Inkuru y’ubuzima

Gukorera abandi biragabanya imibabaro

NK’UKO VYAVUZWE NA JULIÁN ARIAS

Mu 1988, igihe nari mfise imyaka 40 y’amavuka, nasa n’uwutekaniwe mu bijanye n’akazi. Nari umuyobozi aserukira ikompanyi mpuzamakungu imwe mu rwego rw’intara. Biciye kuri ako kazi nararonse umuduga uzimvye, umushahara mwiza be n’ibiro bimeze neza vyari hagati mu gisagara ca Madrid muri Esupanye. Mbere muri iyo kompanyi, vyaravugwa yuko nogenywe nkaba umuyobozi ayiserukira mu rwego rw’igihugu. Sinari nzi na gato yuko ubuzima bwanje bwari bugiye guhinduka bimwe bikomeye.

UMUSI uri izina muri uwo mwaka nyene, umuganga wanje yambwiye yuko ndwaye indwara yo mu bwonko (Sclérose en plaques) idakira. Naravunitse umutima. Mu nyuma, igihe nasoma ico iyo ndwara ishobora kugira ku muntu, naratekewe n’ubwoba.a Vyasa n’uko nategerezwa kwama niteze gushikirwa n’icago mu misi yose nari nsigaje kubaho. None nari gushobora gute kubungabunga umukenyezi wanje Milagros be n’agahungu kanje k’imyaka itatu Ismael? Twari kuvyifatamwo gute? Nkiriko ndateka umutwe ndondera inyishu z’ivyo bibazo, naciye nshikirwa n’ikindi kintu c’agacavutu.

Haciye nk’ukwezi umuganga wanje ambwiye ivyerekeye iyo ndwara ndwaye, umuhagarikizi wanje w’akazi yarantumyeko mu biro vyiwe maze amenyesha yuko iyo kompanyi ikeneye abantu baboneka neza. Umuntu rero arwaye indwara idakira igenda irongerekana, naho nyene yari ikiri mu ntango, ntiyashobora kuba aboneka neza. Ubwo nyene, databuja yaciye anyirukana. Bukwi na bukwi, akazi kanje kari karangiye!

Imbere y’umuryango wanje, naragerageje kwiyumanganya, mugabo naripfuza cane kuba ukwa jenyene, kugira ngo nzirikane kuri ivyo bintu vyari vyanshikiye no kugira ngo nzirikane kuri kazoza kanje. Naragerageje kurwanya ukwihebura kwariko kurongerekana. Icambabaza cane kuruta ibindi, ni ukuntu mu kanya isase nari nacitse umuntu ata co amaze mu maso y’ikompanyi nakoramwo.

Ndonkera inkomezi mu ntege nke

Igishimishije, ni uko muri ico gihe c’umwiza, nashobora kwiheka ku masoko y’inkomezi nk’angahe. Mu myaka nka 20 imbere y’aho, nari naracitse Icabona ca Yehova. Narasenze Yehova ata buryarya ndamubwira ukuntu numva merewe be n’amakenga mfise kuri kazoza. Umukenyezi wanje dusangiye ukwizera, yarambereye isoko ridakama ry’inkomezi, kandi narashigikiwe n’abagenzi somambike bamwebamwe bangaragarije ubuntu n’ubugwaneza vyangiriye akamaro kanini.​—Imigani 17:17.

Kwumva ko hariho ibanga njejwe ku bandi na vyo nyene vyaramfashije. Nipfuza kurera neza agahungu kanje, nkakigisha, nkakina na ko kandi nkakamenyereza mu gikorwa co kwamamaza. Ni co gituma rero ntashobora gutana n’akabando. Vyongeye, nari umukurambere muri rimwe mu mashengero y’Ivyabona vya Yehova, abavukanyi n’abavukanyikazi banje bakirisu bo muri iryo shengero bakaba bari bakeneye ko ndabashigikira. Iyo ndeka ingorane narimwo zigahungabanya ukwizera kwanje, nari gushobora gute kubera abandi akarorero?

Ata kabuza, ubuzima bwanje bwarahindutse ku mubiri no mu vy’ubutunzi: ku ruhande rumwe bwarushirije kuba bubi, mugabo ku rundi ruhande burushiriza kuba bwiza. Igihe kimwe narumvise umuganga avuga ati: “Indwara ntihonya umuntu; ahubwo, iramuhindura”. Naramenye yuko amahinduka yose atama ari mabi.

