Ukurokorwa n’Ubwami bw’Imana kuregereje!

“Ubwami bwawe nibuze. Ivyo ugomba nibibe kw’isi nko mw’ijuru.”​—MAT. 6:10.

1. Inyigisho nyamukuru ya Yezu yari iyihe?

IGIHE Yezu Kristu yashikiriza ya Nsiguro yo ku Musozi, yaravuzemwo ibijanye n’isengesho ry’akarorero, iryaseruye muri make inyigisho yiwe nyamukuru. Yigishije abayoboke biwe gusenga Imana bati: “Ubwami bwawe nibuze. Ivyo ugomba nibibe kw’isi nko mw’ijuru.” (Mat. 6:9-13) Yezu “[yarafashe] urugendo ava mu gisagara aja mu kindi, ava mu kigwati aja mu kindi, yamamaza yongera amenyesha inkuru nziza y’ubwami bw’Imana.” (Luka 8:1) Kristu yahimirije abayoboke biwe ati: ‘Gume mubanza kurondera ubwami n’ubugororotsi bw’Imana.’ (Mat. 6:33) Igihe uzoba uriko uriga iki kiganiro, uraza uraraba uburyo butandukanye wokoreshamwo aya mayagwa mu busuku urangura. Nk’akarorero, rimbura ukuntu woshobora kwishura ibi bibazo: Ubutumwa bw’Ubwami buhambaye ku rugero uruhe? Abantu bakeneye kurokorwa ibiki? Kandi Ubwami bw’Imana buzoturokora gute?

2. Ubutumwa bw’Ubwami buhambaye ku rugero rungana iki?

² Yezu yamenyesheje imbere y’igihe ati: “Iyi nkuru nziza y’ubwami izokwamamazwa mw’isi yose ngo bibe intahe ku mahanga yose; maze umuhero uzoca uza.” (Mat. 24:14) Iyo nkuru nziza yerekeye Ubwami bw’Imana irahambaye kuruta ibindi bintu vyose. Ego cane, ni bwo butumwa buhambaye mw’isi kuruta ubundi bwose! Mu mashengero y’Ivyabona vya Yehova arenga 100.000 ari hirya no hino kw’isi, abasavyi b’Imana hafi imiliyoni indwi bariko baragira uruhara mu gikorwa co kwamamaza ata kindi cogereranywa, bakabwira abandi yuko Ubwami bwamaze gushingwa. Ukuba bwaramaze gushingwa ni inkuru nziza kubera yuko bisobanura ko Imana yashinze intwaro mw’ijuru kugira ngo izokwifatire mu minwe ibintu vyose bikorerwa kw’isi. Igihe ubwo Bwami buzoba buganza, ivyo Yehova ashaka bizoca bikorwa kw’isi nk’uko bikorwa mw’ijuru.

3, 4. Ni ibiki bizoshika igihe ivyo Imana igomba bizoba biba kw’isi?

³ None ni igiki kizoshikira abantu igihe ivyo Imana igomba bizoba bikorwa kw’isi? Yehova “[a]zohanagura amosozi yose ku maso yabo, kandi urupfu ntiruzokwongera kubaho, eka n’ikigandaro canke amaborogo canke ububabare ntibizokwongera kubaho.” (Ivyah. 21:4) Abantu ntibazorwara canke ngo bapfe bivuye ku kuba bararazwe igicumuro be n’agasembwa. Abantu bapfuye Imana yibuka bazoronka akaryo ko kubaho ibihe bidahera, kubera yuko Bibiliya isezerana iti: “Hagiye kubaho izuka ry’abagororotse n’abatagororotse.” (Ibik. 24:15) Nta ntambara, indwara canke inzara bizoba bikiriho, kandi isi izohindurwa Iparadizo. Mbere n’ibikoko biryana muri kino gihe bizobana mu mahoro n’abantu, vyongere bibane mu mahoro hagati yavyo.​—Zab. 46:9; 72:16; Yes. 11:6-9; 33:24; Luka 23:43.

