Abasohotse Ishure ry’i Gileyadi bararemeshejwe kuvuga “ibitangaza”

ISINZI ry’abantu bose hamwe 6.635 bava mu bihugu 52, ni bo bari bahari mu gihe ca porogarama y’ugutanga impapuro z’umutsindo ku mugwi ugira 115 w’abasohoka Ishure ry’ivya Bibiliya ry’i Gileyadi rya Watchtower ku wa 13 Nyakanga 2003.

Barumvise indemesho zishingiye kuri Bibiliya abanyeshure 48 b’uwo mugwi bahawe kugira ngo bashikirize “ibitangaza vy’Imana” abantu bo mu bihugu 17 (Ivyakozwe 2:11). Muri ivyo bihugu ni ho abo baronse impapuro z’umutsindo bari bagiye kurangurira igikorwa cabo c’ubumisiyonari.

Mu majambo yiwe yugurura, Stephen Lett wo mu bagize Inama Nyobozi y’Ivyabona vya Yehova akaba ari na we yari ahagarikiye ivy’uko gutanga impapuro z’umutsindo, yibukije abanyeshure ibi: “Igihe muzoba mugiye mu bikebere vyanyu, aho muzoja hose canke ibizobashikira vyose, ababashigikiye ni bo benshi kuruta ababarwanya”. Umuvukanyi Lett, akoresheje ikigabane ca 6 c’Abami ba Kabiri, yaribukije abo banyeshure yuko bashobora kwizigira ko bafashwe mu mugongo na Yehova Imana be n’abamarayika ibihumbi n’ibihumbi, uko bamenyekanisha “ibitangaza vy’Imana” (2 Abami 6:15, 16). Abakirisu bo mu kinjana ca mbere barahanganye n’ukurwanywa be n’ukutanegwa ibintu mu gikorwa cabo c’ukwamamaza n’ukwigisha, kandi n’abamisiyonari bakirisu muri iki gihe barahangana n’ibintu nk’ivyo. Ariko rero, barashobora kwiheka ku mfashanyo iva mw’ijuru no kw’ishirahamwe rya Yehova ryo kw’isi.​—Zaburi 34:7; Matayo 24:45.

Vuga “ibitangaza vy’Imana”

Umuhagarikizi amaze kuvuga amajambo y’ukwugurura, Harold Corkern wo muri Komite y’ishami yo muri Leta Zunze Ubumwe za Amerika yaraciye irya n’ino umutwe shimikiro uvuga ngo “Ukwitega ibintu bishoboka ni rwo rupfunguruzo rwo kurangura umurimo uteye umunezero kandi uroranirwa”. Umuvukanyi Corkern yarerekanye yuko ivyizigiwe ntibishike bishobora gutuma umuntu avunika umutima, nk’uko mu Migani 13:12 havyerekana. Ariko rero, ukuvunika umutima kenshi kuva ku kwitega ibintu bidashoboka. Abo baronse impapuro z’umutsindo barakeneye kugira uburimbane no kubona ibintu nk’uko biri ku vyerekeye bo ubwabo be no ku vyerekeye abandi. Bakwiye kwitega ko bazogira amakosa amwamwe, ariko ivyo ntibikwiye kubababaza birenze urugero mu gihe bagwa bavyuka kugira ngo bafashe abandi gutahura “ibitangaza vy’Imana”. Umuvukanyi Corkern yararemesheje abo bamisiyonari bashasha kwiheka kuri Yehova, ‘we aha impera abamurondera’.​—Abaheburayo 11:6.

Uwakurikiye kuri porogarama yari Daniel Sydlik wo mu bagize Inama Nyobozi, akaba yaciye irya n’ino umutwe shimikiro uvuga ngo “Icizigiro ca gikirisu ni iki?” Yavuze ati: “Icizigiro ni kamere ya gikirisu. Ni ingingo mfatirwako y’ivyiza ituma umuntu agiranira ubucuti bwiza n’Imana. Ku wutari umukirisu, kwizigira nk’uko twizigira ni ikintu kidashoboka”. Umuvukanyi Sydlik yarabandanije kudondora imice itandukanye y’icizigiro ca gikirisu ifasha umuntu kuguma abona ibintu mu buryo bwiza, naho yoba ahanzwe n’ingorane z’ubuzima. “Dufise icizigiro, turashobora kubaho dufise umwete unaguwe be n’agatima ko kuzotahukana intsinzi”. Icizigiro c’umukirisu kiramufasha kubona Yehova ko ari Imana ifise imigambi hanyuma agahimbarwa no kumusukurira.​—Abaroma 12:12.

