Woba ‘uzoguma ugenda wisunga impwemu’?

“Gume mugenda mwisunga impwemu, ni ho mutazoshitsa icipfuzo c’umubiri na kimwe”.​—AB’I GALATIYA 5:16, NW.

1. Dushobora gute gutsinda uguhagarika umutima twibaza ngo twoba twaracumuye ku mpwemu?

HARIHO uburyo bwo gutsinda uguhagarika umutima twibaza ngo twoba twaracumuye ku mpwemu nyeranda ya Yehova. Ubwo buryo ni ugukora ivyo intumwa Paulo yavuze agira ati: “Gume mugenda mwisunga impwemu, ni ho mutazoshitsa icipfuzo c’umubiri na kimwe” (Ab’i Galatiya 5:16, NW). Nitwareka impwemu y’Imana ikatuyobora, ntituzokwizizirwa n’ivyipfuzo vy’umubiri bitabereye.​—Abaroma 8:2-10.

2, 3. Nitwaguma tugenda twisunga impwemu, bizogira ico bidukozeko gute?

² Uko ‘tuguma tugenda twisunga impwemu’, ni ko iyo nguvu ikora ya Yehova Imana izotuma tumugamburukira. Tuzogaragaza kamere zishimwa n’Imana, haba mu busuku turangura, mw’ishengero, mu ngo zacu, n’ahandi aho ari ho hose. Ivyamwa vy’impwemu bizokwigaragaza mu kuntu dufata uwo twubakanye, abana bacu, abo dusangiye ukwizera be n’abandi.

³ Kubaho “ku bijanye n’impwemu nk’uko Imana ibona ibintu”, biradushoboza kureka icaha (1 Petero 4:1-6, NW). Nitwayoborwa n’impwemu, ntituzokwigera dukora icaha kidaharirwa. Ariko none, nitwaguma tugenda twisunga impwemu, ni mu bundi buryo bwiza ubuhe bizogira ico bikoze kuri twebwe?

Nugume wiyegereje Imana na Kristu

4, 5. Kugenda twisunga impwemu bigira ico bikoze gute ku kuntu tubona Yezu?

⁴ Kubera yuko tugenda twisunga impwemu nyeranda, turashobora kuguma dufitaniye n’Imana be n’Umwana wayo ubucuti somambike. Igihe Paulo yandika ibijanye n’ingabirano zo mu buryo bw’impwemu, yabwiye abo bari basangiye ukwizera b’i Korinto ati: “Mbamenyesha yukw ata muntu avugishwa n’[im]pwemu [y]’Imana, avuga ati Yesu n’ikivume: kand’ata muntu ashobora kuvuga, ati Yesu n’[“Umukama”, UB], atabivugishijwe n’[im]pwemu [nyeranda]” (1 Ab’i Korinto 12:1-3). Impwemu yose ituma abantu bavuga ko Yezu ari ikivume nta handi ikomoka atari kuri Shetani wa Mubesheranyi. Ariko rero, twebwe abakirisu tugenda twisunga impwemu nyeranda, twarajijutse ko Yehova yazuye Yezu mu bapfuye maze amushira hejuru y’ibindi biremwa vyose (Ab’i Filipi 2:5-11). Turizera inkuka y’incungu ya Kristu tukongera tukemera ko Yezu ari we Imana yagenye ngo atubere Umukama.

⁵ Abantu bamwebamwe bo mu kinjana ca mbere biyita abakirisu bararahiye bararengwa ko Yezu ataje mu mubiri (2 Yohana 7-11). Kwemera ivyo vyiyumviro bitari vyo vyatumye bamwebamwe bamirira kure inyigisho z’ukuri zerekeye Yezu, ari we Mesiya (Mariko 1:9-11; Yohana 1:1, 14). Kugenda twisunga impwemu nyeranda biradukingira ngo ntitugwe muri mwene ubwo buhuni. Yamara, kuguma turi maso mu buryo bw’impwemu ni vyo vyonyene bishobora kudufasha kuguma tugirirwa ubuntu bwa Yehova tutabereye no kuguma ‘tugendera mu kuri’ (3 Yohana 3, 4). Nimuze rero tugire umwiyemezo wo kwamirira kure ubuhuni ubwo ari bwo bwose kugira dushobore kuguma dufitaniye ubucuti bukomeye na Data wa twese wo mw’ijuru.

