Woba uzogendana n’Imana?

‘Gendana n’Imana yawe wicishije bugufi’.​—Mika 6:8.

1, 2. Ukuntu Yehova yumva amerewe ku bitwerekeye bishobora gute kugereranywa n’ukuntu umuvyeyi yumva amerewe igihe ariko arigisha umwana wiwe gutambuka?

AKANA gatoyi ng’ako karahagaze gafise impungenge. Karafashe amaboko umuvyeyi wako yaramvuye maze gaciye gatera udutambwe twako twa mbere. Hari aho ico cosa n’aho umenga ni ikintu ata co kivuze, mugabo se na nyina bo babona ko ari intambwe ikomeye. Iyo ntambwe ituma baca batangura kwitega ibintu vyinshi. Abo bavyeyi bariteganye umushasharo kugendana n’ako kana kabo bagafashe amaboko mu mezi ari imbere no mu myaka iri imbere. Barizigiye kuzomara igihe kirekire bayobora uwo mwana mu buryo bwinshi bongera bamufata mu mugongo mu buryo bwinshi.

² Ukwo nyene ni ko Yehova Imana yiyumva ku vyerekeye abana biwe bo kw’isi. Ku vyerekeye ihanga ryiwe rya Isirayeli ari bo Befurayimu, igihe kimwe yavuze ati: “Nigishije Abefurayimu gutambuka; nabashize mu kwāha. . . . Nabakwegesheje imigozi y’umuntu, imigozi y’ibitsibo vy’urukundo” (Hoseya 11:3, 4). Ng’aho Yehova yidondora ko ari umuvyeyi w’umunyarukundo ariko arigisha akana kiwe gutambuka abigiranye ukwihangana, kumbure akagaterura igihe gatemvye. Yehova, we Muvyeyi mwiza kuruta abandi bose, arashashaye rwose kutwigisha ukuntu twotambuka. Arahimbarwa kandi no kugendana natwe uko tubandanya gutera imbere. Nk’uko vyerekanwa n’umutwe-shimikiro w’iki kiganiro cacu, turashobora kugendana n’Imana (Mika 6:8)! Ariko none, kugendana n’Imana bisobanura iki? Ni kubera iki dukeneye kugendana n’Imana? Ivyo bishoboka bite? Kandi ni imihezagiro iyihe iva mu kugendana n’Imana? Nimuze twihweze ivyo bibazo bine kimwekimwe ukwaco.

Kugendana n’Imana bisobanura iki?

3, 4. (a) Ni ikintu ikihe cibonekeje ku bijanye n’imvugo ngo kugendana n’Imana? (b) Kugendana n’Imana bisobanura iki?

³ Mu vy’ukuri, umuntu w’inyama n’amaraso ntashobora kugendana bugendane na Yehova narirya Yehova we ari ikinyabuzima c’impwemu (Kuvayo 33: 20; Yohana 4: 24). Igihe rero Bibiliya ivuga ivy’abantu bagendana n’Imana, iba iriko ikoresha imvugo ngereranyo. Icibonekeje ni uko ibivuga mu buryo umuntu uwo ari we wese aca abibona, ashake abe ari uwo mu gihugu ikihe, yakuriye mu mico kama iyihe, eka mbere n’iyo yoba ari uwo mu gihe ikihe. Kanatsinda, umuntu avuze ivyo kugendana n’uwundi, ni umuntu wo mu karere akahe canke wo mu gihe ikihe adaca abona ico bisobanura? None ntuca ubibonamwo igishika bafitaniye be n’ubucuti somambike buri hagati yabo? Ico gishika n’ubwo bucuti bitumye duca dutangura kubona ico kugendana n’Imana bisobanura. Ariko rero, reka ubu turushirize kudomako.

