Rya Teraniro ry’Intara Ritaziriwe ngo “Inzira y’Ubuzima Ishimwa n’Imana” ryo mu 1998-1999 Riregereje!

MU Burundi, muri Repubulika ya Kongo no muri Repubulika Demokaratike ya Kongo, aho honyene hategekanijwe amateraniro 59 kuva muri Mukakaro gushika muri Gitugutu. Kumbure umwe muri iyi mitororokano y’imisi itatu uzobera ahatari kure y’aho uba. Mu bibanza vyinshi, iyo porogarama imisi yose—ku wa Gatanu gushika ku w’Iyinga—izotangurana n’umuziki kw isaha 3:30 zo mu gitondo.

Porogarama yo ku wa Gatanu mu gitondo izoshimikira ku maraporo yerekana ukuntu ukwamamaza Ubwami kwateye imbere mu bice binyuranye vy’isi. Hanyuma umutwe-shimikiro uzoshimikwako n’ijambo nyamukuru rifise umutwe uvuga ngo “Incungu ya Kirisitu—Inzira Imana Ikirizamwo.”

Ku muhingamo, urukurikirane rw’insiguro rutaziriwe ngo “Bavyeyi—Nimwigishe Abana Banyu Inzira y’Imana,” ruzotugira inama z’ukugene twovyurira abakiri bato gukunda no gukorera Yehova. Porogarama yo ku muhingamo izosozerwa n’insiguro ifise umutwe uvuga ngo “Hoba Hari Ubuzima Inyuma yo Gupfa?”

Porogarama yo ku wa Gatandatu mu gitondo izoshimika ku gikorwa c’uguhindura abigishwa kirangurwa n’Ivyabona vya Yehova, mu rukurikirane rugizwe n’ibice bitatu ari vyo “Dufashe Abantu Bashikire Inzira y’Ubuzima,” “Twigorere Gushikira Abantu,” hamwe na “Twigishe Abigishwa Ibintu Vyose Kirisitu Yategetse.” Mu gusozera porogarama yo mu gitondo, hazoba hategekanijwe ibatizwa ry’abigishwa bashasha.

Insiguro izotangura ku wa Gatandatu ku muhingamo ifise umutwe uvuga ngo “Dukore Twiteze Ubuzima Budahera,” iraturemesha ko twozirikana n’umutima wacu wose impamvu ubwacu dufise zituma dukorera Imana. Insiguro “Dushime ‘Abantu b’Ingabirano’ Bigisha Inzira y’Imana” hamwe n’iyi ivuga ngo “Niwiyambure Umuntu wa Kera Wiyambike Umuntu Mushasha” zizogira umwihwezo ntangamuco w’umurongo ku wundi, ku gitabu c’Abanyefeso ikigabane ca 4. Ubukurikira, hari inkeburo nziza ivuye mu Vyanditswe izotangwa mu nsiguro ivuga ngo “Nugume Utandujwe n’Isi” hamwe no mu rukurikirane rw’insiguro rw’ibice bitatu ruvuga ngo “Rwaruka—Nimukurikire Inzira y’Imana.” Porogarama yo ku muhingamo izosozerwa n’insiguro ifise umutwe uvuga ngo “Umuremyi—Kamere Yiwe n’Inzira Ziwe.”

Porogarama yo ku w’Iyinga mu gitondo irimwo urukurikirane rw’insiguro rw’ibice bitatu ruzosigura ibigabane vya nyuma vy’igitabu ca Bibiliya ca Ezekiyeli hamwe n’insobanuro menyeshakazoza yavyo. Mu kurangiza porogarama yo mu gitondo hazoba idaramu ikinirwa mu nyambaro ndangamuco ishingiye ku bwizerwe bwa ba basore batatu b’Abaheburayo. Ikintu kizoba icibonekeje mw’iteraniro ku muhingamo ni insiguro y’icese ivuga iti, “Inzira Rudende Ijana mu Buzima Budashira.”

Nta mazinda, uzohungukira mu vy’impwemu niwitaba iryo teraniro iyo misi itatu yose. Turaguhaye ikaze n’igishika cinshi ngo uzobe uhari ku biringo vyose vy’iteraniro, tukakumenyesha kandi yuko uzobirorera ataco urishe. Kugira ngo umenye aho rizobera hafi y’aho uba, bariza ku Ngoro y’Ubwami y’Ivyabona vya Yehova y’aho iwanyu canke wandikire abasohoye iki kinyamakuru.