6. Ni kamere izihe impwemu y’Imana yama mu bagenda bayisunga?

⁶ Ugusenga ibigirwamana kw’abahuni be n’ukwirema ibice Paulo yabishize mu mugwi umwe n’“ibikorwa vy’umubiri”, nk’ubusambanyi n’ubushirasoni. Ariko yasiguye ati: “Aba Kristu Yezu, umubiri bawumanikanye n’inambu zawo be n’ivyipfuzo vyawo. Nimba tubaho twisunga impwemu, tubandanye kugendera ku rutonde twisunga impwemu nyene” (Ab’i Galatiya 5:19-21, 24, 25, NW). Ni kamere izihe inguvu ikora y’Imana yama mu babaho bayoborwa n’impwemu kandi bakagenda bayisunga? Paulo yanditse ati: “Ivyamwa vy’impwemu ni urukundo, akanyamuneza, amahoro, ukwiyumanganya, ubuntu, ukumera neza, ukwizera, ubwitonzi, ukwigumya” (Ab’i Galatiya 5:22, 23, NW). Reka duce irya n’ino iyo mice y’ivyamwa vy’impwemu.

‘Nimukundane’

7. Urukundo ni iki, kandi ni ibintu bimwebimwe ibihe biruranga?

⁷ Urukundo, urusanzwe ari umuce umwe w’ivyamwa vy’impwemu, akenshi rusobanura ukugirira abandi igishika kigera kure no kubitwararika mu buryo buzira ubwikunzi, bifatanije no kubagira abagenzi somambike. Ivyanditswe bivuga yuko ‘Imana ari urukundo’ kubera ko ari yo karorero ruheta mu kugaragaza iyo kamere. Urukundo ruhambaye Imana be n’Umwana wayo bakunze umuryango w’abantu rugaragarira mu nkuka y’incungu Yezu Kristu yatanze (1 Yohana 4:8; Yohana 3:16; 15:13; Abaroma 5:8). Twebwe abayoboke ba Yezu, urukundo dufitaniye ni rwo ruturanga (Yohana 13:34, 35). Nkako, dusabwa ‘gukundana’ (1 Yohana 3:23). Vyongeye, Paulo avuga ko urukundo rwihangana kandi rugira neza. Ntirugira ishari kandi ntirwihayagiza, ntirukora ibiteye isoni canke ngo rurondere ivyarwo. Urukundo ntirwiciraho canke ngo rwiyumvire ikibi ku bantu. Runezeranwa n’ukuri, ntirunezererwa ukugabitanya kw’abandi. Urukundo rurenzako muri vyose, rwizera vyose, rwizigira vyose, kandi rwihanganira vyose. N’ikindi kandi, nta ho rushira.​—1 Ab’i Korinto 13:4-8.

8. Ni kubera iki dukwiye kugaragariza urukundo abo dusangiye ugusenga Yehova?

⁸ Nitwareka impwemu y’Imana ikama urukundo muri twebwe, iyo kamere izokwigaragariza mu bucuti dufitaniye n’Imana be na bagenzi bacu (Matayo 22:37-39). Intumwa Yohani yanditse ati: “Ūdakundana yama mu rupfu. Uwanka mwene Data wundi n’umwicanyi; kandi murazi yukw ata mwicanyi yogira ubugingo budashira ngo bugume muri we” (1 Yohana 3:14, 15). Umuntu yaba yishe uwundi yashobora kuronka ubuhungiro mu gisagara c’ubuhungiro co muri Isirayeli, igihe gusa ataba yari asanzwe yanka uwo yaba yishe (Gusubira mu vyagezwe 19:4, 11-13). Nitwayoborwa n’impwemu nyeranda, tuzokwerekana ko dukunda Imana, abo dusangiye ugusenga be n’abandi.