⁴ Ibuka ba bagabo b’intahemuka Henoki na Nowa. Ni kubera iki bavugwa yuko bagendana n’Imana (Itanguriro 5: 24; 6:9)? Muri Bibiliya, imvugo ngo “kugenda” akenshi isobanura gukurikira ingendo yinaka. Henoki na Nowa bahisemwo gukurikira ingendo y’ubuzima yari ihuye n’ivyo Yehova Imana agomba. Ntibabaye nk’abantu bari babakikije. Bobo bararondeye kuyoborwa na Yehova bongera baragamburuka ubuyobozi bwiwe. Baramwizigiye. None ivyo vyoba bisobanura yuko Yehova ari we yabafatira ingingo? Habe namba. Yehova yarahaye abantu ubushobozi bwo kwihitiramwo, kandi ashaka yuko dukoresha iyo ngabirano hamwe n’‘ububasha bwacu bwo kuzirikana’ (Abaroma 12: 1, NW). Ariko rero, igihe dufata ingingo turicisha bugufi tukareka ubushobozi bwacu bwo kuzirikana bukayoborwa n’ivyiyumviro vya Yehova birengeye ivyacu kure n’iyo (Imigani 3: 5, 6; Yesaya 55: 8, 9). Mu bisanzwe, urwo rugendo tugira duca mu nzira y’ubuzima, turugira turi kumwe na Yehova.

5. Ni kubera iki Yezu yavuze ivy’ukwongereza ukuboko kumwe ku kiringo co kubaho c’umuntu?

⁵ Akenshi ubuzima Bibiliya ibusanisha n’urugendo. Hamwehamwe, usanga bica vyibonekeza yuko ubuzima yabugereranije n’urugendo, ahandi na ho ugasanga ntibishoka vyibonekeza. Nk’akarorero, Yezu yavuze ati: “Ni nde muri mwebge yoshobozwa n’amaganya kwisumvya [“ku kiringo ciwe c’ukubaho”, NW] nk’ukuboko kumwe?” (Matayo 6: 27). Muri ayo majambo hari ikintu coshobora gusa n’ikikuvuruga ubwenge. Ni kubera iki Yezu yavuze ivy’ukwongereza “ukuboko kumwe” ku ‘kiringo co kubaho’ c’umuntu gisanzwe kigerwa bafatiye ku ngero y’umwanya, kandi tuzi ko “ukuboko kumwe” [ni ukuvuga intambwe y’ukuboko uciriye mu nkokora] ari ingero y’ubureburea? Biribonekeza ko Yezu yariko agereranya ubuzima n’urugendo. Mu bisanzwe yigishije yuko ukwiganyira bitazogufasha kwongereza n’intambwe ntoya ku kuntu urugendo rw’ubuzima bwacu rureha. Ariko none, twoca dushika ku ciyumviro c’uko ata kintu na kimwe twoshobora gukora kugira ngo twongereze uburebure bw’urwo rugendo? Habe namba! Ivyo bidushikanye ku kibazo cacu kigira kabiri, na co kikaba ari iki: Ni kubera iki dukeneye kugendana n’Imana?

Ni kubera iki dukeneye kugendana n’Imana?

6, 7. Ni igiki abantu b’abanyagasembwa bakeneye cane, kandi ni kubera iki vyoba vyiza turondeye ko Yehova aturonsa ico kintu?

⁶ Imvo imwe yerekana igituma dukeneye kugendana na Yehova Imana irasigurwa muri Yeremiya 10: 23, ahagira hati: “Uhoraho, nzi yukw inzira umuntu yogenderamwo atari we ashobora kuyigaba; ntibiri mu muntu agenda kwitunganiriza intambuko ziwe”. Ku bw’ivyo, twebwe abantu nta bushobozi dufise bwo kwitunganiriza inzira y’ubuzima bwacu bwite, eka nta n’uburenganzira tubifitiye. Turakeneye cane ubuyobozi. Abantu babandanya kugendera mu nzira yabo bwite bitandukanije n’Imana bakora ikosa nk’iryo Adamu na Eva bakoze. Uwo mugabo n’umugore ba mbere barihaye uburenganzira bwo kwishingira ikibi n’iciza (Itanguriro 3: 1-6). Ubwo burenganzira ‘ntibuturimwo’, ni ukuvuga yuko atari ubwacu.

