Ni Ubuyobozi bwa Nde Ushobora Kwizigira?

Umuntu umwe yari agendeye Afirika ari bwo bwa mbere, yaratangajwe n’ukubona umugabo ahagaze gisoda ku nkengera y’ibarabara. Yabonye yuko, uko haca iminuta ari ko uwo mugabo yanyereza ibirenge maze akigirayo gato iruhande, mugabo agihagaze gisoda. Mu nyuma ni ho gusa iyo ngenzi yatahura igituma uwo mugabo yigirayo ukuraho. Nkako, yashaka kuguma ari mu gitutu c’inkingi itwara intsinga zo gutumatumanako amakuru. Ico gitutu caguma cimuka buhorobuhoro uko izuba ryo ku muhingamo ryaza rirarenga.

NKA kurya kw’ico gitutu giterwa n’izuba, ibintu abantu bakora be n’ubuyobozi bakurikiza biguma bihungabana vyongera bihinduka uko bukeye uko bwije. Yehova Imana we, akaba ari “Se w’imico,” ntahinduka. Umwigishwa Yakobo yanditse ati: “[Nta]shobora guhinduka canke kugira igitūtu gitewe n’uguhindagurika.” (Yakobo 1:17) Umuhanuzi w’Umuheburayo Malaki yaranditse ivyo Imana ubwayo yimenyeshereje iti: “Jewe Uhoraho [n]ta ho mpinduka.” (Malaki 3:6) Imana yabwiye ihanga rya Isirayeli mu misi ya Yesaya iti: “Nzobageza no mu zabukuru ndi We, muzorinda musēsa imvi nkibaheka: ni jewe [nzobikora].” (Yesaya 46:4) Ni co gituma ukurengana kw’igihe kudahindura ukwizigira dushobora kugirira imihango y’umwe Mushoboravyose.

Icigwa Dukura ku Vyagezwe

Nka kurya nyene imihango Yehova yasezeranye ari iyo kwizigirwa kandi idahinduka, n’ubuyobozi bwiwe mu vyerekeye iciza n’ikibi ni ko bumeze. Woba wokwizigira umudandaza akoresha amabuye y’ibiro y’uburyo bubiri, umugwi umwe ukaba ari wo ugizwe n’ayakwije uburemere? Nta nkeka ntiwomwizigira. Muri ubwo buryo nyene, “umunzane ubesha n’igisesema k’Uhoraho, arikw ikilo c’ukuri kiramuhimbara.” (Imigani 11:1; 20:10) Mu Vyagezwe yahaye Abisirayeli, Yehova yarashizemwo iri bwirizwa rigira riti: “Ntimuze mugoreke imanza, mu gusuzuma ivyo kugeresha metero, cank’ikilo, cank’ingero. Arikw iminzane y’ukuri, n’ibilo vy’ukuri, n’ingero yitwa efa y’ukuri, n’ingero yitwa hini y’ukuri, bize bibe ari vyo mukoresha: ni jewe Uhoraho Imana yanyu, nabakūye mu gihugu ca Egiputa.”​—Abalewi 19:35, 36.

Kugamburuka iryo bwirizwa vyatumye Abisirayeli batoneshwa n’Imana bituma kandi baronka inyungu nyinshi z’umubiri. Muri ubwo buryo nyene, kwumira ku buyobozi bwa Yehova budahinduka, atari gusa mu vy’ibipimo n’ivy’ingero, mugabo mu mice yose y’ubuzima, bivamwo imihezagiro ku bamusenga bamwizigira. Imana yavuze iti: “Ni jewe Uhoraho Imana yawe, nkwigisha ibikugirira ikimazi, nkakurōngōra mu nzira ukwiye gucamwo.”​—Yesaya 48:17.

Ni Kubera Iki Muri Iki Gihe Ubuyobozi Bukurikizwa Buriko Buratituka?

