Ikigabane ca 2
Hayagiza Yehova We Mana y’Ukuri
1. (a) Imana y’ukuri ni nde? (b) Uko tuguma twiga ibiyerekeye, ubuzima bwacu bukwiye guca bumera gute?
INTUMWA Paulo yandikiye abakirisu bagenziwe ko naho hari ivyitwa imana vyinshi, “ariko kuri twebwe hariho Imana imwe, Data wa twese . . . kandi hari [Umukama] umwe, ni Yezu Kirisitu.” (1 Ab’i Korinto 8:5, 6) “Imana” imwe Paulo avuga ni Yehova, Umuremyi w’ibintu vyose. (Gusubira mu vyagezwe 6:4; Ivyahishuriwe Yohani 4:11) Abantu bakenguruka kandi batahura kamere ziwe hamwe n’ivyiza yakoreye ababa mw isi, ni ngombwa ngo bace biyumvamwo ko bamukunze. Ivyo bituma bagira iki? Birumvikana rwose ko baca bahayagiza uwo bikugura koko, mu mvugo no mu ngiro. Uko urukundo bafitiye Imana rwongerekana, ni ko biyumvamwo ko bategerezwa kuyimenyesha abandi, kandi naho ari abantu, bakagerageza kuyigana uko bashoboye kwose. Bibiliya ivyo irabituremeshamwo twese hamwe, iti: “Nuko mwigane Imana, nk’abana ikunda. Kandi mugendere mu rukundo.” (Abanyefeso 5:1, 2) Kugira ngo iyo mpanuro tuyikurikize, dukwiye kumenya Yehova nk’uko ari koko.
Ukuntu Yehova Ameze
2. Ni kamere zimwe zimwe z’Imana izihe zibonekeje rwose zituma tuyishemeza?
2 Muri Bibiliya harimwo imvugo nyinshi zitomoye zerekana kamere z’Imana zibonekeje rwose. Igihe uzisoma, fata umwanya w’ukurimbūra ukuntu izo kamere ziri, hamwe n’ukuntu zoba zigufitiye akamaro. Akarorero: ‘Imana ni urukundo.’ (1 Yohani 4:8) ‘Inzira zayo zose ni ubutungane.’ (Gusubira mu vyagezwe 32:4) “Ni yo ifise [ubukerebutsi].” (Yobu 12:13) ‘Iri n’ububasha bw’ubushobozi.’ (Yesaya 40:26) Igihe uzirikanye izo kamere, ntuca wiyumvamwo ko ukwiye kwikugura iyo Mana, ukayishemeza?
3. Ni kamere za Yehova zindi izihe ziteye igomwe?
3 Bibiliya iratumenyesha kandi ukuntu kamere za Yehova ziteye igomwe, ikavuga ko “yuzuye imbabazi n’ubuntu,” ‘ateba kuraka, agira ikigongwe cinshi kandi ko ari umunyakuri.’ (Kuvayo 34:6) “Wewe [Yehova], uri mwiza, ugabirije guharira.” (Zaburi 86:5) “Inyonga [za Yehova] zinyuranganya mw isi yose hirya no hino, kugira ngo yerekane ububasha bwiwe bwo gutabara [abamwerekezako umutima wose].” (2 Ngoma 16:9) ‘Imana ntirobanura abantu ku butoni, ariko mu mahanga yose uwuyitinya agakora ivy’ugutungana, iramwemera.’ (Ivyakozwe n’intumwa 10:34, 35) Yehova ‘agabira bose ata kinubwe’ kandi ni “Imana [inezerewe].” (Yakobo 1:5; 1 Timoteyo 1:11) Ese ingene bihimbaye gukorera Imana nk’iyo itagereranywa, ukumva ko ikubungabungana urukundo!
4. (a) Yehova adusaba ugusenga kumeze gute, kandi ivyo birahambaye bigeze he? (b) Ni igiki muri Zaburi ya 34:3 hadusaba gufadikanya n’abandi?
