‘Ntimuzi umusi canke isaha’

1-3. (a) Ni ibintu ibihe vyodufasha gutahura icigwa kiri muri ya migani ibiri ya Yezu? (b) Ni ibibazo ibihe dukeneye kwishura?

DUFATE yuko umutegetsi akomeye agusavye kumutwara n’umuduga kw’isango rihambaye. Ariko rero hasigaye iminuta mikeyi ngo uje kumutora umujane muri iyo nama, uciye ubona yuko mu muduga wawe ata gitoro gikwiye kirimwo cogufasha kugira urwo rugendo. Urakeneye kwihutira kugura ikindi. Mu gihe uriko urakigura, wa mutegetsi arashika aho wari kumutora. Areraguje ariko ntakubona. Kubera ko adashobora kurindira, aciye asaba uwundi muntu ngo amutware. Haciye akanya gatoyi, uragarutse maze usanze wa mutegetsi yigiriye. Wokwumva umerewe gute?

² Ubu na ho, dufate yuko uri uwo mutegetsi ukaba wahisemwo abagabo batatu babishoboye kugira ngo bitwararike urucuruza kanaka ruhambaye. Urabasiguriye ibijanye n’ico gikorwa, maze bose uko ari batatu bakemera kugikora. Yamara ugarutse haciye akanya, usanze babiri gusa muri bo ari bo bakoze igikorwa cabo. Vyongeye, umwe atakoze igikorwa ciwe ariko arisigura. Mbere ntiyanagerageje. Wokwumva umerewe gute?

³ Muri wa mugani wa Yezu werekeye abigeme b’isugi no muri umwe werekeye italanto, yarakoresheje ibintu bisa n’ivyo mu kwerekana igituma mu gihe c’iherezo abakirisu barobanuwe bamwebamwe bobaye abizigirwa n’ab’ubwenge, mugabo abandi ntibabe gutyo.a (Mat. 25:1-30) Yarashize ahabona icigwa yashaka gutanga mu kuvuga ati: “Mugume muri maso rero, kuko mutazi umusi canke isaha,” ni ukuvuga igihe nyezina Yezu yoshikije urubanza Imana yaciriye isi ya Shetani. (Mat. 25:13) Turashobora gushira mu ngiro iyo mpanuro muri iki gihe. Twokwungukira gute ku kuguma turi maso nk’uko Yezu yabituremesheje? Ni bande berekanye ko biteguriye kurokoka? Kandi dutegerezwa gukora iki muri iki gihe kugira ngo tugume turi maso?

NIWUNGUKIRE KU KUGUMA URI MASO

4. Kugira ngo ‘tugume turi maso,’ ni kubera iki atari ngombwa ngo tumenye igihe nyezina iherezo rizoshikira?

⁴ Ibikorwa bimwebimwe nko gukora mw’ihinguriro, kwitaba isango wahawe n’umuganga, canke kwipakiza mu mabisi amwamwe, bisaba ko twubahiriza umwanya. Ariko rero mu bindi bikorwa, nko kuzimya umuriro wadutse canke gutabara abashikiwe n’icago, kwitwararika umwanya birashobora gusamaza umuntu canke mbere bigashobora kubamwo akaga. Mu bihe nk’ivyo, birarushiriza kuba ibihambaye umuntu yitwararitse igikorwa abwirizwa gukora aho kurondera gukurikiza umwanya. Kubera yuko iherezo ry’ivy’iyi si rirushiriza kwegereza, igikorwa co kwerekana intunganyo Yehova yashizeho kugira ngo arokore abantu kirahambaye ubu kuruta ikindi gihe cose. Kugira ngo twebwe abakirisu tugume turi maso, si ngombwa ngo tumenye igihe nyezina iherezo rizoshikira. Nkako, hariho n’imiburiburi uburyo butanu twungukira ku kuba tutazi umusi canke isaha nyezina iherezo rizoshikira.