Bibiliya irerekana igituma ubuyobozi bukurikizwa buriko buratituka muri iki gihe. Igitabu ca nyuma ca Bibiliya ari co Ivyahishuriwe, kiradondora intambara yabaye mw’ijuru, ingaruka zayo zikaba zagize ico zikora ku muryango wose w’abantu gushika muri iki gihe. Intumwa Yohani yanditse ati: “Mw ijuru havyuka intambara. Mikayeli n’abamarayika biwe barwanya ca gisato: igisato kirwanana n’abamarayika baco. Ntibatsinda, kandi mw ijuru ahabo ntihaba hakiboneka. Ca gisato c’amahēro kirakororwa, ni co ya nzoka ya mbere, yitwa Murwanizi, irindi ni Satani, ni co kizimiza abari kw isi bose, gikororerwa kw isi, abamarayika baco bakororanwa na co.”​—Ivyahishuriwe 12:7-9.

Ingaruka y’iyo ntambara yaciye iba iyihe ubwo nyene? Yohani yabandanije ati: “Nuko noneho munezerwe mwa majuru, namwe abayabamwo. Ibara rizobonwa n’isi n’ikiyaga, kuk’Umurwanizi yabamanukiye, ari n’inzigo nyinshi, azi kw afise igihe gito.”​—Ivyahishuriwe 12:12.

“Ibara [ryabonywe] n’isi” igihe Intambara ya Mbere y’Isi Yose yaduka mu 1914, riba ribaye iherezo ry’ikiringo aho abantu bakurikiza ubuyobozi butandukanye cane n’uburiho muri iki gihe. Umutohozakahise umwe Barbara Tuchman avuga ati: “Ya Ntambara Ihambaye yo kuva mu 1914 gushika mu 1918, imeze nk’akarimbi gatandukanya ico gihe n’igihe cacu. Mu guhitana ubuzima bw’abantu benshi bobaye abakozi mu myaka yakurikiye, mu gutuma abantu bahindura ivyo bemera, bahindura ivyiyumviro no mu gusiga imvune ziva ku mwiheburo, iyo ntambara yaratumye haba itandukaniro rinini hagati y’ivyo biringo bibiri.” Uwundi mutohozakahise mugenziwe Eric Hobsbawm yiyemerera ati: “Guhera mu 1914, haranzwe n’itituka ry’ubuyobozi bukurikizwa, muri ico gihe bwabonwa ko ari ubusanzwe mu bihugu biteye imbere . . . ntivyoroshe gutahura neza urugero tugezeko mu kwihutira gusubira ku vyo basokuruza bacu bo mu kinjana ca cumi n’icenda bokwise inyobozo z’ubunyeshamba.”

Mu gitabu ciwe (Humanity​—A Moral History of the Twentieth Century), umwanditsi Jonathan Glover avuga ati: “Ikintu kimwe mu biranga igihe turimwo, ni itituka ry’amategeko agenga ukwigenza runtu.” Naho atemera nka neza amategeko agenga ivy’ukwigenza runtu ava hanze kubera ukuntu idini rigenda ricupira mu bihugu vya Buraya, agabisha ati: “Abo muri twebwe batemera amategeko agenga ivy’ukwigenza runtu bakwiye kuguma bahagaritswe umutima n’itituka ryayo.”

Ubuhemu bwo muri iki gihe​—haba mu vy’ubucuruzi, mu vya politike canke mu vy’amadini eka no mu migenderanire umuntu agiranira n’abandi be no mu bucuti bwo mu muryango​—be n’ingaruka zavyo z’agahomerabunwa ni bumwe mu buryo Shetani akoresha urwenge rurangwa ububisha kugira ngo ateze amarushwa ababa kw’isi. Shetani yiyemeje gukokeza intambara yiwe gushika kw’iherezo no guhitanisha abihata bose kubaho bisunga ubuyobozi bw’Imana dukwiye gukurikiza.​—Ivyahishuriwe 12:17.