‘Umunezero wa Yehova ni zo nkomezi zawe’

9, 10. Umunezero ni iki, kandi ni imvo zimwezimwe izihe zotuma tunezerwa?

⁹ Umunezero, ari ko kanyamuneza, ni ukugira agahimbare ntangere. Yehova ni “Imana ihimbawe” (1 Timote 1:11, UB; Zaburi 104:31). Umwana w’Imana arahimbarwa no gukora ivyo Se wiwe agomba (Zaburi 40:8; Abaheburayo 10:7-9). Vyongeye, ‘umunezero wa Yehova ni zo nkomezi zacu’.​—Nehemiya 8:10.

¹⁰ Umunezero uva ku Mana uratuma dushira akanyota koko igihe dukora ivyo igomba naho twoba turi mu bintu bigoye, twishwe n’intuntu canke turi mu ruhamo. Ese ukuntu “ukumenya Imana” bituma tugira agahimbare ntangere (Imigani 2:1-5)! Ubucuti burangwa umunezero dufitaniye n’Imana bushingiye ku bumenyi butagira amakosa, ku kuyizera no ku kwizera inkuka y’incungu Yezu yatanze (1 Yohana 2:1, 2). Kuba turi mu bagize umuryango w’abavukanyi umwe rudende w’ukuri ukwiye kw’isi yose, ni ikindi kintu gikwiye gutuma tugira umunezero (Zefaniya 3:9; Hagayi 2:7). Icizigiro cacu c’Ubwami be n’agateka ntangere twatewe ko kwamamaza inkuru nziza biratuma tugira umunezero (Matayo 6:9, 10; 24:14). Icizigiro dufise co kubaho ibihe bidahera na co nyene kiratuma tugira umunezero (Yohana 17:3). Kubera yuko dufise ico cizigiro ntangere, turakwiye ‘kunezerwa rwose’.​—Gusubira mu vyagezwe 16:15.

Nube umunyamahoro n’uwiyumanganya

11, 12. (a) Wosigura gute amahoro? (b) Amahoro ava ku Mana agira ico akoze gute kuri twebwe?

¹¹ Amahoro, ayasanzwe ari uwundi muce w’ivyamwa vy’impwemu, ni ukwumva utekanye kandi udahagaritse umutima. Data wa twese wo mw’ijuru ni Imana y’amahoro, kandi dukurwa amazinda duti: “Uhoraho azoha abantu biwe umugisha w’amahoro” (Zaburi 29:11; 1 Ab’i Korinto 14:33). Yezu yabwiye abigishwa biwe ati: “Amahoro ndayabasigaranye, amahoro yanje ndayabagabiye” (Yohana 14:27). None ivyo vyofashije gute abayoboke biwe?

¹² Amahoro Yezu yahaye abigishwa biwe yaratumye imitima yabo be n’imizirikanyi yabo bitekana yongera aratuma baticwa n’ubwoba. Bararonse canecane amahoro igihe baronswa impwemu nyeranda bari barasezeraniwe (Yohana 14:26). Muri iki gihe, iyo tuyobowe n’impwemu kandi amasengesho yacu akishurwa, turagira “amahoro y’Imana” atagira ukwo yovugwa, ayatuma imitima yacu be n’imizirikanyi yacu bitekana (Ab’i Filipi 4:6, 7). N’ikindi kandi, impwemu ya Yehova iradufasha gutekanirwa no kugiriranira amahoro n’abo dusangiye ukwizera be n’abandi bantu.​—Abaroma 12:18; 1 Ab’i Tesalonike 5:13.

13, 14. Ukwiyumanganya ni iki, kandi ni kubera iki dukwiye kugaragaza iyo kamere?

¹³ Ukwiyumanganya kurafitaniye isano n’ukugira amahoro, kuko kudufasha kwihangana turindiyeko igihe dusomborokejwe canke tugiriwe nabi, twizigiye yuko ibintu bizogenda neza. Imana iriyumanganya (Abaroma 9:22-24). Yezu na we nyene yaragaragaje iyo kamere. Turashobora kwungukira ku kuba yarayigaragaje, kubera ko Paulo yanditse ati: “Icatumye ngirirwa ikigongwe n’ukugira ngo Yesu Kristo yerekanire muri jewe gahebuza, [“ukwiyumanganya”, NW] kwiwe kwose, mbe icitegererezo c’abazomwizera bakaronka ubugingo budashira”.​—1 Timoteyo 1:16.

