“Anyobora mu nzira zo kugororoka”

Nk’uko vyavuzwe na Olga Campbell

“Akarorero keza ni nk’inkengeri ihamagarira abandi kwitaba akamo. Waravugije inkengeri maze nanje ndayitabira”. Ayo ni yo majambo yavuzwe na murumunanje yitwa Emily. Ico gihe yari yanyandikiye kugira ngo ankeze kubera yuko nari ndumije imyaka 60 ndi mu murimo w’igihe cose. Reka mbanze ndabiganire ubuzima naciyemwo nkiri muto be n’ingene nahavuye ntangura uwo murimo nagize umwuga mu buzima bwanje bwose.

NAVUTSE ku wa 19 Nzero 1927, mvukira mu muryango w’abanya Ukraine b’abarimyi waba hafi y’igisagara citwa Wakaw, mu ntara ya Saskatchewan iri amaja mu Burengero bwa Kanada. Nari umwana agira gatandatu, musanzanje w’ihasa ryanje yitwa Bill na we akagira indwi, mu muryango w’abana umunani. Twebwe abana twaraja gufasha dawe ibikorwa vyo mu mirima, uno akaba yari umukozi akora agatama. Twaba mu nzu ntoya, kandi mawe yaratwitwararika cane naho yagira imibabaro ikomeye yaterwa na ya ndwara ya rumatizime ifatira mu ngingo z’amagufa, iyo ikaba ari yo yahavuye imuhitana. Igihe yapfa yari afise imyaka 37 gusa, nanje nkaba nari mfise imyaka 4 gusa.

Haheze amezi atandatu mawe apfuye, dawe yaciye azana uwundi mugore. Budakeye na kabiri, indyane zaciye ziganza aho mu rugo iwacu, urwo twahavuye tubanamwo na barumunanje batanu bavyawe na muka data. Jewe naragerageza kwubaha uwo muka data, mugabo musazanje mukuru yitwa John we, ntivyamworohera na gato kumwubaha.

Mu mpera z’imyaka ya 1930, twe na Bill twaratanguye ishure ryisumbuye. Igihe twaba turi aho kw’ishure twarashobora kuba turikinze indyane zarangwa mu rugo iwacu. Igihe Intambara ya kabiri y’isi yose yari yegereje, ivyo kwishimira igihugu vyari vyeze mu gihugu cose. Umwigisha wacu mushasha yaratanguje ivyo kuramutsa ibendera, mugabo hari umwigeme umwe yanse kubigiramwo uruhara. Abandi banyeshure baramucucagiye ibitutsi. Ariko rero, naramwemeye kubera ukuntu yagaragaje uburindutsi maze nca ndamubaza igituma yanse kuramutsa ibendera. Yaransiguriye ko yari Umutohoji wa Bibiliya, uko akaba ari ko rimwerimwe bita Ivyabona vya Yehova ico gihe, be n’uko icubahiro yagiha Imana yo nsa.​—Kuvayo 20:2, 3; Ibikorwa 5:29.

Nirwanako

Mu 1943, naratanguye gukora akazi ahitwa Prince Albert, ako kazi kakaba kari ako gupakira mu makamyo amakaziye y’ibinyobwa bitambiye no kuyashira ababa bayaranguye. Kubera yuko nipfuza cane kuronka iconyobora mu vy’Imana, naraguze Bibiliya mugabo rero nasanze igoye cane gutahura ku buryo nakoroye amosozi y’umubabaro. Ca gisabisho ca Dawe wa twese ni nka co kintu conyene nari nzi ku bijanye na Bibiliya.​—Matayo 6:9-13.

Ku musi w’iyinga umwe, hari umukenyezi w’umunyedini, ari na we yari nyene inzu nabamwo, yanyiganiye n’ubwishime n’akantu yuko yari yahindiye hanze uwo yise ngo ni umupfasoni wa Bibiliya. Nariyumviriye nti: ‘Bigenda gute ngo agire umutima mubi gutyo?’. Haciye amayinga makeya, narumvise ntamerewe neza maze bituma kuri uwo musi nguma i muhira, sinaja mu misa. Kuri uwo musi, umwe yiswe ngo ni umupfasoni wa Bibiliya yaragarutse.

Yambajije ati: “Woba uhora usenga?”

Namwishuye nti: “Mpora mvuga ca gisabisho ca Dawe wa twese”.

Narumvirije ndabishashaye igihe yariko aransigurira ico ayo majambo ya Yezu asobanura. Yaranyemereye ko azogaruka ku wa gatatu w’indwi ikurikira.

Igihe wa mukenyezi nyene inzu twabamwo yataha, naramubwiranye akamwemwe ivyerekeye umwe yise ngo ni umupfasoni wa Bibiliya, uno akaba yari Icabona ca Yehova. Icambabaje, uwo mukenyezi nyene inzu yaciye ambwirana iterabwoba ati: “Niyaramuka agarutse ku musi wa gatatu, nzoca ndabahindira hanze mwempi!”.