Hoba hariho uburyo bwo gutorera umuti ako gatima kiganje k’ubuhemu? Intumwa Petero yishura ati: “Nk’uko [Imana] yasezeranye tureretse ijuru risha n’isi nsha, ivyo ukugororoka kuzobamwo.” (2 Petero 3:13) Turashobora kwizigira uwo muhango kubera yuko Imana idafise gusa ububasha bwo gushitsa umugambi wiwe, mugabo kandi ko itwemerera yuko uzoranguka ata kabuza. Ku biraba ‘ijambo ryose riva mu kanwa kiwe,’ Yehova avuga ati: “Ntirizogaruka ubusa, ariko rizoshitsa ivyo ngomba, rizosozera ico naritumye.” Ese ukuntu ari umuhango wo kwizigirwa koko!​—Yesaya 55:11; Ivyahishuriwe 21:4, 5.

Tubeho Dukurikiza Ubuyobozi bw’Imana

Muri iyi si aho ubuyobozi bukurikizwa buhungabana kandi butituka, Ivyabona vya Yehova barihata kubaho bakurikiza ubuyobozi Bibiliya itanga bwerekeye uburyo umuntu yokwigenza. Ico bivamwo ni uko batandukanye na benshi, kandi kenshi ivyo vyarakwegereye ivyiyumviro vy’abandi bituma kandi babacokora.

Kw’ihwaniro rimwe ry’Ivyabona vya Yehova i Londere, umuvugizi umwe yarabajijwe n’umushikirizamakuru wa televiziyo niba Ivyabona vya Yehova vy’ukuri ari Abakirisu. Yishuye ati: “Ego cane, kanatsinda Yezu ni we citegererezo cacu. Isi yuzuye ubwikunzi, kandi duhanga amaso Yezu Kirisitu ko ari we ari inzira, ukuri, n’ubuzima. Turemera yuko ari Umwana w’Imana, atari umwe mu bigize Ubutatu, gutyo tukaba dutahura Bibiliya mu buryo butandukanye n’ukuntu ayandi madini ashinze imizi ayitahura.”

Igihe ico kiyago cashikirizwa kuri televiziyo ya BBC, umushikirizamakuru yasozereye ico kiganiro mu kuvuga ati: “Naramenye vyinshi ku vyerekeye igituma Ivyabona vya Yehova baza kudodora ku nzugi zacu. Nta na hamwe nari bwigere mbona abantu 25.000 bashajije ukuraho kandi bigenza neza bari hamwe mu kibanza kimwe mu gihe kimwe.” Koko, ese ukuntu ari intahe nziza yashinzwe n’uwatwitegereje atari uwo muri twebwe, yerekeye ukuntu gukurikiza ubuyobozi bw’Imana budahinduka biranga ubukerebutsi!

Naho bamwebamwe boshobora kuba baterekwa iciyumviro co kubaho bisunga ubuyobozi ubwabo batishingiye, turakuremesheje gutereza amaso muri Bibiliya yawe maze wige ubuyobozi bw’Imana ico ari co. Mugabo, ntugarukire ku kuyisuzuma uca hejuru. Nukurikire inkeburo y’intumwa Paulo igira iti: “Ntimushushanywe n’ivy’iki gihe, yamara muhinduke rwose, mugize imitima misha, kugira ngo mumenye neza ivy’Imana igomba, ni vyo vyiza bishimwa, bitunganye rwose.” (Abaroma 12:2) Nugendere Ingoro y’Ubwami y’aho iwanyu, wongere urondere kumenyana n’Ivyabona baho. Uzosanga ari abantu basanzwe, bizigira imihango ya Bibiliya kandi bagaragaza ukwizigira Imana kwabo mu kugerageza kubaho bisunga ubuyobozi bwayo.

Kwumira ku buyobozi bw’Imana budahinduka kandi bwo kwizigirwa mu buzima bwawe, nta nkeka bizokuzanira imihezagiro. Niwitabe aka kamo Imana ubwayo igutera iti: “Iy’uba warumviye ivyagezwe vyanje, uba waragize amahoro ameze nk’uruzi, kand’ukugororoka kwawe kuba kwarabaye nk’imipfunda y’ikiyaga.”​—Yesaya 48:18.

[Amafoto ku rup. 5]

Muri iki gihe, hariho ubuhemu mu bucuruzi, mu vya politike, mu vy’amadini be no mu bucuti bwo mu muryango