⁷ None ntiwiyumvamwo yuko ukeneye uwukuyobora mu rugendo rw’ubuzima? Ku musi ku musi, hari ingingo tubwirizwa gufata, zaba izoroshe canke izihambaye. Zimwe muri izo ziragoye kandi zirashobora kugira ingaruka kuri kazoza kacu canke k’abacu. Ariko niwiyumvire gatoyi iki kintu: hari umuntu aturuta kure n’iyo kandi afise ubukerebutsi burengeye kure n’iyo ubwo dufise, ahimbawe no kudufasha gufata izo ngingo abigiranye urukundo! Ikibabaje ni uko abantu benshi muri iki gihe usanga bahitamwo kwizigira uburyo bo ubwabo babona ibintu, bakaba ari bo biyoborera intambuko zabo. Bariyobagiza uku kuri kuvugwa mu Migani 28: 26, ahagira hati: “Uwizigira uwiwe mutima aba ar’igipfu, arik’ūgendana ubgenge azorokorwa”. Yehova yipfuza ko tutoshikirwa n’ivyago biterwa n’ukwizigira umutima wacu wibesha (Yeremiya 17:9). Ashaka ko tugendera mu bukerebutsi, tukamwizigira nka we Muyobozi n’Umucishabwenge wacu w’inkerebutsi. Tubigenjeje gutyo, duca tugendera mu nzira y’ubuzima dutekanye, duhimbawe kandi dushize akanyota.

8. Igicumuro n’agasembwa abantu bavukanye bibashikana hehe, yamara ni igiki Yehova atwipfuriza?

⁸ Iyindi mvo ituma dukenera kugendana n’Imana ijanye n’uburebure bw’urugendo dushaka gufata. Hariho ukuri kubabaje Bibiliya ivuga. Abantu bose b’abanyagasembwa hari ukuntu bagenda bagana ahantu hamwe. Mu kwerekana ingorane zijanye n’ubusaza, mu Musiguzi 12:5 havuga hati: “Umuntu yīgīra i wabo w’intahava, mu nzira hakaba uruja n’uruza rw’abamuririra”. “I wabo w’intahava” ni hehe? Ni ha handi igicumuro n’agasembwa twavukanye bidushikana, ni ukuvuga mu mva (Abaroma 6: 23). Ariko rero, Yehova ntashaka ko tugira urugendo rutoyi gusa rwuzuye amarushwa ruva ku kuvuka rugashika ku gupfa (Yobu 14:1). Tugendanye n’Imana ni ho gusa dushobora kwizigira kugira urugendo rw’ibihe bidahera nk’uko Imana yari yarabitugeneye. None ivyo si vyo wipfuza? Biribonekeza rero ko ukeneye kugendana n’uwo So wawe.

Dushobora gute kugendana n’Imana?

9. Ni kubera iki Yehova rimwe na rimwe yihisha abasavyi biwe, ariko twisunze Yesaya 30: 20 ni igiki yabahaye kibakura amazinda?

⁹ Ikibazo kigira gatatu tugiye kurimbura, birakwiriye ko tucitwararika cane kuruta ibindi. Ico na co ni iki: Dushobora gute kugendana n’Imana? Inyishu tuyisanga muri Yesaya 30: 20, 21, ahagira hati: “[“Umucishabwenge wanyu Mukuru ntazoba acihisha, kandi amaso yanyu azotegerezwa kuba ayabona Umucishabwenge wanyu Mukuru”, NW]; kandi ni mwakikamira i buryo cank’i bumoso, amatwi yanyu azokwumva ijambo ribaturutse inyuma rivuga, rit’Iyi ni yo nzira, mube ari yo mujana”. Muri iki canditswe kiremesha, amajambo Yehova yavuze mu murongo wa 20 yoshobora kuba yaribukije abasavyi biwe yuko mu vy’ukuri yabihishije igihe bamugarariza (Yesaya 1:15; 59:2). Ubu hoho Yehova ntadondorwa ko yihishije, ahubwo adondorwa ko ahagaze neza na neza imbere y’abasavyi biwe b’intahemuka. Ivyo vyoshobora gutuma duca twiha ishusho y’umwigisha ahagaze imbere y’abanyeshure biwe ariko abasigurira ivyo yipfuza ko bamenya.