4 Igihuje n’izo kamere, ni uko ari “Imana isaba gusengwa ari yonyene.” (Kuvayo 20:5, NW) Kugira ngo tuyikorere mu buryo ishima, dutegerezwa kwihebera ivy’ugusenga. Ntidukwiye gukunda n’iyi si isenga Shetani. (1 Yohani 2:15-17; 2 Ab’i Korinto 4:3, 4) Yehova arabona neza ivy’ugutungana bivanze n’uburyarya. Ntatahura gusa ivyo dukora, arazi n’ivyo twiyumvamwo hamwe na kamere tugerageza gutsimbataza. Ni twaba mu vy’ukuri dukunda ivy’ugutungana, aca abidufashamwo. (Yeremiya 17:10; Imigani 15:9) Kubera ukuntu Yehova ameze, abantu amamiliyoni atari make kw isi yose bāremeye gushitsa n’agahimbare aya majambo y’umwanditsi wa Zaburi dusanga muri Bibiliya: “Ni muhayagize Yehova muri kumwe nanje, dukuze izina ryiwe twese hamwe.” (Zaburi 34:3, NW) Muri abo na wewe woba urimwo?
5. Ni igiki codufasha kuronkera rwose akunguko mu vy’ugutohoza kamere za Yehova?
5 Nk’igihe wokwitonda ugatohoza kamere ziwe z’agatangaza, icipfuzo ufise c’ukuyagira abandi ivy’iyo Mana coshinga imizi, kandi cogushigikira rwose igihe uriko wigora ngo uyigane. Gerageza kumenya (1) kamere imwe imwe, ngira ngo igituma itandukanye n’izindi, (2) ukuntu Yehova yayigaragaje hamwe n’uwo yayigaragarijeko, (3) ukuntu na wewe woyigaragaza hamwe n’ukuntu yokuyobora mu buryo ubona ibintu.
6. Fatira akarorero ku rukundo werekane ukuntu woshobora gutohoza kamere za Yehova. Bigire mu kwishura ibibazo bisozera iki gifungo, ushiremwo n’Ivyanditswe mu nyishu uza gutanga.
6 Raba nk’aka karorero kari ngaha: igihe Bibiliya ivuga ngo ‘Imana ni urukundo,’ bishaka kuvuga iki? (1 Yohani 4:8) Birumvikana ko urukundo ruri mu buryo bwinshi. Ijambo ry’ikigiriki ryakoreshejwe muri ico Canditswe ni a·gaʹpe, ijambo ryerekana urukundo ruhambaye rwose ruranga Imana Yehova ubwayo. Urukundo ben’urwo ni ikimenyetso c’ukutagira ubwikunzi na gato. Tunganya inyishu kuri ibi bibazo bikurikira, wishimikije ico ciyumviro kandi ukoresheje ivyo Vyanditswe vyerekanywe.
Iyo kamere yibonekeza gute mu vyo Yehova yaremye? (Ivyakozwe n’intumwa 14:16, 17)
Ni akarorero akahe kibonekeje rwose k’urukundo Yehova afitiye abantu iyo bava bakagera? (Yohani 3:16) Ivyo Yehova yoba yabigize kubera ubutungane bw’abantu? (Abaroma 5:8)
Ivyo Yehova yagize abicishije ku Mwana wiwe bikwiye kutuyobora gute mu buryo dukoresha ubuzima bwacu? (2 Ab’i Korinto 5:14, 15, 18, 19)
Ni mu buryo ki twebwe abakirisu twokwerekana ko dufise urukundo ben’urwo ku bakirisu bagenzi bacu? (1 Ab’i Korinto 13:4-7; 1 Yohani 4:10, 11; 3:16-18)
Ni bande kandi dukwiye gukunda, kandi twobakunda gute? (Matayo 5:43-48; 28:19, 20; Ab’i Galatiya 6:10)
7. Mu vy’ukwiyigisha wewe nyene ubwawe, woronka ute ivyiyumviro nk’ivyo nyene vyerekeye izindi kamere za Yehova?
7 Ntiwoshimishwa kandi n’ugutohoza zimwe zimwe mu zindi kamere za Yehova? Mu gutangura, igihe wiyigisha wewe nyene ubwawe gerageza kwihweza “ubutungane” hamwe n’“ubukerebutsi,” hanyuma ngira ngo utohoze “ubuntu” hamwe n’“imbabazi.” Ukoresheje indegisi (index) z’ibitabu vya Sosayiti hamwe n’igitabu mpuzamagambo (concordance) c’ivya Bibiliya, woronka isinzi ry’ivyiyumviro bicisha ubwenge.