5. Kuba tutazi umusi canke isaha vyodufasha gute guhishura ikiri mu mutima wacu?

⁵ Ubwa mbere, kuba tutazi igihe iherezo rizoshikira biradufasha guhishura ikiri mu mutima wacu vy’ukuri. Nkako, kuba tutazi ico gihe biradutera iteka, bigatuma dukoresha umwidegemvyo wacu wo kwihitiramwo mu kwerekana ko turi intahemuka kuri Yehova. Naho dushashaye kurokoka iherezo ry’ivy’iyi si, dukorera Yehova kubera ko tumukunda, atari kugira gusa twironkere ubuzima. (Soma Zaburi 37:4.) Turahimbarwa no gukora ivyo agomba, kandi turatahura yuko Imana itwigisha ibitwungura. (Yes. 48:17) Ntitubona yuko amategeko yayo ari umuzigo.​—1 Yoh. 5:3.

6. Igihe dukorera Imana tubitumwe n’urukundo, imererwa gute kandi kubera iki?

⁶ Ikindi kintu kigira kabiri twungukira ku kuba tutazi umusi canke isaha, ni uko bituma turonka akaryo ko kunezereza umutima wa Yehova. Igihe tumukorera tubitumwe n’urukundo, tutabitumwe n’uko tuzi igihe iherezo rizoshikira canke kubera gusa twipfuza kuronka impera, turafasha Yehova kwishura ka gacokoro katagira ishingiro wa mwansi wiwe Shetani amucokora. (Yobu 2:4, 5; Soma Imigani 27:11.) Turavye imibabaro n’intuntu vyose Shetani yateje, turashigikira tunezerewe ubusegaba bwa Yehova tukongera tukiyamiriza ubutegetsi bubi bwa Shetani.

7. Ni kubera iki wiyumvira yuko kubaho mu buryo buranga ukwitanga ari ikintu dukwiye kwipfuza?

⁷ Ubwa gatatu, gukorera Imana tutazi igihe iherezo rizoshikira biraturemesha kubaho mu buryo buranga ukwitanga. Muri iki gihe, abantu bamwebamwe batazi Imana na bo nyene baremera yuko iyi si nk’uko tuyizi isigaje igihe gito. Kubera yuko batinya ko hashobora gushika icago umwanya n’umwanya, usanga babaho bisunga ya mvugo ngo: “Twirire twinywere, kuko ejo tuzopfa.” (1 Kor. 15:32) Ariko twebwe ntidutinya. Turanka kwigungira ukwacu turondera guhaza ivyipfuzo vyacu vy’ubwikunzi. (Imig. 18:1) Ahubwo, turiyanka maze tugakoresha tubikunze umwanya wacu, inguvu zacu be n’ibindi bintu dutunze kugira ngo tubwire abandi inkuru nziza y’Ubwami bw’Imana. (Soma Matayo 16:24.) Turahimbarwa no gukorera Imana, na canecane mu gufasha abandi kuyimenya.

8. Ni akarorero ko muri Bibiliya akahe kerekana igituma dukwiye kurushiriza kwiheka kuri Yehova no kw’Ijambo ryiwe?

⁸ Ikintu kigira kane twungukira ku kuba tutazi umusi canke isaha, ni uko bidufasha kurushiriza kwiheka kuri Yehova no gushira mu ngiro Ijambo ryiwe mu buzima bwacu tubigiranye umwete. Twebwe abantu b’abanyabicumuro usanga dufise impengamiro yo kwiheka ku bushobozi bwacu. Paulo yakebuye abakirisu bose ati: “Uwiyumvira ko ahagaze yiyubare ntagwe.” Abantu ibihumbi 23 baratakaje agateka ko gutoneshwa na Yehova imbere gato y’uko Yosuwa ashikana abasavyi b’Imana mu Gihugu c’isezerano. Paulo avuga ati: “Ivyo bintu . . . vyanditswe ngo bitubere imburi twebwe abashitsweko n’amaherezo y’ibihe.”​—1 Kor. 10:8, 11, 12.

