ICIGWA CA 1

Intangamarara nziza

Ivyakozwe 17:22

INCAMAKE: Intangamarara yawe ikwiye gutuma abakwumviriza bumva bashashaye kugukurikira, igashira ahabona iciyumviro nyamukuru ugira ushikirize, ikabereka n’igituma bakwiye kwitaho ivyo ugira uvuge.

UKO WOBIGIRA:

Nutume abakwumviriza bumva bashashaye kugukurikira. Nuhitemwo ikibazo, ikintu cabaye koko, ikintu cavuzwe mu makuru canke ikindi kintu coshimisha abakwumviriza.

Nuzirikane imbere y’igihe ivyoshimisha abakwumviriza hamwe n’ibibaraje ishinga, uce uvyisunga mu gutegura intangamarara yawe.
Nushire ahabona iciyumviro nyamukuru. Nurabe neza ko intangamarara yawe ituma abakwumviriza babona neza iciyumviro nyamukuru ugira ushikirize be n’intumbero yawe.
Niwerekane igituma ico ciyumviro gihambaye. Ivyo uvuga nubihuze n’ivyo abakwumviriza bakeneye. Bakwiye kubona neza ko ivyo uriko uravuga vyobagirira akamaro.

Igihe utegura ikiganiro cawe, niwibaze uti: ‘Ni ingorane izihe zihanze abo turi kumwe mw’ishengero?’ Nuce uhuza intangamarara yawe n’ivyo bakeneye.