Yehova Ni We Karorero Ntangere mu vy’Ukumera Neza

“Ni mushime Uhoraho Nyen’ingabo, kuk’Uhoraho ari mwiza!”​—YEREMIYA 33:11.

1. Ni kuki tuvyurirwa umutima wo gushemeza Imana kubera imeze neza?

YEHOVA IMANA ameze neza bimwe bitagira agahaze. Umumenyeshakazoza Zekariya yatangaye avuga ati: “Ewe ineza yiwe ukuntu ari nyinshi!” (Zekariya 9:17) Kukaba nkako, ukumera neza kw’Imana kugaragarira mu kantu kose yakoze kugira ngo itegure isi tuyinezerererwe. (Itanguriro 1:31) Ntituzokwigera dushobora gutahura uburyo busiga ubwenge Imana yakoresheje mu kurema ijuru n’isi. (Umusiguzi 3:11; 8:17) Mugabo dukeyi tuzi turatuvyurira umutima wo gushemeza Imana kubera imeze neza.

2. Ukumera neza wogusigura ute?

² Ukumera neza bisobanura iki? Ni inyifato runtu canke ingeso nziza. Yamara rero, ukumera neza ntibisigura gusa ukudakora ikibi na rimwe. Ukumera neza, ni kimwe mu bigize ivyamwa vy’impwemu, ni kamere idusunikira ku gukora ivyiza. (Ab’i Galatiya 5:22, 23) Tugaragaza ko tumeze neza igihe dukorera abandi ibikorwa vyiza kandi vy’ingirakamaro. Muri uru runkwekwe rw’ibintu, ibibonwa ko ari vyiza ku bantu bamwe bishobora kubonwa ko ari bibi ku bandi. Ariko rero, nimba dushaka kugira amahoro n’ubuhirwe, ikintu kimeze neza gikwiye kuba kimeze neza kuri bose. Ni nde akwiriye gushinga ukumera neza ukwo ari kwo?

3. Mw’​Itanguriro 2:16, 17 herekana iki ku vyerekeye ivyo kumenya ikintu kimeze neza ico ari co?

³ Imana ni yo ishinga ikintu kimeze neza. Mu ntango y’ukubaho kw’umuntu, Yehova ni we yabwirije umuntu wa mbere ati: “Igiti cose co mur’iryo tongo ukiryek’uk’ugomba; arikw igiti kimenyekanisha iciza n’ikibi ntuz’ukiryeko: kuk’umusi wakiriyeko, uzopfa nta kabuza.” (Itanguriro 2:16, 17) Erega ni vyo, abantu bakeneye guhanga amaso Umuremyi wabo niba bashaka kumenya iciza n’ikibi.

Aratugaragariza Ineza Tutabikwiriye

4. Ni ibiki Imana yakoreye umuryango w’abantu kuva aho Adamu acumuriye?

⁴ Icizigiro c’umuryango w’abantu c’ukugira ubuhirwe buhoraho batagira akanenge carahanamiwe igihe Adamu yacumura gutyo akanka kwemera icese uburenganzira Imana ifise bwo gushinga ikintu kimeze neza ico ari co. (Itanguriro 3:1-6) Ariko rero, imbere y’uko uruvyaro rwa Adamu rwarazwe icaha n’urupfu ruvuka, Imana yari yarabuye ko hoje Urubuto rutagira akanenge. Hari amajambo Yehova yamenyesheje ariko abwira ya “nzoka ya mbere,” ari yo Shetani wa Mucokoranyi, avuga ati: “Nzoshira inyankane hagati yawe n’uyu mugore, no hagati y’uru[buto] rwawe n’urwiwe: ruzogukomeretsa umutwe, nawe uzorukomeretsa igitsintsiri.” (Ivyahishuriwe 12:9; Itanguriro 3:15) Umugambi wa Yehova wari uwo gucungura umuryango w’abantu b’abanyavyaha. Mu buryo bwo kutugaragariza ineza tutabikwiriye, Yehova yaratunganije ikintu nk’ico ku bw’ubukiriro bw’abantu bagaragaza ukwizera inkuka y’incungu y’Umwana wiwe mukundwa.​—Matayo 20:28; Abaroma 5:8, 12.