¹⁴ Kamere y’ukwiyumanganya iradufasha kwihangana igihe abandi bakoze canke bavuze ibintu bitaranga ubuntu kibure ivyo batabanje kwiyumvira. Paulo yahimirije abakirisu bagenziwe ati: “Mube abiyumanganya kuri bose” (1 Ab’i Tesalonike 5:14, NW). Kubera yuko umwe wese muri twebwe ari umunyagasembwa kandi bishika agakora amakosa, nta nkeka ko twipfuza ko abandi batwihanganira, bakiyumanganya igihe bishitse tugakora amakosa mu vyo tugiriranira na bo. Ku bw’ivyo rero, nimuze twiyemeze ‘[“kwiyumanganya”, NW] tubigiranye umunezero’.​—Ab’i Kolosayi 1:9-12.

Nugaragaze ubuntu n’ukumera neza

15. Nusigure ubuntu ico ari co, wongere utange uburorero bw’ingene bwagaragajwe.

¹⁵ Tuba tugaragaje ubuntu igihe twitwararika abandi mu kubavugisha kigenzi mu buryo bwubaka be no mu kubakorera ibintu biranga ubuntu kandi vy’ingirakamaro. Yehova ni umunyabuntu, kandi n’Umwana wiwe ni ko ameze (Abaroma 2:4; 2 Ab’i Korinto 10:1). Vyitezwe ko abasukurira Imana na Kristu baba abanyabuntu (Mika 6:8; Ab’i Kolosayi 3:12). Mbere n’abantu bamwebamwe batari bafitaniye ubucuti n’Imana baragaragaje “ubuntu bw’akataraboneka” (Ivyakozwe n’intumwa 27:3; 28:2, NW). Nta mazinda rero ko dushobora kugaragaza ubuntu niba ‘tuguma tugenda twisunga impwemu’.

16. Ni mu bihe bimwebimwe ibihe vyosaba ko tugaragaza ubuntu?

¹⁶ Turashobora kugaragaza ubuntu n’igihe nyene hoba hari imvo yumvikana yotuma dushavura kubera yuko hari uwatubwiye amajambo ababaza canke yatugiriye ibintu bitaranga ubuntu. Paulo yavuze ati: “Ni mwaraka ntibibakoreshe icaha: izuba ntirirenge mukiratse, kandi ntimuhe wa Murwanizi icicaro. Mugiriranire neza, mugiriranire imbabazi, muharirane, nk’ukw Imana na yo yabahaririye muri Kristo” (Abanyefeso 4:26, 27, 32). Birabereye canecane ko tugaragariza ubuntu abariko bashikirwa n’ibigeragezo. Emwe, umukurambere mukirisu ntiyoba agaragaje ubuntu igihe atoha umuntu impanuro zishingiye ku Vyanditswe ngo n’uko adashaka kumubabariza umutima kandi biboneka ko uwo muntu ahakwa guheba kugendera mu “ngeso nziza . . . no mu kugororoka no mu kuri”.​—Abanyefeso 5:9.

17, 18. Ukumera neza ni iki, kandi ni uruhara uruhe iyo kamere ikwiye kurangura mu buzima bwacu?

¹⁷ Ukumera neza ni ukugira ingeso nziza, ukuba umuntu ahebuje mu vy’inyifato runtu, canke ukuba umuntu mwiza. Imana ni nziza bimwe bitagira agahaze (Zaburi 25:8; Zekariya 9:17). Yezu ni umunyangeso nziza kandi arafise kamere ihebuje mu vy’inyifato runtu. Yamara, ntiyemeye kwitwa “mwiza” igihe yahamagarwa ngo “Mwigisha mwiza” (Mariko 10:17, 18). Ivyo vyarumvikana kubera ko yari azi neza yuko Imana ari yo iri kw’isonga mu bijanye no kumera neza.