Narabaririkije nitonze hafi y’aho naba ngerageza kurondera wa mupfasoni w’Icabona, uwo nari namenye ko yitwa Rampel. Igihe natora aho aba, naramusiguriye ingorane nari mfise maze nca ndamusaba kunyiganira ibintu vyose yari gushobora kumbwira ku bijanye na Bibiliya. Emwe, wamengo twahetuye Bibiliya kuva mw’⁠Itanguriro gushika mu Vyahishuwe! Yarasanishije imisi ya none be n’imisi ya Nowa, igihe Imana yazana umuhero kw’isi y’abantu batari bagororotse maze ikarokora Nowa n’umuryango wiwe ikabashira mw’isi ityoroye.​—Matayo 24:37-39; 2 Petero 2:5; 3:5-7, 12.

Tumaze umwanya munini tuganira, wa mupfasoni Rampel yavuze ati: “Ndabona ko wemeye yuko izi nyigisho za Bibiliya ari ukuri. Mu ndwi zibiri, Ivyabona vya Yehova bazogira iteraniro, kandi urashobora kuzobatizwa”. Muri iryo joro naraye ntagohetse, nguma nzirikana ku bintu vyose nari nize. Ibatisimu yasa n’ibanga riremereye. Naho ari ukwo, naripfuza gukorera Imana. Naho nari mfise ubumenyi bwa Bibiliya bukeya, narabatijwe ku wa 15 Gitugutu 1943, ico gihe nkaba nari mfise imyaka 16.

Nimukira mu karere ka kure cane

Muri Munyonyo, musazanje yitwa Fred yaransavye ko noja gukora akazi ko kwitwararika ivy’isuku mu nyubakwa yabamwo y’igorofa zibiri mu gisagara ca Toronto, mu Buseruko bwa Kanada. Naravyemeye, nizigiye yuko noshoboye kuharonkera umwidegemvyo mwinshi kuruta wo gusenga Yehova. Imbere y’uko ngenda, naragiye kuramutsa mukurwanje yitwa Ann, uno akaba yari akiba hafi y’i Saskatchewan. Yari amfitiye agakuru yiyumvira ko kari kuntangaza, ako na ko kakaba kari ak’uko we be n’uwundi mukurwanje yitwa Doris bariko bariga Bibiliya n’Ivyabona vya Yehova, maze aca andemesha ko nanje nobigenza gutyo. Naciye ndamuhishurira ico nari naragize akabanga, ico na co kikaba ari uko nari maze kuba Icabona yabatijwe.

Jewe na murumunanje yitwa Emily twarafashe urugendo rurerure n’igariyamoshi tuja i Toronto. Bill yaraje kudutegera ku gituro c’amagariyamoshi maze atujana mu nzu yabanamwo na Fred be n’uwundi yitwa John. Narabajije Fred abandi bantu baba muri iyo nyubakwa abo ari bo. Yishuye ati: “Ndazi ko utaza kubura gutangara. Uribuka Alex Reed umwe wo ku gatumba iwacu? Aba muri iri gorofa ryo hejuru, kandi uwo mugabo adashoboka aritaho ivyo ba Batohoji ba Bibiliya bigisha”. Emwe, naciye numva nuzuye umunezero mu mutima!

Naciye nduga nyaragasa nja kuraba Alex maze duca turavugana ukuntu twojana kw’ikoraniro muri iryo joro nyene. Nipfuza kwitaba amakoraniro ubwo nyene kugira ngo basazanje ntibaronke umwanya wo kugerageza kunjijura ngo sindayitabe. Haciye igihe gito, naragiye mu gikorwa co kwamamaza ari bwo bwa mbere, naho ata nyigisho nyezina ya Bibiliya nari bwigere ngirirwa. Narahimbawe no gushobora kuyaga n’abantu benshi baturuka muri Ukraine, nkoresheje ururimi nari narize nkiri umwana.

Bill yarakunda gusoma Umunara w’Inderetsi, uwo akenshi nahora nshira mu cumba ciwe. Amaze kwimukira muri Kolombiya y’Abongereza mu Burengero bwa Kanada, naramurungikiye ingabirano y’agakaratasi namurihiyeko amahera kugira ngo azokwame aronka Umunara w’Inderetsi. Naho yari umuntu asanzwe yivugira make, yaranyandikiye ikete ryo gukenguruka rigizwe n’impapuro cumi. Haciye igihe, yareguriye ubuzima bwiwe Yehova kandi yahavuye acika umucungezi mukirisu w’umunyamwete. Icanezereje cane ni uko batanu mu bo tuvukana, ni ukuvuga Bill, Ann, Fred, Doris be na Emily, bahavuye baba abasavyi ba Yehova bamwiyeguriye.