⁴ Kubera yuko ubutegetsi bw’Ubwami buzozana imihezagiro myiza igitangaza nk’iyo, ntibitangaje kubona ubuhanuzi bwo muri Bibiliya buvuga ibijanye n’ubuzima bwo muri ico gihe muri aya majambo ahumuriza agira ati: “Abagwaneza bazoragwa igihugu, bazonezererwa amahoro y’umusēsekara.” Tuvuge iki ku bijanye n’abantu batera akajagari? Ivyanditswe bivuga biti: “Hasigaye igihe gito, umunyakibi ntabeho.” Ariko rero, “abarorereye Uhoraho bazoragwa igihugu.”​—Zab. 37:9-11.

5. Ni igiki kigiye gushikira ivy’isi ya kino gihe?

⁵ Kugira ngo ivyo vyose bibe, ivy’isi ya kino gihe ushizemwo intwaro zayo ziguma zishamirana, amadini yayo aguma acanamwo be n’ivy’urudandaza vyayo birangwa n’uguhiganwa, bitegerezwa kuzobanza gukurwaho. Kandi ivyo ni vyo neza na neza ya ntwaro yo mw’ijuru izokora. Umuhanuzi Daniyeli yarahumekewe n’Imana kugira ngo amenyeshe imbere y’igihe ati: “Ku ngoma z’abo bami [abahari muri kino gihe], Imana yo mw ijuru izohagurutsa ubundi bgami [mw’ijuru] butazokwigera buhangūra, kand’ingoma y’inganji yabgo nta ho izonyagwa n’irindi hanga; ariko buzomara bukomvomvore ubgami bgose [buriho] bg’abo bami; yamara bgo buzohangama gushitsa ibihe vyose.” (Dan. 2:44) Ubwami bw’Imana, iyo akaba ari intwaro nshasha yo mw’ijuru, buzoca butegeka ikibano gishasha co kw’isi. Hazobaho “ijuru rishasha n’isi nshasha . . . , kandi muri ivyo ni ho ubugororotsi buzoba.”​—2 Pet. 3:13.

Muri kino gihe turarushiriza gukenera kurokorwa

6. Bibiliya idondora gute ububi bukorerwa muri ino si mbi?

⁶ Igihe Shetani, Adamu be na Eva bagarariza Imana barondera kwifatira ingingo ubwabo mu bijanye n’icari ciza canke icari kibi, vyatumye umuryango w’abantu utangura guhura n’amakuba. Imyaka irenga 1.600 inyuma y’aho, imbere ya wa Mwuzure waba kw’isi yose, ‘ibibi vy’abantu vyari vyinshi mw’isi, kandi ivyiyumviro vy’imitima yabo vyari vyamogoreye gukora ibibi gusa nantaryo.’ (Ita. 6:5) Haheze nk’imyaka 1.300 inyuma y’uwo Mwuzure, Salomo yarabonye ko ibintu vyari vyarunyutse cane ku buryo yanditse ati: “[Narashimye] abahisi bamaze gupfa kurusha abariho bakibona; mbere kurusha abo bose nshima ūtigeze kubaho, atigeze kubona amabi akorerwa musi y’izuba.” (Umus. 4:2, 3) Imyaka nka 3.000 inyuma y’ico gihe ca Salomo idushikana muri kino gihe cacu, aho ububi buguma bwongerekana cane.