¹⁸ Ubushobozi dufise bwo gukora iciza buraburabuzwa n’icaha twarazwe (Abaroma 5:12). Naho ari ukwo, turashobora kugaragaza iyo kamere mu gihe dusenze Imana tuyisaba ‘kutwigisha ukumera neza’ (Zaburi 119:66, NW). Paulo yabwiye abakirisu bagenziwe b’i Roma ati: “Bene Data, nanje nyene ndazi ivyanyu ntakekeranya, yuko mwuzuye ineza, mwuzuye ubgenge bgose, mushobora no guhanūrana” (Abaroma 15:14). Umucungezi mukirisu ategerezwa kuba “akunda ivyiza” (Tito 1:7, 8). Nitwayoborwa n’impwemu y’Imana, ukumera neza ni kwo kuzoturanga, kandi Yehova ‘azotwishura ivyiza dukora’.​—Nehemiya 5:19; 13:31.

‘Ukwizera kutari ukw’uburyarya’

19. Nusigure ukwizera ico ari co wisunze Abaheburayo 11:1.

¹⁹ Ukwizera, ugusanzwe na kwo nyene ari kimwe mu vyamwa vy’impwemu, ni “ukwitega ata mazinda ibintu vyizigiwe, iyerekanwa riboneka ry’ibintu biriho koko naho bitabonwa” (Abaheburayo 11:1, NW). Igihe dufise ukwizera, turizigira tudakeka ko ikintu cose Yehova asezerana kiba gisa n’aho camaze kuranguka. Ikimenyamenya kidukura amazinda c’ibintu biriho koko bitabonwa kirakomeye cane ku buryo ukwizera kuvugwa ko ata ho gutaniye n’ico kimenyamenya. Nk’akarorero, ivyaremwe biradukura amazinda yuko hariho Umuremyi. Ukwo ni kwo kwizera tuzogaragaza nitwaguma tugenda twisunga impwemu.

20. “Icaha gikunda kutwizingirako vuba” ni ikihe, kandi dushobora gute kwirinda ico caha be n’ibikorwa vya kameremere kacu?

²⁰ Ukubura ukwizera ni “icaha gikunda kutwizingirako vuba” (Abaheburayo 12:1). Turakeneye kwiheka ku mpwemu y’Imana kugira ngo twirinde ibikorwa vya kameremere kacu, uguhahamira amaronko be n’inyigisho z’ikinyoma, ibishobora kwonona ukwizera kwacu (Ab’i Kolosayi 2:8; 1 Timoteyo 6:9, 10; 2 Timoteyo 4:3-5). Impwemu y’Imana irama mu basavyi ba Yehova bo muri iki gihe ukwizera nka kumwe ivyabona b’imbere y’ubukirisu be n’abandi bantu bavugwa muri Bibiliya bari bafise (Abaheburayo 11:2-40). Vyongeye, “ukwizera [kwacu] kutar’ukw’uburyarya” kwoshobora gukomeza cane ukwizera kw’abandi.​—1 Timoteyo 1:5; Abaheburayo 13:7.

Niwerekane ubwitonzi n’ukwigumya

21, 22. Ubwitonzi ni iki, kandi ni kubera iki dukwiye kugaragaza iyo kamere?

²¹ Ubwitonzi ni ukugaragaza ubugwaneza mu kuntu tumeze no mu kuntu twigenza. Ubwitonzi ni imwe muri kamere z’Imana. Ivyo tubibwirwa n’uko Yezu, uwarangwa n’ubwitonzi, yagaragaza mu buryo butagira agahaze kamere za Yehova (Matayo 11:28-30; Yohana 1:18; 5:19). Ni igiki none twebwe abasavyi b’Imana dusabwa?