Ku wa 22 Rusama 1945, Leta ya Kanada yarakuyeho itegeko ryabuza igikorwa c’Ivyabona vya Yehovaa. Mu bisanzwe, igihe ntari bwumve iryo tangazo, sinari bwamenye ko igikorwa cari kibujijwe. Jewe n’umugenzi wanje yitwa Judy Lukus twarafashe ingingo yo gutangura umurimo w’igihe cose mu gukorera ubutsimvyi mu karere ka kure ko mu Buseruko, muri Québec ivugwamwo igifaransa. Igihe benewacu Doris na Emily bumva imigambi dufise, na bo baciye bafata ingingo yo gukorera ubutsimvyi i Vancouver muri Kolombiya y’Abongereza, ako kakaba ari akarere ko mu Burengero bw’ico gihugu ca Kanada.

Ukwinubana gushingiye kw’idini kwarangwa i Québec

Igihe nimukira i Québec ntikwabaye uguhindura akarere gusa. Muri ico gisagara, igikorwa Ivyabona bakora co kuvuga ubutumwa cararwanywa bimwe bikazeb. Twarahimbawe cane no kugira uruhara mu gushikiriza abantu agapapuro k’inkuru nziza kavuga ngo La haine ardente du Québec pour Dieu, pour Christ et pour la liberté, est un sujet de honte pour tout le Canada (Urwanko rukaze Québec yanka Imana, Kirisitu be n’umwidegemvyo, ni ikintu giteza isoni Kanada yose). Ubwo butumwa bukaze bwarashize ku kabarore ukwinubana gushingiye kw’idini kwagirirwa Ivyabona.

Twamaze imisi 16 tuza turacisha utwo dupapuro tw’inkuru nziza munsi y’imiryango tubigiranye ukwiyubara, buri musi tukaba twatangura ico gikorwa nk’isaha zibiri zo mu gatondo. Igihe twari tugeze ku nyubakwa imwe, twaramenye yuko abapolisi bariko baraduhiga. Twaririnze ko badufata mu kwinyegeza mu kayira kari hagati y’amazu. Ku musi wakurikiye, twarasubiye kuja mu mabarabara gutanga ibinyamakuru Umunara w’Inderetsi na Réveillez-vous! Uko amezi yagiye ararengana, abapolisi baradufashe incuro nyinshi cane ku buryo tutashobora no kuzimenya. Kugira ngo nitegurire ivyo kumara imisi mu gasho, igihe cose nama ngenda nitwaje umujigiti wanje be na ka kantu gakoreshwa mu gusiga ingohe kitwa tiro.

Muri Munyonyo 1946, Nathan Knorr, uno akaba ari we ico gihe yari ahagarikiye igikorwa Ivyabona barangurira kw’isi yose, yaratugendeye avuye i Brooklyn muri New York. Yaratumiye abatsimvyi 64 muri twebwe twakorera i Québec kugira ngo bitabe ivyigwa mu mugwi ugira icenda wa rya Shure ry’ivya Bibiliya ry’i Gileyadi rya Watchtower ryari i South Lansing, muri New York. Muri iryo Shure twaraharonkeye ivyigwa vya Bibiliya vy’urutavanako vyamaze amezi atanu. Tumaze kuronka impapuro z’umutsindo muri Myandagaro 1947, twararungitswe mu bisagara bitandukanye vyo muri Québec kugira ngo tuje gutanguza amashengero mashasha.

Ubusuku buzana impera

Bane mu bavukanyikazi b’abirebange twari kumwe barungitswe mu gisagara ca Sherbrooke. Twarimenyereza dushirutse ubute kuvuga igifaransa, tukaguma duhadikiriza amavuga igihe twaba turiko turagenda mu cibare twamamarizamwo inkuru nziza canke tuvuyeyo. Mu gihe co kwivuna umusase, wasanga rimwe na rimwe tudafise amahera yo kugura ivyo dufungura, akaba ari co gituma twaca dutaha i muhira maze tukiyigisha. Uwo twakorana yitwa Kay Lindhorst yari azi cane ivy’indimburo. Kugira ngo nshobore gutahura indimburo y’igifaransa, yabanje kunyigisha iy’icongereza.

Igihe gishimishije kuruta ibindi mu murimo wanje w’ubutsimvyi cabaye ico namaze i Victoriaville, ico gihe ico gisagara kikaba cabamwo abantu nka 15.000. Muri ako karere abantu bavuga icongereza bari imparurwa, ico kikaba ari co gituma kuri twebwe hari ahantu heza gusumba ahandi ho kuryohorera igifaransa cacu. Indwi ya mbere twahamaze yari iteye umunezero cane. Ahantu hose twagenda abantu barakira ibinyamakuru twabaha. Igihe twasubira kubaraba, twasanze imiryango yose be n’amadirisha vyugaye. Uti none vyari vyagenze gute?

