Inyishu ku bibazo vyanyu

◼ Ni ibiki bikwiye kumanikwa ku kibaho c’amatangazo c’ishengero?

Ikibaho c’amatangazo kiri mu Ngoro y’Ubwami cagenewe gutanga amakuru ajanye n’ibikorwa vy’ishengero. Nta kintu na kimwe gikwiye gushirwa ku kibaho c’amatangazo bitemejwe n’umucungezi muhagarikizi.

Bimwebimwe mu bintu bikunze kumanikwa ku kibaho c’amatangazo ni ibi: Urutonde rw’Ikoraniro ry’umurimo n’urw’Ishure ry’ubusuku bwa gitewokarasi ruriko abashikiriza ibiganiro, urutonde rw’insiguro z’icese zategekanijwe kuzoshikirizwa, urutonde rw’abahagarikira Ikoraniro ry’icese be n’abasoma Umunara w’Inderetsi, urutonde rw’abagize imigwi y’Inyigisho z’igitabu z’ishengero be n’aho zibera, itangazo ryerekana igihe umucungezi w’umuzunguruko azogarukira kugendera ishengero ryanyu be n’ayandi makuru bijanye, amakuru yerekeye ihwaniro canke iteraniro ryimirije, tutibagiye urutonde rw’abasukura Ingoro y’Ubwami. Rimwe na rimwe abakurambere barasabwa kumanika ku kibaho c’amatangazo amakete amwamwe canke ibindi bintu. Nimba habonetse amakuru atari asanzwe amenyerewe, inama y’abakurambere irashobora kuraba niba bikwiye canke bidakwiye ko amanikwa ku kibaho c’amatangazo.

Naho nyene itangazo rigufi rivuga ivyerekeye ubugeni buzobera mu Ngoro y’Ubwami ryoshobora gushikirizwa muri rimwe mu makoraniro, ubutumire ntibukwiye gushirwa ku kibaho c’amatangazo. Ntibibereye kandi ko amatangazo yerekeye ivyo guhurira hamwe bitajanye n’ishengero amanikwa ku kibaho c’amatangazo kuko adafitaniye isano n’ibikorwa vy’ishengero. Raba Umunara w’Inderetsi (mu gifaransa) wo ku wa 15 Mukakaro 1984, urupapuro rwa 15; Igikorwa dukorera Ubwami (mu congereza) co muri Ruheshi 1975, urupapuro rwa 4 be n’ico muri Myandagaro 1970 (mu gifaransa), urupapuro rwa 4.

Ikibaho c’amatangazo gikwiye kuguma kiboneka neza kandi gikwegera. Gikwiye kuba ari kinini bihagije ku buryo gikwirako birya vyavuzwe muri iki kiganiro. Intonde zaheze be n’ibindi bintu ishengero riba ryamaze kumenya birakwiye guca bikurwa ku kibaho c’amatangazo. Igihe hari amashengero menshi akoranira mu ngoro imwe, rimwerimwe ryose rikwiye kuba rifise ikibaho c’amatangazo ryisangije, canke rikaba rifise igice rimanikako ibintu, izina ryaryo rikaba ryanditseko mu buryo buboneka. Birasabwe ko umucungezi muhagarikizi canke uwundi yagenye aza arasuzuma ko ibintu bimanitse ku kibaho c’amatangazo bitarata igihe, bibereye kandi ko biboneka neza.