10. Ni mu buhe buryo woshobora ‘kwumva ijwi riguturutse inyuma’ rivuye kuri wa Mucishabwenge wawe Mukuru?

¹⁰ Mu murongo wa 21, Yehova adondorwa mu bundi buryo. Adondorwa ariko agendera inyuma y’abasavyi biwe, abereka inzira ibereye bakwiye gucamwo. Incabwenge mu vya Bibiliya zavuze yuko ukwo kuntu Yehova adondorwa bishobora kuba bishingiye ku kuntu umwungere rimwe na rimwe akurikira intama ziwe, azamira kugira aziyobore yongere azibuze guca mu nzira itari yo. Ukwo kuntu adondorwa bihuye gute n’ibitwerekeye? Urabona, igihe turonderera ubuyobozi mw’Ijambo ry’Imana, tuba turiko turasoma amajambo haheze imyaka ibihumbi yanditswe. Ni nk’aho ayo majambo aza aduturutse inyuma uravye igihe yanditswemwo. Ariko naho yanditswe kera, arahuje n’igihe cacu, nk’uko yari ahuje n’igihe yandikwa. Impanuro Bibiliya itanga zirashobora kutuyobora mu ngingo dufata ku musi ku musi, kandi zirashobora kudufasha gutegura inzira y’ubuzima tuzocamwo mu myaka iri imbere (Zaburi 119: 105). Mu gihe turonderanye ubwira impanuro nk’iyo maze tukayishira mu ngiro, Yehova rero aba abaye Umuyobozi wacu. Tuba turiko turagendana n’Imana.

11. Twisunze Yeremiya 6: 16, ni amajambo akwegera ayahe Yehova yabwiye abasavyi biwe, mugabo bavyakiriye gute?

¹¹ Twoba vy’ukuri turiko turareka Ijambo ry’Imana ngo rituyobore cane gutyo? Birahambaye ko rimwe na rimwe duhagarara tukisuzuma tutibesha. Raba umurongo uzodufasha kwisuzuma: “Uku ni k’Uhoraho agize, ati Muhagarare mu mayira, mwitegereze, mubaze inzira za kera, inzira nziza iy’ari yo, abe ari yo mujana, maze muzoronka uburuhukiro bg’imitima yanyu” (Yeremiya 6: 16). Ayo majambo yoshobora kutwibutsa ibijanye n’umuntu ari ku rugendo ahagaze mu mayirabiri kugira ngo abaze iyo izo nzira zija. Mu buryo bw’impwemu, abasavyi ba Yehova bo muri Isirayeli bari baramugararije bari bakeneye kugira ikintu gisa n’ico. Bari bakeneye gusubira mu “nzira za kera”. Iyo “nzira nziza” yari inzira ba sekuruza babo b’intahemuka bari baragendeyemwo, inzira iryo hanga ryari ryarataye bitewe n’ubujuju. Ikibabaje, Abisirayeli baranse n’akagagazo n’akantu ico cibutswa ca Yehova kiranga urukundo. Uwo murongo nyene ubandanya uti: “Ariko bo baravuga, bat’Eka ntituyijana”. Ariko rero, mu bihe vya none abasavyi b’Imana bakiriye impanuro nk’iyo mu buryo butandukanye n’ubwo.

12, 13. (a) Abayoboke ba Kirisitu basizwe bakiriye gute impanuro yo muri Yeremiya 6: 16? (b) Ni gute twokwirimbura ku bijanye n’inzira turiko turacamwo muri iki gihe?

¹² Kuva mu mpera y’ikinjana ca 19, abayoboke ba Kirisitu basizwe bariyerekejeko iyo mpanuro iri muri Yeremiya 6: 16. Uko bagize umugwi, barabaye imboneza mu kugaruka n’umutima wabo wose mu “nzira za kera”. Ntibabaye nk’abiyita abakirisu b’abahuni. Bobo barumiye badahemuka ku “citegererezo c’amajambo mazima” cashizweho na Yezu Kirisitu hanyuma gikurikizwa n’abayoboke biwe b’intahemuka bo mu kinjana ca mbere G.C. (2 Timoteyo 1:13). Gushika n’uyu musi, abasizwe barafashanya bakongera bagafasha bagenzi babo bo mu “zindi ntama” gukurikirana iyo nzira nziza y’ubuzima kandi ihimbaye abiyita abakirisu bataye.​—Yohana 10:16.

