Ivyo Wemera Uvyemerera Iki?

Kwemera vyasiguwe ko ari “ugufata ikintu ko ari ic’ukuri, ko ari nyaco.” Icete c’Itangazo Mpuzamakungu ry’Agateka ka Zina Muntu casohowe n’Ishirahamwe Mpuzamakungu O. N. U. kirakingira “uburenganzira umuntu wese afise bwo kugira umwidegemvyo mu vyiyumviro, ukwizera be n’idini.” Ubwo burenganzira burimwo umwidegemvyo wo “guhindura idini canke ivyo umuntu yemera” mu gihe abishatse.

NI KUKI none umuntu yoshaka guhindura idini canke ivyo yemera? Kenshi abantu bakunda kuvuga bati: “Ndafise ivyo nemera kandi birampimbara.” Abenshi babona yuko no mu gihe ivyo bemera atari vyo ata muntu n’umwe bigirira nabi. Nk’akarorero, umuntu yemera yuko isi ibase birashoboka ko bitamugirira nabi canke ngo bigirire nabi uwundi muntu uwo ari we wese. Bamwebamwe bavuga bati: “Dukwiye kwemera ko tugira ivyiyumviro bitandukanye, nta kundi.” Vyoba nantaryo biranga ubukerebutsi? Mbega umuganga yokwemera ko ari ugutandukana mu vyiyumviro gusa n’umwe mu bo bakorana, mu gihe uno yoba abandanya kwiyumvira yuko ashobora kuva gukorakora imivyimba mu buruhukiro agaca aja ubwo nyene gusuzuma abarwayi mu cumba barwariyemwo?

Ku bijanye n’idini, ukwemera ibitari vyo kwarakweze ikibi gikomeye muri kahise. Ibaze ibintu vy’agacavutu vyabaye igihe indongozi z’amadini “zaremesha abarwanashaka b’Abakirisu mu bukazi bw’akaburakigongwe” muri za ntambara zitwa ngo ni Intambara Nyeranda z’Amadini zabaye muri ca Kiringo co hagati y’ikinjana ca 5 n’ica 15 G.C. Canke iyumvire ibiheruka kuba mu ntambara y’abanyagihugu imwe yabaye vuba, igihe abantu bitwaje ibirwanisho kandi bitwa ngo ni “Abakirisu” bo mu gihe ca none bahomeka amafoto ya Bikira Mariya ku birindi vy’inkoho zabo, “nka kurya nyene kw’abarwanyi bo muri ca kiringo co hagati y’ikinjana ca 5 n’ica 15 G.C. wasanga bafise inkota zifise ibirindi vyanditseko amazina y’aberanda.” Abo barwanashaka bose baremera yuko bariko bagira neza. Yamara rero, biragaragara ko muri izo ntambara z’amadini be no mu zindi zayo, hariho ikintu kitagenda neza na gato.

Ni kuki hari umuvurungano mwinshi n’amatati menshi gutyo? Bibiliya yishura yuko Shetani wa Murwanizi ariko “[ara]zimiza abari kw isi bose.” (Ivyahishuriwe 12:9; 2 Ab’i Korinto 4:4; 11:3) Intumwa Paulo yabuye yuko abanyamadini benshi ‘bohonye’ bimwe biteye umubabaro bivuye ku guhendwa na Shetani, we “yokoze ibitangaro be n’ibitangaza kugira ngo abazimize.” Paulo yavuze yuko mwene abo bantu “bokwugaye imizirikanyi yabo kugira ngo ntikunde ukuri kwoshoboye kubakiza” maze gutyo ‘bagahendwa bakizera ibinyoma.’ (2 Ab’i Tesalonike 2:9-12, Isezerano Rishasha ryahinduwe na William Barclay) Woshobora gukora iki kugira wirinde mu buryo bushoboka bwose kugwa mu vyo kwemera ibinyoma? Kukaba nkako, ivyo wemera uvyemerera iki?

Woba Wakuze Wemera Ivyo Abavyeyi Bemera?

