Yehova Araha Inkomezi Uwurushe

“[Yehova] aha inkomezi [“uwurushe,” “NW”], kand’ūtagira intege amwongeramw’inkomezi.”​—YESAYA 40:29.

1. Nutange akarorero k’inguvu ziri mu bintu Imana yaremye.

YEHOVA afise ububasha butagira umupaka. Kandi ese inguvu ziri mu bintu yaremye! Agahimba inzatsa kitwa atome​—ari ryo tafari ibintu vyose vyubakishije—​ni gato cane ku buryo ima rimwe rudende ry’amazi ririmwo atome amamiliyaridi imiliyaridi ijana.a Ibifise ubuzima vyose kuri uwu mubumbe turiko, bibukesha inguvu zirekurwa n’ikora ry’amatome ku zuba. Mugabo, hakenewe inguvu z’izuba zingana iki kugira ngo zibungabunge ubuzima bwo kw’isi? Isi ironka gusa agace inzatsa k’inguvu zose zihingurwa n’izuba. Yamara rero, ako gace isase k’inguvu z’izuba gashikira isi karasumba kure n’iyo inguvu zose hamwe zikoreshwa mu mahinguriro yo kw’isi.

2. Ahanini muri Yesaya 40:26 havuga iki ku vyerekeye ububasha bwa Yehova?

² Twaba tuzirikanye ivyerekeye atome canke tukerekeza ivyiyumviro vyacu ku kirere amahanga, turajorezwa n’ububasha buteye akoba bwa Yehova. Ntibitangaje kuba yashoboye kuvuga ati: “Ni mwunamure amaso yanyu murābe hejuru, murābe uwaremye izo nyenyeri uw’ari we, asohora ingabo zazo mu bitigiri: azihamagara zose mu mazina; kubg’ububasha bg’ubushobozi bgiwe, no kubg’inkomezi ziwe nyinshi, nta n’imwe ihara.” (Yesaya 40:26) Egome, Yehova ari n’“inkomezi . . . nyinshi” kandi ni we Soko ry’“ububasha bw’ubushobozi” bwakoreshejwe mu kurema ivyo kw’isi no mu kirere vyose.

Ububasha Burengeye Ubusanzwe Burakenewe

3, 4. (a) Ni ibintu bimwebimwe ibihe vyoshobora kuturuhisha? (b) Ni ikibazo ikihe bisaba ko turimbura?

³ Mu gihe Imana ifise ububasha butagira umupaka, abantu bo bararuha. Aho tuja hose, turabona abantu barushe. Bikangura barushe, bakaja ku kazi canke kw’ishure barushe, bakagodoka barushe, maze bakaja kuryama batarushe gusa, ariko basanzaye. Bamwebamwe bipfuza kuja ahantu kugira ngo bashobore kuronka akaruhuko gakenewe bimwe bibi. Bwa basavyi ba Yehova, na twe turaruha, kubera yuko ubuzima bwacu bwo kwibanga Imana busaba kwihata n’inguvu. (Mariko 6:30, 31; Luka 3:24; 1 Timoteyo 4:8) Kandi, hari ibindi bintu vyinshi bidutwara inkomezi.

⁴ Naho turi Abakirisu, ntitwakingiwe ingorane zishikira abantu muri rusangi. (Yobu 14:1) Indwara, ugucupira mu vy’ubutunzi, canke izindi ngorane zikunda gushika mu buzima, vyoshobora gutuma umuntu acika intege, n’ukuntu ingaruka zakwo zica zituma agoyagoya. Iciyongereye kuri izo ngorane ni ibigeragezo bishikira abahamwa bahorwa ukurondera ukugororoka. (2 Timoteyo 3:12; 1 Petero 3:14) Kubera imikazo yo ku musi ku musi iva mw’isi be n’ukurwanywa kw’igikorwa cacu co kwamamaza Ubwami, bamwe muri twebwe twonanirwa ku buryo twumva ari nk’aho turiko turatezura mu gikorwa ca Yehova. Ikindi, mu kigoro ko kutudohora ku Mana, Shetani wa Mucokoranyi ariko arakoresha uburyo bwose afise. Dushobora none kuronka gute inkomezi zo mu buryo bw’impwemu zikenewe kugira ngo ntituruhe maze ngo twiyonjorore?

