukwifatanya n’abandi mu buryo buremesha ari umuce uhambaye w’ihwaniro, igihe co kubigira ni imbere y’uko ikiringo cose gitangura canke inyuma yaco (Umus. 3:1, 7). Mu gihe tuba tutari mu vyicaro vyacu twumviriza twitonze, twoshobora gucikwa n’iciyumviro gihambaye. Abacungezi b’inzego zisahiriza ihwaniro hamwe n’abavukanyi bafise ibikorwa bashinzwe boshobora rimwe na rimwe gusanga ari nkenerwa ko baganira ibijanye n’ihwaniro mu gihe amaporogarama ariko arabandanya. Atari ukwo, bakwiye gutanga akarorero mu kwumviriza bitonze porogarama. Nta n’umwe muri twebwe akwiye gucikwa na kimwe mu mfungurwa zo mu vy’impwemu zitangwa.—1 Kor. 10:12; Flp. 2:12.
4. Dushobora kwerekana gute ko ubwacu dukenguruka imfungurwa zo mu vy’impwemu umukimba Yehova atanga?
4 Ese ukuntu tunezerwa n’ukuri umukimba kwo mu vy’impwemu Yehova atanga, na kwo kukaba gutandukanye n’inyigisho z’ikinyoma zo mu biyita abakirisu zitagiramwo ivyangombwa (Yes. 65:13, 14)! Uburyo bumwe dushobora kwerekanamwo ko ‘dukenguruka’ ni mu kubona ihwaniro ko ari akaryo ko kwigishwa na Yehova (Kol. 3:15). Nturabe umushikirizansiguro ahubwo nurabe ubutumwa ashikiriza, kandi ubone ubwo butumwa nk’aho buvuye kuri wa “Mucishabwenge wa[cu] Mukuru” (Yes. 30:20, 21, NW; 54:13). Niwumvirize witonze. Niwandike muri make ivyiyumviro nyamukuru. Nusubiremwo ivyiyumviro bikurubikuru vya porogarama buri mugoroba. Nushire mu ngiro ivyo wiga.
5. Ni imvo izihe zo kunezerwa amahwaniro y’intara aturonsa?
5 Ihwaniro ryose tugira muri iki kiringo c’imbere ya Harumagedoni, ryaba rigirirwa mw’ikambi y’impunzi, mu gihugu gitabagurwa n’intambara, canke ahantu hanini kuruta harushirije kuba amahoro, tuba dutsinze Shetani! Bwa kivukano cunze ubumwe, turaha agaciro uturyo dufise two gukoranira hamwe ku mahwaniro y’intara (Ezk. 36:38). Turizigiye tudakeka yuko Yehova azosubira kuturonsa mu buryo buranga urukundo ‘imfungurwa igihe kigeze’.—Luka 12:42.
[Picture on page 4]
Niwerekane ko ukenguruka imeza ya Yehova
◼ Niwumvirize witonze
◼ Niwandike ivyiyumviro nyamukuru
◼ Nusubiremwo ivyiyumviro bikurubikuru vya porogarama buri mugoroba
◼ Nushire mu ngiro ivyo wiga