Umukinyi wa tombora ariko arasuzuma agakarata kiwe igihe bavuga uwatsinze kuri televiziyo

Akamari koba ari igicumuro?

Inyishu Bibiliya itanga

Naho Bibiliya itavuga cane ivy’akamari, impanuro ziri muri yo ziradufasha gutahura yuko Imana ibona ko akamari ari igicumuro.—Abanyefeso 5:17.a

Akamari kava ku mwina canke umunoho w’amahera, na wo ukaba ari ikintu Imana yanka. (1 Abakorinto 6:9, 10; Abanyefeso 5:3, 5) Abagakina baba bipfuza gutsindira amahera abandi bahomvye, kandi tuzi ko Bibiliya itubuza kwipfuza ivy’abandi.—Kuvayo 20:17; Abaroma 7:7; 13:9, 10.
Gukina akamari, naho kwoba ari ugukinira amahera make, birashobora gutuma umuntu akunda amahera bikamugirira nabi.—1 Timoteyo 6:9, 10.
Kenshi abakina akamari usanga bizigira ibintazi canke umugisha w’igihamana. Kwizigira ivyo bintu, Imana ibona ko ari nk’ugusenga ibigirwamana, na vyo ikaba itavyerekwa.—Yesaya 65:11.
Bibiliya ituremesha gukora cane aho kwipfuza kurya ivyo tutabiriye akuya. (Umusiguzi 2:24; Abanyefeso 4:28) Abakurikiza iyo mpanuro, “[ba]rya ibifungurwa bo ubwabo bakoreye.”—2 Abatesalonika 3:10, 12.
Akamari karashobora kuvyura agatima kabi ko guhiganwa kiyamirizwa mw’Ijambo ry’Imana.—Abagalatiya 5:26.

a Ahantu hamwe gusa Bibiliya ivuga ivy’akamari idomako, ni muri ya nkuru y’abasoda b’Abaroma bapfindiye impuzu ya Yezu mu ‘gukina akamari.’—Matayo 27:35; Yohani 19:23, 24; Contemporary English Version; Good News Translation.