Aho woronderera ukumurikirwa nyakuri

HARI ku wa 18 Kigarama 1810, bukaba bwariko burira. Akato kamwe k’ingabo z’Abongereza zirwanira mu mazi kitwa HMS Pallas kari kataye inzira mu kiyaga cari casaze, kakaba kari hirya kure y’inkengera yo mu Bumanuko bushira Ubuseruko bw’igihugu ca Ekose. Umwiza uguma wongerekana be n’urubura rukaze vyatuma abakorera muri ako kato birushiriza kubagora kugenekereza ibitara bimurikira amato maze ngo bashobore kukayobora ahatagira inkomanzi. Iyumvire ukuntu biruhukije igihe amaherezo baza babona umuco, maze bagaca berekeza iyo nya muco uzanana! Ariko rero, ikibabaje ni uko uwo muco utari umuco bipfuza, ni ukuvuga uwa mwene vya bitara bimurikira amato. Ahubwo bari babonye umucanwa wacanywe n’abakozi bariko bakorera hafi y’inkengera y’ico kiyaga. Nya kato kaciye kaja kwiseka ku bitandara vy’amabuye, maze kose gaca karasaba. Abantu 11 bari muri ako kato baciye basoma nturi. Umve iryo bara yemwe!

Uravye ivyashikiye ako kato kitwa Pallas, ukwihenda kwaratumye ibara rigwa. Ariko rero, birashika abagendera mu bwato bagashikirwa n’ikintu giteye akaga kanakomeye kuruta, ico na co kikaba ari uguhendwa n’ibitara vyo kuzimiza amato. Igitabu kimwe (Wrecks, Wreckers and Rescuers) kivuga yuko hariho abantu wasanga bashinga mwene ivyo bitara kugira bazimize amato ngo aze ku nkengera ziriko ibitandara vy’amabuye, maze asabe bisahurire.

‘Ivyanditswe vyeranda bishobora kukujana mu bukiriro’

Igihe urondera ukumurikirwa, woshobora gushikirwa n’ibintu birimwo akaga bisa n’ivyo vyashikira abo bantu bagendera mu bwato. Vyoshika ugakurikira amakuru azimiza canke ugahendwa. Ivyo vyompi birashobora kugukwegera akarambaraye. None, wokora iki kugira ngo uvyikingire? Nurabe neza yuko aho uronderera ukumurikirwa ari ah’ukuri kandi ko ari aho kwizigirwa. Haraciye imyaka irenga 125 iki kinyamakuru gishigikira Ijambo ry’Imana ryahumetswe Bibiliya mu kwerekana ko ari ryo soko ry’ukumurikirwa umuntu yokwizigira kubera yuko ririmwo “ivyanditswe vyeranda, ibifise ububasha bwo kukugira inkerebutsi no kukujana mu bukiriro”.​—2 Timoteyo 3:15-17, New English Bible.

Ariko rero, kugira ngo wemere udakeka ko Bibiliya ari ryo tara ryo kwizigirwa ryokumurikira, birumvikana ko wobanza gusuzuma ivyemeza ko ari iy’ukuri (Zaburi 119:105; Imigani 14:15). Ntiwitinye kwandikira abasohora iki kinyamakuru kugira ngo umenye ibintu vyafashije abantu amamiliyoni kujijuka yuko Bibiliya mu vy’ukuri yahumetswe n’Imana. Nk’akarorero, usomye agatabu kavuga ngo Un livre pour tousa, uragasangamwo amakuru menshi yerekana ko Bibiliya itarimwo agakosa mu vyo ivuga, ko ari iy’ukuri kandi ko yahumetswe.

Ibintu vy’ukuri vy’ishimikiro

None, ibintu vy’ukuri vy’ishimikiro biri mu “vyanditswe vyeranda” ni ibihe? Ehe raba bimwebimwe muri ivyo:

Hariho Imana imwe Mushoboravyose yaremye ibintu vyose (Itanguriro 1:1). Turiho ‘kuko [Imana] ari yo yaremye vyose’ kandi ikaba ari yo yaduhaye ubuzima (Ivyahishuriwe 4:11). Ni co gituma ari yo yonyene dukwiye gusenga. Umuremyi ni we soko ruheta ry’umuco wose (Zaburi 36:9; Yesaya 30:20, 21; 48:17, 18). Irafise izina ry’uruharo ishaka ko dukoresha (Kuvayo 3:15). Iryo zina, iryanditswe mu ndome z’igiheburayo, rikaba rihindurwa urudome ku rundi ngo YHWH, riboneka nk’incuro 7.000 muri Bibiliya yo mu ntango. Mu kirundi, iryo zina rimaze imyaka rivugwa ngo “Yehova”.​—Yesaya 12:2.

