Woba uriko uronderana ubwira Yehova?

HARI umugabo w’umukirisu yari afise icipfuzo gikomeye co kubwira inkuru nziza yo muri Bibiliya abandi bantu baba bari mw’igariyamoshi (Mariko 13:10). Yamara, ubwoba bwatuma adakurako umunwa. Yoba yaciye atana n’akabando? Oya, yarabishize mw’isengesho yaturanye ubwira arongera ariga ukuntu yotanguza ikiganiro. Yehova Imana yarishuye ivyo nya mugabo yasavye maze aramuha inkomezi zituma ashinga intahe.

Ubwira nk’ubwo ni ntahara igihe turondera Yehova n’umuhezagiro wiwe. Intumwa Paulo yavuze ati: “Uwēgēra Imana akwiye kwizera yukw iriho, igaha impēra “abayirondera[na “ubwira”, NW]” (Abaheburayo 11:6). Kurondera Yehova gusa ntibihagije. Irivuga ry’ikigiriki ryahinduwe ngo “kuronderana ubwira” ni inyubako ishaka kwerekana inguvu nyinshi be n’akigoro katavanako. Ivyo bisaba ko umuntu abigirana umutima wiwe wose, umuzirikanyi wiwe wose, ubugingo bwiwe bwose be n’inguvu ziwe zose. Nimba turiko turonderana ubwira Yehova, ntitwigenza mu buryo buranga ukutanegwa ibintu, ukutibabaza canke buranga ubunebwe. Ahubwo riho, turagaragaza umwete nyakuri mu kumurondera.​—Ivyakozwe 15:17.

Abaronderanye ubwira Yehova

Ivyanditswe vyuzuyemwo uturorero tw’abantu bagize utwigoro tutavanako mu kurondera Yehova. Umwe muri abo bantu yari Yakobo, uwaniganye gushika mu mutwenzi n’umumarayika w’Imana yari yiyambitse umubiri w’abantu. Ivyo vyatumye Yakobo ahabwa izina Isirayeli (Uwunigana n’Imana) kubera yuko ‘yaniganye’, canke yanyinyanye, yarwanye, yahanganye n’Imana. Uwo mumarayika yaramuhezagiye kubera yihase abigiranye ubwira.​—Itanguriro 32:24-30.

Uwundi na we yari umukenyezi atavuzwe izina w’Umunyagalilayakazi yari amaze imyaka 12 arwaye ubutinyanka, bwatuma ‘ababara cane’. Muri ukwo kuntu yari amerewe, vyitegwa ko adakora ku bandi bantu. Yamara, yarariye umutima amenyo aragenda iyo Yezu ari. Yaguma yibwira ati: “N’iyo nokora ku mpuzu ziwe gusa, nokira”. Niwihe ishusho ariko arinyegeteza mw’‘ishengero ryariko rirakurikira [Yezu] rimubanda’. Amaze gukora ku mpuzu ya Yezu, yaciye yumva ‘isoko y’amaraso ikamye’, ni ukuvuga ko yaciye akira indwara yari amaranye igihe kirekire! Igihe Yezu yabaza ngo “ni nde akoze ku mpuzu zanje?”, nya mukenyezi yaciye ahinda agashitsi. Mugabo Yezu yamubwiranye ikibabarwe ati: “Mwana wanje, ukwizera kwawe kuragukijije, genda amahoro, ukire rwose icago cawe”. Yararonse impera ku bw’utwigoro twiwe.​—Mariko 5:24-34; Abalewi 15:25-27.

Ikindi gihe, umugore umwe w’Umunyafoyinikekazi yaringinganye ubwira Yezu ngo amukirize umukobwa wiwe. Yezu yishuye yuko atari vyiza guha utubwa indya z’abana. Yashaka kuvuga yuko atari gushobora kwitwararika abantu batari Abisirayeli mu gishingo c’Abayuda bari babikwiriye. Naho nya mugore yari yatahuye ico ikigereranirizo ca Yezu cashaka kuvuga, yamwinginze ati: “Nka ko, Mugenzi, kuk’utubga na two twīrīra utuvunguka dukorokera musi y’ameza ya ba nyene two”. Ukwizera kwiwe gukomeye be n’ukutagira uburyarya kwiwe vyatumye Yezu avuga ati: “Ukwizera kwawe ni kwinshi nyina wanje: bikubere nk’uk’ugomba”.​—Matayo 15:22-28.