Wallace Liverance, umunyamabanga w’Ishure ry’i Gileyadi, yararemesheje abanyeshure ‘kuguma bagendeshwa n’impwemu’ (Ab’i Galatiya 5:16). Yarerekanye ukuntu Baruki, umukarani wa Yeremiya yahatswe kureka kugendeshwa n’impwemu. Baruki yarashitse aho agoyagoya maze atangura kwikurikiranira ibintu bihambaye (Yeremiya 45:3, 5). Umuvukanyi Liverance yaciye yerekana yuko bamwebamwe baretse gukurikira Yezu maze baratera akagere ukuri kwo mu vy’impwemu, kwo ari nkenerwa kugira ngo umuntu aronke ubukiriro. Ivyo vyatumwe n’uko batatahura ivyo yariko yigisha, biraheza bituma bavunika umutima kubera ko ivyo bari biteze mu buryo bw’umubiri bitashitse ico gihe (Yohana 6:26, 27, 51, 66). Ni igiki abamisiyonari bashobora kwigira kuri izo nkuru, abo igikorwa cabo ari ico kwerekeza ivyiyumviro vy’abantu ku Muremyi no ku migambi yiwe? Abanyeshure bararemeshejwe kutitwararika ivyo kwironkera igiti, kwemerwa n’abantu, canke gukoresha igikorwa ca gitewokarasi ku bw’inyungu zabo bwite.

“Uzoba uwutanga canke uwakira?”. Ico ni co kibazo umwigisha wa Gileyadi, Mark Noumair yavyuye. Ivyo yavuze yabishingiye ku Bacamanza 5:2, aho Umwisirayeli wese yashimagijwe bivuye ku kwitanga ata kwikunda kugira ngo aje mu ngabo za Baraki. Abanyeshure b’i Gileyadi barakejwe kubera agatima bagaragaje ko kwitaba akamo k’umwe Baraki Mukuru, ari we Yezu Kirisitu, ngo barushirize kujamwo mu ntambara yo mu vy’impwemu. Abasoda ba Kirisitu bakwiye kwitwararika kwemerwa n’umwe yabandika mu gisoda. Umuvukanyi Noumair yibukije abo banyeshure ibi: “Igihe dutanguye kwishinga ivyo kwihimbaza, duca duhagarika kurwanya umwansi. . . . Umurimo w’ubumisiyonari si rwawe. Ni uwerekeye Yehova, ubusegaba bwiwe be n’ukugomba kwiwe kuriko gushitswa. Ntidusukura turi abamisiyonari kubera ko dushaka ko Yehova atunezereza, tumusukurira kubera ko tumukunda”.​—2 Timoteyo 2:4.

Umwigisha w’i Gileyadi Lawrence Bowen ni we yaciye akurikira mu guhagarikira igihimba kivuga ngo “Ubeze mu kuri” (Yohana 17:17). Yavuze yuko abanyeshure b’umugwi ugira 115 ari abasuku b’Imana bejejwe. Bakiri kw’ishure, baragira kandi uruhara mu busuku bwo mu ndimiro, bakarondera abantu b’inziraburyarya bakunda ukuri. Nka kumwe kwa Yezu n’abigishwa biwe bo mu ntango, abo banyeshure ntibavuga ‘ivyo bigeneye’ (Yohana 12:49, 50). Barashikirije babigiranye umwete ijambo ry’ukuri ryahumetswe kandi rirokora ubuzima. Udukino dusubiramwo ivyabaye twakinywe n’abo banyeshure be n’ivyabonywe biganye, vyaragaragaje akosho gakomeye Bibiliya yagize ku bantu babonanye.