5. Naho twarazwe umutima uhengamiye ku kibi, ni kuki hari ukuntu dushobora kugaragaza ukumera neza?

⁵ Kubera icaha ca Adamu, birumvikana ko twarazwe umutima uhengamiye ku kibi. (Itanguriro 8:21) Naho ari ukwo, igihimbaye ni uko Yehova adufasha kugaragaza ko tumeze neza ku rugero runaka. Tugumye mu bintu twize mu vyanditswe vyiwe vyeranda vy’agaciro, ntibituma gusa ‘tugira ubwenge bwo kutuzanira ubukiriro’ ngo vyongere bitume turonka ‘ibikwiye vyose ngo dukore igikorwa ciza cose,’ mugabo kandi biradushoboza gukora ivyiza mu nyonga ziwe. (2 Timoteyo 3:14-17) Naho ari ukwo, kugira ngo twungukire ku macishabwenge yo mu Vyanditswe twongere tugaragaze ko tumeze neza, dutegerezwa kugira agatima nk’ak’umwanditsi wa Zaburi yaririmvye ati: “[Yehova] uri mwiza, kand’ugira neza; unyigishe ivyo washinze.”​—Zaburi 119:68.

Ukumera Neza kwa Yehova Kurashemagizwa

6. Umwami Dawidi amaze gutuma ngo bazane isandugu y’isezerano i Yeruzalemu, Abalewi baririmvye ururirimbo rurimwo ayahe majambo?

⁶ Umwami Dawidi wa Isirayeli ya kera yaremeye icese ko Imana imeze neza yongera ararondera ubuyobozi bwayo. Dawidi yavuze ati: “Uhoraho ni mwiza, aragororotse: ni co gituma azorangira abanyavyaha inzira.” (Zaburi 25:8) Mu mabwirizwa Imana yahaye Abisirayeli harimwo amategeko cumi ahambaye, ari yo Mabwirizwa Cumi, yanditswe ku bisate bibiri vy’amabuye maze abikwa mw’isandugu ryeranda ryitwa isandugu ry’isezerano. Dawidi amaze gutuma ngo bazane iryo Sandugu ku murwa mukuru wa Isirayeli, ari wo Yeruzalemu, Abalewi bararirimvye ururirimbo rwarimwo aya majambo avuga ngo: “Ni mushimire Uhoraho yukw ari mwiza: kukw [ubuntu-mvarukundo bw]iwe [bw]amah’ibihe bidashira.” (1 Ngoma 16:34, 37-41) Ese ukuntu bitegerezwa kuba vyari biryoshe kwumva ayo majambo ava mu kanwa k’abaririmvyi b’Abalewi!

7. Ni ibiki vyabaye Isandugu imaze kwinjizwa Ahera Cane be n’inyuma y’aho Salomo aturiye isengesho ryo kwegurira Imana urusengero?

⁷ Amajambo nk’ayo nyene yo gushemeza yarashimitsweko mu gihe c’ukwegurira Yehova urusengero rwubatswe na Salomo, umuhungu wa Dawidi. Isandugu y’isezerano imaze gushirwa Ahera Cane h’urwo rusengero rushasha bubatse, Abalewi baratanguye gushemeza Yehova kubera “[ari] mwiza, kukw [ubuntu-mvarukundo bw]iwe [bw]amah’ibihe bidashira.” Ico gihe urusengero rwaruzuye igicu c’igipfungu ku gitangaro, ivyo bikagereranya ukuhaba kwa Yehova afise ubuninahazwa. (2 Ngoma 5:13, 14) Salomo amaze gutura isengesho ryo kwegurira Imana urusengero, “umuriro utibuka uvuye mw ijuru, utōngōra ibimazi vy’ukwoswa n’ibindi bimazi.” Babonye ivyo bintu, “Abisirayeli bose . . . bunamika amaso, barūnama bashika hasi ku mabuye ahashashe, barasenga, bakengurukira Uhoraho, bat’Uhoraho ni mwiza, kukw [ubuntu-mvarukundo bw]iwe [bw]amah’ibihe bidashira.” (2 Ngoma 7:1-3) Inyuma y’iyo sabukuru yamaze imisi 14, Abisirayeli basubiye mu ngo zabo “banezerewe, bahimbawe mu mitima yabo kubg’ivyiza Uhoraho yagiriye Dawidi na Salomo n’abantu biwe b’Abisirayeli.”​—2 Ngoma 7:10.

