Urashobora kuba umunyabubasha naho woba uri n’ubugoyagoye

UBUGOYAGOYE burashobora gutuma uta umutwe. Burakwumirako nka kurya kw’imisundo. Woshobora kwiyumvira ko utazokwigera ubutsinda, canke kwiyumvamwo ko ataco ushoboye wigereranije n’abandi, ugaca ubona ko utari nk’abo. Ku rundi ruhande, woshobora kuba usinzikajwe n’indwara kanaka igatuma utagira inguvu n’umunezero mu buzima. Umubabaro waba utewe n’iki, woshobora gusa n’aho utagira isaganirizo. Ushobora kwumva umeze nka Yobu, uwabwiye Imana ati: “Icompa ukampisha i kuzimu, ukandindira ahihishije, gushitsa ah’uburake bgawe buzoshirira; ukanshingira igihe, kand’ukazonyibuka.”​—Yobu 14:13.

Woshobora gute none kuva muri mwene uwo mubabaro? Naho vyoshobora kuba bitoroshe, urakeneye kumara akanya utariko wiyumvira ingorane zawe. Nk’akarorero, woshobora kuzirikana ku bibazo Yehova yahumekeye umusavyi wiwe w’umwizigirwa Yobu, ati: “Mbega wewe wari hehe, igihe nashirah’amatanguriro y’isi? Bivuge, namb’ufise ubgenge. Ni nde yatamvye amatambge yayo, namb’ubizi? Canke ni nde yayigeresheje umugozi?” (Yobu 38:4, 5) Tuzirikanye ku nsobanuro y’ivyo bibazo, birashobora gutuma twemera icese ubukerebutsi be n’ububasha bihebuje Yehova afise. Yararetse ukuntu ivy’iy’isi vyifashe muri kino gihe birabandanya, abitumwe n’imvo nziza.

“Ihwa mu mubiri”

Hari uwundi musavyi wa Yehova w’umwizigirwa yamusavye ngo amukure “ihwa mu mubiri,” ikaba yari ingorane ibandanya yari afise. Intumwa Paulo yaratakambiye Imana incuro zitatu ngo imukureko ico kigeragezo. Uko iyo ngorane yari imeze kwose, nka kumwe kw’ihwa ribabaza, yari gushobora gutuma Paulo atakaza umunezero mu murimo wa Yehova. Paulo yasanishije iryo hwa n’ukuguma akubitwa. Yehova yamwishuye ati: “Ubuntu ata wari abukwiriye bwanje burahagije kuri wewe; kuko ububasha bwanje buriko butunganirizwa mu bugoyagoye.” Yehova ntiyamukuye iryo hwa yari afise mu mubiri. Paulo yabwirizwa kunyinyana na ryo, mugabo yongeyeko ati: “Iyo ngoyagoya [ni] ho mba umunyabubasha.” (2 Kor. 12:7-10) None yashaka kuvuga iki?

Ingorane Paulo yari afise ntiyamuvuyeko ku gitangaro. Yamara, ntiyamubujije kurangura ibintu bikomeye mu murimo wa Yehova. Paulo yariheka kuri Yehova kugira amufate mu mugongo kandi yaguma amusaba ngo amufashe. (Flp. 4:6, 7) Amaja mu mpera y’ubuzima bwiwe bwo ngaha kw’isi, Paulo yarashoboye kuvuga ati: “Nararwanye ya ndwano nziza, narirutse mw’isiganwa kugeza kw’iherezo, naragumije ukwizera.”​—2 Tim. 4:7.

Yehova arakoresha abantu badatunganye ngo bakore ivyo agomba naho bafise utunenge n’ingorane, kandi ni we bitera iteka. Arashobora kubaha ubuyobozi be n’ubukerebutsi kugira ngo bavyifatemwo neza mu ngorane, bongere bagumane umunezero mu murimo bamurangurira. Mu vy’ukuri, Yehova arashobora gukoresha abantu badatunganye bagakora ibikorwa bikomeye naho baba bafise ubugoyagoye.

Paulo yaravuze igituma Imana itamukuye ihwa yari afise mu mubiri, ati: “Kugira ngo sinirate birenze urugero.” (2 Kor. 12:7) “Ihwa” Paulo yari afise ryaramwibutsa ko hari ivyo adashoboye kandi ryatuma aguma yicishije bugufi. Ivyo birahuye n’ivyo Yezu yigishije ati: “Uwo wese yishira hejuru azocishwa bugufi, kandi uwo wese yicisha bugufi azoshirwa hejuru.” (Mat. 23:12) Ibigeragezo birashobora gutuma abasavyi b’Imana bicisha bugufi bikongera bikabafasha gutahura ko bakeneye kwiheka kuri Yehova kugira ngo bihangane badahemuka. Ku bw’ivyo, nka kumwe kw’iyo ntumwa, barashobora “[kwirata] muri Yehova.”​—1 Kor. 1:31.

Ubugoyagoye bwihishije

Hari abashobora kuba bafise ubugoyagoye ntibabice n’ikanda canke ngo babwemere. Nk’akarorero, umuntu yoshobora kuba yiyizigira birenze, akizigira ubuhanga afise. (1 Kor. 10:12) Ubundi bugoyagoye abantu badatunganye bakunda kuba bafise, ni icipfuzo co kuba rurangiranwa.

