Uguhumurizwa Turonkera ku Bumenyi Ntagakosa Bwerekeye Imana

KU BANTU bamwebamwe, ivyo Bibiliya ivuga ku vyerekeye urukundo rw’Imana be n’ikigongwe cayo biravyura ibibazo bivuruga ubwenge. Babaza bati: Nimba Imana ishaka gukuraho ikibi, ikaba izi ukuntu yobigira, kandi ikaba ifise ububasha bwo kubigira, ni kubera iki ikibi kibandanya kwimonogoza? Kuri bo ingorane ni uguhuza ibi vyiyumviro bitatu: (1) Imana ni mushoboravyose; (2) Imana ni munyarukundo kandi imeze neza; kandi (3) ivyago birabandanya gushika. Biyumvira yuko, kubera ko ico ciyumviro kigira gatatu ata woharira ko ari ic’ukuri, n’imiburiburi kimwe muri ivyo bibiri rero bisigaye gishobora kuba atari ic’ukuri. Kuri bo, Imana ntishobora guhagarika ikibi, canke na ho nta vyo ibabaye.

Haheze imisi nk’ingahe za nyubakwa z’Icicaro Gikuru c’Ubucuruzi (World Trade Center) i New York zasanganguwe, hari indongozi ikomeye y’idini muri Leta Zunze Ubumwe za Amerika yavuze iti: “Baramaze kumbaza . . . incuro amajana n’amajana mu buzima bwanje, igituma Imana ireka hakaba ivyago n’ugucumukura. Ndiyemerera yuko mu vy’ukuri ata nyishu itomoye mfise, eka mbere na jewe ubwanje nibajije ico kibazo sindakironkera inyishu.”

Umwigisha umwe mu vya tewolojiya, yumvise iyo nyishu yaciye yandika yuko yakozwe ku mutima n’iyo “tewolojiya yumvikana” iyo ndongozi y’idini yigishije. Yarashimye kandi iciyumviro c’incabwenge imwe yanditse iti: “Umuntu adatahura igituma ducumukura hari ukuntu aba adatahura Imana.” Mugabo vyoba vy’ukuri bidashoboka ko dutahura igituma Imana ireka ikibi?

Iyo Ikibi Cazananye

Mu buryo buhushanye n’ivyo indongozi z’idini zishobora kuvuga, Bibiliya ntivuga ko ata woshobora gutahura igituma Imana ireka ikibi kikabaho. Iciyumviro nyamukuru gifasha gutahura ikibazo cerekeye ikibi, ni ukwemera icese yuko Yehova ataremye isi yuzuye ububisha. Yaremye umugabo n’umugore ba mbere batagira agasembwa, ata caha bafise. Yehova yarihweje ibikorwa vyiwe vy’irema abona ko ari “vyiza cane.” (Itanguriro 1:26, 31) Umugambi wiwe wari uw’uko Adamu na Eva bagura Iparadizo ya Edeni igakwira kw’isi yose, kandi bakayuzuza abantu bahimbawe bakingiwe na segaba wabo arangwa n’urukundo.​—Yesaya 45:18.

Ikibi catanguranye n’ikiremwa c’impwemu, icahavuye gitsimbataza icipfuzo co gusengwa, naho mu ntango cari intahemuka ku Mana. (Yakobo 1:14, 15) Ubugarariji bwaco bwiserukije kw’isi igihe cosha umugabo n’umugore ba mbere kwifatanya na co mu kurwanya Imana. Aho kugamburuka itegeko ritomoye ry’Imana ryo kutarya no kudakora ku camwa co ku giti kimenyekanisha iciza n’ikibi, Adamu na Eva baracamuyeko bararya. (Itanguriro 3:1-6) Mu kubigenza gutyo, ntibagambarariye Imana gusa, mugabo kandi barerekanye yuko bipfuza kwigenga ntibisunge Imana.

Haravyutse Ikibazo Kijanye n’Inyifato

Ubwo bugarariji bwo muri Edeni bwaravyuye ikibazo kijanye n’inyifato, kikaba gihigisha ukuntu ubusegaba buhambaye. Abo bantu b’abagarariji baravyuye amakenga ku vy’uko Yehova yoba yategeka ibiremwa vyiwe mu buryo bubereye. Mbega Umuremyi yoba yari afise uburenganzira bwo gusaba ko umuryango w’abantu umugamburukira bimwe bishitse? Abantu boba borushirije kumererwa neza mu gihe bogira ubwigenge mu vyo bakora vyose?

Yehova yatoreye umuti iryo higishwa ry’ubutware bwiwe, abigira mu buryo bugaragaza uburimbane butagira agahaze hagati y’urukundo, ubutungane, ubukerebutsi n’ububasha. Yari gushobora gukoresha ububasha bwiwe kugira ngo ahashe ubwo bugarariji ico gihe nyene. Ivyo vyari gushobora gusa n’uko Imana ikurikije ubutungane, kubera yuko yari ifise uburenganzira bwo kubigira. Mugabo, kubigenza gutyo ntivyobaye vyishuye ibibazo bijanye n’inyifato vyari vyavyuwe. Ku rundi ruhande, Imana yari gushobora gusa kwirengagiza ico caha. Kuri bamwebamwe muri iki gihe, guhitamwo ingendo nk’iyo vyoshoboye kuba bisa n’ibiranga urukundo. Yamara rero, ivyo na vyo nyene ntivyotoreye umuti ivyo Shetani yavuze vy’uko ngo abantu borushirije kumererwa neza bitegetse bonyene. Ikigeretseko, ingendo nk’iyo none ntiyoremesheje n’abandi guta inzira ya Yehova? Ingaruka vyovuyemwo, kwobaye ugucumukura kudahera.