Impanuro be n’ivyabonywe biratanga indemesho

Anthony Pérez na Anthony Griffin bo mu bagize Urwego rujejwe umurimo rw’ishami rya Leta Zunze Ubumwe za Amerika, bararongoye ibiganiro vyo kubaza ibibazo abo mu Makomite y’ishami bavuye hirya no hino kw’isi. Abo bagabo baraciye irya n’ino intambamyi abamisiyonari bashasha bahangana, hanyuma baratanga impanuro ngirakimazi zishingiye ku vyo biboneye. Zimwezimwe muri izo ntambamyi ni ukudahuza kw’imico kama, intara z’ubushuhe ziguma zishushe hafi umwaka wose, canke ivy’idini be n’ivya politike usanga bitandukanye n’ivyo abo banyeshure bari bamenyereye. Ni igiki gishobora gufasha abamisiyonari bashasha guhangana n’ivy’aho hantu hashasha? Ni urukundo bakunda Yehova, urukundo bakunda abantu, kudasubiza amaso inyuma no kudakora ibintu gihutihuti. Umwe mu bagize komite y’ishami yavuze ati: “Abantu bo mu gikebere cacu bari bamaze ibinjana n’ibindi bahaba imbere y’uko tuhashika. Nta gukeka ko twashoboye kuhaba kandi tukahamenyera. Igihe cose twahura n’ingorane, ni bo twarabirako kugira ngo turyohore kamere yacu. Uriheka kw’isengesho no ku mpwemu ya Yehova, maze ukibonera ukuri kw’amajambo ya Yezu agira ati: ‘Ndi kumwe namwe’”.​—Matayo 28:20.

Samuel Herd, umwe mu bagize Inama Nyobozi, ni we yashikanye iyo porogarama ku kiringo gihambaye akoresheje insiguro igira iti: “Gume muvuga ibitangaza vy’Imana”. Isukwa ry’impwemu yera ku musi wa Pentekote yo mu 33 G.C., ryararonkeje inguvu abigishwa ba Yezu zo kuvuga “ibitangaza vy’Imana”. Ni igiki gishobora gufasha abamisiyonari bashasha muri iki gihe kuvugana umwete nk’uyo nyene ivy’Ubwami bw’Imana? Ni iyo mpwemu yera nyene. Umuvukanyi Herd yararemesheje abari bagiye kuronka impapuro z’umutsindo ‘kururumba impwemu’, guhimbarwa n’ibikebere vyabo, batigera bibagira ukumenyerezwa bahawe (Abaroma 12:11, NW). Umuvukanyi Herd yavuze ati: “Bibiliya ni igitangaza c’Imana. Ntukigere usuzugura agaciro kayo. Ubutumwa buri muri yo ni buzima. Irinjira gushika ku ntimatima y’ibintu. Yikoreshe kugira ngo ugorore ibintu mu buzima bwawe. Reka ihindure uburyo wiyumvira. Rinda ubushobozi bwawe bwo kwiyumvira mu kwiga, mu gusoma no mu kuzirikana ku Vyanditswe . . . Gukoresha ukumenyerezwa waronkeye i Gileyadi kugira ngo ugume uvuga ‘ibitangaza vy’Imana’, nubigire yo ntumbero yawe n’umwiyemezo wawe”.

Hamaze gusomwa indamukanyo zivuye hirya no hino kw’isi no gushikirizwa impapuro z’umutsindo, umwe mu baronse izo mpapuro z’umutsindo, yarasomye ikete ry’uwo mugwi ryaserura ugukenguruka ku bw’ukumenyerezwa baronse. Umuvukanyi Lett yaciye asozera ico kiringo giteye umunezero mu kwerekeza ku 2 Ngoma 32:7 no mu Gusubira mu vyagezwe 20:1, 4. Mu guhuza amajambo yiwe yo kurangiza be n’amajambo yiwe y’ukwugurura, yasozereye avuga ati: “Nuko rero bakundwa muronse impapuro z’umutsindo, mwibuke yuko Yehova azogendana namwe uko mutera muja imbere, muja mu rugamba rwo mu vy’impwemu mu bikebere vyanyu bishasha. Ntimwigere mwibagira yuko ababashigikiye ari bo benshi kuruta ababarwanya”.

[Uruzitiro ku rup. 25]

IBIRANGA ABARI BITAVYE IRYO SHURE

Igitigiri c’ibihugu bavuyemwo: 7

Igitigiri c’ibihugu barungitswemwo: 17

Igitigiri c’abanyeshure: 48

Incahagati y’imyaka y’amavuka: 33,7

Incahagati y’imyaka bamaze mu kuri: 17,8

Incahagati y’imyaka bamaze mu busuku bw’igihe cose: 13,5

[Ifoto ku rup. 26]

Umugwi ugira 115 w’abasohoka Ishure ry’ivya Bibiliya ry’i Gileyadi rya Watchtower

Mu rutonde rukurikira, imirongo iharurwa uhereye imbere uja inyuma, amazina na yo akaba atondetse uhereye ibubamfu uja iburyo ku murongo umwumwe wose.

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.