Kumbure wakuze wemera ivyo umuryango w’iwanyu wemera. Ico gishobora kuba ari ikintu ciza. Imana ishaka ko abavyeyi bigisha abana babo. (Gusubira mu Vyagezwe 6:4-9; 11:18-21) Nk’akarorero, wa musore Timoteyo yarungukiye cane ku kwumviriza nyina be na inakuru. (2 Timoteyo 1:5; 3:14, 15) Ivyanditswe biremesha kwubahiriza ivyo abavyeyi bemera. (Imigani 1:8; Abanyefeso 6:1) Ariko Umuremyi wawe yoba yashatse ko wemera ibintu kubera gusa abavyeyi bawe bavyemera? Ugupfa kwumira ku vyo ba sogokuru na ba sogokuruza bemera kandi bakoze utiyumviriye, mu vy’ukuri vyoshobora kuba ingeramizi.​—Zaburi 78:8; Amosi 2:4.

Umukenyezi umwe w’Umusamariyakazi yahuye na Yezu Kirisitu akaba yari yakuze yemera idini yarimwo y’Abasamariya. (Yohana 4:20) Yezu yarubahirije umwidegemvyo wiwe wo guhitamwo ivyo yashaka kwemera, ariko kandi yamubwiye ati: “Mwebge musenga ico mutazi.” Vyinshi mu vyo bemera mw’idini iwabo kukaba nkako ntivyari vyo, gutyo amubwira yuko yari akwiye guhindura ivyo yemera nimba yashaka gusenga mu buryo Imana yemera, ni ukuvuga mu “mpwemu no mu kuri.” Aho kwumira ku vyo bemera, we hamwe n’abandi nka we mu nyuma bobwirijwe gucika “abumvira ukwizera” kwahishuwe biciye kuri Yezu Kirisitu.​—Yohana 4:21-24, 39-41; Ivyakozwe 6:7.

Woba Wigishijwe Kuvyemera?

Abigisha n’abahinga benshi mu bintu kanaka barakwiriye icubahiro cinshi. Yamara, kahise kuzuyemwo uburorero bw’abigisha ba rurangiranwa wasanga bihenda cane. Nk’akarorero, ku vyerekeye ibitabu bibiri bivuga ivya siyansi vyanditswe n’umufilozofe w’Umugiriki Aristote, umutohozakahise Bertrand Russell yavuze yuko “muri ivyo bitabu vyompi ata n’iryungane na rimwe umuntu yokwemera afatiye kuri siyansi yo mu gihe ca none.” N’abahinga bo mu gihe ca none kenshi barashika ku vyiyumviro bitari vyo na gato. Amajambo ngo “ntibishoboka ko ivyuma biremereye gusumba impemu biguruka,” ni amajambo umunyasiyansi wo mu Bwongereza Lord Kelvin yavuze adakekeranya mu 1895. Umuntu w’inkerebutsi rero, ntapfa kwemera yuko ikintu ari ic’ukuri kubera gusa umwigisha kanaka afise ubukuru avuze ko ari ic’ukuri.​—Zaburi 146:3.

Harakenewe ukwiyubara nk’ukwo ku vyerekeye inyigisho zo mu vy’idini. Intumwa Paulo yari yarigishijwe neza n’abigisha bo mw’idini ryiwe, kandi yari arengeje urugero mu “kugira ishaka ry’imigenzo [b]ārazwe na ba [se]kuruza.” Ariko rero, umwete yari afitiye ukwizera kwa ba sekuruza gushingiye ku migenzo, ku bwa ngingo kwaramuteje ingorane. Vyamushikanye ku ‘guhiga ishengero ry’Imana birengeje, araritikiza.’ (Ab’i Galatiya 1:13, 14; Yohana 16:2, 3) Icari kibi kuruta, ni uko Paulo yamaze igihe kirekire aguma “atera imigere ku mihunda,” atera igere ku kosho keza kari kumushikana ku kwizera Yezu Kirisitu. Vyasavye ko Yezu ubwiwe abijamwo mu buryo bukomeye kugira ngo avyurire Paulo umutima wo guhindura ivyo yemera.​—Ivyakozwe 9:1-6; 26:14.

Woba Wohejwe n’Ibimenyeshamakuru?

Kumbure ibimenyeshamakuru vyaragize akosho gakomeye ku vyo wemera. Abantu benshi barahimbarwa kubona hariho umwidegemvyo wo guserura ivyiyumviro mu bimenyeshamakuru, bibaha akaryo ko kuronka amakuru ashobora kuba ngirakamaro. Ariko rero, hariho ibintu bikomeye bishobora kwosha ibimenyeshamakuru, kandi kenshi na kenshi birabigira. Ibishikirizwa kenshi ni amakuru atabereye ashobora kwonona ivyiyumviro vyawe ku rwenge.