¹³ Mu gutanga imfungurwa zo mu vy’impwemu ku gihe kibereye, umugwi wa wa mushumba wo kwizigirwa warafashije abantu amamiliyoni gutora “inzira za kera” no kugendana n’Imana (Matayo 24: 45- 47). Woba uri muri abo bantu amamiliyoni? Niba uri muri bo, wokora iki kugira ngo ntutwarwe akayombekere ngo ukurikire ingendo yawe bwite? Vyoba biranga ubukerebutsi ugiye urahagarara maze ugasuzuma inzira uriko uracamwo mu buzima. Niba uriko urabandanya gusoma Bibiliya n’ibitabu bishingiye kuri yo wongera witaba amaporogarama y’ukwigishwa ahagarikiwe n’abasizwe bo muri iki gihe, uriko rero umenyerezwa kugendana n’Imana. Kandi igihe wicishije bugufi ugashira mu ngiro impanuro uhawe, nta nkeka uba uriko uragendana n’Imana, ukurikira “inzira za kera”.

Genda nk’aho ‘ubona Umwe ataboneka’

14. Niba Yehova atari umugani kuri twebwe, bizogaragarira gute mu ngingo dufata?

¹⁴ Kugira tugendane na Yehova, ategerezwa kutaba ari umugani kuri twebwe. Ibuka yuko Yehova yakuye amazinda abantu b’intahemuka bo muri Isirayeli ya kera yuko atari abihishije. No muri iki gihe, ariyereka abasavyi biwe ko ari Umucishabwenge Mukuru. Yehova yoba atari umugani kuri wewe, nk’aho yoba ahagaze imbere yawe kugira ngo akwigishe? Ukwizera mwene ukwo ni kwo dukeneye niba dushaka kugendana n’Imana. Musa yari afise mwene ukwo ukwizera “kuko yashikamye nk’ah’abona Ītaboneka” (Abaheburayo 11:27). Niba Yehova atari umugani kuri twebwe, ntituzokwirengagiza uburyo yiyumva igihe dufata ingingo. Nk’akarorero, ntitwonarota gukora ibintu bitabereye ngo hanyuma tugerageze guhisha ivyaha vyacu abakurambere bakirisu canke abo mu muryango. Ahubwo riho, turakora uko dushoboye kwose tukagendana n’Imana n’igihe ata muntu n’umwe ashobora kutubona. Nka kumwe kw’Umwami Dawidi wo mu gihe ca kera, twiyemeze duti: “Nzokwama ngendana mu nzu yanje umutima utunganye”.​—Zaburi 101:2.

15. Kwifatanya n’abavukanyi be n’abavukanyikazi bacu bakirisu, bidufasha gute kubona ko Yehova atari umugani?

¹⁵ Yehova aratahura ko turi ibiremwa vy’ibinyagasembwa bifise umubiri w’inyama be n’uko vyoshika rimwe na rimwe bikatugora kwemera ivyo tutabona (Zaburi 103: 14). Nta ko atagira ngo adufashe gutsinda mwene ubwo bugoyagoye. Nk’akarorero, Imana yaratororokanije “ubgoko bg’izina ryayo” ibukuye mu mahanga yose yo kw’isi (Ivyakozwe n’intumwa 15: 14). Igihe twese dukora dusenyera ku mugozi umwe, turakomezanya. Kwumva ingene Yehova yafashije umuvukanyi canke umuvukanyikazi wacu wo mu buryo bw’impwemu gutsinda ubugoyagoye bunaka canke gutsinda ibigeragezo binaka bikomeye, biratuma Imana yacu irushiriza kutaba umugani kuri twebwe.​—1 Petero 5:9.