5. Ni kuki inkomezi zirengeye iz’umuntu zikenewe kugira ngo turangure ubusuku bw’Abakirisu?

⁵ Kugira ngo turonke inkomezi zo mu buryo bw’impwemu, dutegerezwa kwiheka kuri Yehova, Umuremyi mushoboravyose. Intumwa Paulo yerekanye yuko ubusuku bw’Abakirisu busaba ububasha burengeye ubusanzwe ku bantu b’abanyagasembwa. Yanditse ati: “Dufise ubgo butunzi mu nzavya z’ibumba, ng’ubushobozi buhebuje bube ubg’Imana, butavuye kuri twebge.” (2 Ab’i Korinto 4:7) Abakirisu basizwe bariko bararangura “igikorwa co kugabura umwuzuzo” bashigikiwe na bagenzi babo bafise icizigiro c’isi. (2 Ab’i Korinto 5:18; Yohana 10:16; Ivyahishuriwe 7:9) Kubera yuko twebwe abantu b’abanyagasembwa turiko turakora igikorwa c’Imana duhanganye n’uruhamo, ntidushobora kugikora bivuye ku nkomezi zacu gusa. Yehova aradufasha biciye ku mpwemu yiwe yera, kandi gutyo ubugoyagoye bwacu bugahayagiza ububasha bwiwe. Kandi ese ukuntu duhumurizwa n’igikuramazinda c’uko “Uhoraho a[zo]ramira abagororotsi”!​—Zaburi 37:17.

‘Yehova Ni We Nkomezi Zacu’

6. Ivyanditswe bidukura amazinda gute ko Yehova ari Isoko ryacu ry’inkomezi?

⁶ Dawe wa twese wo mw’ijuru arafise “inkomezi . . . nyinshi” kandi mu buryo bworoshe arashobora kuduha inguvu. Kukaba nkako, tubwirwa duti: “[Yehova] aha inkomezi [“uwurushe,” NW], kand’ūtagira intege amwongeramw’inkomezi. Imisore yonadendebukirwa, ikaruha, n’imisore y’imikangara yokwicakw igatemba, arikw abīteze Uhoraho bazokwama biyubura mu nkomezi nsha; bazodūgisha amababa nk’inkukuma, biruke ntibaruhe, bagende ntibadendebukirwe.” (Yesaya 40:29-31) Kubera imikazo iguma yiyongera, rimwe na rimwe twokwiyumva nk’umwirutsi yasanzajwe n’uburuhe, uwo ibirenge vyiwe bisa n’ibidashobora kumuteza iyindi ntambwe. Mugabo, umurongo wa nyuma wo mu gusiganirwa ubuzima uri imbere gato, kandi dutegerezwa kudateshwa ngo dute. (2 Ngoma 29:11) Umwansi wacu, wa Murwanizi, agendagenda “nk’intambge yivuga,” kandi ashaka kuduhagarika. (1 Petero 5:8) Nimuze twibuke yuko ‘Yehova ari we nkomezi zacu n’inkinzo yacu,’ kandi yatunganije ibintu umuyoro kugira ngo ‘ahe inkomezi uwurushe.’​—Zaburi 28:7.

7, 8. Ni icemeza ikihe kiriho c’uko Yehova yakomeje Dawidi, Habakuki na Paulo?

⁷ Yehova yarahaye Dawidi inkomezi zikenewe kugira ngo akomere ku muheto mu guhangana n’intambamyi zikomakomeye. Ku bw’ico, Dawidi yuzuye ukwizera n’ukwizigira yanditse ati: “Imana izodukoresha ivy’ubuhizi, kukw ari yo izosiribanga abarwanizi bacu.” (Zaburi 60:12) Yehova kandi yarahaye inguvu Habakuki kugira ngo ashobore kurangiza ibanga yari yarajejwe bwa muhanuzi. Muri Habakuki 3:19 havuga hati: “Uhoraho, Umwami, ni we nkomezi zanje; ni we ahindura ibirenge vyanje nk’ivy’impongokazi, kand’azompa gutambagira ku dutwe tw’imisozi yanje.” Ayandi majambo akwiriye kurimburwa ni aya ya Paulo, uwanditse ati: “Nshobozwa vyose n’[Imana i]mpa inkomezi.”​—Ab’i Filipi 4:13.