Yehova yaremye abantu kugira ngo babeho ibihe bidahera mw’Iparadizo ngaha kw’isi. Abantu yabaremanye kamere zisa n’iziwe. Yabaremanye kandi ubuhanga n’ubushobozi vyotumye bahimbarirwa ubuzima budahera kandi bumara akanyota ngaha kw’isi (Itanguriro 1:26-28). Ntiyigeze agira umugambi w’uko isi yoba ahantu ho kugeragereza abantu maze ngo ababereye bace bigira kuba mw’ijuru, nk’aho umengo mw’ijuru ni ho honyene bashobora kugiranira ubucuti n’Imana.

Nta kibi na kimwe cari mu bantu igihe Imana yabarema. Ikibi caje igihe gusa bamwe mu bo Imana yaremye, ni ukuvuga abantu be n’abamarayika, bakoresha nabi ubushobozi bwabo bwo kwihitiramwo bakagarariza Imana (Gusubira mu vyagezwe 32:5). Abavyeyi bacu ba mbere barihaye uburenganzira bwo kwishingira ikibi n’iciza (Itanguriro 2:17; 3:1-5). Ivyo vyakwegeye abantu urupfu (Itanguriro 3:19; Abaroma 5:12). Kugira ngo ibibazo vyavyuwe n’ubwo bugarariji bishobore kwishurwa, Yehova yahisemwo kuba araretse ubukozi bw’ikibi burabandanya. Ariko umugambi yari afise ku biraba isi n’abantu ntiwahindutse (Yesaya 45:18). Bitebe bitebuke, abantu bazobaho ibihe bidahera mw’Iparadizo, kw’isi izoba yahumanuwe.​—Matayo 6:10; Ivyahishuriwe 21:1-5.

Yezu Kirisitu si Imana Mushoboravyose ahubwo ni Umwana w’Imana. Yezu Kirisitu ubwiwe yigishije abayoboke biwe gusenga batya: “Data wa twese wo mw ijuru, izina ryawe ryubahwe” (Matayo 6:9). Ntiyigeze arondera ivyo kuringanira n’Imana. Ahubwo riho, yavuze ati: ‘Data aranduta’.​—Yohana 14:28.

Yezu arafise uruhara ruhambaye cane mw’iranguka ry’umugambi w’Imana. Imana yamurungitse ‘ari umuco w’isi, kugira ngo uwumwizera wese ntaze agume mu mwiza’ (Yohana 12:46). Intumwa Petero yavuze yuko “[a]ta wundi agakiza kabonerwamwo” (Ivyakozwe n’intumwa 4:12). Ivyo ni ivy’ukuri kubera yuko ubukiriro bwacu tubukesha amaraso y’agaciro ya Kirisitu (1 Petero 1:18, 19). Yezu Kirisitu yatanze ubuzima bwiwe kw’inkuka y’incungu kugira ngo aducungure adukize icaha abavyeyi bacu ba mbere Adamu na Eva baturaze (Matayo 20:28; 1 Timoteyo 2:6). Vyongeye, Imana yarakoresheje Yezu kugira ngo ihishure ivyo igomba be n’umugambi wayo.​—Yohana 8:12, 32, 46, 47; 14:6; Ivyakozwe n’intumwa 26:23.

Imana yarashinze Ubwami bwo mw’ijuru, ari yo ntwaro yo mw’ijuru, bugizwe na Yezu Kirisitu hamwe n’abacaguwe mu bantu. Ibijanye n’ubwo Bwami usanga bigenda biravugwa muri Bibiliya yose uko ingana. Iyo ntwaro, Imana yayishinze igikorwa co gutuma ivyo igomba bikorwa mw’isi nk’uko bikorwa mw’ijuru (Matayo 6:10). Mu ntango Imana nta mugambi yari ifise w’uko hogira umuntu n’umwe aja mw’ijuru. Yari yageneye abantu kuba kw’isi. Ariko inyuma y’aho bamariye gucumura, Imana yaciye itegura ikintu gishasha. Yararinganije ivy’ugucagura abantu ibakuye “mu miryango yose no mu ndimi zose no mu moko yose no mu mahanga yose” kugira ngo ‘bazobe abami’ bafatanya na Kirisitu kuganza mu ntwaro yo mw’ijuru (Ivyahishuriwe 5:9, 10). Iyo ntwaro y’Ubwami, vuba igiye ‘kumara ikomvomvore’ ubutegetsi bwose bw’abantu ata kindi bwakoze atari ugukwegera abantu amarushwa n’umubabaro bitagira uko bingana.​—Daniyeli 2:44.

Nta gihimba kitaboneka kandi kidapfa abantu bafise muri bo. Ukwo kuri kw’ishimikiro kwo muri Bibiliya kurafasha cane gutahura ivyerekeye abantu be n’icizigiro ca kazoza bashobora kugira. Vyongeye, kuratuma umuntu abona aho ukuri kuri ku bijanye n’ivyiyumviro bitari vyo be n’inyigisho zitari zo vyatumye abantu batabona ico bari bufate n’ico bari bureke ku vyerekeye ukuntu abapfuye bamerewe.

