Kwumvira imburi vyararokoye ubuzima bwabo
YEZU KIRISITU yaratanze imbere y’igihe imburi yerekeye isangangurwa ry’urunkwekwe rw’ibintu rw’Abayuda rwari rushingiye ku rusengero i Yeruzalemu. Ntiyatanze igenekerezo ivyo vyoshikiyeko. Mugabo yaradondoye ibintu vyoshikanye kuri iryo sangangurwa. Yahimirije abigishwa biwe kwama bagavye no kuva mu karere karimwo ingeramizi.
Yezu yabuye ati: “Ni mwabona i Yerusalemu hakikijwe n’ibitero, muze mumenye yuk’ubuyobe bgaho bugira bushike”. Yavuze kandi ati: “Aho muzobonera ca kizira c’ubuyobe bg’ubugesera, gihagaze ahantu hēra, . . . ico gihe abazoba bar’i Yudaya baze bahungire ku misozi miremire”. Yezu yahimirije abigishwa biwe kudasubira inyuma ngo bahungishe ivyo batunze. Bategerezwa guhunga mu maguru masha kugira ngo bashobore kurokora ubuzima bwabo.—Luka 21:20, 21; Matayo 24:15, 16.
Kugira ngo Cestius Gallus ahagarike imigumuko yari imaze igihe kirekire, yarayoboye ingabo z’Abaroma ziragaba igitero kuri Yeruzalemu mu 66 G.C. Yarinjiye mbere muri ico gisagara maze arakikuza urusengero. Uruhagarara rwaciye ruba rwose muri ico gisagara. Abagumye bari maso barashoboye kubona yuko icago cari cimirije gushika. Mugabo none, vyoba vyarashoboka ko abantu bahunga? Ata muntu yari avyiteze, Cestius Gallus yarakuyeyo ingabo ziwe. Abayuda bari bagumutse baciye baboma inyuma. Igihe c’uko abantu bahunga bakava i Yeruzalemu n’i Yudaya hose cari kigeze!
Umwaka ukurikira, ingabo z’Abaroma zaragarutse zirongowe n’uwitwa Vespasien be n’umuhungu wiwe Titus. Igihugu cose uko kingana caciye cuzuramwo intambara. Mu ntango z’umwaka wa 70 G.C., Abaroma barubatse uruzitiro rw’ibisonga rukikuje Yeruzalemu. Ahantu hose umuntu yari gucarukana hari hamaze kuzibirwa (Luka 19:43, 44). Imigwi itavuga rumwe yo muri ico gisagara yaciye igandagurana. Abanyagihugu bari basigaye, bamwe barishwe n’Abaroma abandi bajanwa mu bunyagano. Ico gisagara be n’urusengero rwaco vyarasenyaguwe ntihagira ibuye risigara rigeretse ku rindi. Nk’uko umutohozakahise w’Umuyuda wo mu kinjana ca mbere yitwa Josèphe yabivuze, Abayuda barenga umuliyoni baracumukuye bongera barahasiga ubuzima. Urwo rusengero ntirwigeze rusubira kwubakwa.
Iyo abakirisu baza kuba bakiri i Yeruzalemu mu 70 G.C., baba barishwe canke bakajanwa mu buja hamwe n’abandi bose bari ngaho. Ariko rero, abatohozakahise ba kera bavuga yuko abakirisu bari barumviye imburi iva ku Mana maze bava i Yeruzalemu n’i Yudaya hose bahungira mu misozi yo mu Buseruko bw’Uruzi Yorodani. Bamwebamwe bagiye kuba muri Pela ho mu ntara ya Pereya. Bari baravuye i Yudaya kandi ntibari barasubiyeyo. Kwumvira imburi Yezu yatanze vyararokoye ubuzima bwabo.
Woba udafata minenegwe imburi zivuye ku masôko yo kwizigirwa?
Abantu benshi iyo bamaze kwumva ibintu vyinshi bari baraburiwe ko vyoshitse mugabo ntibishike, baca batangura gufata minenegwe imburi zose. Ariko rero, kwumvira imburi birashobora kurokora ubuzima bwawe.
Mu Bushinwa mu 1975, haratanzwe imburi zivuga yuko hoteye ca nyamugigima. Abategetsi baciye bagira ico bakoze. Abanyagihugu barabumviye. Abantu ibihumbi n’ibihumbi bararokotse.
Muri Ndamukiza 1991 mu gihugu ca Filipine, abanyagihugu baba mu nda y’Umusozi Pinatubo bavuze yuko umwuka be n’ivyotsi vyirabura vyariko birafumburuka muri uwo musozi. Igisata kijejwe gutohoza ivy’ibirunga be na vya nyamugigima muri Filipine kimaze amezi abiri gisuzuma ukuntu ibintu vyifashe, caraburiye abantu yuko akaga kimirije gushika. Abantu ibihumbi mirongo barakuwe muri ako karere badatebaganye. Hakiri kare ku wa 15 Ruheshi, ibintu vy’ibivunjivunji birenga kilometero kibe umunani (8 km3) vyarapfundutse n’ukwasana gukomeye biduga mu kirere, hanyuma vyisuka mu micungararo. Kwumvira imburi vyararokoye ubuzima bw’abantu ibihumbi n’ibihumbi.
Bibiliya iratanga imburi yerekeye umuhero w’uru runkwekwe rw’ibintu. Ubu tubayeho mu misi y’iherezo. Uko umuhero wegereza, woba ubandanya kuba maso? Woba uriko uragira ico ukoze kugira ngo ugume hanze y’akarere karimwo ingeramizi? Ubigiranye ukubona ko ibintu vyihutirwa, woba uriko uraburira abandi ngo na bo nyene bakore nkawe?
[Ifoto ku rup. 20]
Kwumvira imburi vyararokoye ubuzima bw’abantu benshi igihe Umusozi Pinatubo wafumburukamwo ivyotsi vyirabura
[Ifoto ku rup. 21]
Ubuzima bw’abakirisu bumviye imburi ya Yezu bwararokotse igihe Yeruzalemu hasangangurwa mu 70 G.C.