8, 9. (a) Naho Abisirayeli bashemeje Yehova kubera ameze neza, mu nyuma bahavuye bakurikirana iyihe ngendo? (b) Ni ibiki vyari vyarabuwe ku vyerekeye Yeruzalemu biciye kuri Yeremiya, kandi ubwo buhanuzi bwarangutse gute?

⁸ Ikibabaje ni uko Abisirayeli batabandanije kubaho mu buryo buhuje n’indirimbo zo gushemeza baririmbiye Imana. Mu nyuma, abantu b’i Buyuda ‘bubahisha Yehova iminwa yabo gusa.’ (Yesaya 29:13) Aho guhuza n’ukuntu Imana ibona ukumera neza ukwo ari kwo, batanguye kumogorera ibibi. None ivyo bibi bakora vyari ibihe? Emwe, barisutse mu vy’ugusenga ibigirwamana, ubushegabo, uguhahaza abakene n’ibindi vyaha bikomakomeye! Ingaruka yabaye iy’uko Yeruzalemu hasanganguwe maze ababa i Buyuda batwarwa mu bunyagano i Babiloni mu 607 B.G.C.

⁹ Gutyo Imana iba ihanye igisata cayo. Ariko rero, ibicishije ku mumenyeshakazoza wayo Yeremiya, yarabuye yuko i Yeruzalemu hosubiye kwumvikanayo ijwi ry’abavuga bati: “Ni mushime Uhoraho Nyen’ingabo, kuk’ Uhoraho ari mwiza, kukw [ubuntu-mvarukundo bw]iwe [bw]amah’ibihe bidashira!” (Yeremiya 33:10, 11) Kandi ivyo ni ko vyabaye. Haciye imyaka 70 ico gihugu ari umusaka, mu 537 B.G.C., amasigarira y’Abayuda yaragarutse i Yeruzalemu. (Yeremiya 25:11; Daniyeli 9:1, 2) Barasubiye kwubaka igicaniro ahahoze hubatswe urusengero ku Musozi Moriya, maze batangura kuhatangira ibimazi. Umushinge w’urwo rusengero washinzwe mu mwaka ugira kabiri kuva bagarutse. Ese ukuntu cari igihe c’akanyamuneza! Ezira yavuze ati: “Abubatsi bamaze kwubaka itanguriro ry’urusengero rw’Uhoraho, bashirah’abaherezi, bambaye impuzu z’ubuherezi nyene, bafise inzumbete, n’Abalewi bo mu ba Asafu, bafise ivyo kuvuza vyitwa matowazi, ngo bahimbaze Uhoraho nk’uko vyagezwe na Dawidi umwami w’Abisirayeli. Bakaririmba bahāniranwa, bahimbaza Uhoraho bamushima, bat’Erega [ameze ne]za, kukw [ubuntu-mvarukundo bw]iwe [bw]amah’ibihe bidashira.”​—Ezira 3:1-11.

10. Zaburi y’⁠118 itangurwa ikongera igasozerwa n’amajambo ayahe ahambaye?

¹⁰ Amajambo yo gushemeza nk’ayo nyene yerekeye ukumera neza kwa Yehova araseruka mu mazaburi atari make. Imwe muri ayo ni Zaburi y’⁠118, iyaririmbwe n’imiryango y’Abisirayeli igihe barangiza guhimbaza Pasika. Iyo Zaburi itangurwa ikongera igasozerwa n’aya majambo agira ati: “Ni mushime Uhoraho yukw ari mwiza: kukw [ubuntu-mvarukundo bw]iwe [bw]amah’ibihe bidashira.” (Zaburi 118:1, 29) Ayo ashobora kuba ari yo majambo ya nyuma yo gushemeza Yezu Kirisitu yaririmvye ari kumwe n’intumwa ziwe b’intahemuka mw’ijoro rya buca apfa mu 33 G.C.​—Matayo 26:30.

“Ndakwinginze, Nyereka Ubgiza Bgawe”

11, 12. Igihe Musa yarabukwa ubwiza bw’Imana, ni amajambo ayahe yumvise?