7. Ni kubera iki muri kino gihe ari ho turushiriza gukenera kurokorwa n’Imana?

⁷ Naho ari ivy’ukuri yuko ububi bwamyeho kuva kera na rindi, muri kino gihe ni ho turushiriza gukenera kurokorwa n’Ubwami bw’Imana kuruta ikindi gihe ico ari co cose. Uko ibintu vyari vyifashe mu myaka 100 iheze vyari vyarunyutse kuruta ikindi gihe ico ari co cose, kandi n’ubu birabandanya kuyangara. Nk’akarorero, hari ikigo kimwe (Worldwatch Institute) kivuga giti: “Abantu basize ubuzima mu ntambara mu kinjana [ca 20] baruta incuro zitatu abahitanywe n’intambara zose zabaye kuva mu kinjana ca mbere G.C. gushika mu 1899.” Abantu barenga imiliyoni 100 barahitanywe n’intambara zagiye ziraba kuva mu 1914. Igitabu kimwe c’inkoranyabumenyi kivuga yuko abantu bashika ku miliyoni 60 bahitanywe na ya Ntambara ya kabiri y’isi yose. Kubera yuko ibihugu bimwebimwe biriko birahingura ibirwanisho ruhonyanganda, abantu barafise ubushobozi bwo kuzimanganya igice kinini cane c’abantu baba kw’isi. Vyongeye, naho habaye amaterambere mu vya siyansi be no mu vy’ubuvuzi, buri mwaka inzara iracahitana ubuzima bw’abana bashika hafi imiliyoni zitanu.​—Raba ikigabane ca 9 mu gitabu Mu vy’ukuri Bibiliya yigisha iki?

8. Imyaka ibihumbi n’ibihumbi ubutegetsi bw’abantu bumaze yerekanye iki ata gukeka?

⁸ Utwigoro abantu bagira twarananiwe guhagarika ububi buguma bwimonogoza. Inzego z’ivya politike, iz’ivy’ubudandaji be n’iz’ivy’idini zo muri ino si, ntizigeze zirangura icipfuzo nyamukuru abantu bafise co kuronka amahoro, ugusagamba be n’amagara meza. Aho gutorera umuti ingorane zikomakomeye zugarije abantu muri kino gihe, izo nzego zaje nyabuna gusongera isibe. Mu vy’ukuri, imyaka ibihumbi n’ibihumbi ubutegetsi bw’abantu bumaze yarerekanye ko aya majambo ari ay’ukuri, na yo akaba agira ati: “Inzira umuntu yogenderamwo [ntashobora] kuyigaba; ntibiri mu muntu agenda kwitunganiriza intambuko ziwe.” (Yer. 10:23) Ni vyo, “umuntu umwe agira ububasha ku wundi bgo kumugirira nabi.” (Umus. 8:9) Vyongeye, “ivyaremwe vyose biguma binihira hamwe kandi bikababarira hamwe.”​—Rom. 8:22.

9. Ni ibintu ibihe abakirisu b’ukuri biteze kubona muri iyi “misi ya nyuma”?

⁹ Ku bijanye n’iki gihe cacu, Bibiliya yamenyesheje imbere y’igihe iti: “Mu misi ya nyuma hazobaho ibihe bitoroshe kandi bigoye kwihanganira.” Ubwo buhanuzi bumaze kudondora ukuntu ibintu vyobaye bimeze mu misi ya nyuma igihe intwaro z’abantu zobaye zigitwara, buca buvuga buti: “Abantu babi be n’abahumvyi bazogenda barushiriza kuba babi.” (Soma 2 Timoteyo 3:1-5, 13.) Ivyo ni vyo abakirisu biteze, kubera yuko “isi yose iri mu bubasha bwa wa mubi,” ari we Shetani. (1 Yoh. 5:19) Naho ari ukwo, kwumva ko Imana igiye vuba kurokora abayikunda, ni inkuru nziza. Bazorokorwa bakurwe muri ino si, iyiguma irushiriza kuba mbi mu buryo bwihuta.