9. Ingorane zishobora gute kudutyorora no gutuma turushiriza kwiyegereza Imana?

⁹ Uburyo bugira gatanu twungukira ku kuba tutazi igihe iherezo rizozira, ni uko bituma ingorane zidushikira muri iki gihe zidutyorora. (Soma Zaburi 119:71.) Imisi ya nyuma y’ivy’iyi si mu vy’ukuri ni “ibihe bitoroshe kandi bigoye kwihanganira.” (2 Tim. 3:1-5) Abantu benshi bo mw’isi ya Shetani baratwanka, akaba ari co gituma twoshobora guhamwa duhorwa ukwizera kwacu. (Yoh. 15:19; 16:2) Nitwicisha bugufi tukarondera ubuyobozi buva ku Mana muri ivyo bigeragezo, ukwizera kwacu kuzotyororwa nk’aho kwoba gucishijwe mu muriro. Ntituzotana n’akabando. Ahubwo nyabuna, tuzorushiriza kwiyegereza Yehova kuruta uko twavyibaza.​—Yak. 1:2-4; 4:8.

10. Ni igiki gituma umwanya usa n’uwihuta?

¹⁰ Ukwihuta kw’umwanya kuvana n’ukuntu ibintu vyifashe. Igihe dufise vyinshi dukora kandi tukavyitunirako aho kuguma turaba isaha, umenga umwanya uraguruka. Muri ubwo buryo nyene, nimba twitwararika cane ca gikorwa giteye umunezero Yehova yadushinze, uwo musi n’iyo saha vyoshobora gushika tutabiciye n’ikanda. Benshi mu barobanuwe baratanze akarorero keza igitangaza muri ivyo. Nimuze twihweze muri make ivyabaye inyuma y’aho Yezu abereye Umwami mu 1914, maze turabe ukuntu bamwebamwe bari biteguye mu gihe abandi batari biteguye.

ABAROBANUWE BAREREKANA KO BITEGUYE

11. Inyuma y’umwaka wa 1914, kubera iki bamwebamwe mu barobanuwe biyumviriye ko Umukama atevye?

¹¹ Niwibuke wa mugani wa Yezu werekeye abigeme b’isugi n’umwe werekeye italanto. Iyo abo bigeme b’isugi canke abo bashumba bavugwa muri iyo migani baza kuba bazi igihe umukwe canke shebuja yoshikiye, ntibari kuba bakeneye kuguma bari maso. Mugabo kubera ko ata vyo bari bazi, bategerezwa kuguma biteguye. Naho abarobanuwe bari bamaze imyaka mirongo babona yuko umwaka wa 1914 ari uwudasanzwe, ntibatahura neza ivyobaye ico gihe. Igihe ibintu bitagenda nk’uko bari bavyiteze, vyari gushobora gusa n’uko Umukwe atevye. Umuvukanyi umwe mu nyuma yaravuze ivyo yibuka ati: “Bamwebamwe muri twebwe bariyumvira ata gufyina yuko twogiye mw’ijuru mu ndwi ya mbere y’ukwo kwezi kwa Gitugutu [mu 1914].”

12. Abarobanuwe berekanye gute ko ari abizigirwa n’ab’ubwenge?

¹² Iyumvire gato ukuntu kwitega iherezo mugabo ntirishike bishobora kuba vyarabaciye intege! Vyongeye, abo bavukanyi bararwanijwe biturutse ku Ntambara ya mbere y’isi yose. Hari hatanguye ikiringo co guhororokerwa kimeze nk’ugusinzira. Mugabo mu 1919, haratewe akamo ko kwikangura! Yezu yari yaje ku rusengero rw’Imana rwo mu buryo bw’impwemu, igihe c’isuzuma kikaba rero cari kigeze. Ariko rero, bamwebamwe ntibatsinze iryo suzuma bituma batakaza agateka bari bafise ko kubandanya bakora ‘urucuruza’ rw’Umwami. (Mat. 25:16) Ni nk’aho batari bafise umwete wo kuguma bashira mu matara yabo amavuta yo mu buryo bw’impwemu, nka ba bigeme b’isugi b’ibijuju. Vyongeye, cokimwe na wa mushumba w’ikinebwe, ntibari biteguriye kugira ivyo bahevye ku bw’Ubwami. Ariko rero, benshi mu barobanuwe barerekanye ukudahemuka kutanyiganyiga be n’icipfuzo gikomeye co gukorera Shebuja wabo muri iyo myaka igoye y’intambara.