⁸ Nka kumwe kwa Dawidi, Habakuki na Paulo, dukwiye kugaragaza ukwizera mu bushobozi Imana ifise bwo kudukomeza no mu bubasha ifise bwo kudukiza. Kubera tuzi yuko Umukama Segaba Yehova ari we Soko ryacu ry’“inkomezi,” nimuze ubu turimbure uburyo bumwebumwe bwo kuvoma inkomezi zo mu buryo bw’impwemu mu bintu umuyoro Imana itunganya.

Intunganyo zo mu vy’Impwemu zo Kuduha Ingoga

9. Ni uruhara uruhe ibisohokayandikiro vya gikirisu bifise mu kudufungurira?

⁹ Kwigana ubwira Ivyanditswe tubifashijwemwo n’ibisohokayandikiro vya gikirisu birashobora kuduha ingoga no kudushigikira. Umwanditsi wa Zaburi yaririmvye ati: “Hahirwa umuntu . . . ibimuhimbara biri mu vyagezwe vy’Uhoraho, kand’ivyagezwe vyiwe ni vyo [“asoma n’ijwi ritoyi,” NW] ku murango no mw ijoro. Azoba nk’igiti gitewe hafi y’imigezi y’amazi, cama igihe caco, ibibabi vyaco ntivyuma: Ic’azokora cose kizomubera ko.” (Zaburi 1:1-3) Nka kurya nyene dutegerezwa gufungura kugira ngo tubungabunge inkomezi z’umubiri, turakeneye kwihereza imfungurwa z’ivy’impwemu zitangwa n’Imana biciye kw’Ijambo ryayo no ku bisohokayandikiro vya gikirisu ngo zibungabunge inkomezi zacu zo mu vy’impwemu. Ni co gituma inyigisho iri n’ico ivuze be n’ukuzirikana ari ntahara.

10. Ni ryari tworonka umwanya wo kwiga no kuzirikana?

¹⁰ Mu vy’ukuri, kuzirikana ku “bintu [“vyimbitse,” NW] vy’Imana” biraronsa impera. (1 Ab’i Korinto 2:10) Mugabo, ni ryari dushobora kuronka umwanya wo kuzirikana? Umuhungu wa Aburahamu Isaka “[yagiye] mu gahinga [“kuzirikana,” NW], hāri ku kagoroba.” (Itanguriro 24:63-67) Umwanditsi wa Zaburi Dawidi ‘yazirikana ivyerekeye Imana mu bihe vy’amaterama.’ (Zaburi 63:6) Twokwiga Ijambo ry’Imana tukongera tukarizirikanako mu gitondo, ku mugoroba no mw’ijoro​—emwe, igihe ico ari co cose. Ukwiga n’ukuzirikana nk’ukwo bijana ku yindi ntunganyo iri mu ntunganyo zo mu vy’impwemu za Yehova zikomeza, ikaba ari isengesho.

11. Ni kuki dukwiye guha agaciro kanini ugusenga ubudahorereza?

¹¹ Gusenga Imana ubudahorereza birafasha mu kuduha ingoga. Nimuze rero “[d]ushishikare gusenga.” (Abaroma 12:12) Rimwe na rimwe, dukeneye gusaba mu buryo butomoye ubukerebutsi n’inkomezi bikenewe kugira ngo duhangane n’ikigeragezo kinaka. (Yakobo 1:5-8) Nimuze kandi dushimire Imana twongere tuyishemeze igihe twibonera iranguka ry’imigambi yayo canke tubona yuko yadukomeje kugira ngo tubandanye umurimo wayo. (Ab’i Filipi 4:6, 7) Mu gihe twoguma twiyegereje Yehova mw’isengesho, ntazokwigera aduta. Dawidi yaririmvye ati: “Eh’Imana n’umufasha wanje.”​—Zaburi 54:4.