Mu bukerebutsi bwiwe, Yehova yararetse ngo abantu bamare igihe kinaka bigenga. Naho nyene ivyo vyasobanuye kureka ikibi kikagumaho mu gihe gitoyi, muri ubwo buryo abantu bararonse akaryo ko kwerekana nimba bashobora kwitegeka bakererwa batisunze Imana, bakabaho bisunga ingingo mfatirwako bishiriyeho mu vyerekeye iciza n’ikibi. None vyavuyemwo iki? Kahise k’abantu kamye nantaryo karangwa n’intambara, akarenganyo, agahahazo n’ugucumukura. Ukuba amaherezo abagararije Yehova baterewe, kuzotorera inyishu rimwe rizima ibibazo vyavyuwe muri Edeni.

Mu kurindira, Imana yaragaragaje urukundo rwayo mu gutanga Umwana wayo, Yezu Kirisitu, uwatanze ubuzima bwiwe bw’umuntu buba inkuka y’incungu. Ivyo vyatumye abantu bagamburuka bashobora gukurwako akaga kabashikako k’ugukora icaha n’ugupfa kavuye ku kugambarara kwa Adamu. Iyo ncungu yarugururiye inzira yo kuronka ubuzima budahera abantu bose bagaragaza ko bizera Yezu.​—Yohana 3:16.

Yehova araduhumuriza mu kudukura amazinda yuko ugucumukura abantu barimwo ari ukw’igihe gito. Umwanditsi wa Zaburi yanditse ati: “Hasigaye igihe gito, umunyakibi ntabeho; mbere, uzokwitegereza ahiwe, umubure. Arikw abagwaneza bazoragwa igihugu, bazonezererwa amahoro y’umusēsekara.”​—Zaburi 37:10, 11.

Kazoza k’Umutekano n’Ubuhirwe

Iranguka ry’ubuhanuzi bwa Bibiliya rirerekana yuko igihe c’uko Imana ikuraho indwara, intuntu n’urupfu kiri hafi. Raba ibintu vyiza igitangaza bigiye kuza intumwa Yohani yabonye bitaraba mw’iyerekwa. Yanditse ati: “Mbona ijuru risha n’isi nsha: kukw ijuru rya mbere n’isi ya mbere vyari vyagiye, n’ikiyaga nticari kikiriho. . . . Kand’Imana ubgayo izobana n’[umuryango w’abantu], izoba Imana yabo. Izohanagura amasozi yose ku maso yabo, kand’urupfu ntiruzoba rukiriho, kand’amaborogo no gutaka n’uburibge ntibizoba bikiriho: kukw ivya mbere bishize.” Yohani yarabwiwe amajambo ashimika ku vy’uko iyo mihango ari iyo kwizigirwa, ari yo y’aya: “Andika, kukw ayo majambo ar’ayo kwizerwa n’ay’ukuri.”​—Ivyahishuriwe 21:1-5.

Tuvuge iki ku bantu amamiliyaridi bapfuye batazi ico bazira kuva ubwo bugarariji bwadutse muri Edeni? Yehova yasezeranye yuko azosubiza ubuzima abantu ubu basinziriye mw’itiro ry’urupfu. Intumwa Paulo yavuze ati: “Mfise ivyizigiro ku Mana . . . yuko hazoba ukuzuka kw’abagororotsi n’abagabitanya.” (Ivyakozwe 24:15) Abo bantu bazogira ivyizigiro vyo kubaho mw’isi “ukugororoka kuzobamwo.”​—2 Petero 3:13.

Nka kurya sebibondo munyarukundo areka umwana wiwe akabagwa mu buryo bubabaza, kubera azi yuko bizomuzanira ivyiza biramba, ni ko na Yehova yaretse abantu bagashikirwa n’ikibi kw’isi mu gihe gitoyi. Yamara rero, imihezagiro yamaho irarindiriye abantu bose barondera gukora ivyo Imana igomba. Paulo yasiguye ati: “Ivyaremwe vyagezwe kuganzwa n’ibitagira ikimazi, kandi si vyo vyavyigombeye, ariko vyagizwe n’Iyageze ko biganzwa birtyo, kugira ngo vyizigire yuko na vyo bizocungurwa ngo ntibibe ibija vyo kubora, bizohabga ukwidegemvya, gufatana n’ubgiza bg’abana b’Imana.”​—Abaroma 8:20, 21.

Mu vy’ukuri, iyo ni inkuru itameze nka ya makuru tubona kuri televiziyo canke dusoma mu binyamakuru, ariko ni inkuru nziza. Ni inkuru nziza kuruta izindi zose, ikaba iva ku “[M]ana yirura imibabaro yose,” itubabaye vy’ukuri.​—2 Ab’i Korinto 1:3.

[Amafoto ku rup. 6]

Igihe kihaciye carerekanye yuko abantu badashobora kwitegeka ngo bererwe batisunze Imana

[Abo dukesha amafoto]

Umuryango wo muri Somaliya: UN PHOTO 159849/M. GRANT; ibombe ruhonyaganda: USAF photo; ikambi y’itunatuniro: U.S. National Archives photo