Porogarama y’Iteraniro ry’umuzunguruko ryimirije

Yehova arabereye kuninahazwa. None twomuninahaza gute? Ni ibiki bituma bamwebamwe batoroherwa no kuninahaza Yehova? Ni imihezagiro iyihe abaninahaza Imana muri iki gihe bironkera? Porogarama y’iteraniro ry’umuzunguruko ryo mu mwaka w’umurimo wa 2008 izokwishura ivyo bibazo mu buryo bumara akanyota. Iryo teraniro rifise umutwe-shimikiro uvuga ngo “Dukore vyose ku bw’ubuninahazwa bw’Imana” (1 Kor. 10:31). Rimbura ibiturindiriye muri iyo misi ibiri yimirije y’inyigisho zo mu vy’impwemu umukimba.

Umucungezi w’intara azoshikiriza insiguro ivuga ngo “Ni kubera iki twoninahaza Imana?” be n’ikivuga ngo “Nitube intangakarorero mu gushitsa ivyo Imana isaba”. Azoshikiriza insiguro y’icese ivuga ngo “Ni bande baninahaza Imana?”, yongere ashikirize insiguro isozera ivuga ngo “Baraninahaza Imana bunze ubumwe kw’isi yose”. Azohagarikira kandi Ishure ry’ubusuku bwa gitewokarasi. Umucungezi w’umuzunguruko azoshikiriza insiguro ivuga ngo “Duhimbarwe no kugaragaza ubuninahazwa bw’Imana”, iyivuga ngo “Twihweze ibikenewe mu muzunguruko wacu” be n’iyivuga ngo “Tugume ‘dushinzwe bimwe bishikamye mu kuri’ ”, ishingiye kuri 2 Petero 1:12, NW. N’ikindi kandi, tuzobona ingene ‘Igikorwa c’ubutsimvyi kininahaza Imana’. Insiguro y’ibice bine ivuga ngo “Tuninahaze Imana mu mice yose y’ubuzima bwacu”, izoba ari iya mbere mu nsiguro zibiri zikabura ubwenge z’ibice binebine. Iyo nsiguro y’ibice bine ya mbere izoca irya n’ino insobanuro igera kure y’amajambo yahumetswe dusanga mu 1 Ab’i Korinto 10:31. Insiguro y’ibice bine ivuga ngo “Turangure umurimo mweranda kugira ngo dushemeze Yehova”, izoca irya n’ino imice itandukanye y’ugusenga kwacu. Ku musi w’iyinga tuzokurikirana incamake y’Umunara w’Inderetsi twongere dukurikirane ikiganiro gishingiye ku canditswe c’umusi. Hazoboneka kandi akaryo ko kubatiza.

Abantu benshi baranka kwemera Imana. Abenshi barasamazwa cane n’imigambi y’abantu ku buryo batazirikana ku buninahazwa bwa Yehova (Yoh. 5:44). Ariko twebwe twarajijutse ku bijanye n’agaciro ko kumara umwanya turimbura ukuntu ‘twokora vyose ku bw’ubuninahazwa bw’Imana’. Nutunganye ibintu kugira ngo uzobe ariho uri maze wungukire mu buryo bwuzuye ku biringo bine vyose vy’iryo teraniro.