13. Wa mugwi w’umushumba wari ufise agatima akahe inyuma y’umwaka wa 1914, kandi ubu ufise agatima akahe?

¹³ Inyuma y’umwaka wa 1914, Umunara w’Inderetsi waravuze iki kintu gihambaye uti: “Bavukanyi, abo muri twebwe bafise agatima kabereye imbere y’Imana ntibacika intege ku bijanye n’intunganyo izo ari zo zose yashizeho. Ntitwipfuza ko ivyo tugomba aba ari vyo bikorwa; ni co gituma igihe twabona ko twari twiteze ikintu kitari co muri Gitugutu 1914, twahimbawe n’uko Umukama atahinduye Umugambi wiwe kugira ngo ahuze n’ivyo tugomba. Ntitwipfuza ko yobigenza gutyo. Twipfuza gusa gutahura imigambi yiwe.” Ako gatima ko kwicisha bugufi no kwihebera Imana karacaranga abarobanuwe b’Umukama. Ntibavuga yuko bahumekerwa, mugabo biyemeje guhagarikira ‘urucuruza’ rw’Umukama kw’isi. Vyongeye, muri iki gihe “isinzi rinini” ry’“izindi ntama,” ni ukuvuga abakirisu bafise icizigiro co kuba kw’isi, ririko rirabigana mu bijanye no kuba maso hamwe no kugira umwete.​—Ivyah. 7:9; Yoh. 10:16.

TWAME TWITEGUYE

14. Kwumira ku muhora Imana yashizeho kugira uze uratanga ibifungurwa vyo mu buryo bw’impwemu biturinda gute?

¹⁴ Nk’uko nyene abakirisu barobanuwe babigenza, abagize isinzi rinini barikanuye barumira ku muhora Imana yashizeho kugira uze uratanga ibifungurwa vyo mu buryo bw’impwemu. Ico bivamwo, ni nk’aho na bo nyene bariko barashira mu matara yabo amavuta yo mu buryo bw’impwemu ava mw’Ijambo ry’Imana no ku mpwemu yayo. (Soma Zaburi 119:130; Yohani 16:13.) Kubera ko baba bakomejwe, na bo nyene baguma biteguriye ukugaruka kwa Kristu, bakabandanya kugira umwete mbere n’igihe bari mu bigeragezo bikomeye. Nk’akarorero, mw’ibohero rimwe ry’Abanazi, mu ntango abavukanyi bari bafise Bibiliya imwe gusa. Barasenze rero basaba ibindi bifungurwa vyo mu buryo bw’impwemu. Haciye igihe gitoyi baramenye yuko umuvukanyi yaheruka gupfungwa yari yarashoboye kwinjiza muri iryo bohero inomero zimwezimwe nshasha z’Umunara w’Inderetsi azinyegeje mu kuguru kwiwe kw’igiti. Mu barokotse harimwo umuvukanyi yarobanuwe yitwa Ernst Wauer, uno akaba yahavuye avuga ivyo yibuka ati: “Yehova yaradufashije mu buryo butangaje gufata ku mutwe ivyiyumviro bikomeza vyari muri ivyo biganiro.” Yaciye avuga ati: “Muri iki gihe, biroroshe cane kuronka ibifungurwa vyo mu buryo bw’impwemu, mugabo twoba twama tubikenguruka? Ndizigiye ko Yehova afise imihezagiro myinshi abikiye abamwizigira, bakaguma ari intahemuka kandi bagafungurira ku meza yiwe.”

15, 16. Abubakanye bamwe bahezagiwe gute kubera umwete bagize mu busuku bwa gikirisu, kandi wokwigira iki kuri ivyo bintu?