Yowabu, uwahavuye aba umukuru w’ingabo z’Umwami Dawidi, yari umuntu adatinya urukamvye, afata ingingo adatebaganye kandi azi gutorera umuti ingorane. Yamara, Yowabu yarigenjeje nabi cane ku buryo vyerekanye ko yari afise agatima kw’ubwibone n’uguhahamira ubukuru. Yaragandaguye bunyamaswa abakuru b’ingabo babiri. Ubwa mbere yarihoye mu kwica Abuneri. Mu nyuma, Yowabu yigirishije nk’aho ariko araramutsa muvyarawe Amasa, yaramufashe ubwanwa n’ukuboko kw’iburyo nk’aho agomba kumusoma maze aca amusogota inkota yari afise mu kuboko kw’ibubamfu. (2 Sam. 17:25; 20:8-10) Yowabu yari yasubirijwe na Amasa mu kibanza c’umukuru w’ingabo maze aca akoresha ako karyo kugira ngo akure ku musozi umukeba wiwe, kumbure yizigiye ko yociye asubizwa muri ico kibanza yari yahozemwo. Urabona ko Yowabu atacungereye agatima yari afise, ushizemwo n’icipfuzo ciwe kiranga ubwikunzi. Ivyo bibi vy’agahomerabunwa yabikoze ata kintu na kimwe cerekana ko adogombwa. Igihe Umwami Dawidi yari mu gupfa, yarabwiye umuhungu wiwe Salomo ngo aze yitwararike ivy’uko Yowabu yishura ikibi yakoze.​—1 Abm. 2:5, 6, 29-35.

Ntidukwiye kureka na gato ngo dutwarwe n’ivyipfuzo bibi, turashobora gucungera ubugoyagoye bwacu. Ubwa mbere dutegerezwa kumenya ko tubufise kandi tukavyemera, hanyuma tukagira ico dukoze kugira ngo tubutsinde. Turashobora gusenga Yehova ubudasiba tumusaba ngo adufashe kubunesha, kandi tukiga Ijambo ryiwe tubigiranye ubwira turondera uburyo bwo kuburwanya. (Heb. 4:12) Hari aho vyokenerwa ko tuguma tugerageza gutsinda ubugoyagoye bwacu atagucika intege. Urwo rugamba rwoshobora mbere kubandanya magingo tukiri abanyagasembwa. Ivyo Paulo yaravyemeje icese yirabiyeko, akaba yanditse ati: “Kuko ico nshaka atari co nkora; mugabo ico nanka ni co nkora.” Yamara, nk’uko ubizi, Paulo ntiyatwawe n’ubwo bugoyagoye nk’aho umenga nta kintu na gitoyi yari ashoboye gucungera mu vyo yakora. Ahubwo nyabuna, yagumye anyinyana n’ubugoyagoye bwiwe, yihetse ku mfashanyo Imana itanga biciye kuri Yezu Kristu. (Rom. 7:15-25) Ahandi naho, Paulo yavuze ati: “Ndakubitagura umubiri wanje nkawujana nk’umuja, kugira ngo, maze kwamamaza ku bandi, jewe ubwanje simpave ncika uwutemewe.”​—1 Kor. 9:27.

Abantu usanga bakunda kwisigura. Ivyo turashobora kubirwanya mu kurushiriza kubona ibintu nk’uko Yehova abibona, tukabigenza nk’uko Paulo yabihanuye abakirisu ati: “Muzinukwe ikibi, mwumire ku ciza.” (Rom. 12:9) Mu rugamba rwo gutsinda ubugoyagoye bwacu, tuzokenera kubona ibintu uko biri, kwumira kw’ibanga no kwicungera. Dawidi yasavye Yehova ati: “Sesa umushaha wanje n’umutima wanje.” (Zab. 26:2) Yari azi ko Imana ishobora gusuzuma ata kwihenda ubugoyagoye bwacu buri ibwina, maze ikadufasha igihe tuba tubikeneye. Twakiriye neza ubuyobozi Yehova aduha biciye kw’Ijambo ryiwe no ku mpwemu nyeranda yiwe, turashobora gutera imbere mu bijanye no gutsinda ubugoyagoye bwacu.

Bamwebamwe boshobora guteshwa umutwe n’ibibazo babona ko bibarengeye. Abakurambere bo mw’ishengero boshobora ata gukeka kubafasha no kubaremesha mu buryo buranga urukundo. (Yes. 32:1, 2) Ariko rero, ni vyiza ko tutorenza urugero mu vyo twitega. Hari ingorane zidashobora gutorerwa umuti ijana kw’ijana muri iyi si ya kino gihe. Ariko ntiwumve, abantu benshi baramenye ukuntu bavyifatamwo neza bari mu ngorane, kandi ivyo vyarabafashije kugira ubuzima bumara akanyota.