12. Ni kuki dukwiye gusaba Imana impwemu yayo?

¹² Dawe wa twese wo mw’ijuru araduha ingoga akongera akadukomeza biciye ku mpwemu yiwe yera, ari yo nguvu yiwe ikora. Paulo yanditse ati: “Mpfukamira Data wa twese . . . ngw abahe, nk’ukw itunga ry’ubgiza bgiwe riri, kuremeshwa n’ubushobozi imbere mu mutima mubihawe n’[impwemu yera yiwe].” (Abanyefeso 3:14-16) Dukwiye gusenga dusaba impwemu yera, twizigiye yuko Yehova azoduhezagira akayituronsa. Ehe ukuntu Yezu yafashije abantu kuzirikana: Mu gihe umwana asavye ifi, mbega umuvyeyi munyarukundo yomuha inzoka? Nawe nu, ntiyovyubahuka. Ni co gituma yasozereye ati: “None mwebge, ko muzi guha abana banyu ingabire nziza muri babi, mbega So wo mw ijuru ntazorushiriza rwose guha [im]pwemu [y]era aba[yi]musavye?” (Luka 11:11-13) Nimuze dusengane ukwo kwizigira kandi nantaryo twibuke yuko abasavyi b’Imana b’abizerwa bashobora guhabwa “ubushobozi” bivuye ku bubasha buciye ku mpwemu yiwe.

Ishengero Ni Imfashanyo Ikomeza

13. Dukwiye kubona gute amakoraniro ya gikirisu?

¹³ Yehova araduha ingoga biciye ku makoraniro y’ishengero rya gikirisu. Yezu yavuze ati: “Aho babiri canke batatu bazoba bakoraniye mw izina ryanje, nanje nzoba ndi hagati muri bo.” (Matayo 18:20) Igihe Yezu yatanga iryo sezerano, yariko aravuga ibibazo vyari bikeneye kwitwararikwa n’abayobora ishengero. (Matayo 18:15-19) Ariko rero, amajambo yiwe ku bwa ngingo yerekeye amakoraniro, amateraniro n’amahwaniro yose tugira, ayugururwa akongera akarangizwa n’isengesho riturwa mw’izina ryiwe. (Yohana 14:14) Urumva rero ko ari agateka kwitaba imitororokano y’Abakirisu nk’iyo, yaba yitabwe na bake canke hari abantu ibihumbi n’ibihumbi. Nimuze rero tugaragaze ko dukura ubwatsi ku bw’ivyo biringo bigenewe kudukomeza mu buryo bw’impwemu no kutwoherereza ku rukundo no ku bikorwa vyiza.​—Abaheburayo 10:24, 25.

14. Ni ivyiza ibihe dukura ku twigoro tw’abakurambere b’Abakirisu?

¹⁴ Abakurambere b’Abakirisu baratanga imfashanyo n’indemesho vyo mu buryo bw’impwemu. (1 Petero 5:2, 3) Paulo yarafashije yongera araremesha amashengero yasukurira, nka kurya abacungezi b’ingenzi babigira muri iki gihe. Kukaba nkako, yaripfuza cane kuba kumwe n’abo basangiye ukwemera kugira ngo hashobore kuba iyubakana n’ihanahanwa ry’indemesho. (Ivyakozwe 14:19-22; Abaroma 1:11, 12) Ese nantaryo twogaragaza ko dukengurukira abakurambere bacu be n’abandi bacungezi b’Abakirisu, abarangura uruhara runini mu kudukomeza mu buryo bw’impwemu.