Fasha Abandi Kumenya Ukuri Kwerekeye Imana
8. (a) Ab’iyi si basenga ibimana ibihe? (b) Ni nde atera uwo muvurungano, kandi ni kuki tuvuze gutyo?
8 Ibimana amamiliyoni birasengwa n’abantu mu buryo bunyuranye n’ugusenga Imana y’ukuri. Mu kinjana ca kane, ni ho abiyita abakirisu batangura kwemera “ubutatu” bwīgishwa n’Abanyababiloni, Abanyamisiri, Abahindi hamwe n’Ababudha, imbere y’aho. Turetse uko kwiyumvīra Imana gutyo, hariho abakuru b’intwaro bahambaye, abakinyi n’abaririmvyi ba rurangiranwa, basengwa nk’Imana. Amahera, ukwikunda hamwe n’ukumarana inambu y’umubiri umugabo n’umugore, na vyo nyene biramaze kuba nk’ibimana bisengwa. Ivyo vyose ni nde abihagarikiye? Ni “imana y’ivy’iyi si,” Shetani wa Mucokoranyi. (2 Ab’i Korinto 4:4, NW; 1 Ab’i Korinto 10:20) Iragerageza ku rwenge mu buryo buyishobokeye bwose kuyovya abantu ngo ntibamenye Yehova, canke igatuma uburyo bwabo bw’ugusenga buba injojo.
9. Ni uburyo ubuhe bwiza rwose bwofasha umuntu gutohoza ukuri ku vyerekeye Imana?
9 Abo bantu twobafasha dute kumenya ukuri ku vyerekeye Imana, niba bavuga ko ari abakirisu canke ko atari bo? Uburyo bwa mbere bwiza rwose ni ukubereka neza ko Bibiliya ubwayo ivuga ivyerekeye Imana y’ukuri hamwe n’ukuntu imeze. Mu nyuma ivyo dukwiye kubishigikira mu buryo twigenza, bukaba nk’icirore cerekana kamere y’Imana mu buzima bwacu.—1 Petero 2:12.
10. Igihe tuyaga n’abemera ubutatu, ni kuki kuvuga yuko tuzi neza ivyo bemera bitaranga ubukerebutsi?
10 Bite none nk’igihe abo mu madini y’abiyita abakirisu baguharirije, bakavuga ko inyigisho y’“ubutatu” bo bemera ishigikiwe n’Ivyanditswe? Ubwa mbere na mbere, menya ko naho ayo madini yatangaje icese ivy’ukuntu iyo nyigisho y’“ubutatu” ikwiye kumera, ku vyerekeye nya nyigisho abantu benshi bafise ivyiyumviro vyabo bwite. Basabe bayigusigurire bo nyene, hanyuma ubafashe kugereranya ibiyerekeye bemera, n’ivyanditswe muri Bibiliya bafise. Haciye utusi, bafashe kandi kugereranya ivyo idini yabo yatangaje icese, n’inyigisho ziri mw Ijambo ry’Imana.
11. Fata iciyumviro kimwe kimwe muri ivyo bitanu bikuru bikuru, ukoreshe ibibazo n’Ivyanditswe biri muri ico gifungo kugira ngo uzirikane ukuntu inyigisho y’“ubutatu” idahuje n’Ivyanditswe.
