Nugume urondera gufashwa na Yehova

1. Yehova yaturemanye icipfuzo ikihe? (Matayo 5:3)

YEHOVA arazi ivyo twebwe abantu dukeneye. Nk’akarorero, kugira tubandanye kubaho turakenera ibifungurwa, ivyambarwa, n’uburaro. Tubuze na kimwe muri ivyo, mbere naho hoba mu gihe gito, ubuzima ntibwokworoha. Vyongeye, naho Yehova yaturemanye icipfuzo co kwironsa ivyo bintu vya nkenerwa mu buzima, yaranaturemanye icipfuzo co kumenya ivyerekeye Imana. (Soma Matayo 5:3.) Kugira rero duhimbarwe vy’ukuri, turakwiye kwemera ko dukeneye kugiranira ubucuti n’Imana kandi tukabandanya tubukomeza.

2. Kumenya ko ‘dukeneye ivy’Imana’ bisobanura iki? Tanga akarorero.

² Kumenya ko ‘dukeneye ivy’Imana’ bisobanura iki? Mu kigiriki, iyo mvugo itanga ishusho y’umuntu asega ivy’impwemu. Gerageza kumubona mu bwenge. Iyumvire nk’akarorero umuntu asa nabi, yambaye imishambara, yicaye kw’ibarabara. Nta tuguvu agifise kubera inzara, abantu bamuca kure kubera uko asa, kandi ku murango yama akubitwa n’uruzuba, mw’ijoro na ho agakubitwa n’imbeho y’igikonyozi. Uwo musezi aratahura ko akeneye gufashwa kugira abe aramaze na kabiri. Muri ubwo buryo nyene, umuntu azi ko akeneye ivy’Imana, ni ukuvuga umusezi w’ivy’impwemu, aratahura ko akeneye gufashwa na Yehova mu buzima bwiwe. Ni co gituma akora uko ashoboye kwose kugira ngo yungukire ku mfungurwa zo mu vy’impwemu Yehova aronsa abamukunda.

3. Twihweza ibiki muri iki kiganiro?

³ Muri iki kiganiro, tugiye kubanza kwihweza ivyo twokwigira ku Munyafenisiyakazi yasavye Yezu ngo amufashe. Iyo nkuru iraza kutwereka kamere zitatu abazi ko bakeneye ivy’Imana bategerezwa gutsimbataza. Mu nyuma, turaza kwihweza akarorero k’intumwa Petero, ak’intumwa Pawulo be n’ak’umwami Dawidi, bose bakaba ari abantu barondeye gufashwa n’Imana.

AKARORERO KO KWICISHA BUGUFI, KWUMIRAKO BE N’UKWIZERA

4. Umugore umwe w’Umunyafenisiyakazi yasavye iki Yezu?

⁴ Umusi umwe, hari umugore w’Umunyafenisiyakazi yituye Yezu kubera yuko umukobwa wiwe yari ‘arembejwe n’idayimoni.’ (Mat. 15:​21-28) Nya mugore yaciye apfukama imbere ya Yezu, aramutakambira ngo amufashe. Reka turabe kamere zimwezimwe uwo mugore yagaragaje be n’ivyo twomwigirako.