Ubwa mbere, ‘ihwa ryo mu mubiri’ nari mfise ryaramfashije gutahura neza ingorane z’ivy’amagara abandi bafise be no kwishira mu kibanza cabo (2 Ab’i Korinto 12:7). Naratahuye kurusha uko nahora amajambo yo mu Migani 3:5 agira ati: “Wizigize Uhoraho umutima wawe wose, kandi ntiwishimikize ubgenge bg’iwawe”. Ikiruta vyose, uko ivyanje vyari vyifashe kwaranyigishije vy’ukuri ikintu gihambaye mu buzima ico ari co be n’icotuma umuntu ashira akanyota koko kandi akiyumva ko afise agaciro. Hari hakiriho vyinshi nashobora gukora mw’ishirahamwe rya Yehova. Naratahuye insobanuro nyakuri y’amajambo Yezu yavuze agira ati: “Gutanga kuzana [agahimbare], kuruta guhabga”.​—Ivyakozwe 20:35.

Ubuzima bushasha

Inyuma gatoyi y’aho batoreye indwara yanje, naratumiwe mu nama nkarishabwenge yabereye i Madrid, aho abakirisu b’abishakire bigishijwe ivyo gutuma hagati y’abaganga n’abarwayi b’Ivyabona babivuzako hatsimbatara ugukorana neza. Mu nyuma, abo bishakire barashizwe mu Makomite ajejwe kuja inama n’ibitaro yatunganijwe. Kuri jewe, iyo nama nkarishabwenge yaje neza na neza hageze. Narubuye umwuga urushirije kuba mwiza, uworushirije gutuma mpera akanyota kuruta akazi ako ari kose ko mu vy’ubucuruzi.

Muri iyo nama nkarishabwenge, twaramenye ko ayo makomite yari aherutse gushingwa yategerezwa kuza aragendera ibitaro, kugiranira ibiganiro n’abaganga no kuja kwimenyekanisha ku bakora mu vy’amagara y’abantu, ivyo vyose bikaba vyari gukorwa mu ntumbero yo gutsimbataza ugukorana neza no gukinga ukutumvikana kwokwaduka. Ayo makomite arafasha Ivyabona bagenzi bacu kuronka abaganga bafise umutima ukunze wo gukoresha uburyo bwo kuvura hadakoreshejwe amaraso. Ariko ntiwumve, kubera ko ntari narigiye ivy’ubuvuzi, nari mfise vyinshi vyo kwiga mu bijanye n’amajambo akoreshwa mu vy’ubuvuzi, amategeko y’ivy’ubuvuzi be n’ukuntu ibitaro bitunganywa. Naho ari ukwo, iyo nama nkarishabwenge iheze, nasubiye i muhira nabaye mushasha, mfise ibikwiye vyose kugira ngo ndangure igikorwa gishasha kitoroshe canezera cane.

Ukugendera ibitaro kwarambereye isoko ry’umunezero

Naho indwara yanje yariko irankegeta buhorobuhoro kandi idahengeshanya, amabanga nari njejwe ndi umwe mu bagize Komite ijejwe kuja inama n’ibitaro yarongerekanye. Kubera ko nari naremerewe kuzoza ndaronka amafaranga baha umuntu atagishoboye gukora kubera ubumuga, nararonka umwanya wo kuza ndagendera ibitaro. Naho vyashika ntibigende neza, izo ngendo nagira zararushirije kunyorohera no kumara akanyota kuruta uko nari ndavyiteze. Naho ubu ngendera kw’ikinga ry’ibimuga, ivyo ntivyambereye intambamyi ihambaye. Mugenzanje umwe wo mu bagize iyo komite yama nantaryo amperekeza. Ikindi kandi, abaganga baramenyereye kuganiriza abantu bagendera ku makinga y’ibimuga, kandi rimwe na rimwe basa n’abumviriza n’icubahiro cinshi igihe babona akigoro ngira mu kubagendera.