11 Gumiza ku muzirikanyi icipfuzo c’ugufasha abantu b’inziraburyarya, uzirikane ukuntu wokoresha ivyo Vyanditswe biri aha hepfo, kugira ngo utohoze ivyo vyiyumviro bijana n’ivyo Vyanditswe vyerekanywe:
(1) Mu bigisha ivy’ubutatu hari abashimika cane cane ku ciyumviro c’uko hari abaperesona batatu (Data, Mwana na Mutima Mweranda) ariko ngo abo batatu bagize Imana imwe.
Ubwo none mu Vyakozwe n’intumwa 2:4, 17 hoba herekana ko “Mutima Mweranda,” ni ukuvuga ‘impwemu yera,’ ari umuperesona?
Ni kuki kumenya igitigiri c’abaperesona bavugwa mu Canditswe kimwe kimwe muri ibi bikurikira, bifise akamaro koko? (Yohani 17:20-22; Ivyakozwe n’intumwa 7:56; Ivyahishuriwe Yohani 7:10)
(2) Hari abemera ko abagize ubwo ‘butatu’ bose banganya ubuninahazwa, ko ata n’umwe ari mukuru canke mutoyi, ko bose bangana kandi ko bose bamyeho.
Ivyanditswe ni uko bivuga? (Mu gutora inyishu raba Yohani 14:28; Matayo 24:36; Ivyahishuriwe Yohani 3:14.)
(3) Hari aberekana muri Yohani 1:1 mu gushigikira “ubutatu.” Bavuga ko hakwiye guhindurwa ngo “Jambo yari Imana,” ntihandikwe “imana.”
None muri Yohani 1:1 havugwa abaperesona bangahe? Havugwa batatu canke havugwa babiri? Ibiri muri Yohani 1:18 biteye kubiri gute n’iyo nyigisho y’“ubutatu”?
Ijambo ry’ikigiriki bahindura ngo “Imana” canke “imana,” ntirigira indongorazina karangura y’ukumenyekanisha iyo Mana iyo ari yo. Raba mu Vyakozwe n’intumwa 28:6. (Hariho Bibiliya imwe La Bible du centenaire, muri Yohani 1:1 bahahinduye uku: “Kandi Jambo yari nk’Imana,” ni ukuvuga ko yari afise kamere nk’iz’Imana.)
(4) Abigisha ivy’ubutatu bavuga kandi ko mw Itanguriro 1:1, 26 ijambo ry’igiheburayo rihari bahindura ngo “Imana” ari El·o·himʹ, iryo jambo rero rikaba ryerekana ubwinshi mu giheburayo, ni ukuvuga “Imana nyinshi.”
Ni kuki iryo jambo ridashigikiye inyigisho ivuga ko hari abaperesona batatu bagize “Imana imwe”?
Niba mw Itanguriro 1:1 herekana “ubutatu,” bite none mu Bacamanza 16:23, aho el·o·himʹ ryahinduwe ngo “imana,” hanyuma ingereka satunga irikurikira ntiyerekane ubwinshi ariko ikaja mu rudende?
Ni kuki muri ivyo Vyanditswe vy’igiheburayo bakoresha ubwinshi mu kuvuga Imana? Ubwo ni bwo buryo bumwe gusa mu giheburayo bw’ukwerekana icubahiro. Iyo haba havugwa imana nyinshi, amavuga yerekeye izo mana aba ahadikirijwe mu bwinshi, ariko muri ivyo Vyanditswe si uko biri.
(5) Kubera ko amadini ahayagiza rwose Yezu (kandi kubera ko bazimanganije izina Yehova muri Bibiliya bahindura), hari abaca biyumvīra Yezu gusa igihe umuntu acishije Imana mu kanwa.