²² Twebwe abakirisu, vyiterwa ko ‘twerekana ubwitonzi ku bantu bose’ (Tito 3:2, NW). Turagaragaza ubwitonzi mu busuku turangura. Abafise kamere zisabwa zo mu vy’impwemu bahanurwa kubogora umukirisu yahuvye babigiranye “umutima w’ubwitonzi” (Ab’i Galatiya 6:1, NW). Umwe wese muri twebwe yoshobora kugira ico aterereye ku bumwe n’amahoro twebwe abakirisu dufitaniye mu “kwiyorosha kwo mu muzirikanyi n’ubwitonzi” (Abanyefeso 4:1-3, NW). Turashobora kwerekana ubwitonzi niba tuguma tugenda twisunga impwemu twongera tugaragaza ukwigumya.

23, 24. Ukwigumya ni iki, kandi kudufasha gute?

²³ Ukwigumya kuradushoboza kuguma dusuzuma ivyo twiyumvira, ivyo tuvuga be n’ivyo dukora. Yehova ‘yagumye agaragaza ukwigumya’ mu kuntu yafashe Abanyababiloni basanganguye Yeruzalemu (Yesaya 42:14, NW). Umwana wiwe ‘yaradusigiye icitegererezo’ mu kugaragaza ukwigumya igihe yababazwa. Vyongeye, intumwa Petero yahanuye abakirisu bagenziwe ko ‘ubwenge bobwongerako ukwigumya’.​—1 Petero 2:21-23; 2 Petero 1:5-8.

²⁴ Abakurambere bakirisu vyitezwe ko bagaragaza ukwigumya (Tito 1:7, 8). Mu vy’ukuri, abantu bose bayoborwa n’impwemu nyeranda barashobora kugaragaza ukwigumya, gutyo bagashobora kwirinda ubushegabo, imvugo iteye isoni canke ikintu cose cotuma batemerwa na Yehova. Nitwareka impwemu y’Imana ikama muri twebwe ukwigumya, abandi bazovyibonera kubera yuko tuvuga kandi twigenza mu buryo Imana ishima.

Nugume ugenda wisunga impwemu

25, 26. Kuguma tugenda twisunga impwemu bigira ico bikoze gute ku bucuti dufitaniye be no ku cizigiro ca kazoza dufise?

²⁵ Nitwagenda twisunga impwemu, tuzoba abamamaji b’Ubwami b’abanyamwete (Ivyakozwe n’intumwa 18:24-26). Tuzoba abantu babana neza n’abandi, kandi canecane abantu bayobokera Imana bazohimbarwa no kwifatanya natwe. Nka kurya nyene bigenda ku bayoborwa n’impwemu nyeranda, na twebwe nyene tuzobera isoko ry’indemesho, mu buryo bw’impwemu, abo dusangiye ugusenga Yehova (Ab’i Filipi 2:1-4). Uko si kwo none abakirisu bose bipfuza kumera?

²⁶ Muri iyi si itwarwa na Shetani, ntivyoroshe kugenda twisunga impwemu (1 Yohana 5:19). Ariko ntiwumve, abantu amamiliyoni bariko barabigira muri iki gihe. Nitwizigira Yehova n’umutima wacu wose, tuzonezererwa ubuzima muri iki gihe kandi tuzoshobora kuguma tugendera mu nzira zigororotse za wa Mutanzi munyarukundo w’impwemu nyeranda ibihe bidahera.​—Zaburi 128:1; Imigani 3:5, 6.

Wokwishura gute?

• ‘Kugenda twisunga impwemu’ bigira ico bikoze gute ku bucuti dufitaniye n’Imana be n’Umwana wayo?

• Ivyamwa vy’impwemu nyeranda bigizwe na kamere izihe?

• Ni uburyo bumwebumwe ubuhe twogaragazamwo ivyamwa vy’impwemu y’Imana?

• Kugenda twisunga impwemu bigira ico bikoze gute ku buzima bwacu muri iki gihe be no ku cizigiro ca kazoza dufise?

[Ifoto ku rup. 23]

Impwemu nyeranda ya Yehova ituma dukunda abo dusangiye ukwizera

[Ifoto ku rup. 24]

Nugaragaze ubuntu biciye ku bintu vy’ingirakamaro uvuga canke ukora