Isôko rimwe rudende ryo kwizigirwa mu bijanye no kurokorwa

10. Ni kubera iki Yehova ari we Sôko rimwe rudende ryo kwizigirwa mu bijanye no kurokorwa?

¹⁰ Igihe wamamaza inkuru nziza, niwerekane ko Yehova ari we Sôko rimwe rudende ryo kwizigirwa mu bijanye no kurokorwa. Ni we wenyene afise ububasha bwo kurokora abasavyi biwe ngo abakure mu bihe bibi ivyo ari vyo vyose, kandi akaba yipfuza kubigira. (Ibik. 4:24, 31; Ivyah. 4:11) Turashobora kwizigira tudakeka ko Yehova azokwama arokora abasavyi biwe akongera akarangura imigambi yiwe, kuko yarahiye ati: “N’ukuri, uko niyumviriye ni ko bizoshika.” Ijambo yavuze “ntirizogaruka ubusa.”​—Soma Yesaya 14:24, 25; 55:10, 11.

11, 12. Ni ikimenyamenya ikihe Imana iha abasavyi bayo?

¹¹ Yehova yaratanze ikimenyamenya c’uko azorokora abasavyi biwe igihe azoshitsa urubanza rwiwe ku banyakibi. Igihe Imana yarungika umuhanuzi Yeremiya ngo aje kugira ico abwiye abacumuzi katwa abigiranye uburindutsi, yavuze iti: “Ntuz’ugire ubgoba.” Kubera iki atari kugira ubwoba? Yamubwiye iti: “Ndi kumwe nawe ngo nkurokore.” (Yer. 1:8) Muri ubwo buryo nyene, igihe Yehova yari yimirije gusangangura ibisagara bibi vya Sodomu na Gomora, yararungitse abamarayika babiri ngo baje gukura Loti be n’umuryango wiwe muri ako karere kugira ngo baveyo ata nkomanzi. Yehova yaciye “atiburira kuri Sodomu na Gomora umuriro n’amazuku.”​—Ita. 19:15, 24, 25.

¹² Yehova arashobora kurokora abakora ivyo agomba, mbere ivyo akabigira kw’isi yose. Igihe yarandura ya si mbi ya kera akoresheje Umwuzure, “[yarazigamye] Nowa, umwamamaji w’ubugororotsi, hamwe n’abandi indwi.” (2 Pet. 2:5) Yehova azokwongera kurokora abagororotsi igihe azosangangura isi mbi yo muri kino gihe. Ni co gituma Ijambo ryiwe rivuga riti: “Murondere Uhoraho, yemwe bagwaneza mwese bo kw isi, . . . : murondere ubugororotsi, bo n’ukwicisha bugufi; kumbure muzokinjishwa ku musi w’uburake bg’Uhoraho.” (Zef. 2:3) Ukwo gusangangurwa kw’isi yose kuzotuma ‘abagororotsi bibera mu gihugu, ariko abanyavyaha bakomborwe muri co.’​—Imig. 2:21, 22.

13. Abasavyi ba Yehova bapfuye bazorokorwa gute?

¹³ Naho ari ukwo, hari abasavyi b’Imana batari bake bamaze gupfa bivuye ku ndwara, ku ruhamo be no ku bindi bintu. (Mat. 24:9) None abo bose bazorokorwa gute? Nk’uko twamaze kubibona, “[hazo]baho izuka ry’abagororotse.” (Ibik. 24:15) Ese ukuntu bihumuriza kumenya yuko ata kintu na kimwe gishobora kubuza Yehova kurokora abasavyi biwe!

Intwaro igororotse

14. Ni kubera iki twizigira tudakeka yuko Ubwami bw’Imana ari intwaro igororotse?

¹⁴ Mu busuku urangura, urashobora gusigurira abantu yuko Ubwami bwa Yehova bwo mw’ijuru ari intwaro igororotse. Ukwo ni ko bimeze kubera yuko ubwo Bwami burangwa na kamere z’akaroruhore z’Imana, nk’ubutungane, ubugororotsi be n’urukundo. (Gus. 32:4; 1 Yoh. 4:8) Imana yarahaye ubwo Bwami Yezu Kristu, uwo akaba ari we akwije ibisabwa kuruta abandi bose kugira ngo ategeke isi. Yehova kandi yaratunganije ivy’uko abakirisu basizwe 144.000 bakurwa mw’isi maze bakazurirwa ubuzima bwo mw’ijuru, bakaba abaraganwa na Kristu bazofadikanya na we gutegeka isi.​—Ivyah. 14:1-5.