5. Ni kamere izihe wa mugore yagaragaje, kandi Yezu yakoze iki? (Raba n’ifoto.)

⁵ Wa Munyafenisiyakazi yarerekanye ukwicisha bugufi nyakuri. Tuvyemezwa n’iki? Tuvyemezwa nuko ataciye ashavura igihe Yezu yamuha inyishu yasa n’iyimugereranya n’akabunda k’imbwa. Mu bisanzwe, utubwa twatungwa n’Abanyamahanga, tukaza turakinisha abana babo. Iyaba ari wewe Yezu abwiye gutyo, wari kuvyakira gute? Woba wari kwumva ko agututse maze ugaca wivumbura ukigira? Uwo mugore si ko yabigenjeje. Uretse ukwicisha bugufi, yaragaragaje n’ukwumirako. Ivyo tubibonera ku kuntu yagumye atakambira Yezu. Ni igiki none catumye aguma amutakambira? Ni uko yizera Yezu. Ukwizera kw’uwo mugore kwarakoze Yezu ku mutima cane ku buryo aca amufasha. Naho Yezu yari ahejeje kumubwira ko yari yarungitswe gusa ku «ntama zazimiye zo mw’ihanga rya Isirayeli», yarirukanye iyo dayimoni yari mu mukobwa wiwe.

6. Ni ibiki twokwigira kuri wa mugore w’Umunyafenisiyakazi?

⁶ Kugira twironse ivyo dukeneye mu vy’impwemu, turakeneye kugaragaza kamere nk’iza wa Munyafenisiyakazi. Dutegerezwa kwicisha bugufi, kwumirako be no kugira ukwizera gukomeye. Umuntu yicisha bugufi ni we gusa yumirako akaguma atakambira Imana ngo imufashe. Dutegerezwa kandi kwizera cane Kristu Yezu no kwizigira abo akoresha kugira ngo atuyobore. (Mat. 24:​45-47) Yehova n’Umwana wiwe barahimbarwa no kuronsa abagaragaza izo kamere ivyo bakeneye mu vy’impwemu. (Gereranya na Yakobo 1:​5-7.) Nimuze ubu na ho twihweze ingene Yehova aturonsa ibifungurwa n’ivyambarwa vyo mu buryo bw’impwemu be n’ingene adukingira. Turaza kubona ingene akarorero ka Petero, aka Pawulo be n’ak’umwami Dawidi budufasha kubona ivyo twokora kugira ngo twungukire kuri izo ntunganyo.

NIWIGANE PETERO MU KUGUMA WIGABURIRA IJAMBO RY’IMANA

7. Ni igikorwa ikihe Petero yashinzwe, ariko kandi camusaba gukora iki? Sigura. (Abaheburayo 5:14–6:1)

⁷ Raba akarorero k’intumwa Petero. Ni umwe mu Bayuda ba mbere bamenye ko Yezu yari Mesiya, uwo Yehova yariko arakoresha mu kugaburira abasavyi biwe «amajambo y’ubuzima budahera.» (Yoh. 6:​66-68) Imbere y’uko Yezu asubira mw’ijuru yabwiye Petero ati: «Gaburira intama zanje ntonto.» (Yoh. 21:17) Petero yarakoze ico gikorwa adahemuka, Yehova akaba mbere yaramukoresheje mu kwandika amakete abiri dusanga muri Bibiliya. Ariko rero, Petero na we nyene yari akeneye kwigaburira Ijambo ry’Imana. Nk’akarorero, yariyigishije ivyari mu makete abiri yari yaranditswe n’intumwa Pawulo. Petero yariyemereye ko ibintu bimwebimwe Pawulo yanditse vyari «bigoye gutegera.» (2 Pet. 3:​15, 16) Naho ari ukwo, biboneka ko Petero yagumye yiyigisha ivyari muri ayo makete yahumetswe n’Imana, yizigiye ko Yehova yomufashije gutahura ivyo «bifungurwa bigumye» no gushira mu ngiro ivyo yaba yize.—Soma Abaheburayo 5:14–6:1.