¹¹ Isano riri hagati y’ukumera neza kwa Yehova be n’ubuntu-mvarukundo bwiwe ryagaragajwe ari bwo bwa mbere ibinjana n’ibindi imbere y’igihe ca Ezira. Haciye igihe gito Abisirayeli bamaze gusenga ya masa y’inzahabu mu bugaragwa n’abakoze ico kibi bamaze kwicwa, Musa yaratakambiye Yehova ati: “Ndakwinginze, nyereka ubgiza bgawe.” Kubera Yehova yari azi yuko Musa atoshoboye kubona mu nyonga hiwe ngo abeho, yavuze ati: “Uku[me]ra neza kwanje kwose nzogucisha imbere yawe.”​—Kuvayo 33:13-20.

¹² Ukumera neza kwa Yehova kwaciye imbere ya Musa ku musi ukurikira ku Musozi Sinayi. Ico gihe, Musa yarabutswe ubwiza bw’Imana yumva n’aya majambo agira ati: “[“Yehova, Yehova, Imana y’ikigongwe n’ubugwaneza, iteba gushavura kandi igwije ubuntu-mvarukundo n’ukuri, izigama ubuntu-mvarukundo ku bw’abantu ibihumbi, ikarekurira ikosa n’icaha n’igicumuro, mugabo ntaho izokura ku muntu igihano,” NW]; mpōra abana ibigabitanyo vya ba se, nkageza ku buzukuru no ku runganwe rwabo rugira gatatu no ku rugira kane.” (Kuvayo 34:6, 7) Ayo majambo yerekana yuko ukumera neza kwa Yehova gufitaniye isano n’ubuntu-mvarukundo bwiwe be n’iyindi mice ya kamere ziwe. Turimbuye ivyo bintu bizodufasha kugaragaza ko tumeze neza. Nimuze tubanze turimbure kamere yavuzwe incuro zibiri muri ayo majambo y’akaroruhore avuga ivy’ukumera neza kw’Imana.

“Imana . . . Igwije Ubuntu-mvarukundo”

13. Mu majambo yerekeye ukumera neza kw’Imana, ni kamere iyihe ivugwa incuro zibiri kandi ni kuki ivyo bibereye?

¹³ “Yehova [ni] Imana . . . igwije ubuntu-mvarukundo . . . , izigama ubuntu-mvarukundo ku bw’abantu ibihumbi.” Ijambo ry’Igiheburayo ryahinduwe ngo “ubuntu-mvarukundo” risobanura kandi “urukundo rudahemuka.” Ni yo kamere yonyene igaruka incuro zibiri mu majambo Imana yabwiye Musa. Ese ukuntu bibereye, kubera na kare kamere nyamukuru ya Yehova ari urukundo! (1 Yohana 4:8) Ya majambo azwi cane yo gushemeza Yehova avuga ngo ‘kuko ameze neza, kuko ubuntu-mvarukundo bwiwe bwamaho ibihe bidashira,’ arashimika kuri iyo kamere.

14. Ni bande canecane bungukira ku kumera neza kw’Imana no ku buntu-mvarukundo bwayo?

¹⁴ Kimwe mu bigaragaza ko Yehova ameze neza ni uko “agwije ubuntu-mvarukundo.” Ivyo biribonekeza canecane mu kuntu yitwararikana ikibabarwe abantu b’abizerwa bamukorera kandi bamwiyeguriye. (1 Petero 5:6, 7) Nk’uko Ivyabona vya Yehova bashobora kubishingira intahe, ‘azigama ubuntu-mvarukundo’ afitiye abantu bamukunda bakongera bakamukorera. (Kuvayo 20:6) Ihanga rya Isirayeli yo ku mubiri Yehova yararetse kurigaragariza ubuntu-mvarukundo, ari rwo rukundo rudahemuka, kubera ryateye akagere Umwana wiwe. Mugabo, Imana izokwama ibihe vyose igaragariza Abakirisu b’intahemuka bo mu mahanga yose ko imeze neza n’uko ibafitiye urukundo rudahemuka.​—Yohana 3:36.

Yehova Ni Umunyakigongwe Akaba n’Umugwaneza

15. (a) Amajambo Musa yumvise ku Musozi Sinayi yatangujwe n’ayahe majambo? (b) Ukugira ikigongwe harimwo n’iki?