15. Nuhushanye ubutegetsi bw’Ubwami bw’Imana be n’ubutegetsi bw’abantu.

¹⁵ Ese ukuntu ubutegetsi bwa Yezu be na ba bantu 144.000 buzoba butandukanye cane n’ubutegetsi bw’abantu b’abanyagasembwa! Abategetsi b’iyi si akenshi bagiye baraba ba ruburakigongwe kandi barasutse mu ntambara abo batwara, ivyo bikaba vyatumye abantu amamiliyoni bahasiga ubuzima. Ntibitangaje kubona Ivyanditswe biduhanura kutizigira umuntu “ata co yoshobora gukiza.” (Zab. 146:3) Yamara, urazi ga ntuze ukuntu ubutegetsi bwa Kristu bwo buzoba burangwa n’agatima keza! Yezu yavuze ati: “Nimuze kuri jewe, mwese abacumukura n’abaremerewe, nanje ndabaruhurira. Mwishireko ingǒgo yanje munyigireko, kuko nitonda kandi niyoroheje mu mutima, namwe muzoronka ukuruhuka kw’imitima yanyu. Kuko ingǒgo yanje yoroshe n’umutwaro wanje uhwahutse.”​—Mat. 11:28-30.

Imisi ya nyuma igiye kurangira vuba!

16. Iyi misi ya nyuma izorangira gute?

¹⁶ Kuva mu mwaka wa 1914, iyi si iri mu misi ya nyuma, ni ukuvuga mu “nsozero y’ivy’isi.” (Mat. 24:3) Vuba cane, ico Yezu yise “amakuba akomeye” kigiye gushika. (Soma Matayo 24:21.) Ayo makuba ata co yogereranywa azoshikana isi ya Shetani yose uko ingana ku muhero. Ariko none, ayo makuba akomeye azotangura gute? Kandi azorangira gute?

17. Bibiliya ivuga ko ya makuba akomeye azotangurana n’iki?

¹⁷ Ya makuba akomeye azotangura bukwi na bukwi. Ni vyo, “umusi wa Yehova” uzoza giturumbuka “igihe bazoba bariko bavuga ngo: ‘Amahoro n’umutekano!’” (Soma 1 Abanyatesalonika 5:2, 3.) Igihe amahanga azoba yiyumvira yuko yimirije gutorera umuti zimwezimwe mu ngorane zikomeye ziyahanze, ayo makuba akomeye yavuzwe imbere y’igihe azoca atangurana n’ugusangangurwa gitumburuka kwa “Babiloni Akomeye,” ya nganji y’isi yose y’idini ry’ikinyoma. Ivyo bizoshika isi itari ivyiteze. Abami be n’abandi bantu bazotangara nibabona Babiloni Akomeye ashitswako urubanza.​—Ivyah. 17:1-6, 18; 18:9, 10, 15, 16, 19.

18. Yehova azoca akora iki Shetani niyatera abasavyi biwe?

¹⁸ Mu gihe kinaka kidasanzwe, hazoboneka “ibimenyetso mu zuba n’ukwezi n’inyenyeri,” kandi “ikimenyetso c’Umwana w’umuntu kizoboneka mw’ijuru.” Ico gihe tuzoca ‘turaramura imitwe, kuko ukurokoka kwacu kuzoba kuriko kuregereza.’ (Luka 21:25-28; Mat. 24:29, 30) Shetani, ari we Gogi, azogomora ingabo ziwe ngo zitere abasavyi b’Imana. Yamara, ku bijanye n’abatera abasavyi biwe b’intahemuka, Yehova avuga ati: “Ūbakorako aba akoze ku mbone y’ijisho [ryanje].” (Zek. 2:8) Ku bw’ivyo rero, utwigoro Shetani azogira kugira ngo abasangangure nta co tuzoshikako. Uti kubera iki? Kubera yuko Umukama Segaba Yehova azoca agira ico akoze adatebaganye kugira ngo arokore abasavyi biwe.​—Ezk. 38:9, 18.