16. Kwiga ivyerekeye Yezu bizodufasha gute kugendana n’Imana?

¹⁶ Ikiruta vyose, Yehova yaraduhaye akarorero k’Umwana wiwe. Yezu yavuze ati: “Ni jewe nzira n’ukuri n’ubu[zima]: nta wushika kuri Data ntamujanye” (Yohana 14:6). Kwiga ivyerekeye ubuzima bwa Yezu bwo kw’isi ni bumwe mu buryo bwiza kuruta ubundi bwo gutuma Yehova arushiriza kutaba umugani kuri twebwe. Ibintu vyose Yezu yavuze canke yakoze birerekana neza na neza ukuntu Se wiwe wo mw’ijuru ameze be n’inzira ziwe (Yohana 14:9). Igihe dufata ingingo, turakeneye kwiyumvira twitonze ukuntu Yezu yari kuvyifatamwo. Igihe dufata ingingo tubanje kuzirikana kuri ico kintu tukabishira no mw’isengesho, tuba turiko turagera ikirenge mu ca Kirisitu (1 Petero 2: 21). Tuba rero turiko tugendana n’Imana.

Ni imihezagiro iyihe iva mu kugendana n’Imana?

17. Nitwagendera mu nzira ya Yehova, ni “uburuhukiro” bw’imitima yacu ubuhe tuzoronka?

¹⁷ Kugendana na Yehova Imana bituma umuntu agira ubuzima buryoshe. Ibuka ivyo Yehova yasezeraniye abasavyi biwe ku vyerekeye kurondera “inzira nziza”. Yavuze ati: “Abe ari yo mujana, maze muzoronka uburuhukiro bg’imitima yanyu” (Yeremiya 6: 16). None ubwo “buruhukiro” busobanura iki? Bwoba busobanura ubuzima bwuzuyemwo ibinezereza n’ibihinda? Eka da. Yehova atanga ikintu ciza cane kuruta, kimwe n’abatunzi karuhariwe badahuta bararonka. Kuronka uburuhukiro bw’umutima bisobanura kuronka amahoro yo mu mutima, umunezero, agahimbare be n’ugushira akanyota mu vy’impwemu. Mwene ubwo buruhukiro bwerekana yuko ushobora gushira umutima mu nda yuko wahisemwo inzira nziza cane kuruta izindi mu buzima. Amahoro yo mu mutima nk’ayo ni imbonekarimwe muri iyi si yuzuye ingorane!

18. Ni umuhezagiro uwuhe Yehova yipfuza kuzoguha, kandi wiyemeje iki?

¹⁸ Ego ni ko, ubuzima ubwabwo ni umuhezagiro ukomeye. Ngo ‘Ubusa busumba akamaramaza’, umuntu yopfuma abaho akanya gatoyi hako atabaho. Ariko rero, Yehova ntiyigeze yipfuza ko urugendo rwacu rw’ubuzima ruba urugendo rugufi rwo kuva mu butǒre bw’ubuto gushika mu mibabaro yo mu busaza. Oya, Yehova akwipfuriza kuronka umuhezagiro uruta iyindi yose. Akwipfuriza kugendana na we ibihe vyose! Ivyo biravugwa neza muri Mika 4:5 ahagira hati: “Ayandi mahanga yose azogenda, ihanga ryose rigendere mw izina ry’imana yaryo, ariko tweho tuzogendera mw izina ry’Uhoraho Imana yacu gushitsa ibihe bitazoshira”. Woba wipfuza kutagisha uwo muhezagiro? Woba wipfuza kuzogira ico Yehova yita mu buryo bukwegera “ubu[zima] nyakuri” (1 Timoteyo 6: 19)? Niba uvyipfuza, niwiyemeze rero kugendana na Yehova ubu, ejo hazoza, eka mbere n’imisi yose gushika ibihe bidahera!

[Akajambo k’epfo]

Wokwishura gute?

• Kugendana n’Imana bisobanura iki?

• Ni kubera wumva ukeneye kugendana n’Imana?

• Ni igiki kizogufasha kugendana n’Imana?

• Ni imihezagiro iyihe abagendana n’Imana bironkera?

[Ifoto ku rup. 23]

Biciye kuri Bibiliya, turumva ijwi rya Yehova riduturuka inyuma rivuga riti: “Iyi ni yo nzira”

[Ifoto ku rup. 25]

Ku makoraniro, turaharonkera imfungurwa zo mu vy’impwemu ku gihe kibereye