8. Petero yakiriye gute ubuyobozi yahawe n’umumarayika wa Yehova?

⁸ Petero yarerekanye ko yizera Yehova mu kugamburuka ubuyobozi yamuhaye. Nk’akarorero, igihe yari mu gisagara ca Yopa umumarayika wa Yehova yaramubonekeye maze amusaba kubaga no kurya ibitungwa vyari bihumanye twisunze amategeko ya Musa. Ku Muyuda, gukora ico kintu cari ikizira. Mu ntango, Petero yishuye ati: «Oya Mukama! Erega sindigera ndya ikintu na kimwe canduye canke gihumanye.» Nya mumarayika yaciye amubwira ati: «Ibintu Imana yahumanuye ntusubire kuvyita ivyanduye.» (Ivyak. 10:​9-15) Petero icigwa cari cinjiye. Tuvyemezwa n’iki? Gatoyi inyuma y’iryo yerekwa, hari abagabo batatu barungitswe n’Umunyamahanga yitwa Koruneliyo ngo baje kuraba Petero. Bamusavye ko yojana na bo kugira ngo avugane na shebuja wabo. Mu bisanzwe, Petero ntiyopfuye yemeye guhonyoza ikirenge mu nzu y’Umunyamahanga, kuko Abayuda babona ko Abanyamahanga bahumanye. (Ivyak. 10:​28, 29) Naho ari ukwo, Petero yaciye akurikiza adatebaganye ubwo buyobozi Yehova yari ahejeje kumuha. (Imig. 4:18) Yaciye abwira inkuru nziza Koruneliyo n’umuryango wiwe maze arahimbarwa no kubona ingene bakira ukuri, ingene baronka impwemu nyeranda, n’ingene babatizwa.—Ivyak. 10:​44-48.

9. Kugirira akayabagu ibifungurwa bigumye bitugirira akamaro mu buryo bubiri ubuhe?

⁹ Cokimwe na Petero, turakeneye kwama twiyigisha ukuri kw’ishimikiro kwo mw’Ijambo ry’Imana, ukwo twogereranya n’amata. Turakwiye kandi gutsimbataza akayabagu ko kwihereza ibifungurwa bigumye, ni ukuvuga inyigisho zisa n’izigoye gutahura. Kugira ivyo tubishikeko, turakwiye gufata umwanya ukwiye wo kwiyigisha Ijambo ry’Imana kandi tukihata kugira ngo turushirize kuritahura. Uti kubera iki? Kubera ko bitugirira akamaro n’imiburiburi mu buryo bubiri. Ubwa mbere, turamenya ibintu vyinshi ku bijanye na Yehova bituma turushiriza kumukunda no kumwubaha. Ubwa kabiri, biratuma turushiriza kugira ishaka ryo kubwira abandi ibijanye n’uwo Muvyeyi wacu wo mw’ijuru ateye akoba. (Rom. 11:33; Ivyah. 4:11) Akarorero ka Petero karatwigisha n’ikindi cigwa: Igihe turonse umuco mushasha, turakwiye kwihutira guhindura ivyiyumviro maze tugakora duhuza n’ayo mahinduka. Aho ni ho gusa tuzoguma tugaburirwa neza mu vy’impwemu kandi tukaguma dukorera Yehova tudahemuka.

NIWIGANE PAWULO MU KUGUMA WAMBAYE UMWAMBARO MWIZA WO MU VY’IMPWEMU

10. Kwambara umwambaro mwiza wo mu vy’impwemu bisobanura iki? (Abakolosayi 3:​8-10)

¹⁰ Kugira ngo duhimbare Yehova, dutegerezwa kwungukira ku yindi ntunganyo yadushiriyeho, na yo ikaba ari ukwambara umwambaro wo mu buryo bw’impwemu. None ivyo bisobanura iki? Intumwa Pawulo yavuze ko dutegerezwa ‘kwambura kamere ya kera’ maze tukambara «kamere nshasha.» (Soma Abakolosayi 3:​8-10.) Kwambara uwo mwambaro, birashobora kuba urugamba rudahera. Raba akarorero ka Pawulo ubwiwe. Kuva akiri muto, yarakora uko ashoboye kwose arondera gushimwa n’Imana. (Gal. 1:14; Flp. 3:​4, 5) Ariko rero, yagendera mu kutamenya kubera yuko atatahura na gato ibijanye n’umugambi w’Imana. Ukutamenya inyigisho za Kristu be n’ubwibone yari afise, vyatumye aba «umuntu atisonera», yambaye kamere mbi cane.—1 Tim. 1:13.