¹⁵ Amajambo Musa yumvise ku Musozi Sinayi yatangujwe n’aya majambo agira ati: “Yehova, Yehova, Imana y’ikigongwe n’ubugwaneza.” Ijambo ry’Igiheburayo ryahinduwe ngo “ikigongwe” rishobora kwerekeza ku “mara” kandi rirafitaniye isano cane n’ijambo “igitereko.” Ikigongwe rero kirimwo inyiyumvo z’imbabazi zirangwa n’ikibabarwe zigera ibwina mu muntu. Mugabo ikigongwe ntikirimwo gusa ukugira impuhwe zivuye ku mutima. Gikwiye kutuvyurira umutima wo gukora ikintu cotezurira abandi umubabaro. Nk’akarorero, abakurambere banyarukundo b’Abakirisu barabona ko bikenewe yuko bagaragariza ikigongwe abo basangiye ukwizera, ‘bakakigaragaza banezerewe’ igihe bibereye.​—Abaroma 12:8; Yakobo 2:13; Yuda 22, 23.

16. Ni kuki dushobora kuvuga ko Yehova ari umugwaneza?

¹⁶ Ukumera neza kw’Imana kuragaragarira no mu bugwaneza bwayo. Umuntu w’umugwaneza “arangwa n’uko yubahiriza inyiyumvo z’abandi” kandi akagaragaza ‘umutima mwiza w’igikundiro, na canecane awugaragariza abantu aruta.’ Yehova ni we karorero ruheta k’ubugwaneza mu vyo agirana n’abasavyi biwe b’abizerwa. Nk’akarorero, biciye ku bamarayika, ibigiranye ubugwaneza, Imana yarakomeje umumenyeshakazoza Daniyeli yari ageze mu zabukuru yongera imenyesha ya nkumi y’isugi Mariya ivyerekeye agateka yari agiye guterwa ko kuvyara Yezu. (Daniyeli 10:19; Luka 1:26-38) Twebwe abasavyi ba Yehova, nta nkeka turakenguruka ukuntu adukwegera mu buryo buranga ubugwaneza biciye kuri Bibiliya. Turamushemeza kubera agaragaza ko ameze neza kandi tukarondera kuba abagwaneza mu vyo dukorana n’abandi. Igihe abakwije ibisabwa mu vy’impwemu babogora uwo basangiye ukwizera n’“umutima w’[ukugenza buhoro],” baragerageza kwitonda, kuba abagwaneza.​—Ab’i Galatiya 6:1.

Imana Iteba Gushavura

17. Ni kuki dukura ubwatsi kuba Yehova “ateba gushavura”?

¹⁷ “Imana . . . iteba gushavura.” Ayo majambo arakwegera ubwenge bwacu ku bundi buryo Yehova agaragaza ko ameze neza. Yehova arihanganira utunenge twacu akongera akaduha umwanya wo gutsinda ubugoyagoye bukomeye maze tugatera imbere mu vy’impwemu. (Abaheburayo 5:12–6:3; Yakobo 5:14, 15) Ukwihangana kw’Imana ni ngirakamaro kandi ku bataracika abasavyi biwe. Baracafise umwanya wo kwakira ubutumwa bw’Ubwami no kwigaya. (Abaroma 2:4) Ariko rero, naho Yehova yihangana, ukumera neza kwiwe rimwe na rimwe kuramutera kugaragaza ishavu, nk’uko yabigize igihe Abisirayeli basenga imasa y’inzahabu ku Musozi Sinayi. Ishavu ry’Imana vuba rigiye kuzogaragazwa mbere ku rugero runini kuruta niyaherengeteza urunkwekwe rubi rwa Shetani.​—Ezekiyeli 38:19, 21-23.

18. Ku vyerekeye ukuri, ni ubudasa ubuhe buri hagati ya Yehova n’indongozi z’abantu?

¹⁸ “Yehova [ni] Imana . . . igwije . . . ukuri.” Ese ukuntu Yehova atandukanye n’indongozi z’abantu, bo basezerana ibintu vyinshi maze bakananirwa kubirangura! Abasavyi ba Yehova bo barashobora kwizigira akantu kose yavuze mw’Ijambo ryiwe yahumetse. Kubera Imana igwije ukuri, turashobora kwama nantaryo twizigira imihango yayo. Dawe wa twese wo mw’ijuru muri ukwo kumera neza kwiwe, nta kabuza ko yishura amasengesho dutura dusaba ukuri kwo mu vy’impwemu, mu kugutanga akatuvotorera.​—Zaburi 43:3; 65:2.