15. Ni gute abo dusangiye ukwemera bo mw’ishengero dukukira dusanga ari “imfashanyo ikomeza”?

¹⁵ Abo dusangiye ukwemera bagize ishengero dukukira barashobora kuba “imfashanyo ikomeza.” (Ab’i Kolosayi 4:10, 11, NW) Bwa ‘bakunzi nyakuri,’ barashobora kudufasha mu bihe vy’amagorwa. (Imigani 17:17) Nk’akarorero, igihe abasavyi b’Imana 220 bakurwa mw’ikambi ry’itunatuniro rya Sachsenhausen barinzwe n’Abanazi mu 1945, bari bagiye kugira urugendo rugoye rw’ibirometero 200 ku maguru. Bagenda ari umugwi, kandi abakomeye kuruta bakandaza abagoyagoya mu dukogote dukeyi dutoduto. Vyavuyemwo iki? Mu rugendo rwataziriwe urw’urupfu rwahitanye ubuzima bw’abari bapfungiwe mw’ikambi ry’itunatuniro barenga 10.000, nta Cabona ca Yehova n’umwe yapfuye. Inkuru nk’izo ziseruka mu bisohokayandikiro vya Watch Tower, harimwo na Annuaire des Témoins de Jéhovah be n’igitabu Les Témoins de Jéhovah: Prédicateurs du Royaume de Dieu, ziremeza yuko Imana iha ububasha abasavyi bayo, kugira ngo ntibateshwe ngo bate.​—Ab’i Galatiya 6:9.b

Turakomezwa n’Ubusuku Bwacu bwo mu Ndimiro

16. Ukugira uruhara ubudahorereza mu busuku bidukomeza gute mu buryo bw’impwemu?

¹⁶ Kugira uruhara ubudahorereza mu gikorwa co kwamamaza Ubwami biradukomeza mu vy’impwemu. Umurimo nk’uwo uradufasha kwitunira ku Bwami bw’Imana no kuguma duhanze amaso ibihe bidahera n’imihezagiro twiteze. (Yuda 20, 21) Imihango yo mu Vyanditswe tuyagira abantu mu busuku bwacu iraduha umwizero kandi igashobora gutuma tugira umwiyemezo nk’umuhanuzi Mika, uwavuze ati: “Tuzogendera mw’izina ry[a] [“Yehova,” NW] Imana yacu gushitsa ibihe bitazoshira.”​—Mika 4:5.

17. Ni inama izihe zitangwa ku biraba inyigisho za Bibiliya zo ku mihana?

¹⁷ Ubucuti ubwacu dufitaniye na Yehova burakomezwa uko turushiriza gukoresha Ivyanditswe mu kwigisha abandi. Nk’akarorero, igihe turongora inyigisho za Bibiliya zo ku mihana twifashishije igitabu Ubumenyi Bujana mu Buzima Budahera, ni ibiranga ubukerebutsi gusoma no kuganira ku vyanditswe nka bingahe biba vyatanzwe. Ivyo birafasha umutohoji bikongera bigakomeza ubutahuzi bwacu bwite bw’ibintu vy’impwemu. Mu gihe umutohoji yoba afise ingorane yo gutahura iciyumviro kinaka co muri Bibiliya canke ikigereranirizo kinaka, ibiringo vyinshi vy’ukwiga birashobora kuba bikenewe kugira ngo baheture ikigabane kimwe mu gitabu Ubumenyi. Ese ukuntu turi n’akamwemwe ko kwitegura neza no kugira akigoro karengereje ko gufasha abandi kwiyegereza Imana!

18. Tanga akarorero k’ukuntu igitabu Ubumenyi kiriko kirakoreshwa mu buryo kirumara.

¹⁸ Ku mwaka ku mwaka, igitabu Ubumenyi kiriko kirakoreshwa mu buryo kirumara mu gufasha abantu ibihumbi gucika abasavyi biyeguye ba Yehova, kandi abo barimwo n’abatakuriye aho Bibiliya ikoreshwa. Nk’akarorero, igihe yari umwana, umugabo umwe w’Umuhindu w’i Sri Lanka yarumvise Icabonakazi umwe ariko araganira ivyerekeye Iparadizo. Haciye imyaka nk’ingahe, yaregereye ico Cabonakazi, maze haciye igihe gito umunega w’uno atangura kwigana na we Bibiliya. Kukaba nkako, uwo mugabo akiri muto yaza kwiga ku musi ku musi, maze igitabu Ubumenyi giheturwa mu gihe gito ugereranije. Yaratanguye kwitaba amakoraniro yose, aritandukanya n’idini yahoramwo, maze acika umwamamaji w’Ubwami. Igihe yabatizwa, yari amaze gutangura kuyoborera inyigisho ya Bibiliya umuntu bazinanye.