19. Ni kubera iki dushobora kwizigira tudakeka yuko ingabo Imana ikoresha mu gushitsa imanza zizosangangura ivy’iy’isi ya Shetani?

¹⁹ Igihe Imana izogira ico ikoze kugira ngo irwanye amahanga, ayo mahanga ‘azomenya yuko ari Yehova.’ (Ezk. 36:23) Azorungika ingabo ziwe akoresha mu gushitsa imanza, izo ngabo zikaba zigizwe n’amasinzi y’ibiremwa vy’impwemu azoba ayobowe na Kristu Yezu, kugira ngo zisangangure ibisigarira vy’ibintu biranga iyi si ya Shetani. (Ivyah. 19:11-19) Iyo twibutse ko igihe kimwe vyasavye ijoro rimwe gusa kugira ngo umumarayika umwe rudende yice abansi b’Imana “ibihumbi ijana na mirongumunani na bitanu,” duca twizigira tudakeka yuko igihe ya makuba akomeye azoba ashitse ku gihe cayo c’agaheta kuri Harumagedoni, izo ngabo zo mw’ijuru zizosangangura bitagoranye ibisigarira vyose vy’ibintu biranga iyi si ya Shetani. (2 Abm. 19:35; Ivyah. 16:14, 16) Shetani n’amadayimoni yiwe bazotabwa mu nyenga bamareyo imyaka igihumbi. Amaherezo, bazosangangurwa.​—Ivyah. 20:1-3.

20. Ni ibiki Yehova azorangura biciye ku Bwami?

²⁰ Muri ubwo buryo, ijuru n’isi bizotyororwa bikurwemwo ubukozi bw’ikibi, maze abantu b’abagororotsi bace bibera kuri uwu mubumbe ibihe bidahera. Yehova azoba yagaragaje ko ari we Murokozi Ahambaye. (Zab. 145:20) Biciye ku Bwami, azokwemeza ubusegaba bwiwe, atume izina ryiwe ryeranda ryezwa, yongere arangure umugambi uhambaye afitiye isi. Ese woronkera umunezero mu busuku urangura uko wamamaza iyo nkuru nziza ukongera ugafasha abantu “bafise agatima kabereye kotuma baronka ubuzima budahera,” kugira ngo bamenye ko ukurokorwa n’Ubwami bw’Imana kwegereje!​—Ibik. 13:48.

Woba uvyibuka?

• Yezu yashimitse gute ku vy’uko Ubwami buhambaye cane?

• Ni kubera iki muri kino gihe ari ho turushiriza gukenera kurokorwa kuruta ikindi gihe ico ari co cose?

• Ni ibintu ibihe dushobora kwitega mu kiringo ca ya makuba akomeye?

• Yehova agaragaza gute ko ari Umurokozi Ahambaye?

[Amafoto ku rup. 12, 13]

Ijambo ry’Imana ryaravuze imbere y’igihe yuko muri kino gihe cacu hobayeho igikorwa ata co cogereranywa co kwamamaza kw’isi yose

[Ifoto ku rup. 15]

Nk’uko Yehova yarokoye Nowa n’umuryango wiwe, arashobora kuturokora na twebwe

[Ifoto ku rup. 16]

Yehova “[a]zohanagura amosozi yose . . . , kandi urupfu ntiruzokwongera kubaho.”​—Ivyah. 21:4