Ni ibiki vyari gushikira abo bantu iyo batabandanya kugira utwigoro? Boba bari kuronka iyo mihezagiro iyo baca baheba igihe bari bahuye n’intambamyi ya mbere canke igihe babankira ubwa mbere? Oya! Utwo turorero turerekana neza iciyumviro Yezu yigishije, na co kikaba ari ic’uko ‘kwihambira kutarimwo kugira isoni’ bibereye, mbere yuko ari ntahara, mu kurondera Yehova.​—Luka 11:5-13.

Nk’uko igomba

None mu nkuru zamaze kuvugwa zerekeye abantu bakize ku gitangaro, ubwira bwoba ari co kintu conyene casabwa kugira ngo bakire? Oya, ivyo basaba vyategerezwa kuba bihuje n’ivyo Imana igomba. Yezu yarahawe ububasha bwo gukora ibitangaro kugira ngo atange ikimenyamenya kidasanzwe c’uko yari Umwana w’Imana, ari we Mesiya yasezeranywe (Yohana 6:14; 9:33; Ivyakozwe 2:22). Ikindi kandi, ibitangaro Yezu yakoze vyabaye imponjo y’imihezagiro y’akaroruhore izoba kw’isi, Yehova azohunda umuryango w’abantu mu gihe c’ubutware bwa Kirisitu buzomara imyaka igihumbi.​—Ivyahishuriwe 21:4; 22:2.

Imana ntikigomba yuko abari mw’idini y’ukuri bagira ububasha bwo gukora ibitangaro, nk’ubushobozi bwo gukiza n’ubwo kuvuga izindi ndimi (1 Ab’i Korinto 13:8, 13). Ivyo Imana igomba muri iki gihe cacu birimwo n’ukwamamaza inkuru nziza y’Ubwami kw’isi yose kugira ngo ‘abantu bose bashike ku kumenya ivy’ukuri’ (1 Timoteyo 2:4; Matayo 24:14; 28:19, 20). Abasavyi b’Imana barashobora kwitega koko yuko Yehova yumviriza kandi akemera amasengesho baturana ubwira, mu gihe bagize utwigoro tuvuye ku mutima mu buryo buhuye n’ukugomba kwiwe.

Hari abokwibaza bati: ‘Ni kubera iki twihata kandi umugambi w’Imana impera n’imperuka uzotegerezwa kuranguka?’. Naho ari ivy’ukuri yuko Yehova azoshitsa imigambi yiwe ataravye utwigoro abantu bagira, arahimbarwa n’uko abantu bagira uruhara mu gukora ivyo agomba. Yehova yoshobora kugereranywa n’umuntu yubaka inzu. Umwubatsi usanga afise umugero w’inzu, mugabo agahitamwo ibikoresho vyo kwubakisha mu biboneka aho hantu. Muri ubwo buryo, Yehova arafise umugambi ashaka kurangura muri iki gihe kandi arahimbarwa no gukoresha abasavyi biwe bitanga babikunze.​—Zaburi 110:3; 1 Ab’i Korinto 9:16, 17.

Rimbura ivyashikiye umusore yitwa Toshio. Amaze gushika mw’ishure ryisumbuye, yashaka gushinga intahe ku rugero runini rushoboka muri ico cibare ciwe kidasanzwe. Yama afise Bibiliya hafi kandi akama agira akigoro kavuye ku mutima ko kuba umukirisu w’intangakarorero. Ari hafi yo kurangiza umwaka wa mbere, yararonse akaryo ko gushikiriza insiguro mw’isomero. Toshio yarasenze Yehova amusaba imfashanyo maze arezwa umutima no kubona ukuntu isomero ryose ryateze ugutwi insiguro yiwe yari ifise umutwe uvuga ngo “Umugambi mfise wo kugira igikorwa c’ubutsimvyi umwuga”. Yarasiguye ko yashaka kuba umusuku w’igihe cose wo mu Vyabona vya Yehova. Umwe mu banyeshure yaremeye kwigana na we Bibiliya, aratera imbere gushika ku kubatizwa. Utwigoro Toshio yagiranye ubwira ahuza n’amasengesho yiwe twatumye aronka impera nini.