Muri iyi myaka cumi iheze, naragendeye abaganga amajana. Bamwebamwe baragize umutima ukunze wo kudufasha tukibonana na bo. Umuganga yitwa Juan Duarte, yabaga abantu barwaye umutima i Madrid akaba yitwararika cane ivyo kwubahiriza ijwi ryo mu mutima ry’umurwayi, yaciye buno nyene yemera gufasha. Kuva ico gihe, aramaze kubaga adakoresheje amaraso abarwayi b’Ivyabona barenga 200 bava mu mihingo myinshi ya Esupanye. Uko imyaka yagiye irarengana, abaganga barushiriza kwongerekana baramaze gutangura kubaga badakoresheje amaraso. Ingendo twagiye turagira zaragize ico zifashije muri ivyo, ariko kandi iryo terambere ryavuye ku materambere yagizwe mu buvuzi be n’ivyiza vyashitsweko mu bijanye no kubaga hadakoreshejwe amaraso. Turemera tudakeka yuko Yehova yahezagiye utwigoro twagize.

Nararemeshejwe canecane n’ukuntu abaganga bamwebamwe babaga abantu barwaye umutima banonosoye ivyo kubaga abana bavyakiriye. Mu kiringo c’imyaka ibiri twaragendeye umugwi umwe ugizwe n’abaganga babiri mu vy’ukubaga hamwe n’abo bakorana banonosoye ivyo gutera imiti itimbisha umubiri. Twarabahaye ibisohokayandikiro bivuga ivy’ubuvuzi vyasigura ico abandi baganga bariko barakora muri ivyo. Utwigoro twagize twaravuyemwo ivyiza mu 1999, igihe hagirwa Inama y’ivy’ubuvuzi ijanye no kubaga abana umutima. Abo baganga babiri mu vy’ukubaga, barongowe mu buryo burimwo ubuhanga n’umuganga mu vy’ukubaga ava mu Bwongereza afise umutima ukunze wo gukorana natwe, bararanguye igikorwa kigoye bimwe bidasanzwe c’ukubaga umwana w’Icabona umutsi wiwe w’umutima utwara amaraso mu mubiri vyasaba ko ugira ico uhinduweko.b Naranezeranwe n’abavyeyi ba nya mwana igihe umwe muri abo baganga yasohoka avuye mu cumba c’ibagiro akatumenyesha yuko ibagwa ryagenze neza, ijwi ryo mu mutima ry’uwo muryango rikaba ryari ryubahirijwe. Ubu abo baganga babiri bama bemera kuvura abarwayi b’Ivyabona bava hirya no hino muri Esupanye.

Ikintu vy’ukuri mbona ceza umutima muri mwene ivyo bihe, ni ukubona ko nshobora gufasha abavukanyi banje bakirisu. Mu bisanzwe, igihe bituye Komite ijejwe kuja inama n’ibitaro, kiba ari igihe kigoye kuruta ibindi mu buzima bwabo. Baba bategerezwa kubagwa, abaganga na bo bo mu bitaro vy’aho iwabo ugasanga ntibashaka canke ntibashoboye kubabaga hadakoreshejwe amaraso. Ariko rero, igihe abo bavukanyi bamenye yuko hariho abaganga mu vy’ukubaga bafise umutima ukunze wo gukorana natwe mu nzego zose zanonosoye ivy’ubuvuzi ngaha i Madrid, barumva baruhuriwe cane. Nariboneye ukuntu mu maso h’umuvukanyi umwe yari yahagaritse umutima hahindutse agatekanirwa, tukimushikako mu bitaro.

Igisata c’abacamanza be n’amategeko y’ivy’ubuvuzi

Mu myaka ya vuba, abagize Amakomite ajejwe kuja inama n’ibitaro yaragendeye kandi abacamanza. Muri izo ngendo, turabaha igisohokayandikiro citwa Soins familiaux et gestion des dossiers médicaux des Témoins de Jéhovah, icari ahanini categuriwe kumenyesha mwene abo bakuru impagararo yacu ku bijanye n’ikoreshwa ry’amaraso n’uko hariho iyindi miti itarimwo amaraso ishobora gukoreshwa. Izo ngendo zari zikenewe cane kubera ko imbere y’aho, vyari bimenyerewe muri Esupanye yuko abacamanza baha abaganga uruhusha rwo gutera amaraso abarwayi batipfuza kuyaterwa.