Umupatiri wo muri ako karere yari yabwiye abo bantu ngo ntibatwumvirize. Igihe rero twariko tugenda tuva ku nzu tuja ku yindi, hari abana badukurikiye bari kure inyuma yacu, baza baradutera amabuye be n’ibivunjivunji vya shelegi. Naho ari ukwo, hariho abantu batari bake bipfuza cane kwumva ubutumwa bwo muri Bibiliya. Mu ntango, twabagendera gusa bumaze guhwibira. Ariko rero, igihe batera imbere mu bumenyi bwerekeye Bibiliya, bariga abantu bose bababona naho ababanyi babo babaraba ribi.

Mu myaka ya 1950, jewe na benewacu twarasubiye kuja gutembera i Wakaw. Kw’ikoraniro rimwe ry’ishengero twariganiye abandi ivyo twiboneye igihe twariko turamamaza. Inyuma yaryo, umusuku muhagarikizi yatubwiye ati: “Mama wanyu azohimbarwa cane niyazuka maze akamenya ko abana biwe bahavuye baba Ivyabona vya Yehova”. Yaradusiguriye yuko imbere y’uko apfa yari yaratanguye kwiga Bibiliya n’Ivyabona. Twarakoroye amosozi igihe twamenya ko mawe yariko arironsa ubumenyi bwerekeye ukuri kwo muri Bibiliya, ubwo ata gukeka ko yari kuba yarasangiye natwe iyo urupfu rutamukubiranya.

Nubaka urwanje maze ngakorana n’umunega wanje mu busuku

Mu 1956, narahuye n’uwitwa Merton Campbell, uno akaba ari Icabona yamaze amezi 27 apfunzwe mu kiringo ca ya Ntambara ya kabiri y’isi yose ahorwa ukutagira aho ahengamiye kwa gikirisu. Yari amaze nk’imyaka cumi akorera ku cicaro gikuru c’Ivyabona vya Yehova i Brooklyn. Merton yari afise kamere nyinshi nziza zo mu vy’impwemu, akaba ari co gituma nabona ko yoshoboye kuba umunega mwiza. Twaramaze amezi nk’angahe twandikiranira, kandi icubahiro twahana be n’igishika twari dufitaniye vyahavuye bikomera bivamwo urukundo.

Nubakanye na Merton ku wa 24 Nyakanga 1960. Ese ukuntu ari umuhezagiro kuba maranye imyaka 47 n’umunega mwiza igitangaza akomeye mu vy’impwemu! Merton amaze imyaka 58 akorera mu Rwego rujejwe umurimo, urwo rukaba rusahiriza rukongera rugaha ubuyobozi amashengero y’Ivyabona vya Yehova ari hirya no hino muri Leta Zunze Ubumwe za Amerika. Mu myaka irenga 30 maze i Brooklyn, igikorwa canje cabaye ico gushariza ivyumba vy’abashitsi, mu nyuma na ho nkaba nagiye ndashariza Ingoro nininini z’amateraniro zo mu karere k’igisagara ca New York. Mu 1995, Jewe na Merton twahavuye twimurirwa mu Kigo ntanganyigisho c’Ivyabona vya Yehova c’i Patterson, aho hakaba ari nko ku bilometero 110 mu Buraruko bw’igisagara ca New York.

Igihe nava i muhira ngifise imyaka 12, sinigeze niyumvira yuko umusi uri izina nokikujwe n’umuryango munini wo mu vy’impwemu wobaye urimwo n’abo tuvukana. Ndashashaye gushika mw’isi nshasha y’Imana, aho tuzoshobora gukikuza mawe maze tukamwiganira ivyabaye igihe yari mw’itiro ry’urupfu, na canecane tukamubwira ukuntu twebwe abana biwe Yehova Imana yitwararitse ivyo twari dukeneye mu vy’impwemu abigiranye urukundo. Ese ukuntu duhimbarwa no kuba Yehova yaratuyoboye mu “nzira zo kugororoka”!​—Zaburi 23:3.

[Utujambo tw’epfo]

[Amafoto ku rup. 27]

Abavyeyi banje be n’inzu twabanamwo na bo hamwe n’abana indwi twavukana

[Ifoto ku rup. 29]

Ndi kumwe n’abo twakorana mu busuku i Ottawa, mu 1952

[Ifoto ku rup. 29]

Ndi kumwe n’abo tuvukana (uva ibubamfu uja iburyo): Ann, Mary, Fred, Doris, John, Jewe, Bill, be na Emily

[Ifoto ku rup. 29]

Ndi kumwe na Merton muri iki gihe