Ukuri Kwerekeye Ubugingo Kurakenewe
“Muzomenya ukuri, kand’ukuri kuzobaha kwidegemvya.”—YOHANA 8:32.
1. Ni kuki bihambaye kwihweza ivyo twemera ku vyerekeye ubugingo n’urupfu?
IVYO umuntu yemera ku biraba urupfu n’ubuzima bw’inyuma yo gupfa ahanini biva ku vyo aba yarakuye mw’idini arimwo no mu mico kama yarerewemwo. Nk’uko twabibonye, bihera ku kujijuka yuko ubugingo bushikira intumbero yabwo y’iherezo inyuma gusa y’ukwongera kuvuka kenshi, bigashika ku ciyumviro c’uko ikiringo kimwe umuntu aba amaze abaho ari co giheza kikerekana itahiro ryiwe. Kubera ivyo, umuntu umwe yoshobora kwumva yizigiye ko amaherezo azovangana na kwa kuri ntabanduka niyapfa, uwundi akizigira gushikira Nirivana, uwundi na we akizigira kuronka impera y’ijuru. None ukuri ni ukuhe? Kubera ko ivyo twemera bigira ico bikoze ku nyifato zacu, ku bikorwa dukora no ku ngingo dufata, ntidukwiye none kwitwararika gutorera inyishu ico kibazo?
2, 3. (a) Ni kuki dushobora kwemera ico Bibiliya ivuga ku vyerekeye ubugingo? (b) Nk’uko bivugwa muri Bibiliya, ukuri ni ukuhe ku vyerekeye ubugingo?
2 Igitabu ca kera kuruta ivyabaye mw’isi vyose, ari co Bibiliya, kiradonda kahise k’umuntu gushika kw’iremwa ry’ubugingo-muntu bwa mbere. Inyigisho zaco nta mafilozofiya n’inkuru mpererekano vy’abantu uzisangamwo. Bibiliya iravuga itomoye ukuri kwerekeye ubugingo: Ubugingo bwawe ni wewe; abapfuye ntibariho na gato; abo Imana yibuka na bo bazozurwa igihe yashinze kigeze. None ukumenya ivyo gushobora kukumarira iki?
3 Yezu Kirisitu yabwiye abayoboke biwe ati: “Muzomenya ukuri, kand’ukuri kuzobaha kwidegemvya.” (Yohana 8:32) Ni vyo, ukuri kurahabuza. Ariko ukuri kuzotugira abidegemvya kudukize ibiki?
Ugukira Ubwoba n’Umwiheburo
4, 5. (a) Ni ubwoba nyabaki ukuri kwerekeye ubugingo kwirukana? (b) Icizigiro c’izuka catinyuye gute umuyabaga umwe yari agiye kwicwa n’indwara?
4 Igitabu The World Book Encyclopedia kivuga giti: “Abantu benshi cane baratinya urupfu kandi bakagerageza kwirinda kurwiyumvira.” Hari umutohozakahise umwe avuga ko “ijambo ‘urupfu’ ubwaryo ryabaye nk’iridacishwa mu kanwa mu Burengero.” Kandi mu mico kama imwimwe imvugo zimwezimwe z’ugukikiriza nk’izi ngo “umuhisi,” “nyakwigendera,” kenshi zirakoreshwa zishaka kuvuga uwapfuye. Ukwo gutinya urupfu mu vy’ukuri ni ugutinya ikitazwi, kubera ko ku bantu benshi urupfu ari ikiyoberane. Ukumenya ukuri kwerekeye ukuntu bigenda iyo dupfuye biragerura ubwo bwoba.
5 Rimbura nk’akarorero ukuntu Michaelyn umukobwa w’imyaka 15 yari amerewe. Yarwaye indwara y’ubwoko bwa kanseri, apfa urupfu rubabaje. Nyina wiwe Paula aribuka ibi: “Michaelyn yavuga ko gupfa ataco vyari bimutwaye kubera ko yari azi ko ugupfa ari ukw’igihe gito gusa. Twaravuga cane ivy’isi nshasha y’Imana hamwe n’abo bose bazoyizurirwamwo. Michaelyn yarizera Yehova Imana hamwe n’izuka bimwe bikomeye—nta madidane n’umuziriziri yari afise.” Icizigiro c’izuka carahaye umwidegemvyo uwo mukobwa w’umutinyutsi, kimukiza ubwoba bukomeye bw’urupfu.
6, 7. Ukuri kwerekeye ubugingo kudukiza umwiheburo uwuhe? Tanga akarorero.
6 Ukuri kwakoze iki ku bavyeyi ba Michaelyn? Se wiwe Jeff agira ati: “Urupfu rw’umwigeme wacu ni co kintu catubabaje kuruta ivyari vyaradushikiye vyose. Ariko turizigiye rwose isezerano Yehova yatanze ry’izuka, tukaba twiteze ko umusi umwe tuzokwongera kugumbira Michaelyn wacu twakunda. Ese ukuntu tuzokumburukanya!”
7 Egome, ukuri ku vyerekeye ubugingo kuragira umuntu uwidegemvya kukamukiza umwiheburo w’agacantege wozanwa n’urupfu rw’uwo yakunda. Nkako nyene, nta kintu na kimwe gishobora kuzimanganya buhere umubabaro n’intuntu tugira iyo uwo twakunda apfuye. Ariko icizigiro c’izuka kirorosha umuborogo kandi kigatuma uwo mubabaro vyoroha cane kuwihanganira.
8, 9. Ukuri kwerekeye uko abapfuye bamererwa kudukiza ubwoba ubuhe?
8 Ukuri kwo mu Vyanditswe kwerekeye uko abapfuye bamerewe kuradukiza kandi ugutinya abapfuye. Kuva bamenye ukwo kuri, abenshi mu bari bahoze babohewe ku mihamuro y’ivy’imiziririzo igirirwa abapfuye, ntibagihagarikwa umutima n’imivumo, agasema, impigi, n’ibiheko, eka nta n’amashikanwa azimvye batanga yo gutururuza abakurambere babo ngo ntibaze baragaruka guturubika abazima. Koko, kubera ko abapfuye “[ata] co baba bakizi,” imigenzo nk’iyo nta co imaze.—Umusiguzi 9:5.
9 Ukuri kwerekeye ubugingo, ukwo dusanga muri Bibiliya, mu vy’ukuri kurahabuza, kandi ni ukwo kwizigirwa. Mugabo raba kandi icizero ciza ntangere Bibiliya iguha.
[Iciyumviro ku rup. 29]
Ukuri kwerekeye ubugingo kuragukiza ugutinya urupfu, ugutinya abapfuye, umwiheburo uterwa n’urupfu rw’uwo wakunda