19. Mu gihe tubanza kurondera Ubwami, ni igiki dushobora kudakeka?

¹⁹ Kubanza kurondera Ubwami biratuzanira umunezero ukomeza. (Matayo 6:33) Naho dushikirwa n’ibigeragezo bitari bimwe, turabandanya kwamamaza inkuru nziza tubigiranye umunezero be n’ubwira. (Tito 2:14) Benshi muri twebwe barashitsa ibisabwa vyo kwinjira mu murimo w’igihe cose w’ubutsimvyi, kandi bamwebamwe bariko barakorera ahakenewe abamamaji benshi kuruta. Twaba duteza imbere inyungu z’Ubwami muri ubwo buryo canke mu bundi buryo tubigiranye umunezero, turizigiye yuko Yehova atazokwibagira igikorwa cacu be n’urukundo tugaragariza izina ryiwe.​—Abaheburayo 6:10-12.

Bandanya mu Nkomezi za Yehova

20. Dushobora gute kugaragaza ko duhanze amaso Yehova ngo turonke inkomezi?

²⁰ Uko bishoboka kwose, nitugaragaze yuko twizigira Yehova n’uko ari we duhanga amaso kugira ngo turonke inkomezi. Ivyo dushobora kubigira mu kwungukira vyuzuye ku ntunganyo zo mu buryo bw’impwemu aturonsa biciye kuri wa “mushumba w’umwizerwa.” (Matayo 24:45, NW) Kwiyigisha Ijambo ry’Imana no kuryigira mw’ishengero tubifashijwemwo n’ibisohokayandikiro vya gikirisu, isengesho rivuye ku mutima, insahirizo yo mu vy’impwemu y’abakurambere, uturorero twiza tw’abo dusangiye ukwemera b’abizerwa be n’uruhara rudahorereza tugira mu busuku, biri mu ntunganyo zikomeza ubucuti dufitaniye na Yehova, zikongera zikaduha ububasha bwo kubandanya mu murimo mweranda wiwe.

21. Intumwa Petero na Paulo baseruye gute yuko inkomezi zitangwa n’Imana zikenewe?

²¹ Naho dufise intege nke ziranga umuntu, Yehova azodukomeza kugira ngo dukore ivyo agomba niba twihetse kuri we kugira turonke imfashanyo. Kubera intumwa Petero yari azi ko imfashanyo nk’iyo ikenewe, yanditse ati: “Umuntu iy’[“akorera abandi, n’abigire,” UB] nk’ūfise ubushobozi Imana itanga.” (1 Petero 4:11) Paulo na we yerekanye ukuntu yiheka ku nkomezi Imana itanga igihe yavuga ati: “Kubga Kristo nzonezererwa intege nke zanje, no gukubagurwa, n’imibabaro, no guhīgwa, n’ivyago: kukw iyo mbaye umunyantege nke ari ho ndushiriza kugira ubushobozi.” (2 Ab’i Korinto 12:10) Nimuze tugaragaze ukwo kujijuka nyene maze tuninahaze Umukama Segaba Yehova, we aha inkomezi uwurushe.​—Yesaya 12:2.

[Utujambo tw’epfo]

Wokwishura Ute?

• Ni kuki abasavyi ba Yehova bakeneye ububasha burengeye ubusanzwe?

• Ni icemeza ikihe co mu Vyanditswe kiriho c’uko Imana iha ububasha abasavyi bayo?

• Ni intunganyo zimwezimwe izihe zo mu buryo bw’impwemu Yehova yagize kugira ngo adukomeze?

• Dushobora gute kwerekana yuko duhanze amaso Imana kugira ngo turonke inkomezi?

[Ifoto ku rup. 22]

Ubucuti ubwacu dufitaniye na Yehova burakomera uko dukoresha Bibiliya mu kwigisha abandi