Aho abacamanza bakorera usanga ari ahantu hatangaje cane, ari co gituma ku rugendo rwa mbere nagize, numvise umengo ndi akantu ubusa igihe nariko ndarengana mu makoridoro ndi ku gakinga kanje k’ibimuga. Icagiye kuvyunyura, ni uko twagize agasanganya, maze ndakoroka mvuye ku ntebe nkubita amavi hasi. Abacamanza be n’abashingwamanza nka bangahe babonye ingorane nagize baraje kumfasha n’umutima mwiza, mugabo naramaramaye imbere yabo.

Naho nyene abacamanza batari bazi icatuma tubagendera, benshi muri bo baratwakira neza. Kubera yuko umucamanza wa mbere nagendeye yari amaze igihe azirikana ku mpagararo yacu, yaciye avuga ko yipfuza kuganira natwe mu buryo buhagije. Ku rugendo rwacu rwakurikiye, ubwiwe yaransunitse ndi ku gakinga kanje anyinjiza mu biro vyiwe maze antega yompi. Ivyiza vyavuye muri urwo rugendo rwa mbere vyaraturemesheje jewe na bagenzanje turarinduka, maze bidatevye turibonera ibindi vyiza.

Muri uwo mwaka nyene, twarasigiye ikopi ya ca gitabu Soins familiaux uwundi mucamanza yatwakiranye umutima mwiza maze adusezeranira kuzosoma ibirimwo. Naramuhaye inomero zanje za telefone kugira ngo ashobore kuduterefona mu gihe adukeneye mu buryo bwihutirwa. Haciye amayinga abiri, yaraterefonye avuga yuko umuganga umwe mu vy’ukubaga wo muri ako karere yamusavye uruhusha rwo gutera amaraso Icabona yari akeneye kubagwa. Uwo mucamanza yatubwiye yuko ashaka ko tumufasha gutora inyishu yokwubahiriza icipfuzo co kudaterwa amaraso c’ico Cabona. Ntivyatugoye cane kuronka ibindi bitaro, ahari abaganga mu vy’ukubaga bamubaze badakoresheje amaraso bikagenda neza. Uwo mucamanza yaranezerewe cane igihe yumva ingene vyagenze, aca atwemerera yuko azoja arabigenza ukwo nyene.

Mu gihe naba ndiko ndagendera ibitaro, akenshi haravyuka ikibazo kijanye n’amategeko y’ivy’ubuvuzi, kubera ko twashaka yuko abaganga batirengagiza uburenganzira bw’umurwayi be n’ijwi ryiwe ryo mu mutima. Ibitaro bimwe bifise umutima ukunze wo gukorana natwe vy’i Madrid vyarantumiye gukurikirana ivyigwa vyariko biratangwa ku vyerekeye amategeko y’ivy’ubuvuzi. Ivyo vyigwa vyarampaye akaryo ko gushikiriza ukubona ibintu kwacu gushingiye kuri Bibiliya abahinga benshi bo mu vy’ubuvuzi. Vyaramfashije kandi gutahura ingingo nyinshi zigoye abaganga bategerezwa gufata.

Umwe mu bigisha b’ivyo vyigwa, ari we Porofeseri Diego Gracia, yama ategura ivyigwa vy’abahinga banongoreye ibijanye n’amategeko y’ivy’ubuvuzi ku bw’abaganga bo muri Esupanye kandi yarabaye umuntu ashigikira ashikamye uburenganzira bwacu bwo kugira ico tuvuze mu bijanye n’ikibazo co guterwa amaraso.c Ukuganira na we tudahorereza kwatumye bamwebamwe mu baserukira ibiro vy’ishami ry’Ivyabona vya Yehova muri Esupanye badusaba kuja gusigurira impagararo yacu abigishijwe na Porofeseri Gracia, bamwe muri bo bakaba babonwa ko ari abaganga karuhariwe mu gihugu.

Kubona ibintu nk’uko biri

Ariko ntiwumve, ico gikorwa kimara akanyota nakora ku neza y’abo dusangiye ukwizera nticatoreye umuti ingorane zanje zose. Indwara yanje ntihengeshanya kwiyongera. Ariko rero, igishimishije ni uko ubwenge bwanje bugikora. Kubera ko umukenyezi wanje n’umuhungu wanje batigera bidoga, ndacashobora kurangura amabanga njejwe. Ivyo ntivyari gushoboka ntafashijwe ngo nongere nshigikirwe na bo. Sinshobora mbere no gupfunga ibipfungo vy’ipantalo yanje canke ngo niyambike ikoti y’imbeho. Ndakunda canecane kwamamaza imisi yose ku wa gatandatu ndi kumwe n’umuhungu wanje Ismael, akaba ansunika kw’ikinga ryanje ry’ibimuga kugira nshobore kuganiriza abanyamuhana batandukanye. Ndacarangura kandi amabanga njejwe ndi umukurambere mw’ishengero.