11. Ni kamere mbi iyihe Pawulo yabwirizwa kurwanya? Sigura.

¹¹ Imbere y’uko Pawulo aba umukirisu yari umuntu akaza ishavu. Inkuru yo mu Vyakozwe ivuga ko Pawulo yashavurira cane abigishwa ba Yezu ku buryo ‘yabagirako iterabwoba rikaze, akarondera no kubica.’ (Ivyak. 9:1) Aho amariye kuba umukirisu, nta nkeka ko yagize akigoro gakomeye kugira yiyambure iyo kamere ya kera. (Ef. 4:​22, 31) Naho ari ukwo, igihe haduka ibihari hagati ya Pawulo na Barunaba vyarakomeye ku buryo ‘bashavuranira, barashwana bimwe bikaze.’ (Ivyak. 15:​37-39) Naho aka kera kari kavyutse, Pawulo ntiyaciye atana n’akabando. Yabandanije ‘gukubitagura umubiri wiwe ibipfunsi’, ni ukuvuga kurwanya kamere mbi yari afise, kugira ngo agume ashimwa na Yehova.—1 Kor. 9:27.

12. Ni igiki cafashije Pawulo kuguma yiyambura kamere mbi yari afise?

¹² Kuba Pawulo atiheka ku nkomezi ziwe vyaramufashije kuguma yiyambura kamere mbi yari afise no kwambara kamere nshasha. (Flp. 4:13) Cokimwe na Petero, Pawulo yaguma yiheka ku «nkomezi Imana itanga.» (1 Pet. 4:11) Ariko ntiwumve, karacamwo agakora amakosa ku buryo yihebura. Mugabo bishitse akihebura, yaca azirikana ku bintu vyiza vyose Yehova yari yaramukoreye bigaca bituma arushiriza kwihata kugira ngo agume amuhimbara.—Rom. 7:​21-25.

13. Twokwigana gute Pawulo?

¹³ Naho twoba tumaze imyaka myinshi dukorera Yehova, turakwiye kwemera ko dukeneye kuguma twihatira kwambura kamere ya kera maze tukambara kamere nshasha, ari wo mwambaro wo mu vy’impwemu Imana ituronsa. Bishitse aka kera kakavyuka, nk’akarorero tugatwarwa n’ishavu canke tukabwira nabi umuntu, ntidukwiye guca twihebura ngo tubone ko kabaye. Ahubwo dukwiye kuguma twihatira guhindura ukuntu twiyumvira be n’ivyo dukora. (Rom. 12:​1, 2; Ef. 4:24) Ariko rero turakwiye kuguma twibuka iki kintu gihambaye: Umwambaro wo mu buryo bw’impwemu Yehova aturonsa ntukeneye kugabanywa canke kwongerezwa nka kurya bigirwa ku mpuzu zisanzwe. Ahubwo ni twebwe dutegerezwa kugira ivyo duhinduye kugira ngo dukwirwe n’uwo mwambaro. Uca wumva rero ko dutegerezwa kugira ivyo duhinduye kugira tubeho duhuza n’ingingo ngenderwako z’Imana.

NIWIGANE DAWIDI MU KUREKA YEHOVA AGUME AGUKINGIRA

14-15. Ni mu buryo butandukanye ubuhe Yehova akingira abasavyi biwe? (Zaburi 27:5) (Raba n’ifoto .)

¹⁴ Kugira duhimbarwe vy’ukuri, turakeneye n’ibindi uretse ibifungurwa n’ivyambarwa vyo mu buryo bw’impwemu. Turakeneye no gukingirwa na Yehova. None adukingira mu buryo ubuhe, kandi twokora iki kugira ngo tugume dukingirwa na we?