Ikimenyamenya c’uko Yehova adushigikiye

Ingorane tugira muri ibi bihe bitoroshe zaba izihe, turashobora kwizigira yuko Yehova azotuyobora akongera akadushigikira. Bibiliya iduhimiriza iti: “Mwicishe bugufi rero munsi y’ukuboko kw’ubushobozi kw’Imana, kugira ngo ibashire hejuru igihe kigeze; mu gihe muterera amaganya yanyu yose kuri yo, kuko ibababara.”​—1 Pet. 5:6, 7.

Igihe Kathy, uwari amaze imyaka itari mike asukurira kuri Beteli, yamenya yuko umunega wiwe yari arwaye ya ndwara yonona ubwonko bitiriye Alzheimer, ntiyabona ko azoshobora kwihanganira ingorane zari zimurindiriye. Ku musi ku musi yategerezwa gutakambira Yehova amusaba ubukerebutsi n’inkomezi zo mu mutima. Uko umunega wiwe yagenda arasinzikara, abavukanyi b’abanyarukundo ni ko bafata umwanya barondera kumenya ukuntu umuntu yovyifatamwo, abavukanyikazi bitwararika na bo barabashigikiye mu bijanye n’inyiyumvo. Abo bakirisu bari bagize umuce w’imfashanyo ikomeza Yehova yatanze, kandi Kathy yarashoboye kwitwararika uwo munega wiwe gushika apfuye haheze nk’imyaka 11 arwaye. Avuga ati: “Narakengurukiye Yehova n’umutima wanje wose nkorora amosozi kubera imfashanyo zose yampaye, izatumye nshobora kwumira kw’ibanga. Sinibaza ko noshoboye kumara ico gihe kirekire gutyo nkora n’uburuhe n’akantu ivyo nategerezwa gukora!”

Ingene twotsinda ubugoyagoye bwihishije

Igihe abantu biyumvamwo ko batabereye, boshobora kwiyumvira ko Yehova atumviriza amasengesho batura bamusaba ko abafasha muri ico gihe c’amagorwa. Birarushiriza kuba vyiza rero bazirikanye ku vyo Dawidi yavuze igihe yadogombwa bivuye ku gicumuro gikomeye yari yakoranye na Bati-sheba. Yavuze ati: “Umutima umenetse, ujanjaguwe, Mana, ntuzowukēngēra.” (Zab. 51:17) Dawidi yarigaye vy’ukuri, kandi yari azi ko ashobora kwegera Imana akongera akitega ko imugirira imbabazi. Yezu aragaragaza umutima Yehova afise uranga ubwitwararitsi. Umwanditsi w’injili Matayo, yarerekeje kuri Yezu amajambo ya Yesaya mu kuvuga ati: “Ntazojanjanga irenga rimenetse, kandi ntazozimya urutambi ruyenga.” (Mat. 12:20; Yes. 42:3) Igihe Yezu yari ngaha kw’isi, yaragaragariza impuhwe abantu baciye bugufi kandi bacurwa bufuni na buhoro. Mu yindi mvugo, ntiyadendura umuntu ameze nk’itara rigira rizime. Ahubwo riho, yaritwararikana ikibabarwe abantu baba bariko baracumukura kugira abafashe gusubirana. Ukwo ni ko yari ameze igihe yari ngaha kw’isi. None ntiwemera ko Yezu ari ukwo akimeze kandi yuko ashoboye kubabarana nawe mu bugoyagoye bwawe? Mu Baheburayo 4:15 herekana yuko ari Umwe ashobora “kubabarana natwe mu bugoyagoye bwacu.”

Igihe Paulo yandika ivyerekeye “ihwa mu mubiri” yari afise, yavuze ko ububasha bwa Kristu bwari kuri we “nk’ihema”. (2 Kor. 12:7-9) Yarumva ko Imana imukingiye biciye kuri Kristu, nka kurya umuntu ari mw’ihema yumva ko akingiwe. Nk’uko kwa Paulo, ntidukwiye kureka ngo ubugoyagoye be n’ingorane dufise biturengere. Kugira ngo tugume dukomeye mu vy’impwemu, turashobora kwikora ku ntunganyo zose Yehova adushiriraho biciye kw’ishengero ryiwe ryo ngaha kw’isi. Turashobora gukora ikintu ico ari co cose umuntu ashoboye, hanyuma tugaca duhanga amaso Yehova twizigiye bimwe bishitse ko azoyobora intambuko zacu. Tumaze kwibonera ukuntu ubushobozi bw’Imana budufasha mu bugoyagoye bwacu, tuzoshobora kuvuga nk’uko Paulo yavuze ati: “Iyo ngoyagoya [ni] ho mba umunyabubasha.”​—2 Kor. 12:10.

[Ifoto ku rup. 3]

Paulo yarasenga Yehova adahengeshanya amusaba ngo amuyobore mu kurangura ubusuku bwiwe

[Ifoto ku rup. 5]

Umwami Dawidi yarajeje Yowabu ingabo

[Ifoto ku rup. 5]

Yowabu yararondeye kwica umukeba wiwe Amasa

[Ifoto ku rup. 6]

Abakurambere baratanga ubuyobozi buranga urukundo bushingiye ku Vyanditswe bushobora kudufasha kuvyifatamwo neza turi mu ngorane