Ni akarorero akahe mu vy’ugusenga Imana dukwiye gukurikira, Yezu yatweretse? (Luka 4:8)
12. Ni kuki Yezu yabwiye Se, kandi birumvikana, ko ari “Imana yonyene y’ukuri”?
12 Naho mu Vyanditswe Yezu avugwa ko ari “imana,” mbere ko ari n’“Imana y’ubushobozi,” ntikibuza ko yahayagije Se akavuga ko ari ‘Imana yiwe ari yo Mana yacu.’ (Yohani 1:1; 20:17; Yesaya 9:6) Yīyumvīra nka Musa, uwavuze kera uyo Yezu ataraza, ati: ‘Yehova ni we Mana, nta yindi iriho atari we.’ (Gusubira mu vyagezwe 4:35) Yehova aratandukanye rwose n’ivyo bigirwamana; n’abo bantu basengwa, hamwe na Shetani wa Mucokoranyi. Kubera ko Yehova atandukanye n’ivyo vyose, ni we ‘Mana yonyene y’ukuri’ nk’uko Yezu yamwise.—Yohani 17:3.
‘Gendera mw Izina rya Yehova’
13, 14. ‘Kumenya’ hamwe no ‘kugendera mw’ izina rya Yehova bishaka kuvuga iki?
13 Abenshi mu bamaze imyaka myinshi badashobora gutahura neza Imana iyo ari yo, bahora buzura akamwemwe iyo babonye izina ry’Imana Yehova ari bwo bwa mbere muri Bibiliya bafise. (Kuvayo 6:3) Ariko uko kumenya iryo zina vyoshobora kuguma bibagirira akamaro, igihe ‘bagendeye muri iryo zina rya Yehova gushitsa ibihe bitazoshira.’ (Mika 4:5) Ivyo si ukumenya gusa iryo zina Yehova, canke kwihaya ko bo ari Ivyabona vyiwe.
14 Ku vyerekeye ukuntu izina ry’Imana rihambaye, muri Zaburi ya 9:10, havuga ngo “abazi izina ryawe bazokwizigira, . . . wewe [Yehova].” Ivyo bishaka kuvuga iki? Si ukumenya izina rya Yehova vyonyene, kubera ko uwurizi atari ngombwa ngo ace amwizigira. Uko ‘kumenya’ izina ry’Imana, bishaka kuvuga ko ari ugushimishwa na kamere y’Imana Yehova; kwubaha ubukuru bwayo no gukurikiza amabwirizwa yashinze. ‘Kugendera mw izina rya Yehova’ ni nk’uko nyene, ni ukumwihebera kandi ukamuserukira kubera ko na wewe uri mu bamusenga, uburyo ubayeho bugahuza rwose n’ivyo agomba. (Luka 10:27) Ivyo woba ubishitsa none?
15. Turetse uguheza umwuga, ni igiki kindi gikenewe niba tuzokorera Yehova ibihe bidashira?
15 Niba tugiye kuzokorera Yehova ibihe bidashira, ntidukwiye kubigira gusa kubera uguheza umwuga. Intumwa Paulo yararemesheje Timoteyo, uwari amaze imyaka itari mike akorera Yehova iti: “Ni wimenyereze ushaka gushikīra ukwihebera ivy’ugusenga Imana.” (1 Timoteyo 4:7, NW) Ugusenga Imana biva ku mutima w’umuntu; bizanwa n’ugukunda uwo yubaha. “Ukwihebera ivy’ugusenga Imana,” ni kwo kwubaha rwose Yehova ubwiwe. Kurangwa n’ukutamuvirira bivuye ku kumukunda no gukunda inzira ziwe. Bituma twipfuza ko umuntu wese ashimagiza izina ryiwe. Dukwiye kwimenyereza “ukwihebera ivy’ugusenga Imana” tukabigira umugambi mu buzima, niba tugiye kuzogendera mw izina rya Yehova Imana y’ukuri ibihe bidashira—Zaburi 37:4; 2 Petero 3:11.
Ikiyago c’Ugusubiramwo
● Yehova afise kamere nyabaki? Ni akunguko nyabaki turonkera ku vy’ugutahura neza imwe imwe muri izo kamere ziwe?
● Twofasha abandi kumenya ukuri ku vyerekeye Imana gute?
● ‘Kumenya’ Yehova hamwe no ‘kugendera mw izina ryiwe’ bishaka kuvuga iki?