¹⁵ Umwami Dawidi yari azi neza ko Yehova yomukingiye mu bihe bitoroshe. (Soma Zaburi 27:5.) None Yehova akingira gute abasavyi biwe muri iki gihe? Aradukingira umuntu wese canke ikintu cose cohava kidutandukanya na we burundu. Adusezeranira ko ata kirwanisho na kimwe cacuriwe kuturwanya kizororanirwa. (Zab. 34:7; Yes. 54:17) Naho Shetani n’abayoboke biwe bakomeye ntibashobora kutugirira nabi ibihe bidahera. Mbere naho vyoshika bakatwica, Yehova azotuzura dusubire kuba bazima. (1 Kor. 15:​55-57; Ivyah. 21:​3, 4) Yehova aradufasha kandi guhangana n’amaganya yoshobora gutuma ubucuti dufitaniye na we bwononekara burundu. (Imig. 12:25; Mat. 6:​27-29) Vyongeye, uwo Muvyeyi wacu adukunda yaraturonkeje umuryango w’abavukanyi udushigikira be n’abakurambere batwitwararika. (Yes. 32:​1, 2) Igihe twitavye amakoraniro, akenshi tuributswa ibindi bintu twokora kugira dukingirwe na Yehova.—Heb. 10:​24, 25.

16. Ni mu buryo ubuhe Yehova yakingiye Dawidi?

¹⁶ Igihe Dawidi yaba agamburukiye Yehova, yarakingirwa ingorane zishikira abacumura nkana. (Gereranya n’Imigani 5:​1, 2.) Ariko bishitse akarenga ku ngingo ngenderwako za Yehova, ntiyamukingira ingaruka z’ivyo yaba yakoze. (2 Sam. 12:​9, 10) Ariko rero, hari igihe Dawidi yashikirwa n’ingorane bitamuvuyeko. None ico gihe yaca akora iki? Yaca yitura Yehova mw’isengesho maze Yehova na we akamuhumuriza ko amukunda cane kandi ko azoguma amwitwararika.—Zab. 23:​1-6.

17. Twokwigana gute Dawidi?

¹⁷ Turashobora kwigana Dawidi mu kwitura Yehova ngo atuyobore igihe tugomba gufata ingingo. Turatahura kandi ko rimwe na rimwe dushobora gushikirwa n’ingorane, atari kubera ko Yehova vyamunaniye kudukingira, ariko kubera ko ari twe twafashe ingingo mbi. (Gal. 6:​7, 8) Bishitse na ho tugashikirwa n’ingorane bitatuvuyeko, turitura Yehova mw’isengesho, twizigiye ko azorinda imitima yacu n’ivyiyumviro vyacu.—Flp. 4:​6, 7.

NUBANDANYE WEMERA GUFASHWA NA YEHOVA

18. Dukikujwe n’abantu bameze gute, kandi twokora iki kugira ngo tubandanye kwungukira ku mfashanyo Yehova aturonsa? (Raba n’amafoto.)

¹⁸ Icanditswe c’umwaka wa 2026 kivuga ngo: «Hahiriwe abazi ko bakeneye ivy’Imana.» Ubu kuruta ikindi gihe cose, birahambaye cane ko twitwararika ico kintu. Uti kubera iki? Kubera ko muri iki gihe usanga dukikujwe n’abantu batemera ko bakeneye Imana ngo ibayobore. Abitwa ko bayemera na bo usanga bayisenga uko bishakiye, bisunze inyigisho z’ikinyoma canke ivyiyumviro vy’abantu. Ivyo bica bituma badahimbarwa. Turakwiye kuba maso kugira ntibatwanduze izo nyifato zabo. Ni igiki none cobidufashamwo? Ni ukuguma twigaburira ibifungurwa vy’impwemu Yehova aturonsa, kuguma twambara kamere nshasha, no kuguma turondera gukingirwa na Yehova.