Mu gitabu co muri Bibiliya c’Umusiguzi 9:5, 10 havuga hati: “Ereg’abariho baba bazi ko bazopfa; arikw abapfuye nta co baba bakizi, . . . [n]ta gikorwa cank’inama cank’ukumenya cank’ubgenge i kuzimu ah’urāriye kuja”. Woba wabonye ico ivyo bisobanura? Nta gihimba kitaboneka kandi kidapfa abantu bafise muri bo kibandanya kubaho inyuma y’urupfu. Igihe umuntu apfuye, ‘asubira mu mukungugu’.​—Itanguriro 3:19.

Abapfuye barashobora gusubira kuba bazima biciye kw’izuka. Ikiringo Imana yaretse ngo ubukozi bw’ikibi bube burabandanije nicarangira, ‘abari mu mva bose bazokwumva ijwi rya [Yezu] bazivemwo; abakoze ivyiza bazukire ubuzima, abakoze ibibi bazukire gucirwako iteka’ (Yohana 5:28, 29; Ivyakozwe n’intumwa 24:15). Izuka rizotuma abantu basubira kuba bazima, babe mw’isi izoba yahindutse Iparadizo, babeho bafise bwa buzima nyene Imana yari yarategekanirije abantu bayo igihe yabarema.

Nusuzume witonze Ivyanditswe uko bukeye

Woba ubona ukuntu kumenya ivyo bintu vy’ukuri vy’ishimikiro bishobora kugufasha? Muri ibi bihe bigoye cane bimeze nk’ibihuhusi, kumenya ivyo bintu birashobora kugukingira “ivyitwa ubgenge atari bgo” bikwiragizwa na Shetani wa Mucokoranyi. Yigira “umumarayika w’umuco”, abamuserukira na bo bakigira “abakozi b’ukugororoka” (1 Timoteyo 6:20; 2 Ab’i Korinto 11:13-15). Ubumenyi butagira agakosa bwo muri Bibiliya burashobora kugukingira ivyitwa ukumurikirwa bishingiye ku vyiyumviro vy’“abanyabgenge n’abahanga” bo mw’isi ‘bagaye ijambo ry’Uhoraho’.​—Matayo 11:25; Yeremiya 8:9.

Kubera yuko mu gihe c’intumwa Yohani, ni ukuvuga mu kinjana ca mbere, hariho inyigisho be n’amafilozofiya bizimiza, yagabishije abakirisu bo muri ico gihe ati: “Ntimwemere impwemu zose”, ni ukuvuga amajambo yose y’amahumekano (ni twe dushimitse.). Mu kwerekeza kuri ayo majambo y’amahumekano, yongeyeko ati: “Mugerageze impwemu ko zavuye ku Mana” (1 Yohana 4:1). Zirikana gatoyi. Nka hamwe woronka ubutumwa bushobora kugira ikintu gikomeye buhinduye ku buzima bwawe, ubwo woca upfa kubwemera ngo ni uko gusa busa n’ubuvuye ahantu ho kwizigirwa? Oya nawe ntu! Wobanza gutohoza aho buva ukongera ukabugerageza, ni ukuvuga ugasuzuma ibibugize imbere y’uko ubukurikiza.

Mu gutanga igitabu cahumetswe kirimwo ibintu vy’ukuri vy’ishimikiro, Imana yatumye bishoboka ko ugira neza na neza ico kintu, ni ukuvuga ‘ukagerageza’ canke ugasuzuma neza ko amatara akumurikira uriko urakurikira ari ay’ukuri (1 Ab’i Tesalonike 5:21). Hari abantu b’imico myiza bo mu kinjana ca mbere bakejwe kubera ko “basesa mu vyanditswe uko bukeye” kugira ngo basuzume ko ivyo baba bize ari vyo koko (Ivyakozwe n’intumwa 17:11). Na wewe ivyo urashobora kubigira. Nureke Bibiliya, yo imeze nk’“itara ryākira ahacuze umwiza”, ikuyobore ahatagira inkomanzi (2 Petero 1:19-21). Niwabigira, “u[zo]ronka ukumenya Imana” kuronsa umuntu ukumurikirwa nyakuri.​—Imigani 2:5.

[Akajambo k’epfo]

[Ifoto ku rup. 4]

Ijambo ry’Imana rimeze nk’itara

[Ifoto ku rup. 5]

Imana yitwa nde?

[Ifoto ku rup. 5]

Kazoza k’abantu ni akahe?

[Ifoto ku rup. 6]

Yezu yoba ari Imana Mushoboravyose?

[Ifoto ku rup. 6]

Abapfuye bari hehe?

[Ifoto ku rup. 7]

Izuka ry’abapfuye ni kimwe mu bintu vy’ukuri vy’ishimikiro Bibiliya yigisha