Narashikiwe n’ibihe bivuna umutima muri iyi myaka 12 iheze. Rimwe na rimwe, kubona ukuntu ubumuga bwanje bugira ico bukoze ku muryango wanje vyarambabaza kuruta uko indwara yanje isanzwe imbabaza. Ndazi yuko bacumukura naho nyene batabivuga. Ata n’igihe kirekire kihaciye, mu kiringo c’umwaka umwe, mabukwe na dawe barapfuye. Muri uwo mwaka nyene, sinari ngishobora kugenda ahantu na hamwe ntari kw’ikinga ry’ibimuga. Dawe, uwaba iwacu, yapfuye yishwe n’iyindi ndwara idakira igenda irongerekana. Milagros, uwamubungabunga, yumvise ari nk’aho yariko yibonera ibizonshikira mu misi iri mbere.

Ariko rero ikintu ciza novuga, ni uko umuryango wacu ufatana mu nda mu gihe duhangana n’ingorane zidushikira turi kumwe. Igiti co kuba umuyobozi nagikavye no kwicara kw’ikinga ry’ibimuga, mugabo mu bisanzwe ubuzima bwanje ubu ni bwiza kuruta kubera ko ndabukoresha bimwe bishitse mu gukorera abandi. Gutanga birashobora kugabanya imibabaro, kandi Yehova arashitsa umuhango wiwe wo kudukomeza mu gihe biba bikenewe. Nka kumwe kwa Paulo, ndashobora kuvuga vy’ukuri nti: “Nshobozwa vyose n’ūmpa inkomezi”.​—Ab’i Filipi 4:13.

[Utujambo tw’epfo]

[Uruzitiro ku rup. 24]

Ukuntu umukenyezi wanje abona ibintu

Ku mukenyezi, kubana n’umuntu arwaye indwara yo mu bwonko biragoye, haba mu bwenge, mu mutima no ku mubiri. Ntegerezwa kuba umuntu agira ibitegereka mu vyo ntegekanya gukora no kugira umutima ukunze wo kwirengagiza umwitwarariko udakenewe ku vyerekeye kazoza (Matayo 6:34). Naho ari ukwo, kubaho ucumukura birashobora guhishura kamere nziza ufise. Umubano wacu urakomeye kuruta uko wari umeze ubwa mbere, vyongeye ubucuti mfitaniye na Yehova burarushirije gukomera. Inkuru z’ubuzima z’abandi bari mu bihe bitesha umutwe nk’ibi na zo nyene zarankomeje cane. Ndafise umunezero nk’uwo Julián afise bivuye ku murimo w’agaciro arangura ku neza y’abavukanyi, kandi nariboneye yuko Yehova atigera aduheba, naho nyene bwoca bugacana ayandi.

[Uruzitiro ku rup. 24]

Ukuntu umuhungu wanje abona ibintu

Ukwihangana kwa dawe be n’agatima kiwe ko kubona neza ibintu, ndabibonamwo akarorero ntangere, kandi ndiyumvamwo yuko ndi n’ico maze igihe ndamusunika kw’ikinga ryiwe ry’ibimuga. Ndazi yuko ntashobora kwama nkora ivyo nipfuza gukora. Ubu ndi umuyabaga, mugabo ninakura, nipfuza kuzoba umwe mu bagize Komite ijejwe kuja inama n’ibitaro. Nisunze ivyo Bibiliya isezerana, ndazi yuko ugucumukura ari ukw’igihe gito kandi ko abavukanyi n’abavukanyikazi benshi bacumukura kuturusha.

[Ifoto ku rup. 22]

Umukenyezi wanje ni isoko ry’inkomezi kuri jewe

[Ifoto ku rup. 23]

Ndiko ndayaga na Muganga Juan Duarte abaga abarwaye umutima

[Ifoto ku rup. 25]

Jewe n’umuhungu wanje turakunda gukorana mu busuku