¹⁵ Abo mu zindi ntama na bo nyene baguma bafise vyinshi bakora mu gikorwa ca Shebuja, mu gushigikira baherejeko bene wabo na Kristu. (Mat. 25:40) Mu buryo butandukanye na wa mushumba mubi kandi w’ikinebwe avugwa muri wa mugani wa Yezu, baremera kugira ivyo bahevye no kwita ku rutare kugira ngo bashire ivyungura Ubwami mu kibanza ca mbere. Nk’akarorero, igihe Jon n’umukenyezi wiwe Masako batumirwa gufasha mu cibare gikoresha ururimi rw’igishinwa muri Kenya, babanje kugonanwa. Mugabo aho bamariye kurimbura babijanisha n’isengesho ukuntu ivyabo vyifashe, barafashe ingingo yo kwimukirayo.

¹⁶ Akigoro bagize katumye bahezagirwa cane. Bavuze bati: “Ubusuku turangurira ino buratangaje cane.” Baratanguje inyigisho za Bibiliya indwi. Inyuma y’ivyo, bariboneye n’ibindi bintu biteye umunezero vyinshi. Basozereye bati: “Turashimira Yehova buri musi kuba yararetse tukaza ng’aha.” Ariko ntiwumve, hariho n’abandi bene wacu na bashiki bacu benshi berekanye biciye ku ngingo bafashe yuko biyemeje kwama bafise vyinshi bakora mu murimo w’Imana, aho umuhero wozira hose. Zirikana abantu ibihumbi basohotse rya Shure rya Gileyadi maze bagatangura gukora umurimo w’ubumisiyonari. Ubona gute urondeye kumenya n’ibindi ku bijanye n’uwo murimo udasanzwe mu gusoma ikiganiro kivuga giti: “Turakora ivyo dushoboye vyose!” casohotse mu Munara w’Inderetsi (mu gifaransa) wo ku wa 15 Gitugutu 2001? Uko wihweza iyo nkuru iteye akamwemwe ijanye no kumara umusi mu gikorwa c’ubumisiyonari, nuzirikane ukuntu worushiriza gukora vyinshi mu murimo wawe kugira ngo ushemeze Imana, ivyo bitume ugira umunezero.

NA WEWE NUGUME URI MASO

17. Kuba tutazi umusi canke isaha vyatubereye gute umuhezagiro?

¹⁷ Biragaragara ko kuba tutazi umusi canke isaha nyezina ivy’iyi si bizoviraho ari umuhezagiro kuri twebwe. Aho guhagarika umutima canke gucika intege, turarushiriza kwiyegereza Yehova, we Data wa twese munyarukundo, uko twitunira ku gukora ivyo agomba. Kuba twaragumije mu buryo bw’ikigereranyo ukuboko kwacu kw’isuka irimishwa n’ibitungwa maze tukirinda ibisamaza, vyatumye twironkera umunezero mwinshi mu busuku turangurira Databuja.​—Luka 9:62.

18. Ni kubera iki tutipfuza guheba ukwizera kwacu?

¹⁸ Umusi w’urubanza w’Imana uriko uregereza wihuta. Nta n’umwe muri twebwe yipfuza guhemukira Yehova canke Yezu. Batujeje igikorwa gihambaye muri iyi misi ya nyuma. Turakenguruka cane kuba baratwizigiye!​—Soma 1 Timoteyo 1:12.

19. Dushobora gute kwama twiteguye?

¹⁹ Twaba dufise icizigiro co kuba mw’ijuru canke mw’Iparadizo ng’aha kw’isi, nimuze twiyemeze kuguma dukora igikorwa Imana yadushinze co kwamamaza no guhindura abantu abigishwa. Ntituramenya umusi canke isaha nyezina umusi wa Yehova uzozira, kandi ntidukeneye vy’ukuri kubimenya. Turashobora kwama twiteguye kandi tuzobandanya tubigira. (Mat. 24:36, 44) Turizigiye yuko igihe cose tuzokwizigira Yehova duherejeko tukongera tugashira Ubwami bwiwe mu kibanza ca mbere, tutazoteterwa.​—Rom. 10:11.