Turetse ivyo, kugira ngo bikwegere abumviriza benshi, ibimenyeshamakuru bifise impengamiro yo gushikiriza abanyagihugu ibintu bikora ku mutima kandi bisanzwe. Ibitashobora kuvugwa canke kwandikwa ngo bishikirizwe abantu mu myaka mikeyi gusa iheze, muri iki gihe ni vyo bisigaye vyuzuye mu bimenyeshamakuru. Buhorobuhoro, uburyo abantu bari basanzwe bigenza burarwanywa kandi bugatituka. Ivyiyumviro vy’abantu bigenda birononekara bukebuke. Bagatangura kwemera yuko ‘ikibi ari ciza n’uko iciza ari kibi.’​—Yesaya 5:20; 1 Ab’i Korinto 6:9, 10.

Kuronka Ishimikiro Ryumvikana ry’Ukwemera

Kwubakira ku vyiyumviro no ku mafilozofiya vy’abantu, bimeze nko kwubakira ku musenyi. (Matayo 7:26; 1 Ab’i Korinto 1:19, 20) None rero ivyo wemera ushobora kubishingira ku biki ata gukekeranya? Kubera yuko Imana yaguhaye ubwenge bwo gusuzuma ibigukikije no kubaza ibibazo vyerekeye ibintu vy’impwemu, ntivyoba none vyumvikana yuko yoguha n’uburyo bwo kuronka inyishu zitagira agakosa z’ibibazo vyawe? (1 Yohana 5:20) Ni vyo, birumvikana ko yobuguha! None rero ushobora gute kumenya ibiri ukuri, ibintu nyavyo mu bijanye no gusenga? Ntiduhigimanga kuvuga yuko Ijambo ry’Imana, Bibiliya ari ryo ritanga ishimikiro ryonyene ryo kubigira.​—Yohana 17:17; 2 Timoteyo 3:16, 17.

Umuntu arashobora kuvuga ati: “Ariko ni ukuraba neza. None abo nyene bafise Bibiliya si bo bateje amatati menshi be n’umuvurungano mwinshi kuruta mu bintu vy’isi?” Emwe, ni ivy’ukuri yuko indongozi z’amadini zivugisha yuko zikurikira Bibiliya zazanye ivyiyumviro vyinshi bivuruga ubwenge kandi bivuguruzanya. Kukaba nkako, ivyo ni kubera yuko ivyo bemera batabishingiye kuri Bibiliya. Intumwa Petero abadondora ko ari “abigira abavugishwa n’Imana” n’“abigisha b’ibinyoma” boshinze “[“utudumbi,” NW] [du]tera guhona.” Petero aravuga inkurikizi z’ivyo bakora ati: “Inzira y’ukuri bazoyitukisha.” (2 Petero 2:1, 2) Mugabo, Petero yandika ati: “Turafise ijambo ryavugishijwe, ryarakomejwe kurushiriza. Mugira neza ko murishirak’umutima, ni nk’itara ryākira ahacuze umwiza.”​—2 Petero 1:19; Zaburi 119:105.

Bibiliya iraturemesha gusuzuma ivyo twemera turabiye ku vyo yigisha. (1 Yohana 4:1) Abasomyi amamiliyoni b’iki kinyamakuru barashobora gushinga intahe yuko kubigenza gutyo vyatumye ubuzima bwabo burushiriza kugira intumbero buranarushiriza gutekana. Nube rero nka ba banyaberoya bari imico myiza. ‘Nusese mu vyanditswe uko bukeye’ imbere yuko uhitamwo ivyo wemera. (Ivyakozwe 17:11) Ivyabona vya Yehova bazohimbarwa no kugufasha kugira ngo ivyo ubishikeko. Ego ni ko, ni wewe wifatira ingingo y’ivyo ushaka kwemera. Ariko rero, ni ingendo iranga ubukerebutsi kuraba neza yuko ivyo wemera bitashinzwe n’ubukerebutsi be n’ivyipfuzo vy’abantu, ahubwo ko vyashinzwe n’Ijambo ry’ukuri ryahishuwe n’Imana.​—1 Ab’i Tesalonike 2:13; 5:21.

[Ifoto ku rup. 6]

Ivyo wemera urashobora kubishingira kuri Bibiliya ata gukekeranya