19. Mu buryo bwibonekeje, Yehova yagaragarije gute abanyavyaha bigaya ko ameze neza?

¹⁹ “Yehova [ni] Imana . . . [i]rekurira ikosa n’icaha n’igicumuro.” Mu kumera neza kwiwe, Yehova yama yiteguriye guharira abanyavyaha bigaya. Nta nkeka turakura ubwatsi kubona Data wa twese wo mw’ijuru munyarukundo yaratunganije ivyo kuduharira biciye ku nkuka ya Yezu. (1 Yohana 2:1, 2) Mu vy’ukuri turahimbawe kubona abagaragaza ukwizera bose muri iyo ncungu bashobora kugiranira ubucuti na Yehova akabatonesha, bafise icizigiro c’ubuzima budahera mw’isi nshasha yasezeranye. Ese ukuntu izo ari imvo zibonekeje zituma dushemeza Yehova kubera agaragariza abantu ko ameze neza!​—2 Petero 3:13.

20. Ni igiki kitwemeza y’uko Imana itarenza uruho rw’amazi ku bubi?

²⁰ “Ntaho [Yehova a]zokura ku muntu igihano.” Iyo mu vy’ukuri ni iyindi mvo ituma dushemeza Yehova ku bw’ukumera neza kwiwe. Kubera iki? Kubera ko uburyo buhambaye umuntu agaragaza ko ameze neza, ari uko atarenza uruho rw’amazi ku bubi mu buryo na bumwe. Ikigeretseko, “ah’Umwami Yesu azohishurirwa, ava mw ijuru, azananye n’abamarayika b’ubushobozi bgiwe,” azokwihora “abatāmenye Imana n’abatumvira ubutumwa bgiza. . . . Bazohanwa, ni kwo guhona kw’ibihe bidashira.” (2 Ab’i Tesalonike 1:6-9) Abambaza Yehova bazorokoka, ico gihe bazoshobora kwinovora ubuzima bimwe bishitse ata bantu batubaha Imana, ni ukuvuga “abadakunda ivyiza,” babavuruga.​—2 Timoteyo 3:1-3.

Niwigane Ukumera Neza kwa Yehova

21. Ni kuki dukwiye kugaragaza ko tumeze neza?

²¹ Nta nkeka turafise imvo nyinshi zotuma dushemeza tukongera tugakengurukira Yehova ku bw’ukumera neza kwiwe. Twebwe abasavyi biwe, ntidukwiye none gukora uko dushoboye kwose kugira ngo tugaragaze iyo kamere? Turakwiye kubigira, kuko na kare intumwa Paulo yahimirije Abakirisu bagenziwe ati: “Mwīgāne Imana, nk’abana ikunda.” (Abanyefeso 5:1) Data wa twese wo mw’ijuru yama nantaryo agaragaza ko ameze neza, natwe ni ko dukwiye kubigira.

22. Ni ibiki tuja kurimbura mu kiganiro gikurikira?

²² Nimba twariyeguriye Yehova n’umutima wacu wose, nta nkeka turipfuza cane kwigana ukumera neza kwiwe. Kubera dukomoka kuri Adamu wa mucumuzi, biratugora gukora ivyiza. Ariko rero, mu kiganiro gikurikira turabona igituma bishoboka ko tugaragaza ukumera neza. Turaja kurimbura kandi uburyo butandukanye dushobora ndetse dukwiye kwiganamwo Yehova, we karorero ntangere mu vy’ukumera neza.

Wokwishura Gute?

• Ukumera neza ni iki?

• Ni amajambo ayahe yo mu Vyanditswe ashimika ku kumera neza kw’Imana?

• Ni mu buryo bumwebumwe ubuhe Yehova agaragaza ko ameze neza?

• Ni kuki dukwiye kwigana akarorero ka Yehova mu vyo kumera neza?

[Ifoto ku rup. 10]

Yehova yarahanye igisata ciwe ca kera kubera kitabayeho cisunga amajambo yo kumushemeza caseruye

[Ifoto ku rup. 10]

Amasigarira y’abizerwa yarasubiye i Yeruzalemu

[Ifoto ku rup. 11]

Musa yarumvise amajambo y’akaroruhore yerekeye ukumera neza kw’Imana

[Ifoto ku rup. 13]

Ukumera neza kwa Yehova kubonekera mu buryo adukwegera biciye kuri Bibiliya