Uri umunyabwira ku rugero rungana iki?

Urashobora kwerekana mu buryo butandukanye yuko uriko uraronderana ubwira Yehova n’imihezagiro yiwe. Ubwa mbere, hariho ibintu vy’ishimikiro wokora, nk’akarorero kwitegurira neza amakoraniro ya gikirisu. Biciye ku nsasanuro zateguwe neza, insiguro zikora ku mutima be n’imyerekano iri n’ico yungura, urahishura ubwira uronderana Yehova. Urashobora kandi kugaragaza ubwira mu kuryohora ubusuku bwawe. Ni kubera iki utogerageza kurushiriza kwifata kigenzi mu kuntu uganira n’uwo usanze ku muhana kandi ugakoresha amajambo ntanguzakiyago ari n’ico avamwo ahuje n’icibare ukoreramwo (Ab’i Kolosayi 3:23)? Umugabo mukirisu yitanze n’umutima wiwe wose, yoshobora kwemera gushingwa amabanga mw’ishengero, nk’ayo kuba umukozi w’ishengero canke umukurambere (1 Timoteyo 3:1, 2, 12, 13). Wemeye kwitanga, urashobora kugira umunezero uva ku gutanga. Urashobora gusaba gukora mw’iyubakwa ry’ishami canke ku biro vy’ishami vy’Ivyabona vya Yehova. Nimba uri umuvukanyi w’umwirebange akwije ibisabwa, woshobora kwipfuza kwitaba rya Shure rimenyereza abasuku, irironsa ivyangombwa abagabo bakomeye mu vy’impwemu kugira ngo babe abungere beza. Nimba wubatse, umurimo w’ubumisiyonari woshobora kuba uburyo bwo kwerekana icipfuzo ufise kirangwa ubwira co kurushiriza gusukurira Yehova. Kumbure woshima kwimukira aho abamamaji b’Ubwami bakenewe kuruta ahandi.​—1 Ab’i Korinto 16:9.

Igihambaye vy’ukuri ni agatima urangurana igikorwa ushinzwe. Ibanga iryo ari ryo ryose wahawe, nurirangurane ubwira, wivuye inyuma kandi ufise ‘umutima utagira akarohe’ (Ivyakozwe 2:46; Abaroma 12:8). Ukwiye kubona igikorwa cose nk’akaryo ko kugaragaza umushasharo ufise wo gutuma Yehova ashemezwa. Nushishikare gusenga usaba ngo Yehova agufashe, kandi ukore uko ushoboye kwose. Aho ni ho uzoronka impera nyinshi.

Impera ziva ku twigoro umuntu agirana ubwira

Woba wibuka wa mugabo w’umukirisu yasenze kugira ngo atsinde ubwoba bwamubuza kubwira inkuru nziza abandi bantu baba bari mw’igariyamoshi? Yehova yarahezagiye icipfuzo yari afise kivuye ku mutima. Nya muvukanyi yarihatiye gukoresha amajambo ahimbaye, mu kurobanura ibiganiro yokoresha mu gutanguza ibiyago. Yarashoboye gukoresha Bibiliya mu buryo ngirakamaro mu kubwira inkuru nziza umugabo umwe yari arajwe ishinga n’ukuntu usanga imigenderanire iri hagati y’abantu itesha umutwe. Kubera baganiriye incuro n’izindi muri iyo gariyamoshi vyatumye hatanguzwa inyigisho ya Bibiliya yo ku muhana. Yehova yaramuhezagiye vy’ukuri ku bw’utwigoro yagiranye ubwira!

Na wewe nyene woshobora gushika ku bintu nk’ivyo uramutse ubandanije kuronderana ubwira Yehova. Niwakomera kw’ibanga wicishije bugufi ukongera ugashira umutima wawe wose ku gikorwa ca gitewokarasi ico ari co cose wahawe kurangura, Yehova azogukoresha mu buryo buhuje n’imigambi yiwe yongere aguhunde imihezagiro myinshi.

[Ifoto ku rup. 26]

Ni ibiki vyari gushikira uyu mugore iyo adakomera kw’ibanga?

[Ifoto ku rup. 27]

Woba ukomera kw’ibanga igihe winginga Yehova ngo aguhezagire?

[Amafoto ku rup. 28]

Wokwerekana gute ko uriko uronderana ubwira Yehova?